Mary nomurumendu we John, a va tura mehi ovandu ovengi mba za koPhilippine mu ve ya okuyekupaha omaturiro noviungura. Owo ve kara nondjoroka okuzuvarisa ku wo. Moruveze rwokorona, Mary wa uta okurihonga Ombeibela ku novandu mba tura mehi re, na wina ku na imba mba tura momahi warwe. Omomuano uṋe ma tjita nao?

Mary aa pura ovahongwa ve vOmbeibela kutja, “Hapo mo tjiwa omundu ngu ma vanga okurihonga Ombeibela?” Indu tji va tja ii, eye ee ve ningire kutja ve mu tjiukise ku wo. Okupura epuriro ndi, potuingi ku eta ouwa. Omena raye? Mena rokutja ovandu mbe tjaterwa i yoviṋa mbi mave rihongo okuza mOmbeibela, potuingi ve vanga okuraera ovazamumwe nomapanga wawo ohunga noviṋa mbi mave rihongo. Hapo ovahongwa va Mary aave raisa ongaro iṋe indu Mary tja pura epuriro ndo?

Omuhongwa wa Mary wena Jasmin, we mu tjiukisa kovandu vane mbaave vanga okurihonga Ombeibela. Umwe wawo Kristine, aa tjaterwa i yomerihongero wOmbeibela tjinene nga tja ningira Mary okurihonga pu na ye tuvari motjivike. Indu Mary tja pura Kristine kutja ma tjiwa omundu ngu ma vanga okurihonga Ombeibela, eye wa tja, “Ii, me ku tjiukisa komapanga wandje.” Kombunda yovivike oviṱiṱi, Kristine wa tjiukisa Mary komapanga we yane ngaaye vanga okurihonga Ombeibela. Kombunda, Kristine wa tjiukisa Mary komapanga we warwe, nu omapanga ngo tjiva wina ya yandja omana wovandu varwe mbaari nonḓero okurihonga Ombeibela.

Kristine wina aa vanga kutja eṱunḓu re moPhilippine ri rihonge Ombeibela. Ku nao, eye wa hungira ku nomuatje we omukazona Andrea. Rutenga, Andrea aa munu kutja, ‘Ovahongonone va Jehova ve pukisa ovandu, kave kambura mu Jesus, nu ve ungurisa Etestamente Ekuru uriri.’ Posi ya kombunda yokurihonga otjikando tjimwe, eye wa muna kutja oviṋa mbyee ripura ohunga nOvahongonone va Jehova vya ri posyo. Otjikando atjihe tje rihongo otjiṋa otjipe okuza mOmbeibela eye aa tja: “Tjinangara Ombeibela mai tja nao, okutja ouatjiri.”

Kombunda, Andrea wa tjiukisa omapanga we yevari ku Mary nomukwao ngu ve ungura pamwe, nu va uta okurihonga Ombeibela. Tanda wa Andrea Angela, ngwa ri omupoṱu, aruhe aa puratene indu Mary tjee rihongo ku na Andrea, posi ya Mary kaa tjiwa. Eyuva rimwe, Angela wa ningira Andrea okuningira Mary kutja me rihonge ku na ye Ombeibela wina. Angela wa suverere oviṋa mbyee rihongo. Momueze umwe, eye we rihonga omatjangwa omengi motjiuru nu aa vanga okurihonga ovikando vine motjivike. Nombatero ya Andrea, Angela aa kara pozombongarero zombongo okupitira morungovi.

 Indu Mary tjee rihongo ku na Kristine, omurumendu wa Kristine, Joshua, aa ryangere mbo pu mave rihongere. Ku nao, Mary we mu ningira kutja ma rire orupa rwomerihongero wawo. Joshua wa tja: “Ami me vanga okupuratena uriri, posi ya o ndji pura omapuriro. Indu tji we ndji pura omapuriro, ami mei.” Mozominute ndano zomerihongero wetu, eye wa pura omapuriro omengi okukapita Kristine, nu aa vanga okurihonga Ombeibela wina.

Epuriro Mary nda pura, ra tjita kutja ma kare novahongwa ovengi vOmbeibela. Eye wa tjita kutja ovengi vawo ve rihonge ku nOvahongonone va Jehova varwe. Mena rokutja Mary wa pura epuriro ndo, ovandu 28 momahi yane pekepeke va uta okurihonga Ombeibela.

Jasmin, omuhongwa omutenga ngwa tamunwa mehungi ndi, wa papitisiwa mu April 2021. Kristine wa papitisiwa mu Mei 2022, nu wa yaruka koPhilippine okukakara pu neṱunḓu re. Ovahongwa varwe vevari mba tjiukisiwa i Kristine ku Mary, wina va papitisiwa. Kombunda yomieze omiṱiṱi Kristine tja za nokupapitisiwa, Angela wina wa papitisiwa nu nai u karera otjomukandjira woruveze aruhe. Omurumendu wa Kristine, Joshua, nomuatje wawo omukazona Andrea, novahongwa varwe ve kayenda komurungu okukonḓonona Ombeibela nokutumbuka popezu na Jehova.

Oruveze indu Jesus novaapostele tji va ri nomuinyo, ovandu ovengi aave raere omaṱunḓu nomapanga wawo imbi mbi ve rihongo ohunga na Jesus. (Oviung. 10:​24, 27, 48; 16:​25-33) Pura ovahongwa voye vOmbeibela na varwe mbe nonḓero kutja, “Hapo mo tjiwa omundu ngu ma vanga okurihonga Ombeibela?” Indu tji wa pura epuriro ndo, ove wina mape ya o munu ovandu ovengi mbu mave vanga okurihonga Ombeibela.