HAPO ove wa rora okukara nouzeu nu kapa ri omundu ngwaa yenena okukuvatera? Eṱe tu hupa ‘motuveze otuzeu’ tu tu tjita kutja tu we momuinyo nu tu rimune ourike. (2 Tim. 3:1) Posi yokutja, indu tji tu nomauzeu, pe novandu mbu mave yenene okutuvatera. Ombeibela i tja omapanga watjiri maye yenene okutuvatera, tjinene indu tji tu ri “moruveze rwouzeu.”—Omiano 17:​17, NWT.

Omuapostele Paulus aa ryanga pu nomapanga we tjiva momauyenda we otjomuhindwa, nu owo ve mu vatera momiano omingi. (Kol. 4:​7-11) Indu Paulus tja ri omukamburwa moRoma, omapanga we ye mu tjitira oviṋa eye mbye hi na aa yenene okutjita omuini. Otjotjihorera, Epafroditus wa etera Paulus oviṋa ovakambure ovakwao moFilipi mbi ve mu hindira. (Fil. 4:18) Tikikus wa twara otutuu twa Paulus kozombongo pekepeke. (Kol. 4:7) Paulus wa yenena okutunduuza ozombongo nandarire indu tja ri omukamburwa woponganda poo indu tja ri monḓorongo, mena rokutja omapanga we ye mu vatera. Ove mo yenene vi okurira epanga ratjiri ndino?

Pe novakambure ndino mbe raisa ounanḓengu wokurira epanga ratjiri. Elisabet, omukandjira woruveze aruhe moSpain, wa hungirira komuano omukazendu omukambure me mu vatera moruveze oruzeu. Indu ina tja munikwa omutjise wokangera, omukazendu omukambure wa hindira Elisabet ozombuze ozengi nḓe nomazeva wOmbeibela nge mu tunduuza. Elisabet wa tja: “Ami tji mba muna ozombuze nḓo, ee tjaterwa okutjiwa kutja pe nomundu ngwee ripurire kwami nu mba hara omasa okutjita oviṋa mbyee hepa okutjita.”—Omiano 18:24.

Eṱe matu yenene okukurisa oupanga wetu ku novakambure ovakwetu indu tji matu ve twaerere motjiungura tjokuzuvarisa poo kozombongarero zombongo. Otjotjihorera, ove mape ya o twaerere omurumendu poo omukazendu omukambure omunene motjiwondo kombongarero yombongo poo motjiungura tjokuzuvarisa. Indu tji we ve vatere momiano mbyo, eṋe mamu yenene okutunduuzasana. (Rom. 1:12) Posi yokutja, Ovakriste tjiva kave yenene okupita mondjuwo. Eṱe matu yenene okuvevatera vi?

Ovakambure tjiva kave yenene okukara pozombongarero zombongo pEtuwo rOmerikotameneno, ngahino mena romutjise omuzeu. Tara kotjihorera tja David, ngwa munikwa omutjise wokangera. Oure womieze hamboumwe, aa munu omapangero wokangera. Indu tjaa munu omapangero, David nomukazendu we Lidia aave kara pozombongarero zombongo okupitira morungovi.

Ombatero iṋe ndji va muna okuza komapanga wawo mombongo? Kombunda yombongarero aihe, tjiva pEtuwo rOmerikotameneno aave tjiti ozongondjero okuhungira ku na David na Lidia okupitira morungovi. Nu wina tji va yandja omaziriro pombongarero yombongo, ovakambure ovakwao aave ve hindire  ozombuze kombunda yombongarero okuveraera kutja va tjaterwa i yomaziriro wawo. Otjiṋa ho tja ṱuna vi ku David na Lidia? David na Lidia aave munu kutja ovakambure ovakwao ve ve suvera.

Eṱe matu yenene okutwa po oruveze okuzuvarisa ku nomukambure omukwetu ngu ha yenene okupita mondjuwo. Eṱe matu yenene okutjita omarundurukiro omaṱiṱi kokutja tu ungure ku na wo. Momuano mbwi matu ve raisire kutja katu ye ve zemba. (Omiano 3:27) Ove mo yenene okuzuvarisa ku na wo mokutjanga otutuu poo okutona ozongoze. Imba mbe ha yenene okupita mondjuwo, mave yenene okukara pombongarero yokuzuvarisa okupitira morungovi. Ovanene vombongo mave yenene okutjita kutja ozombongarero zokuzuvarisa ze kare morungovi wina, kutja imba mbe ha yenene okupita mondjuwo ve kare po. David na Lidia va ri nondangi kutja ombongo yawo aai tjiti nao. David wa tja: “Okukara pombongarero yokuzuvarisa kwe tu tunduuza tjinene.” Povikando tjiva, ove mape ya o pura omurumendu poo omukazendu omukambure ngu ha yenene okupita mondjuwo kutja u ete omuhongwa wOmbeibela poye kutja mu konḓonone Ombeibela pamwe.

Indu tji matu kara pu novakambure ovakwetu mbe ha yenene okupita mondjuwo, eṱe matu yenene okuvetjiwa nokutjiwa ovikaṋena vyawo oviwa, nu matu kara noupanga wopopezu ku na wo. Otjotjihorera, indu tji u ri motjiungura tjokuzuvarisa ku na wo nu tji mo munu omuano omuwa mbu mave ungurisa Embo ra Mukuru okuvatera omundu okutumbuka popezu na Jehova, oupanga woye ku na wo mau kurire ko. Ove mo yenene okukara nomapanga omape indu tji mo vatere ovakambure ovakweṋu okuyenda motjiungura tjokuzuvarisa na kozombongarero zombongo.—2 Kor. 6:13.

Paulus wa muna omahuhumiṋino okuza kepanga re Titus. (2 Kor. 7:​5-7) Onawa okuhungira omambo omatunduuze kovakambure ovakwetu. Posi yokutja, otjihorera tja Titus matji tu raisire kutja eṱe wina matu ve tunduuza indu tji matu twa po oruveze okukara pu na wo nokuvevatera.—1 Joh. 3:18.

Ovakambure ovakwetu moRussia va raisa otjihorera otjiwa tjokuvaterasana. Tara kotjihorera tja Sergey nomukazendu we Tatyana. Ovapolise va hita mondjuwo yawo okupaha oviṋa mbi mavi ve twa moumba, okuzambo va twarewa komberoo yovapolise okukapurwa omapuriro. Tatyana wa isiwa omutenga na yaruka konganda. Sergey wa tja: “Indu Tatyana tja yaruka konganda, omukazendu umwe omukambure ombanḓe we ya okuyekumuryangera. Kombunda yanao, ovakambure ovakwetu varwe ve ya nu ve tu vatera okukohorora ondjuwo yetu.”

Sergey wina wa tja: “Ami mba suvera Omiano 17:17 (NWT) ndi mari tja: ‘Epanga ratjiri ri raisa orusuvero oruveze aruhe, nu erumbi ndi kara po moruveze rwouzeu.’ Moruveze rwondatumisire ndwo, ami ee hepa ombatero yomapanga wandje tjinene. Ami mba muna kutja omambo nge ri mOmiano 17:17 ouatjiri. Jehova we ndji pa omapanga nga raisa ouvanḓe nu nge ndji vatera.” a

Otja tji matu munu omauzeu, matu hepa omapanga okutuvatera. Nu wina matu kevehepa tjinene moruveze rwondatumisire ondirise. Ku nao, ngatu tjite ozongondjero okutunduuza nokuvatera omapanga wetu nai.—1 Petr. 4:​7, 8.