OTJIPERI, povikando tjiva. Ngatu tare kotjihorera tjimwe. Deuteronomium 24:14, 15 mari tja: “Ko nakutjita ko ovineya komuungurire wondjambi omusyona poo omuhepe, nangarire kOmuisrael omukweṋu poo kowozonganda ngu tura motjihuro tjimwe tjehi reṋu . . . Tji u hi nakumusuta eye ma urire ove ku Muhona, nove otji mo riturisa ondjo.”

Ehungi nda tjangwa ohunga nomaningiriro moviṋa otja imbi aari tjiukwa okuza keserewondo oritjahambombari K.O.Z. Oro ra vazewa popezu na Asdod. Orutuu ndwa tjangerwe koutekero wotjitjuma tjomunoko ndwi, nu ngahino ndwa tjangerwa omuungure womahi womakunino, pu pe munika aayo kayandjere ondjambi ndjaa undjirwa ko, rwa tja: “Omukarere woye tja za nokumana okupwika oviṋa mbya konda momahi womakunino omayuva tjiva nga kapita, Hoshayahu omuatje omuzandu wa Shobay weya na toora ombanda yokombanda yomukarere woye. . . . Ovakwetu mbaa tu ungura pamwe momahi womakunino momutenya, mave itavere . . . kutja mbi mba hungire ouatjiri. Ami hi nondjo oparukaze. . . . Tjinangara omunane ke nokumuna kutja ma sokukotora ombanda yomukarere we yokombanda, okutja ove tjita nao mena rondjenda! Ove o mwina ngunda omukarere woye e hi nombanda ye yokombanda.”

Omutjange womakuruhungi wena Simon Schama, wa tja: Omaningiriro nga “maye tu raere ovingi kombanda yonḓero yomuungure womahi womakunino ngu ma vanga okukotorerwa [ombanda ye yokombanda]. Owo wina maye raisa kutja omuriyarikaṋe ngwi u notjiṋa tjaa tjiwa ohunga nomatwako wOmbeibela, nu tjinenenene omarakiza nge ri mu Levitikus na Deuteronomium nge tjaera okutumba ovasyona momuano omuvi.”