ORUPA RWOMAKONḒONONENO 1
“OwAmi Ndjambi woye, o urumisiwa i otjiṋa!”
“O tira, Ami mbi ri puna ove! OwAmi Ndjambi woye, o urumisiwa i otjiṋa! Me ku zeuparisa, nu me ku vatere.”—JES. 41:10.
EIMBURIRO 7 Jehova omasa wetu
OMAPU KU MATU KATARA *
1-2. (a) Omambo nge ri mu Jesaja 41:10 ya ṱuna vi komukazendu omukambure wena Yoshiko? (b) Oouṋe mbu mave yenene okumunu ouwa momambo wa Jehova nge ri mu Jesaja 41:10?
OMUKAZENDU Omukriste omuṱakame wena Yoshiko wa zuva ombuze ombi. Onganga ye, ye mu raera kutja eye u nomieze omiṱiṱi uriri okuhupa. Yoshiko wa raisa ongaro iṋe? Eye wa zemburuka etjangwa ra Jesaja 41:10. (Lesa.) Nu okuzambo wa raere onganga ye neraka nda poro kutja eye ke nokutira, mena rokutja Jehova me mu tjevere nokumuyama. * Omambo omahuhumiṋe nge ri metjangwa ndo ya vatera omukambure omukwetu ngo okukara nongamburiro okuura mu Jehova. Nu wina etjangwa otjingero ndo ma ri yenene okutuvatera okupora momuinyo indu tji matu munu omauzeu. Kutja u zuve nawa kutja ma ri yenene vi okutjita nao, rutenga ngatu konḓonone kutja ongwaye Mukuru tja raera Jesaja omambo ngo.
2 Kotjirutenga, Jehova wa yandjera kutja Jesaja ma tjange omambo ngo kokutja ye huhumiṋe Ovajuda kombunda mba twarewa koBabilon otjovahuurwa. Nungwari, Jehova wa yandjera kutja omambo ngo ye kare ko nga ku nai, kouwa wovandu avehe mbe ri ko nai nungwari kaya ri kOvajuda aveyerike mba ri mouhuura. (Jes. 40:8; Rom. 15:4) Ndino, tu hupa ‘motuveze otuzeu,’ nu tu hepa omayanḓiparisiro nge ri membo ra Jesaja tjinene.—2 Tim. 3:1.
3. (a) Omakwizikiro yeṋe nge ri mu Jesaja 41:10, ndi ri etjangwa rombura ndji 2019? (b) Ongwaye tji tu hepa omakwizikiro ngo?
3 Morupa ndwi, matu kayandja ombango komakwizikiro 3 nge kurisa ongamburiro yetu mu Jehova, nga tjangwa mu Jesaja 41:10: (1) Jehova u ri puna eṱe, (2) eye ma rire Ndjambi wetu, nokutja (3) eye me tu vatere. Tjimuna Yoshiko, eṱe tu hepa omakwizikiro ngo *, mena rokutja tu muna omauzeu mehupo. Nu wina tu muna oṋiṋikizire mena roviṋa ovivi mbi tjitwa mouye. Tjiva vetu ve muna ondatumisire okuza kouhonapare ounamasa. Nambano ngatu tare komakwizikiro 3 ngo, rimwe motjikando.
“AMI MBI RI PUNA OVE”
4. (a) Matu katara komakwizikiro yeṋe omatenga? (Wina lesa omambo wokehi.) (b) Omomiano viṋe Jehova me tu raisira kutja we tu suvera? (c) Omambo wa Mukuru ngo ye ku ṱuna vi?
4 Jehova rutenga u tu huhumiṋa nomambo nga: “O tira, Ami mbi ri puna ove.” * Jehova u raisa kutja u ri puna eṱe mokutupa ombango ye aihe, nokuturaisira orusuvero rwe. Tara komuano eye mbwe raisa orusuvero rwe kweṱe. Jehova u tja: “Ove tjinga au ri otjihuze ku Ami, nu ambe ku suvera nokukuyozika.” (Jes. 43:4) Kape notjiṋa mevaverwa tji matji tjiti kutja Jehova ma ise okusuvera imba mbe mu karera. Kape notjiṋa tji matji tjiti kutja aha rire omuṱakame kweṱe. (Jes. 54:10) Orusuvero rwe noupanga mbu tu na wo kuna Ye u tjita kutja tu rire ozombanḓe. Tjimuna tja tjevera Abram (Abraham) epanga re, eye wina ma yenene okututjevera ndino. Jehova we mu raera kutja: “O tira, Abram! Ami owAmi oruvao rwoye.”—Gen. 15:1.
Nombatero ya Jehova, eṱe matu yenene okutuurunga omauzeu ngamwa aehe ngu maye rauka tjimuna onḓonḓu ndji mai pupu, poo tjimuna omuriro omunene (Lesa oparagrafa 5-6) *
5-6. (a) Matu tjiwa vi kutja Jehova u vanga okutuvatera momauzeu wetu? (b) Ovikwaye mbi matu rihongere kotjihorera tja Yoshiko?
5 Matu tjiwa nawa kutja Jehova u nonḓero yokutuvatera momauzeu wetu, mena rokutja wa kwizikira ovakarere ve kutja, “Tji mo kondo omeva omakoto, Ami me kara puna ove; omaumba woye kamaaye ku tanana. Tji mo tuurungire momuriro, ko nokupya ko; oviwonga ovizeu mbi mavi ya kavi nokukuhihamisa ko omutima.” (Jes. 43:2) Omambo nga maye hee tjike?
6 Jehova kena pa kwizika kutja ma isapo omauzeu ngu matu munu, nungwari ke nokuyandjera “omeva omakoto” womauzeu okutuṋiṋa poo ‘omuriro’ okutuyetera omihihamo omikarerere. Eye we tu kwizikira kutja ma kara puna eṱe, okutuvatera kutja tu ‘tuurunge’ omauzeu ngo. Jehova ma yenenisa vi omambo we ngo? Eye me tu vatere kutja atu ha kara nemuma, kokutja tu yenene okurira ovaṱakame ku ye, nandarire kutja twa kuramenwa i onḓiro. (Jes. 41:13) Yoshiko, ngwa tamunwa rukuru, wa muna ouatjiri womambo ngo. Omuatje we omukazona wa tja: “Eṱe tjiri twa temisirwe i omuano Mama ma yakura ombuze ndjo. Nu twa muna kutja Jehova tjiri we mu pa ohange momuinyo. Ngandu keyuva Mama nda ṱa, eye aa hungire ku nozonesa novavere varwe ohunga na Jehova nomakwizikiro we.” Matu rihongere ko tjike kotjihorera tja Yoshiko? Indu tji twa kara nongamburiro momakwizikiro wa Mukuru ngu maye tja: “Ami me kara puna ove,” eṱe wina matu yanḓipara nokukara nomasa otja tji matu tuurunga omauzeu.
“OWAMI NDJAMBI WOYE”
7-8. (a) Omahuhumiṋino oyetjavari ku matu katara ooyeṋe, nu ye nomaheero waye? (b) Ongwaye Jehova tja raera Ovajuda mba ri mouhuura kutja, ave “urumisiwa”? (c) Omambo yeṋe nge ri mu Jesaja 46:3, 4 nga huhumiṋa ovakarere va Mukuru?
7 Yandja ombango komahuhumiṋino oyetjavari nga tjangwa i Jesaja indu tja tja: “OwAmi Ndjambi woye, o urumisiwa i otjiṋa.” Omambo nga kutja o urumisiwa i otjiṋa maye hee tjike? Embo ku kwa za embo ndi “o urumisiwa” momatjangwa omakuru, ri heya “okukayenda amo tono ombaka kongotwe tjimuna ngu mo tira otjiṋa poo omundu ngu mape ya e ku hihamisa,” poo “okumunika tjimuna omundu ngu u ri moumba.”
8 Ongwaye Jehova tja raera Ovajuda mbaave i kouhuura koBabilon kutja ave ha “urumisiwa”? Mena rokutja aa tjiwa kutja ovature vehi ndo mave raisa ondira. Otjikeṋa tji matji yeta ondira ndjo? Kuṱa komaandero wozombura 70 zouhuura wOvajuda, Babilon matji wirwa i otjimbumba tjovarwe ovanamasa voMedie na Persie. Jehova ma ungurisa otjimbumba tjovarwe wovita hi, okukutura ovandu ve kouhuura wa Babilon. (Jes. 41:2-4) Indu ovandu va Babilon novandu woviwaṋa vyarwe mba hupire moruveze ndo tjaave tjiwa kutja ovanavita nawo mave ya okuvewira, owo va kondja okuraisa ouvanḓe “nokupandiparisasana.” Owo wina va ungura oomukuru vovisenginina ovengi, mokunangarasi mave ve vatere. (Jes. 41:5-7) Moruveze ndo Jehova wa wisa omitima vyOvajuda mba ri mouhuura pehi nomambo nga: “Nungwari ove, Israel, oove omukarere wandje, . . . OwAmi Ndjambi woye, o urumisiwa i otjiṋa!” (Jes. 41:8-10) Zemburuka kutja Jehova wa tja: “OwAmi Ndjambi woye.” Nomambo ngo, Jehova wa kwizikira ovakarere ve ovaṱakame kutja eye ke nokuvezemba, eye oMukuru wawo, nu owo ngunda ovakarere ve. Eye we ve raera na tja: “Me mu vereke . . . nu me mu yama.” Omakwizikiro omawa ngo tjiri ya vanḓiparisa Ovajuda mba ri mouhuura.—Lesa Jesaja 46:3, 4.
9-10. Ongwaye tji tu ha sokutira? Sasaneka.
9 Tjinene moruveze mu tu ri ndwi, ovandu ongondoroka na eṱe ve kurungusiwa i ongaro youye ndji ri rira ko ombi. Otjingaperi, kutja omauzeu otja ingo wina ye tu ṱuna. Posi yokutja eṱe katu sokutira. Jehova u tu raera kutja: “OwAmi Ndjambi woye.” Ongwaye omambo ngo tji maye tu pe epu ewa rokuhina okutira?
10 Ripurira kotjihorera hi: Ovaronde vevari vonḓera, ooJim na Ben, ve ri monḓera ndji mai nyinganyinga nomasa mena rotjivepo tjomasa. Otja onḓera pu mai nyinganyinga mena rotjivepo tjomasa, omuhinge wonḓera wa raera ovandu avehe monḓera na tja: “Pamiseye omakwamo weṋu. Matu kapitira motjivepo otjinamasa.” Jim wa uta okutira. Nungwari omuhinge wonḓera wa weza na tja: “Amu tira. Ingwi omuhinge weṋu wonḓera ngu ma hungire.” Moruveze ndo, Jim wa taka otjiuru tje, na tja, “Ma hee vi nao?” Nu wa tara, na munu kutja Ben kena omburuma oparukaze. Jim wa pura Ben na tja: “Ongwaye ove tji u hi nokutira ?” Ben wa meṱameṱa na tja: “Mena rokutja ami me tjiwa omuhinge wonḓera ngwi nawa. Eye o tate!” Nu okuzambo Ben wa tja: “Indjo mbi ku raere ohunga na tate. Mbi nongamburiro kutja tji we mu tjiwa, notjiwa kutja eye ma yenene okuhinga onḓera nawa, ove wina ko nokutira.”
11. Matu rihongere ko tjike kotjisasanekero tja Ben nomukwao?
11 Matu rihongere ko tjike kotjisasanekero hi? Tjimuna Ben, eṱe katu tira orondu tu tjiwa Jehova nawa, Tate wetu womeyuru. Eṱe matu tjiwa nawa kutja eye me tu hongorere momauzeu womayuva omasenina nga, nge munika tjimuna otjivepo otjinamasa. (Jes. 35:4) Eṱe tu kambura mu Jehova, okutja kamaatu tira otjiṋa nandarire kutja ovandu mouye mbwi va kamburwa i omburuma. (Jes. 30:15) Eṱe wina tu raisa ongaro tjimuna oya Ben indu tji matu raere varwe kutja ongwaye tji tu nongamburiro yomasa mu Mukuru. Kokutja owo wina ve tjiwe kutja Jehova me ve vatere momauzeu aehe ngu mave munu.
“ME KU ZEUPARISA, NU ME KU VATERE”
12. (a) Omahuhumiṋino yeṋe ometjatatu ku matu katara ko? (b) Omambo nga “momaoko” wa Jehova, maye tu zemburukisa ohunga nouatjiri uṋe?
12 Yandja ombango komahuhumiṋino oyetjatatu nga tjangwa i Jesaja indu tja tja: “Me ku zeuparisa, nu me ku vatere.” Jesaja wa raisa rukuru kutja Jehova ma zeuparisa vi nokuyandja omasa kovakarere ve, na tja: “Muhona Ndjambi me ya okuhonapara nouvara . . , ma woronganisa ozondjona ne ze tjindi momaoko we.” (Jes. 40:10, 11) Ombeibela povikando i ungurisa embo ndi “momaoko” okuraisa omasa. Okutja omambo nga ngu maye tja Jehova me “ze tjindi momaoko we” maye tu raisire kutja Jehova Ombara onamasa. Eye wa ungurisa omasa we omahimise ngo okuvatera ovakarere ve morukapitaveze, nu ndino wina u kayenda komurungu okuzeuparisa nokutjevera imba mbe kambura mu ye.—Deut. 1:30, 31; Jes. 43:10.
Kape notjirwise tji matji yenene okutuhihamisa, orondu tu nombatero yokuoko kwa Jehova okunamasa (Lesa oparagrafa 12-16) *
13. (a) Oruṋe tjinenenene tji tu muna omuano Jehova me tu zeuparisa? (b) Omakwizikiro yeṋe nge tu pa omasa nongamburiro?
13 Tjinenenene indu ovanavita na eṱe tji mave tu tatumisa, Jehova u ṱakamisa omakwizikiro we wokutja,“Me ku zeuparisa.” Momahi tjiva ndino, ovanavita na eṱe ve kondja okutjaera otjiungura tjetu tjokuzuvarisa poo oviungura vyarwe vyotjira tjetu. Kehi yoviṋa avihe mbi, eṱe katu rikende tjinene. Jehova we tu pa omakwizikiro nge tu pa omasa nongamburiro. Eye we tu kwizikira na tja: ‘Kape notjirwise tji matji yenene okutuhihamisa.’ (Jes. 54:17) Omambo ngo ye tu zemburukisa oviṋa vitatu ovinanḓengu.
14. Ongwaye tji tu ha sokuhimwa ovanavita na Mukuru tji mave tu tatumisa?
14 Otjitenga, otjovakongorere va Kristus, eṱe tu tjiwa kutja ovandu mave tu tondo. (Mat. 10:22) Jesus wa hunganeka kutja ovahongewa ve mave tatumisiwa tjinene momayuva omasenina. (Mat. 24:9; Joh. 15:20) Otjitjavari, omaprofetero wa Jesaja ye tu rakiza rukuru kutja ovanavita na eṱe kave nokututonda uriri, nungwari mave tu toorere ovirwise pekepeke. Ovirwise mbyo vi kamburira mo ovineya, ovizeze, nondatumisire onḓeu. (Mat. 5:11) Jehova ke nokutjaera ovanavita na eṱe okuungurisa oviṋa mbyo kokuturwisa. (Ef. 6:12; Omavan. 12:17) Nungwari eṱe katu nokuhepa okutira. Omena raye?
15-16. (a) Otjikwaye otjitjatatu tji matu sokuzemburuka, nu omomuano uṋe Jesaja 25:4, 5 mu ma ri ṋuṋisa epu ndi? (b)Jesaja 41:11, 12 ri kahurura oviṋa viṋe mbi mavi ya ku imba mbe tu rwisa?
15 Tara kotjiṋa otjitjatatu tji matu sokuzemburuka. Jehova wa tja “kape notjirwise” tji tja hungamisiwa na eṱe ‘tji matji yenene okutuhihamisa.’ Tjimuna omira tji i tu tjevera kotjivepo tjombura otjinamasa, Jehova wina u tu tjevera ‘kovandu ovindandi.’ (Lesa Jesaja 25:4, 5.) Ovanavita na eṱe kamaave tu etere omihihamo omikarerere.—Jes. 65:17.
16 Jehova wina u zeuparisa ongamburiro yetu mu ye mokuturaera oviṋa mbi mavi katjitwa ku ‘imba mbe nomazenge na eṱe’. (Lesa Jesaja 41:11, 12.) Kainatja kutja ovanavita na eṱe ve tu rwisa tjinene pu pe ṱa pi, owo ngunda va kuramena otjiṋa tjimwe. Ovanavita novakarere va Mukuru avehe ‘mave ṱohoṋi yokuhaverwa. Imba mbe ve rwisa mave ṱu.’
MATU KURISA VI ONGAMBURIRO YETU MU JEHOVA?
Eṱe matu yenene okukurisa ongamburiro yetu mu Jehova indu tji matu lese ohunga na ye mOmbeibela aruhe (Lesa oparagrafa 17-18) *
17-18. (a) Okulesa Ombeibela maku kurisa vi ongamburiro yetu mu Mukuru? Yandja otjihorera. (b) Okuripurira oukoto ketjangwa nda toororwa kombura ndji 2019 maku tu vatere vi?
17 Eṱe tu kurisa ongamburiro yetu mu Jehova indu tji twe mu tjiwa nawa. Nu omuano umwe mu matu yenene okumutjiwa nawa, eendu tji matu lese Ombeibela nokuripurira oukoto ku imbi mbi matu lese. MOmbeibela mu nomahungi ohunga nomuano Jehova ma tjevera ovakarere ve morukapitaveze. Omahungi otja ingo ye tu pa ongamburiro yokutja eye wina me tu ṱakamisa nai.
18 Tara kotjisasanekero otjiwa Jesaja tja ungurisa mokusasaneka omuano Jehova me tu tjevera nokutuṱakamisa. Eye wa sasaneka Mukuru nomurise wozonḓu nu ovakarere va Mukuru e ve sasaneke nozondjona. Jesaja wa tja nai ohunga na Jehova: “Ma woronganisa ozondjona ne ze tjindi momaoko we.” (Jes. 40:11) Indu tji matu munu okuoko kwa Jehova a kwe tu pukata, tu muna kutja tu ri mondjeverero nu tu kara noupore momuinyo. Okutuvatera kutja tu kare noupore momuinyo, omukarere omuṱakame nomunazondunge wa toorora etjangwa ra Jesaja 41:10 otjetjangwa rombura ndji 2019, “OwAmi Ndjambi woye, o urumisiwa i otjiṋa!” Ripurira komambo omahuhumiṋe ngo. Owo maye ku pe omasa otja tji mo munu omarorero ngu maye ya.
EIMBURIRO 38 Eye me ku zeuparisa
^ par. 5 Etjangwa nda toororwa kombura ndji 2019 ma ri tu pe omapu 3 wokutja ongwaye tji twa sokuporimana nandarire indu oviṋa ovivi tji mavi tjitwa mouye poo kweṱe oveni. Orupa ndwi maru ka kahurura nawa omapu ngo nokutuvatera kutja atu ha uruma tjinene, nu tu kare nongamburiro yomasa mu Jehova. Ripurira oukoto ketjangwa rombura. Nu tjiwa etjangwa rombura ndi motjiuru. Indu tji wa tjiti nao ma ku ku vatere okutuurunga omauzeu ngu maye ya moruyaveze.
^ par. 1 Lesa o-Watchtower, ya Juli 2016, pomuk. 18.
^ par. 3 OMAMBO NGA KAHURURWA: Omakwizikiro omambo omundu nge hungira nge raisa kutja otjiṋa tja hungire tjiri matji yenenisiwa. Omakwizikiro Jehova nge tu pa ye tu vatera kutja atu he rikendere tjinene komauzeu ngu mape ya atu munu mehupo retu.
^ par. 4 Omambo nga “O tira” ya tamunwa povikando vitatu, mu Jesaja 41:10, 13, no 14. Omazeva otjingewo povikando ovingi ya tamuna embo ndi “Ami” (kokuhungirira ku Jehova). Ongwaye Jehova tja hinga Jesaja okuungurisa embo ndi “Ami” povikando ovingi nao? Okutuhonga epu enanḓengu rokutja eṱe matu yenene okuhinokutira indu tji twa kara nongamburiro mu Jehova.
^ par. 52 OMAKAHURURIRO WOVIPERENDERO:Ouṋepo weṱunḓu mau munu omauzeu poviungura, mau kondjo nouvere, mau munu omauzeu motjiungura tjokuzuvarisa, na poskole.
^ par. 54 OMAKAHURURIRO WOVIPERENDERO: Ozopolise za wire ombongarero yOvahongonone ndji mai tjitirwa mondjuwo yomundu, nungwari ovakambure va poro uriri kave nokutira.
^ par. 56 OMAKAHURURIRO WOVIPERENDERO: Tji matu tjiti omerikotameneno weṱunḓu aruhe ye tu vatera okukara nonḓaro orure.
