1-2. (a) Jehova u tara ku ye ovandu omayovi tji va worongana pamwe pOmariro Omayapuke wa Muhona? (Tara kotjiperendero tjokombanda yokambo nga.) (b) Morupa ndwi matu katara ku ye?

RIPURA kutja Jehova u kara noumune uṋe tji ma munu ovandu omayovi omingi tji va worongana pamwe okuzemburuka Omariro omayapuke wa Muhona mouye auhe. Eye u muna omundu auhe kourike we nungwari ka munu otjimbumba tjovandu uriri. Otjotjihorera, eye u muna ovandu mbeya kotjitjitwa hi ombura aihe. Mokati kawo muna imba mbeya nandarire kutja ve muna ondatumisire onḓeu. Varwe kave ya aruhe kozombongarero zombongo, posi yokutja ve muna kutja okukara pOmariro omayapuke nga otjiṋa otjinanḓengu okutjita. Jehova wina u muna imba mbe ya pOmariro nga otjikando otjitenga, ngahino mena rokuvanga okutjiwa kutja petjitwa tjike pozombongarero nḓa.

² Mouatjiri, Jehova u kara nondjoroka okumuna ovandu ovengi pOmariro omayapuke wa Muhona nga. (Luk. 22:19) Nungwari Jehova ka yandja ombango tjinene kotjivarero tjovandu mbeya uriri. Eye u nonḓero yokutja otjikeṋa tji tja hingi omundu okukara potjitjitwa otjinanḓengu hi. Morupa ndwi matu katara kepuriro enanḓengu ndi: Ongwaye tji matu sokukara pozombongarero azehe zombongo Jehova nḓa twapo ku imba mbe mu suvera, nungwari kaku kara potjitjitwa tjOmazemburukiro wonḓiro ya Jesus uriri?

3-4. (a) Ongwaye tji tu kara pozombongarero zombongo? (b) Okukara pozombongarero zombongo ku raisa kutja oweṱe ovandu mbu tu ri vi? (c) Otja kOvakorinte ovatenga 11:23-26, ongwaye tji tu sokukara pOmazemburukiro wonḓiro ya Jesus aruhe?

³ Epu enanḓengu ndu tu karera pozombongarero zombongo omena rokutja owo orupa rwomerikotameneno wetu. Eṱe wina tu kara pu zo orondu tu ka hongwa i Jehova. Ovandu overitongamise  kave kambura kutja ve hepa okuhongwa otjiṋa. (3 Joh. 9) Posi yokutja, eṱe tu nonḓero yokuhongwa i Jehova notjira tje.​—Jes. 30:20; Joh. 6:45.

⁴ Okukara pozombongarero zombongo aruhe ku raisa kutja oweṱe ovandu overisusuparise, nu tjiri tu vanga okuhongwa. Mongurova yOmazemburukiro wonḓiro ya Jesus, eṱe tu kara potjitjitwa otjinanḓengu hi, ka mena rokutja twa rakiziwa okutjita nao uriri, nungwari oweṱe overisusuparise nu tu ṱakamisa eronga ra Jesus ndi mari tja: “Ihi tjiteye kokuzemburuka Ami.” (Lesa 1 Ovakorinte 11:23-26.) Omaworonganeno ngo ye yanḓiparisa omaundjiro wetu woruyaveze, nu yetu zemburukisa orusuvero orunene Jehova ndwe naro ku na eṱe. Nungwari, Jehova u tjiwa kutja tu hepa okuyanḓiparisiwa nokutunduuzwa ombura aihe. Kunao eye wa twapo ozombongarero zombongo otjivike atjihe, nu u tu tunduuza kutja tu kare pu zo. Omerisusuparisiro ye tu hinga kutja tu raise onḓuviro. Tu tjita oruveze otjivike atjihe okurirongerisa kozombongarero nḓo, nokukara pu zo.

5. Ongwaye ovandu overisusuparise tji ve yakura omaṋangero wa Jehova?

⁵ Ombura aihe ovandu ovingi overisusuparise, ve riyandjera ku hongwe i Jehova. (Jes. 50:4) Owo ve tjaterwa okukara pOmariro omayapuke wa Muhona, nu ve uta okukara pozombongarero zombongo zarwe wina. (Sak. 8:20-23) Imba mbe ri mouatjiri rukuru na imba ovape, avehe ve kara nonyuṋe yokuhongwa nokuraisirwa omuhunga omusemba i Jehova, “omuvatere nomukuture” wetu. (Eps. 40:17) Tjiri, otjiṋa otjiwa notjinanḓengu okuyakura omaṋangero wokuhongwa i Jehova nOmuna we, Eye me nonyuṋe tjinene.​—Mat. 17:5; 18:20; 28:20.

6. Omerisusuparisiro ya vatera vi omurumendu umwe okukara pOmazemburukiro wonḓiro ya Jesus?

⁶ Ombura aihe, tu tjita ozongondjero zokuṋanga ovandu ovingi okukara pOmazemburukiro wonḓiro ya Jesus. Ovandu ovengi overisusuparise va muna ouwa wokuyakura omaṋangero nga. Tara kotjihorera. Ozombura nḓa kapita, omurumendu wa pewa okambapira komaṋangero kOmariro omayapuke wa Muhona, posi yokutja wa raera omurumendu omukambure ngwe mu pa okambapira nga kutja ke nokuyenena okuvaza. Nungwari, ongurova yOmazemburukiro nga, omurumendu omukambure ngwi wa temwa indu tja muna omurumendu ngwi tja hita mEtuwo romerikotameneno. Omurumendu ngwi wa ṱunwa tjinene i omuano ovakambure ovakwetu mu ve mu yakura, nu okuzambo eye wa uta okuya kozombongarero zombongo. Nu ombura ndja kongorera ko eye kena wa kara pozombongerero povikando 3 uriri. Otjikeṋa tji tje mu vatera okukara pozombongarero azehe zombongo nḓa? Eye wa ri omundu omurisusuparise, nu otjiṋa hi otji tje mu hinga okukara pozombongarero azehe. Kombunda omurumendu omukambure ngwe mu ṋanga wa tja: “Eye tjiri omurumendu omurisusuparise.” Jehova tjiri ongwa nana omurumendu ngwi okurikotamena ku Ye, nu eye nai wa papitisiwa.​—2 Sam. 22:28; Joh. 6:44.

7. Oviṋa mbi tu rihonga pozombongarero zombongo noviṋa mbi tu lesa mOmbeibela vi tu vatera vi okurira overisusuparise?

⁷ Oviṋa mbi tu rihonga pozombongarero zombongo, na imbi mbi tu lesa mOmbeibela vi tu vatera kutja tu rire overisusuparise. Movivike vyokomurungu wOmazemburukiro wonḓiro ya Jesus, ozombongarero zetu zombongo ze yandja ombango kotjihorera tja Jesus nomerisusuparisiro nga raisa mokuyandja omuinyo we otjotjisuta tjonguturiro. Nu momayuva wokomurungu wOmariro omayapuke wa Muhona, ma rire otjiṋa otjiwa okulesa mOmbeibela ohunga novitjitwa mbya tjitwa komurungu yonḓiro ya Jesus nopendukiro ye. Oviṋa mbi tu rihonga pozombongarero zombongo, noviṋa mbi tu lesa mOmbeibela vi kurisa ondangi yetu kombunguhiro Jesus ndje tu tjitira. Ihi tji tu hinga kutja tu horere komerisusuparisiro we, nokutjita ombango ya Jehova, nandarire tje ri ouzeu kweṱe okutjita nao.​—Luk. 22:41, 42.

8. Jesus wa raisa vi ouvanḓe?

⁸ Eṱe wina tu horera ku Jesus mokuraisa ouvanḓe. Ripura ohunga nouvanḓe eye mbwa raisa komurungu yonḓiro ye. Eye aa tjiwa nawa kutja moruveze rwatjimanga ovanavita naye mave mu nyekerere, aave mu tono, nave mu papere komuti. (Mat. 20:17-19) Nandarire kutja aa tjiwa oviṋa mbi avihe, eye we riyandjerere okuṱa. Oruveze tjirwa yenena Jesus okumburwa, eye wa raera ovaapostle ve ovaṱakame mba ri puna ye motjingunino Getsemane na tja ku wo: “Sekameye tu yende! Tareye, ingwi ngu me Ndji zepaisa movineya, eye ngo wa tumbuka!” (Mat. 26:36, 46) Nu indu otjimbumba tjovarwe vovita tji tje ya okumukambura, eye wa ryama neritjiukisa ku tjo, nu wa raera ovarwe vovita mba okuyesa ovaapostele ve yende. (Joh. 18:3-8) Tjiri Jesus wa raisa ovaunḓe wapeke! Ndino, Ovakriste ovatwirisiwa na imba vozonḓu zarwe ve kondja okuhorera kouvanḓe wa Jesus. Omomuano uṋe?

9. (a) Ongwaye tji tu hepa ouvanḓe okukara pozombongarero zombongo aruhe? (b) Otjihorera tjetu matji ṱunu vi kovakambure ovakwetu mberi motjovakamburwa mena rongamburiro yawo?

⁹ Kutja tu kare pozombongarero zombongo aruhe, mape ya atu hepa okuraisa ouvanḓe kehi yozongaro ozonḓeu. Ovakambure ovakwetu tjiva ve kara pozombongarero zombongo, nandarire kutja va zepaisa ovasuverwa vawo, va wa momuinyo, poo ve kondja nouvere. Varwe ve raisa ouvanḓe mokukara pozombongarero zombongo nandarire kehi yomapirukiro omazeu okuza komaṱunḓu wawo, poo okuza komauhonapare wozohoromende. Ripura kutja otjihorera tjetu tji ṱuna vi kovakambure ovakwetu mbe ri motjovakamburwa mena rongamburiro yawo. (Hebr 13:3) Owo tji va zuu kutja tu kayenda komurungu okukarera Jehova kehi yomauzeu ayehe ngu tu muna, ihi tji ve tunduuza okukayenda komurungu okupanḓera pongamburiro yawo, nokuraisa ouvanḓe nouṱamake. Omuapostele Paulus wa ri mongaro otjingeyo ndjo. Indu tja ri motjovakamburwa moRoma, eye wa ri nenyando aruhe okuzuva kutja ovakambure ovakwao aave karere Mukuru nouṱakame. (Fil. 1:3-5, 12-14) Katjisupi komurungu poo tja za nokupitisiwa motjovakamburwa, Paulus wa tjanga orutuu kOvaheberi. Morutuu rwe ndo eye wa tunduuza Ovakriste ovaṱakame mbo kutja ve ‘panḓere pokusuverasana,’ nu ave ha isa okuyenda kozombongarero zombongo.​—Hebr. 10:24, 25; 13:1.

10-11. (a) Oouṋe mbu matu sokuṋanga kOmazemburukiro yonḓiro ya Jesus? (b) Ovaefese 1:7 ri yandja omapu yeṋe ngu matu sokutjitira nao?

¹⁰ Eṱe wina tu raisa ouvanḓe tji matu ṋanga ovazamumwe vetu, ovandu mbu tu ungura pamwe, novararanganda na eṱe kOmazemburukiro wonḓiro ya Jesus. Ongwaye tji tu ṋanga ovandu otja imbo? Tjiri tu nondangi ku imbi Jehova na Jesus mbi ve tu tjitira, nu otjiṋa hi tji tu hinga kutja tu ṋange ovandu varwe kOmariro Omayapuke wa Muhona. Eṱe tu vanga kutja owo ve mune ouwa “wotjari” tja Jehova okupitira motjisuta tjonguturiro.​—Lesa Ovaefese 1:7; Omavan. 22:17.

¹¹ Tji matu raisa ouvanḓe kutja tu kare pozombongarero zombongo, wina tu raisa ovikaṋena vyarwe oviwa mbi raisiwa i Mukuru nOmuna we momiano omihimise.

12. (a) Ozombongarero zetu ze kurisa vi orusuvero rwetu ku Jehova na Jesus? (b) Ovakorinṱe ovetjavari 5:14, 15 ye tu tunduuza okutjita vi?

¹² Orusuvero rwetu ku Jehova na Jesus ru tu hinga kutja tu kare pozombongarero zombongo. Imbi mbi twe rihongo pozombongarero nḓa, vi tjita kutja orusuvero rwetu ku Jehova na kOmuna we ru kurire ko. Ozombongarero zombongo aruhe zetu zemburukisa ouwa mbu ve tu tjitira. (Rom. 5:8) Nu tjinene Omazemburukiro wonḓiro ya Jesus ye tu zemburukisa orusuvero rwawo orunene kweṱe, nandarire ku imba mbe ha tjiwa ounanḓengu wotjisuta tjonguturiro. Ondangi yetu ku wo i tu hinga kutja tu kondje okuhorera ku Jesus eyuva arihe. (Lesa 2 Ovakorinte 5:14, 15.) Kunao, omiitima vyetu vi tu hinga kutja tu tange Jehova kotjisuta tjonguturiro tje tu pa. Omuano umwe mu matu yenene okutjita nao omokuyandja omaziriro okuza komutima pozombongarero zombongo.

13. Omomuano uṋe mu matu raisa kutja tjiri twa suvera Jehova nOmuna we? Kahurura.

¹³ Matu yenene okuraisa kutja tjiri twa suvera Jehova nOmuna we indu tji matu tjiti ozongondjero zokuvekarera aruhe. Povikando, tu hepa okutjita ozongondjero kutja tu kare pozombongarero zombongo. Ozombongarero zopokati kotjivike popengi ze kara komaandero weyuva, nu popengi ovandu ve urwa. Nu ozombongarero zarwe ze kara ko Oroviungura poo Osondaha ovandu varwe tji mave suva. Hapo Jehova u tjiwa kutja nandarire kutja twa urwa eṱe tu yenda kozombongarero zombongo? Eye tjiri u tjiwa! Jehova u muna nu u vara ozongondjero azehe nḓu tu tjita kutja tu kare pozombongarero zombongo.​—Mar. 12:41-44.

14. Omomuano uṋe Jesus me tu pa otjihorera tjokuraisa orusuvero rwatjiri?

¹⁴ Jesus we tu pa otjihorera tjokuraisa orusuvero rwatjiri. Eye wa tjita nao mokuriyandja omuini okuṱira ovahongewa ve, nu aruhe aa twapo ozonḓero zovandu varwe komurungu wa inḓa oze omuini. Otjotjihorera, eye wa kahakaena ku novemukongorere nandarire kutja wa urirwe poo wa ri nombameno momuinyo. (Luk. 22:39-46) Nu eye ee ripurire koviṋa mbi ma yenene okuyandja ku varwe, nungwari ka mbi ma munu okuza ku wo. (Mat. 20:28) Indu orusuvero rwetu ku Jehova na kovakambure ovakwetu tji ru nomasa tjimuna orwa Jesus, matu yenene okukondja pu matu yenene kutja tu kare pOmariro Omayapuke wa Muhona, nokukara pozombongarero zombongo aruhe.

15. Tjinenenene matu vanga okuvatera imba veṋe?

 ¹⁵ Oweṱe orupa rOvakriste vatjiri, nu tu tjaterwa okuungurisa oruveze rwetu okuṋanga varwe kutja ve rire orupa rwetu wina. Posi yokutja, tjinenenene tu vanga okuvatera ‘ovakambure ovakwetu’ mba yaruka ombunda mongamburiro. (Gal. 6:10) Tu raisa kutja twe ve suvera tji matu ve tunduuza kutja ve kare pozombongarero zombongo, nu tjinenenene okukara pOmariro omayapuke wa Muhona. Tjimuna Jehova na Jesus, eṱe tu kara nondjoroka tjinene okumuna imba mba yarukire ombunda mongamburiro tji va kotoka ku Jehova, Tate wetu worusuvero nu Omurise wetu omuwa.—Mat. 18:14.

16. (a) Omomuano uṋe mu matu yenene okutunduuzasana, nu ozombongarero zetu maze tu vatere okutjita vi? (b) Ongwaye omayuva nga tje ri oruveze orusemba okuzemburuka omambo wa Jesus nge ri mu Johanes 3:16?

¹⁶ Movivike mbi mavi ya, kondja okuṋanga ovandu ovengi otja pu mo yenene kOmariro omayapuke wa Muhona, ngu maye kara ko Oritjatano, 19 ku April 2019. (Lesa okaongo nga “ Hapo oouṋe mbu mo ṋanga?”) Mozombura nḓu maze ya, matu vanga okukondja pu matu yenene okutunduuzasana kutja tu kare pozombongarero zombongo azehe Jehova nḓa twapo. Otja omaandero wouye mbwi tji maye tumbuka popezu, ozombongarero zetu zombongo maze tu vatere kutja tu rire overisusuparise, tu kare ozombanḓe, nokuraisa orusuvero. (1 Tes. 5:8-11) Nomutima auhe, ngatu kayende komurungu okuraisa kutja tu tjaterwa i orusuvero orunene Jehova nOmuna we ndu ve tu raisira!​—Lesa Johanes 3:16.