ORUPA RWOMAKONḒONONENO 5
Eṱe matu kayenda puna eṋe
“Matu vanga okurikuta kuna eṋe, tjinga atwa zuva kutja Ndjambi u ri puna eṋe!”—SAK. 8:23.
EIMBURIRO 26 Mwe tji tjitira Ami!
OMAPU KU MATU KATARA *
Ozonḓu zarwe (‘ovandu omurongo’) ve nenyando okurikotamena ku Jehova pu novatwirisiwa (‘Omujuda’) (Lesa oparagrafa 1-2)
1. Jehova wa tja mape tjitwa tjike moruveze rwetu?
JEHOVA wa hunganeka ohunga noruveze rwetu, nu wa tja: “Ovandu vozonganda omurongo mave kambura kombanda yOmujuda umwe, ave tja: ‘Matu vanga okurikuta kuna eṋe, tjinga atwa zuva kutja Mukuru u ri puna eṋe!’” (Sak. 8:23, NW) Embo ndi ‘Omujuda’ ma ri kuramene po imba Mukuru mba twirisa nombepo ondjapuke. Owo wina ve isanewa ‘Israel tja Mukuru.’ (Gal. 6:16, EEP) ‘Ovandu omurongo’ ve kuramena po imba mbe nomaundjiro wokukahupa nga aruhe kombanda yehi. Owo ve tjiwa kutja Jehova wa sera otjimbumba tjovatwirisiwa ondaya nu ve muna kutja ondjozikiro yapeke okurikotamena ku Ye pu novatwirisiwa.
2. Omomuano uṋe ‘ovandu omurongo’ mu ve ‘rikuta’ ku novatwirisiwa?
2 Nandarire kutja kaupupu okutjiwa omana wovatwirisiwa avehe mbe ri kombanda yehi ndino, * imba mbe nomaundjiro wokuhupa kombanda yehi mave yenene “okurikuta” kuna wo. Omomuano uṋe? Ombeibela i tja, “ovandu vozonganda omurongo mave kambura kombanda yOmujuda umwe ave tja: ‘Matu vanga okurikuta kuna eṋe, tjinga atwa zuva kutja Mukuru u ri puna eṋe!’” Ombeibela ya tamuna Omujuda umwe. Posi yokutja embo ndi “eṋe” na inga “puna eṋe” maye hungire ohunga novandu ovengi. Pu mape hee kutja embo ndi Omujuda ma ri kuramena po otjimbumba atjihe tjovatwirisiwa. Kunao imba mbe he ri ovatwirisiwa na imba mba twirisiwa ve karera Jehova pamwe. Nungwari owo kave vara ovatwirisiwa otjovahongore vawo, mena rokutja ve tjiwa kutja Jesus ee mu hongore wawo.—Mat. 23:10.
3. Omapuriro yeṋe ngu maye kazirwa morupa ndwi?
3 Ndino ku nOvakriste ovatwirisiwa mokati kovakarere va Mukuru, ovandu tjiva mape ya ave ripura kutja: (1) Ovatwirisiwa mave sokukara noumune uṋe ohunga nawo oveni? (2) Hapo imba mbe rya komboroto nokunwa kotjinwino pOmariro Omayapuke mave sokutjindwa vi? (3) Matu sokurikenda indu otjivaro tja imba mbu mave ri komboroto nokunwa kotjinwino tji matji yerurukire ko? Orupa ndwi maru ziri omapuriro ngo.
OVATWIRISIWA MAVE SOKUKARA NOUMUNE UṊE OHUNGA NAWO OVENI?
4. Erakiza riṋe ndi ri 1 Ovakorinte 11:27-29 ovatwirisiwa ndi mave sokuripurira ko nawa, nu ongwaye?
4 Ovatwirisiwa mave sokuripurira kerakiza ndi ri 1 Ovakorinte 11:27-29. (Lesa.) Omomuano uṋe omutwirisiwa mu ma yenene okurya komboroto nokunwa kotjinwino “momuhingo mbu ha sere” pOmariro Omayapuke? Eendu eye tji ma ri komboroto nokunwa kotjinwino nungwari ka hupu otja komirari vya Jehova omisemba. (Hebr. 6:4-6; 10:26-29) Ovatwirisiwa ve tjiwa kutja mave sokurira ovaṱakame indu tji mave vanga okukamuna ‘onduri kokutja ve katoṋe ihi otjihuze tjeyuru, . . . . Ndjambi tje ve isanena mu Kristus Jesus.’—Fil. 3:13-16.
5. Ovakriste mba twirisiwa mave sokukara noumune uṋe ohunga nawo oveni?
5 Ombepo ya Jehova ondjapuke i vatera ovakarere ve kutja ve risusuparise nungwari ave he ritongamisa. (Ef. 4:1-3; Kol. 3:10, 12) Kunao ovatwirisiwa kave rivara kutja ovasemba povandu varwe. Owo ve tjiwa kutja Jehova keve pe ombepo ondjapuke tjinene okukapita ovakarere varwe. Owo kave munu kutja ve tjiwa Ombeibela nawa okukapita ovandu varwe. Nu kave raere omundu warwe kutja eye wina wa twirisiwa nu ma sokuuta okurya komboroto nokunwa kotjinwino pOmariro Omayapuke. Nungwari, owo nomerisusuparisiro ve yakura kutja oJehova erike ongu ma yenene okuṋanga ovandu okuyenda keyuru.
6. Otja 1 Ovakorinte 4:7, 8, Ovakriste ovatwirisiwa mave sokuritjinda vi?
6 Nandarire kutja ovatwirisiwa ve tjiwa kutja ondjingonekero onene ku wo okuṋangwa okuyenda keyuru, owo kave undjire ko kutja varwe ve ve tjinde momuano wapeke. (Fil. 2:2, 3) Owo wina ve tjiwa kutja indu Jehova tje ve twirisa, eye katjiukisire otjiṋa ho kovandu varwe. Kunao omundu ngwa twirisiwa ka undjire ko kutja ovandu varwe mave sokukambura tjimanga kutja eye wa twirisiwa. Eye u tjiwa kutja Ombeibela i tja atu hakahanenepo okukambura momundu ngu ma tja Mukuru we mupe omerizirira wapeke. (Omavan. 2:2) Omukriste omutwirisiwa ka vanga kutja ovandu ve mupe ombango yapeke. Kunao eye karaere ovandu mbu va hakaene kutja omutwirisiwa. Nu tjiri eye ke nokuritongamisira otjiṋa ho.—Lesa 1 Ovakorinte 4:7, 8.
7. Ovikwaye ovatwirisiwa mbi ve sokupirukira, nu omena ra tjike?
7 Ovakriste ovatwirisiwa kave munu kutja owo mave sokukara pu novatwirisiwa ovakwao uriri, aayo owo ouṋepo wotjimbumba tjapeke. Owo kave paha okukara pu novatwirisiwa varwe kutja ve serekarere omuano mu va twirisiwa poo okukara nomakonḓononeno wOmbeibela otjokambumba peke. (Gal. 1:15-17) Ombongo kamaai kara nombwaneno indu ovatwirisiwa tji va tjiti oviṋa mbyo. Owo mave pirukire ombepo ondjapuke ndji vatera kutja ovakarere va Mukuru ve kare nohange nombwaneno.—Rom. 16:17, 18.
OVATWIRISIWA MAVE SOKUTJINDWA VI?
Atu vara ovatwirisiwa poo omundu auhe ngu hongorera po varwe, tjimuna owo ovandu ovatjiukwa (Lesa oparagrafa 8) *
8. Ongwaye tji matu hepa okukengeza komuano mbu matu tjindi imba mbe rya komboroto nokunwa kotjinwino pOmariro Omayapuke? (Wina lesa omambo wokehi.)
8 Hapo matu sokutjinda vi ovakambure ovatwirisiwa? Ma rire navi okuraisa ondjingonekero yapeke komundu, nandarire kutja eye omutwirisiwa wa Kristus. (Mat. 23:8-12) Indu Ombeibela tji mai hungire ohunga na imba mbe ri mounane mokati ketu, oyo i tja ngatu “horere kongamburiro yawo,” nungwari kai tu raere kutja matu sokuisapo ovandu otjovahongore vetu. (Hebr. 13:7) Otjiperi kutja Ombeibela i tja tjiva vawo va pwa ‘okupewa ondjambi potuvari.’ Mena rokutja owo ve “ungura otjiungura otjiwa” nu ve “ungura nomasa tji mave zuvarisa nokuhonga,” nungwari ka mena rokutja owo va twirisiwa. (1 Tim. 5:17) Indu tji twe ve tanga tjinene nokuvepa ondjozikiro yapeke, iho matji tjiti kutja ve ṱohoṋi. * Poo mape ya atji ve tjiti kutja ve ritongamise. (Rom. 12:3) Tjiri eṱe kamaatu vanga okuputarisa ovatwirisiwa va Kristus okutjita ondataiziro otja indjo.—Luk. 17:2.
9. Matu raisa vi ondengero ku imba mba twirisiwa i Jehova?
9 Matu raisa vi ondengero ku imba mba twirisiwa i Jehova? Eṱe katu sokuvepura kutja peya vi ve rire ovatwirisiwa. Indjo onḓuvasaneno pokati kawo na Jehova, nu eṱe katu nousemba wokupaha okutjiwa. (1 Tes. 4:11; 2 Tes. 3:11) Nu eṱe katu sokumuna kutja omukwao ngu va kupasana, ovanene ve poo okaṋepo karwe keṱunḓu re wina ka twirisiwa. Omaundjiro wokuyenda keyuru katjiṋa tji tji rumatwa okuza keṱunḓu. Nungwari Mukuru ongu ve toorora. (1 Tes. 2:12) Nu wina atu pura omapuriro ngu maye hihamisa varwe. Otjotjihorera, eṱe katu sokupura omukazendu womurumendu omukambure ngwa twirisiwa kutja okukahupa nga aruhe kombanda yehi nokuhinomurumendu we ku mu ṱuna vi. Kombanda ya avihe, eṱe tu nongamburiro kutja Jehova mouye oupe ma ka “kutisa atjihe tji tji nomuinyo.”—Eps. 145:16.
10. Omomuano uṋe mu matu ritjevere oveni ‘mokuhinokuhivirika ovandu’?
10 Indu tji matu tjindi ovatwirisiwa otjovandu mbe he ri ovananḓengu pu varwe, eṱe wina matu ritjevere oveni. Omomuano uṋe? Ombeibela i tu raera kutja ovatwirisiwa tjiva mape ya ave ha panḓere pouṱakame. (Mat. 25:10-12; 2 Petr. 2:20, 21) Kunao eṱe kamaatu kongorere varwe, nandarire kutja ovatwirisiwa poo ovakambure ovatjiukwa poo imba mba karera Jehova oruveze orure, indu tji tu hi ‘nokuhivirika ovandu.’ (Judas 16, EEP) Nu indu tji ve ha panḓerere po pouṱakame poo tji va isa ombongo yOukriste, eṱe kamaatu pandjara ongamburiro yetu mu Jehova poo okuisa okumukarera.
HAPO MATU SOKURIKENDA NOTJIVARERO TJA IMBA MBE KARA NORUPA MOMARIRO OMAYAPUKE?
11. Otjivaro tja imba mbe rya komboroto nokunwa kotjinwino pOmariro Omayapuke aatji runduruka vi?
11 Oure wozombura ozengi, otjivaro tja imba mbe rya komboroto nokunwa kotjinwino pOmariro Omayapuke aatji yaruka kehi. Posi yokutja mozombura nḓa, otjivarero ho tji yeruruka ombura aihe. Hapo matu hepa okurikenda ohunga notjiṋa ho? Kako. Ngatu tare kutja ongwaye tje he ri ohepero.
12. Ongwaye tji tu ha sokurikenda notjivaro tja imba mbu mave ri komboroto nokunwa kotjinwino pOmariro Omayapuke?
12 Jehova “u tjiwa imba ove.” (2 Tim. 2:19) Ovarumendu ovakambure mbe vara imba mbu mave ri komboroto nokunwa kotjinwino pOmariro Omayapuke kave tjiwa kutja ovatwirisiwa vatjiri ooveṋe, posi yokutja Jehova u tjiwa. Kunao otjivarero ho tji kamburira mo imba mbe nangarasi ovatwirisiwa posi yokutja mbe hiya twirisiwa. Otjotjihorera, tjiva va imba mba kara norupa kombunda va isa okukara norupa. Varwe mape ya mena rokutja ve nouzeu mourizemburuka poo momuinyo ve kambura kutja mave kanana meyuru puna Kristus. Oukahu kutja katu tjiwa nawa otjivaro tjovatwirisiwa mba sewa kombanda yehi.
13. Hapo Ombeibela i raisa kutja ovatwirisiwa vengapi mbu mave kara kombanda yehi indu ondatumisire ondirise tji ya utu?
13 Mape kara ovatwirisiwa mouparanga wouye indu Jesus tji me ya okuvetwara keyuru. (Mat. 24:31) Ombeibela i tja momayuva omasenina ma mu kara otjivarero otjiṱiṱi tjovatwirisiwa kombanda yehi. (Omavan. 12:17) Posi yokutja oyo kairaisa kutja i vengapi mbu mave sewa kombanda yehi indu ondatumisire ondirise tji ya utu.
Hapo matu raisa ongaro iṋe indu omundu tja utu okurya omboroto nokunwa otjinwino pOmariro Omayapuke? (Lesa oparagrafa 14)
14. Otja tji pa raisiwa mOvaroma 9:11, 16, matu rihongo tjike ohunga nomuano ovatwirisiwa mu ve toororwa?
14 Jehova ongu tya kutja oruṋe tji ma toorora omundu okurira omutwirisiwa. (Rom. 8:28-30) Jehova wa uta okutoorora ovatwirisiwa kombunda yombendukiro ya Jesus. Pe munika tjimuna meserewondo etenga Ovakriste avehe vatjiri va ri ovatwirisiwa. Mozombura nḓa kongorera ko, ovengi mbaave ritja Ovakriste kaave kongorere Kristus. Nandarire nao, mozombura nḓo Jehova wa twirisa ovandu tjiva mba ri Ovakriste vatjiri. Owo va ri tjimuna ovikokotwa Jesus mbya tja mavi hapa mokati kozondombora. (Mat. 13:24-30) Momayuva omasenina nga, Jehova u kayenda komurungu okutoorora ovandu mbu mave rire orupa rwa imba 144 000. * Kunao Mukuru tja tye okutoorora tjiva komurungu womaandero, eṱe tjiri katu sokuivaiva. (Lesa Ovaroma 9:11, 12, 16.) * Eṱe ngatu kengeze kutja atu ha kara nongaro tjimuna yovaungure imba Jesus mba hungira motjisasanekero tje. Owo va unaunina omuhona ohunga nomuano eye maa tjindi ovaungure imba mba uta oviungura vyawo moiri osenina.—Mat. 20:8-15.
15. Otja ku Mateus 24:45-47, hapo ovatwirisiwa avehe orupa ‘rOmukarere omuṱakame nomunazondunge’? Kahurura.
15 Ka avehe mbe nomaundjiro wokukahupa meyuru mbe ri orupa ‘rOmukarere omuṱakame nomunazondunge.’ (Lesa Mateus 24:45-47.) Tjimuna tji pa ri meserewondo etenga, Jehova na Jesus ndino ve ungurisa ovakambure tjiva okurisa poo okuhonga ovengi. Meserewondo etenga Ovakriste ovatwirisiwa tjiva uriri ombaave ungurisiwa okutjanga Omatjangwa wOtjingrike. Ndino, Ovakriste ovatwirisiwa tjiva uriri ombe nomerizirira wokuyandja “ovikurya moruveze ndwa tuwa po” kovakarere va Mukuru.
16. Ove we rihongo tjike morupa ndwi?
16 Twe rihongo tjike morupa ndwi? Jehova ma yandja omuinyo wa aruhe kotjimbumba otjinene tjovandu kombanda yehi nu okambumba okaṱiṱi make ka hupa meyuru okukahonapara puna Jesus. Jehova ma yandja ondjambi kovakarere ve avehe, ‘kOmujuda’ na imba ‘ovandu omurongo,’ nu eye ma undjire ko kuwo okukara nonḓuviro nokupanḓera pouṱakame. Avehe mave sokurisusuparisa. Nu mave sokurikotamena ku ye mombwaneno. Nokuungura oukukutu kutja pe kare ohange ku novakambure ovakwao mombongo. Otja tjinga tu ri komaandero wouye mbwi, eṱe ngatu kayende komurungu okukarera Jehova nokukongorera Kristus ‘otjorupanda rumwe rwozonḓu.’—Joh. 10:16.
^ par. 5 Mombura ndji, Omazemburukiro wonḓiro ya Kristus ma ye zemburukwa Oritjavari tji ye ri 7 ku April. Hapo matu sokukara noumune uṋe ohunga na imba mbe rya komboroto nokunwa kotjinwino pOmariro Omayapuke? Matu sokurikenda indu otjivaro tja imba mbu mave ri komboroto nokunwa kotjinwino tji matji yerurukire ko? Morupa ndwi matu kamuna omaziriro komapuriro ngo. Nu orupa ndwi rwa zikamene kepu rimwe tjimuna indwi ndwa ri mokambo kOruhungu ka Januari 2016.
^ par. 2 Otja kEpsalme 87:5, 6, Mukuru mape ya moruyaveze ma katjiukisa omana wa imba mbu mave ka honapara puna Jesus meyuru.—Rom. 8:19.
^ par. 8 Lesa okaongo nga, “Love ‘Does Not Behave Indecently’” mokambo kOruhungu ka Januari 2016.
^ par. 14 Nandarire kutja Oviungura 2:33 ri raisa kutja ombepo ondjapuke ya tirirwa okupitira mu Jesus, omundu auhe u ṋangwa i Jehova.
^ par. 14 Tji mo vanga ondjivisiro yokomurungu, lesa “Omapuriro okuza kovalese” mokambo kOruhunga 1 ku Mei 2007.
EIMBURIRO 34 Okukayenda mousemba
^ par. 56 OMAKAHURURIRO WOTJIPERENDERO:Ngatu tje omukuramene po ngu ri pu nomukazendu we okuza komberoo ohongora va koverwa i yovandu mbu mave ve perende pomaworonganeno wotukondwa. Tjiri iho otjiṋa tji tji hi nokuraisa ondengero.
