1-2. Omomuano uṋe ongaro ovandu mu ve ri mu i ri tjimuna yomurumendu omutanda ngwa tamunwa moparagrafa 1?

 OTJOTJIHORERA, ripura nomurumendu omutanda ngwa ri novanene ovatumbe. Eyuva rimwe ovanene ve va ṱa. Eye wa ri noruhoze tjinene. Posi ya wa zuva ombuze yarwe ombi yokutja ovanene ve va ungurisa ovimariva avihe mbi va ri na vyo nu ve mwesa nozondjo ozengi. Ku nao, eye ka rumatere ovimariva, posi yokutja aa sokusuta ozondjo azehe ovanene ve nḓu va ri na zo. Nu ovandu aave vanga kutja ma sute tjimanga. Eye kaa yenene okusuta ozondjo azehe nḓo.

² Ongaro yetu i ri tjimuna yomurumendu omutanda ngo momiano tjiva. Ovanene vetu ovatenga ooAdam na Eva kava ri nouvi, nu va turire moparadisa ombwa. (Gen. 1:27; 2:​7-9) Owo aave yenene okuyorokera ehupo nga aruhe. Posi yokutja oviṋa avihe vya runduruka indu Adam na Eva tji va tjita ouvi. Ku nao, Jehova we ve ramba motjikunino tja Eden nu kaave yenene okuhupa nga aruhe. Ovanatje vawo va rumata tjike ku wo? Ombeibela i tja: “Ouvi wa zira momundu umwe [Adam] nau ya mouye, nonḓiro ai zu mouvi. Komuhingo mbwi onḓiro otji ya tuurunga movandu avehe, owo avehe tjinga ava tjita ouvi.” (Rom. 5:12) Otjirumatwa Adam tja yandja kweṱe, ouvi mbu eta onḓiro. Ouvi mbu twa rumata u ri tjimuna ozondjo ozengi, eṱe nḓu tu hi nokuyenena okusuta.—Eps. 49:8.

 3. Omena raye omauvi wetu tji maye yenene okusasanekwa ‘kozondjo’?

 ³ Jesus wa sasaneka ouvi ‘kozondjo.’ (Mat. 6:12; Luk. 11:4) Indu tji twa tjiti ouvi, i ri tjimuna tu nozondjo nḓu tu sokusuta ku Jehova. Jehova atja vanga kutja tu sute ozondjo zouvi. Nu tji tu ha sutire ozondjo nḓo, atjatu sokusuta ouvi wetu nonḓiro.—Rom. 6:​7, 23.

 4. (a) Andakuzu kapa ri ombatero, ovikwaye mbya tja vi tjitwa kovandu avehe ovanauvi? (Epsalme 49:​7-9) (b) Embo ndi “ ouvi” ri heya tjike mOmbeibela? (Tara kokawongo nga “Ouvi.”)

⁴ Eṱe kamaatu yenene okukotora oviṋa avihe Adam na Eva mbi va pandjara kourike wetu. (Lesa Epsalme 49:​7-9.) Nokuhinombatero ya Jehova, eṱe katjatu kara nomaundjiro wokukahupa rukwao moruyaveze poo omaundjiro wokukapendurwa. Eṱe atjatu ṱa nokuhinokuhupa rukwao, tjimuna ovinamuinyo tji vi koka.—Omuzuv. 3:19.

 5. Tate wetu worusuvero we tu vatera vi okusuta ondjo yetu youvi? (Tara kotjiperendero.)

⁵ Ripura nomurumendu omutanda ngwa tamunwa pomautiro worupa ndwi, eye atja fula vi indu omurumendu omutumbe tja tja me mu sutire ozondjo ze azehe? Otjingaperi kutja omurumendu omutanda ngo ma kara nondangi tjinene na yakura otjiyandjewa tjouharupu ho. Momuano tjingewo, Tate wetu worusuvero Jehova, we tu pa otjiyandjewa tji tja suta ouvi mbu twa rumata ku Adam. Jesus wa kahurura otjiṋa hi momuano mbwi: “Ndjambi wa suverere ouye tjinene nai nga tja yandja Omuna we omukwatwaerike, kokutja auhe ngu ma kambura mu Ye a ha pandjara, nungwari a kare nomuinyo waaruhe.” (Joh. 3:16) Otjiyandjewa hi wina tji tjita kutja tu kare noupanga ouwa ku na Jehova.

 6. Matu katara ku ye morupa ndwi, nu omena raye?

⁶ Hapo eṱe matu yenene vi okumuna ouwa kotjiyandjewa tji tji tjita kutja ouvi wetu u isirwe? Okuzira epuriro ndo, matu kahungirira komambo pekepeke Ombeibela ngu ya ungurisa nomaheero wayo. Otja tji matu ripurire ko oukoto ku imbi Jehova mbye tu tjitira okutuisira, eṱe matu kara nondangi tjinene.

JEHOVA U VANGA KUTJA TU RIRE OMAPANGA WE

 7. (a) Ovikwaye vyarwe Adam na Eva mbi va pandjara? (b) Otjozondekurona za Adam na Eva, ovikwaye tjinene mbi tu hepa? (Ovaroma 5:​10, 11)

⁷ Indu Adam na Eva tji va tjita ouvi, owo kaave yenene okuhupa nga aruhe rukwao. Posi yokutja, owo wina va rira ovanavita na Tate wawo Jehova. Ngunda ave hi ya tjita ouvi, Adam na Eva va ri orupa rweṱunḓu ra Mukuru. (Luk. 3:38) Posi yokutja owo  kave karere nonḓuviro ku Jehova, nu eye ke ve yandjerere okurira orupa rweṱunḓu re rukwao. Otjiṋa hi tja tjitwa ngunda ave hi ya uta okukara novanatje. (Gen. 3:​23, 24; 4:1) Nu ovanatje vawo, mbu mave kamburire mo eṱe, kaave yenene okurira orupa rweṱunḓu re. Ku nao aatu hepa ombatero kutja tu kare noupanga ouwa ku na Jehova. (Lesa Ovaroma 5:​10, 11.) Eṱe aatu hepa okuisa okurira ovanavita na Mukuru nokurira omapanga we. Jehova ongwa toora omukambo omutenga okuyenenisa otjiṋa hi. Omomuano uṋe?

MUKURU WA TJITA KUTJA TU RIRE OMAPANGA WE

 8. Jehova wa yandja tjike?

⁸ Jehova wa tjita kutja ovandu ovanauvi ve kare noupanga ouwa ku na ye. Eye wa tjita kutja ma yenene okukotora oviṋa Adam mbya pandjara, mokuyandja otjiṋa tjonḓengu imwe. Omatjangwa wOtjigrike wina ye hungirira komuano Jehova ma tjita kutja omundu auhe ma yenene okurira epanga re.—Rom. 3:25.

 9. Ovikwaye Jehova mbya tjita kutja omauvi wOvaisrael ye isirwe?

⁹ Jehova wa tjita kutja Ovaisrael ve isirwe komauvi wawo, nu ve kare noupanga ouwa ku na ye. Ovaisrael aave zemburuka Eyuva enene rOhanganisiro ombura aihe. Meyuva ndo, omupristeri omunene aa tjiti ozombunguhiro zovinamuinyo okupunguhira ouvi wovandu. Otjingaperi kutja ombunguhiro yovinamuinyo aiyerike kaai yenene okuisa po ouvi wOvaisrael, mena rokutja ovinamuinyo vi nonḓengu yokehi povandu. Posi yokutja, indu Omuisrael ngwe ritanaura tja yandja ombunguhiro Jehova ndjaa undjire ko, Jehova aa yenene okumuisira omauvi we. (Hebr. 10:​1-4) Ozombunguhiro nḓaaze tjitwa mEyuva enene rOhanganisiro na povikando vyarwe, za vatera Ovaisrael okumuna kutja owo ovanauvi nokutja aave hepa otjiṋa tji matji vandeke omauvi wawo nga aruhe.

10. Ovikwaye Jehova mbya tjita kutja omauvi wovandu ye isirwe?

¹⁰ Jehova wa tjita tjike kutja omauvi wovandu ye isirwe? Eye wa tjita kutja Omuna we omusuverwa ma ‘punguhwe rumwe kutja ma ise po omauvi wovengi.’ (Hebr. 9:28) Jesus wa yandja “omuinyo we u rire onguturiro yovengi.” (Mat. 20:28) Otjisuta tjonguturiro otjikeṋa?

JESUS WA YANDJA OMUINYO WE OKUTUKUTURA

11. (a) Otja kOmbeibela, omena raye otjisuta tjonguturiro tjaatji sokusutwa? (b) Ouṋe ngwaa yenene okusuta otjisuta tjonguturiro?

¹¹ Otja kOmbeibela, Jehova wa tya kutja otjisuta tjonguturiro aatji hepa okusutwa kutja omauvi wetu ye isirwe nokutja tu rire omapanga we. Otjisuta tjiṋe tjonguturiro tjaatji hepa okusutwa kokutja ovandu ve kare na imbi Adam mbya pandjara? Zemburuka kutja Adam na Eva kaave yenene okuhupa nga aruhe rukwao. Otjisuta tjonguturiro aatji hepa okukara nonḓengu imwe na imbi mbya pandjara. (1 Tim. 2:6) Otjo aatji sokusutwa i yomurumendu (1) ngu u hi nouvi, (2) ngu ma yenene okuhupa nga aruhe kombanda yehi, nu (3) ngu me riyandjere omuinyo we otjonguturiro kovandu. Omuinyo womundu tjimuna ngo, otji mau yenene okusuta imbi mbya pandjara.

12. Omena raye Jesus tja yenene okusuta otjisuta tjonguturiro tjaatji heperwa po?

¹² Tara komapu yetatu kutja ongwaye Jesus tja yenene okusuta otjisuta tjonguturiro. (1) Eye “ka tjitire ouvi.” (1 Petr. 2:22) (2) Mena ranao, eye aa yenene okuhupa nga aruhe kombanda yehi. (3) Eye wa yandja  omuinyo we okutuṱira. (Hebr. 10:​9, 10) Jesus wa ri omurumendu ngu hi nouvi tjimuna omurumendu omutenga Adam, ngunda e hi ya tjita ouvi. (1 Kor. 15:45) Mena rokutja Jesus we tu ṱira, eye wa yenena okusuta imbi Adam mbya pandjara. (Rom. 5:19) Ku nao, Jesus wa rira “Adam ingwi omusenina.” Katu nokuhepa omundu warwe ngu hi nouvi okuyekusuta imbi Adam mbya pandjara. Jesus wa ṱa “rumwe na aruhe.”—Hebr. 7:27; 10:12.

13. Ovikwaye mbi tjita kutja tu kare noupanga ouwa ku na Jehova?

¹³ Ovikwaye mbi tjita kutja tu kare noupanga ouwa ku na Jehova? Jehova wa tjita kutja omauvi wetu ye isirwe. Jesus wa yandja omuinyo we otjotjisuta tjaatji heperwa po okusuta omauvi wetu.—Ef. 1:7; Hebr. 9:14.

JEHOVA WE TU KUTURA KOUVI NONḒIRO NOKUTUVARA OTJOVASEMBA

14. Ovikwaye mbi matu tara ko nai, nu omena raye?

¹⁴ Ouwa waye mbu tu muna okuza ku mbi Jehova mbye tu tjitira? Okumuna eziriro kepuriro ndo, matu kahungirira komaheero womambo Ombeibela ngu ya ungurisa okutuvatera okuzuva nawa omuano mu matu munu ouwa okuza kondjesiro ya Jehova.

15-16. (a) Embo ndi okukuturwa mOmbeibela ri heya tjike? (b) Hapo okukuturwa kouvi nonḓiro ku tu ṱuna vi?

¹⁵ Ombeibela i tja mena rokutja otjisuta tjonguturiro tja sutwa, eṱe twa kuturwa. Omuapostele Paulus wa tja nai: “Orondu eṋe mamu tjiwa indji ondjambi, ndji mwa sutwa na yo okukuturwa kongarero yomungandjo ndji mwa rumata pooiho mukururume. Oyo kaya ri ondjambi, ndji nyonoka uriri tjimuna osilveri nongoldo. Eṋe mwa kuturwa nombinḓu onḓeu yaKristus ngwa ri otja ondjona, ndji hi notjipo nu ndji hi nomaṋi.”—1 Petr. 1:​18, 19.

¹⁶ Mena rombunguhiro yotjisuta tjonguturiro, eṱe matu yenene okukuturwa kouvi nonḓiro mbi tjita kutja tu mune omauzeu. (Rom. 5:21) Tjiri tu nondangi tjinene ku Jehova na Jesus kutja twa kuturwa mena rombinḓu ya Jesus.—1 Kor. 15:22.

17-18. (a) Okuvarwa otjomusemba ku heya tjike? (b) Ouwa waye mbu tu muna mena rokutja Jehova u tu vara otjovasemba?

¹⁷ Ombeibela i tja ovakarere va Jehova ve varwa otjovasemba. Ihi matji hee kutja eye ka undjire ko kutja matu sokusuta omauvi ngu tu tjita. Nandarire nao, Jehova u kayenda komurungu okukongorera omirari vye vyousemba. Eye ke tu vara otjovasemba mena roviṋa mbi twa tjita. Nu wina Jehova ka yakura ouvi. Posi ya u nonḓero yokuisira omauvi wetu mena rokutja tu raisa ongamburiro mu imbi eye na Jesus mbi va tjita okusuta otjisuta tjonguturiro.—Rom. 3:24; Gal. 2:16.

¹⁸ Ouwa waye mbu tu muna indu Jehova tji me tu vara otjovasemba? Tjiva mba varwa kutja ovasemba va toororwa okukahonapara pu na Jesus meyuru, nu va rira ovanatje va Mukuru. (Tit. 3:7; 1 Joh. 3:1) Eye u isira omauvi wawo. I ri tjimuna kave ya rora okutjita omauvi ngo, nu otjiṋa ho tji tjita kutja ve yenene okukahonapara mOuhona wa Mukuru. (Rom. 8:​1, 2, 30) Varwe mba varwa otjovasemba mave kahupa kombanda yehi nga aruhe. Jehova wa isira omauvi wawo nu va rira omapanga we. (Jak. 2:​21-23) Otjimbumba otjinene tjovandu tji matji tuurunga oArmagedon, tji nondjingonekero yokukahupa nga aruhe. (Joh. 11:26) “Ovandu avehe ovawa novavi” mba ṱa mave kapendurwa. (Oviung. 24:15; Joh. 5:​28, 29) Korusenina, ovakarere va Mukuru avehe mbe ri kombanda yehi nu mbe nonḓuviro mave kakara “norupa monguturiro onandjozikiro yovanatje vaNdjambi.” (Rom. 8:21) Tjiri tu undja nonḓero oruveze tji matu  karira ovanatje va Tate wetu Jehova mbe hi nouvi.

19. Omomuano uṋe ongaro yetu mu ya runduruka mena roviṋa Jehova na Jesus mbi ve tu tjitira? (Wina tara kokawongo nga “ Ondjesiro ya Jehova.”)

¹⁹ Ongaro yetu i ri tjimuna yomurumendu omutanda ngwa tamunwa pomautiro, ngwa pandjara oviṋa avihe nu a rumata ozondjo ozengi eye nḓe hi na aa yenene okusuta. Posi ya, Jehova we tu vatera. Ongaro yetu ya runduruka mena rokutja Jehova wa tjita kutja omauvi wetu ye isirwe, nu Jesus wa suta otjisuta tjonguturiro. Ongamburiro yetu mu Jesus i tjita kutja tu kuturwe kouvi nonḓiro. Indu Jehova tja isire omauvi wetu, i ri tjimuna eṱe katu ya tjita ouvi mbwo. Otjiṋa otjinanḓengu otjo hi tjokutja, eṱe nai tu yenena okukara noupanga ouwa ku na Tate wetu womeyuru Jehova.

20. Matu kahungirira ku ye morupa ndu maru kongorere ko?

²⁰ Eṱe tu kara nondangi ku Jehova na Jesus indu tji matu ripurire ko oukoto koviṋa avihe mbi ve tu tjitira. (2 Kor. 5:15) Nokuhinombatero yawo, eṱe katjatu kara nomaundjiro. Orupa ndu maru kongorere ko maru kahungirira kovisasanekero tjiva mbi mavi raisa ouwa mbu tu muna okuza kotjisuta tjonguturiro.