OVANDU ovengi ndino ve muna kutja ve sokutjindwa momuano wapeke, nu ve sokupewa oviṋa mbi mave vanga. Nu nandarire kutja va tjindwa momuano wapeke, owo ngunda ve ripura kutja mave sokupewa ovingi. Ovandu mbe ripura momuano mbwi, ve ripurira ku wo oveni nu kave nondangi koviṋa mbi ve na vyo. Ombeibela i tja ovandu mave raisa ozongaro tjimuna nḓo momayuva omasenina.—2 Tim. 3:2.

Otjiperi kutja, ongaro yokuripurira kweṱe oveni otjiṋa tji tja uta rukuru. Otjotjihorera, Adam na Eva va tya okuritoororera oveni pokati kouwa nouvi, nu atuhe ndino tu muna omauzeu mena romukambo mbu va toora mbwo. Otjihorera tjarwe otjOmbara ya Juda, Usija. Eye ee ripura kutja u sokuyandjerwa okutwimisa ovyomoro omuwa mOndjuwo ondjapuke ya Muhona. Posi ya eye kaari nousemba wokutjita nao. (2 Ekuruh. 26:​18, 19) Momuano tjingewo, Ovafarisei nOvasaduke aave munu kutja Mukuru u sokuvetjinda momuano wapeke mena rokutja owo ozondekurona za Abraham.—Mat. 3:9.

Ovandu ovengi ongondoroka na eṱe ve ripurira ku wo oveni nokurihiva poo okuritongamisa. Nu ongaro yawo ndjo mape ya ai ṱunu kweṱe. (Gal. 5:26) Eṱe mape ya atu utu okuripura kutja tu sokupewa ouyara kaaṋi, poo okutjindwa momuano wapeke. Ovikeṋa mbi mavi tu vatere kutja atu he ripura tjimuna wo? Eṱe matu hepa okuzuva nawa ouripura wa Jehova ohunga notjiṋa hi. Ngatu tare komirari vivari vyOmbeibela mbi mavi tu vatere.

Jehova ongu tya kutja ovikwaye mbi matu sokumuna. Tara kovihorera tjiva.

•   Meṱunḓu, Jehova u vanga omurumendu okumuna kutja wa tengwa i yomukazendu we, nu u vanga omukazendu okumuna kutja wa suverwa i yomurumendu we. (Ef. 5:33) Jehova u tja ovakupasane ve sokuraisasana orusuvero, nu kave sokuraisa orusuvero komundu warwe ngu ve hi ya kupasana. (1 Kor. 7:3) Ovanene ve nousemba wokuundjira ko onḓuviro kovanatje vawo. Nu ovanatje ve sokusuverwa nokutumbwa i yovanene vawo.—2 Kor. 12:14; Ef. 6:2.

• Jehova u tja ovanene vombongo mave sokumuna ondengero koviungura ovizeu mbi ve ungura. (1 Tes. 5:12) Posi yokutja, ovanene vombongo kave nousemba okuhonaparera po ovakambure ovakwao.—1 Petr. 5:​2, 3.

• Mukuru wa yandja ousemba kozohoromende zovandu okusutisa otjitjamurongo, nokupewa ondengero okuza kovandu mbe ri kehi yawo.—Rom. 13:​1, 6, 7.

Jehova u tu pa ovingi okukapita imbi mbi matu sokumuna mena rorusuvero rwe. Mena rokutja twa rumata ouvi okuza ku Adam, eṱe twa pwira okuṱa. (Rom. 6:23) Posi yokutja, Jehova u tu pa ozondaya ozengi mena rorusuvero rwe oruṱakame kweṱe. (Eps. 103:​10, 11) Ozondaya azehe nḓu tu muna omena rotjari tje norusuvero ndwe na ro kweṱe, nungwari kamena rokutja twa pwa okuzemuna.—Rom. 12:​6-8; Ef. 2:8.

Ṱakamisa kutja o ha utu okuripura tjimuna ovandu mouye. Eṱe mape ya atu utu okuripura kutja matu sokumuna ovingi okukapita varwe. Jesus wa raisa kutja oupupu okukara nouripura otja imbwo, indu tja ungurisa omasasanekero wovaungure mba sutwa otjimariva otjisilveri tjimwe. Ovaungure tjiva va uta rukuru muhukomunene nu va ungura eyuva arihe momutenya, varwe va ungura oiri imwe uriri. Posi yokutja, ovaungure imba mba uta rukuru muhukomunene va muna kutja owo mave sokusutwa ovimariva ovingi okukapita varwe, mena rokutja va ungura eyuva arihe momutenya. (Mat. 20:​1-16) Momasasanekero nga, Jesus wa raisa kutja ovemukongorere mave sokukowa mu imbi Mukuru mbye ve pa.

Raisa ondangi nu o undjire ko ovingi ku varwe. (1 Tes. 5:18) Horera komuapostele Paulus,  ngu hi na wa ningira oviṋa mbyaa hepa kovakambure ovakwao moKorinte, nandarire kutja wa ri nousemba wokutjita nao. (1 Kor. 9:​11-14) Eṱe matu sokuraisa ondangi koviṋa ovandu mbi mave tu pe, nu katu sokuundjira ko ovingi okuza ku wo.

Rira omurisusuparise. Indu omundu tje ripurira ku ye omuini tjinene, eye u uta okumuna kutja ma sokupewa ovingi pu imbi mbye na vyo. Indu tji tu ri overisusuparise, ku tu vatera kutja atu ha kara noumune ouvi otja imbwo.

Omuprofete Daniel we tu raisira otjihorera otjiwa tjomerisusuparisiro. Eye wa za monganda youhona, wa ri omuwa, omunazondunge, nu wa ri nondjiviro onyingi. Ku nao, eye atja muna kutja ma sokupewa ondjingonekero yapeke nokutjindwa momuano omuwa. (Dan. 1:​3, 4, 19, 20) Posi yokutja, Daniel wa ri omurisusuparise, nu otjikaṋena ho tja tjita kutja Jehova me mu suvere.—Dan. 2:30; 10:​11, 12.

Ngatu pirukire ongaro yokuripurira kweṱe oveni nokuritongamisa ndji tu muna mouye ndino. Nu tu kayende komurungu okuyorokera ondaya aihe Jehova ndji me tu pe okupitira motjari tje.