1-2. Ongaro iṋe ovakarere va Jehova ovengi ndji ve muna, nu iho tji ṱuna vi kuwo?

TARA kovihorera vitatu mbi: Omurumendu omukambure omutanda wa raerwa i yonganga kutja u nomutjise omuzeu mbu mau mu ngundiparisa tjinene. Omurumendu omukambure wotjiwondo tjozombura zokombanda 50 ngu ungura oukukutu wa pandjara oviungura vye nu keya muna vyarwe. Omukazendu omukambure omukurundu ka yenene okuungurira Jehova oviungura ovingi tjimuna tjaa tjiti.

² Indu tji uri mongaro tjimuna ndja tamunwa movihorera mbyo ove mape ya o rimunu kutja ko nokuyenena okuungurisiwa rukwao. Ozongaro nḓo pe ya aze tjiti kutja o hakara nondjoroka, u kare noumune ouvi ohunga na ove omuini, nu ze ṱuna koupanga woye novakweṋu.

3. Satan na imba mbe horera ku ye ve vara vi omuinyo womundu?

³ Ouye mbwi u raisa ombepo ya Satan ohunga nomuinyo womundu. Eye okuza kombutiro aa tjindi ovandu aayo kave nonḓengu oparukaze. Satan aa tjiwa kutja Eva tje ha karere nonḓuviro ku Mukuru ma ṱu, nandarire nao eye wa raera Eva kutja tja tjiti nao ma kara nousemba wokurinana omuini. Satan u honaparerapo ozongetjefa, ozohoromende nozongamburiro zouye mbwi. Kunao iho katjikumise kutja ovanane vozongetjefa, vozohoromende novanane vozongamburiro kave yandja ondengero komuinyo wovandu nu kave nakonatja kutja ovandu ve noumune uṋe.

4. Matu rihongo tjike morupa ndwi?

 ⁴ Jehova eye ke ri tjimuna Satan, eye u vanga kutja tu kare noumune ouwa ohunga na eṱe oveni nu eye u tu vatera tji turi mozongaro nḓu maze tjiti kutja tu ri mune okuhinonḓengu. (Eps. 136:23; Rom. 12:3) Orupa ndwi maru hungire ohunga nomuano Jehova me tu vatera mozongaro nḓa: (1) Tji u kondja nouvere, (2) ouzeu wotjimariva, na (3) indu oukurundu tji mau tjiti kutja tu ripure kutja eṱe katu notjiṋa tji twa ungurira Jehova motjiungura tje. Rutenga, matu rihongo kutja omena ra tjike tji matu yenene okukara nongamburiro kutja Jehova u nakonatja na eṱe.     

5. Otjikeṋa tji matji raisa kutja Jehova u nakonatja novandu?

⁵ Nandarire kutja twa utwa poruuma rwehi oweṱe ovananḓengu poruuma. (Gen. 2:7) Tara komapu tjiva kutja ongwaye tji matu tjiwa kutja Jehova u nakonatja na eṱe. Eye wa uta ovandu kutja ve horere kovikaṋena vye. (Gen. 1:27) Ovandu Mukuru mba uta ovananḓengu poviutwa avihe kombanda yehi, nu eye we vepa ouyara wokuhonaparera po ehi novipuka.—Eps. 8:4-8.

6. Otjikeṋa tjarwe tji matji raisa kutja Jehova u nakonatja novandu mbe he ri ohomonena?

⁶ Nandarire kombunda ya indu Adam tja tjita ouvi Jehova wa kayenda komurungu okurikendera ovandu. Eye we tu suvera tjinene nga tja yandja Omuna we omusuverwa Jesus otjotjisuta tjonguturiro. (1 Joh. 4:9, 10) Mena rouwa wotjisuta tjonguturiro, Jehova ma kapendura “ovandu avehe ovawa novavi” mba ṱa mena rouvi wa Adam. (Oviung. 24:15) Embo re ri raisa kutja oweṱe ovihuze ku ye nandarire kutja tu vera, oweṱe ovasyona, poo mena roukurundu.—Oviung. 10:34, 35.

7. Omapu yeṋe yarwe nge tjita kutja ovakarere va Mukuru ve kambura kutja Jehova u nakonatja nawo?

⁷ Eṱe tu nomapu omengi mu tu kambura kutja Jehova u nakonatja na eṱe. Eye we tu nana ku ye, nu u tara komuano mbu twa toorera komukambo kombuze ombwa. (Joh. 6:44) Otja tji matu tumbuka popezu na Jehova eye u tumbuka popezu na eṱe. (Jak. 4:8) Jehova wina u ungurisa oruveze rwe nomasa we okutuhonga okuraisa kutja oweṱe ovananḓengu ku ye. Eye u tjiwa kutja oweṱe ovangendu, nu matu yenene vi okurundurura ongaro yetu. Eye u tu vyura mena rokutja we tu suvera. (Omiano 3:11, 12) Iho tjiri otjiraisiro tjokutja Jehova u rikendera eṱe.

8. Omambo nga tjangwa mEpsalme 18:27-29 ye ṱuna vi komuano mbu tu ripura ohunga nomauzeu wetu?

⁸ Ovandu tjiva aave munu kutja Ombara David wa ri otjiṋa uriri, posi yokutja eye aa tjiwa kutja Jehova we mu suverere nu ee mu vatere. Oumune wa David mbo we mu vatera okutjinda ongaro ma ri. (2 Sam. 16:5-7) Indu tji tu ri momauzeu poo mombameno, Jehova u tu vatera kutja tu kare noumune warwe nokutja tu tuurunge omauzeu ngamwa aehe. (Lesa Epsalme 18:27-29.) Indu Jehova tji me tupe oruyameto, kape notjiṋa tji matji tu tjaere okumukarera nondjoroka. (Rom. 8:31) Matu katara kozongaro ndatu nḓu maze tu zemburukisa kutja Jehova we tu suvera nu u rikendera eṱe.

9. Ouvere mape ya u ṱuna vi kongaro yetu?

⁹ Ouvere u yenena okutuwisa momuinyo nu u tjita kutja tu kare noumune wokutja kamaatu ungurisiwa. Mape ya atu ṱohoṋi ovandu tji va tjiwa kutja twa vera poo indu tji matu hepa ombatero yawo. Nandarire kutja ovandu varwe kave tjiwa kutja twa vera, eṱe mape ya atu kondjo noumune ouvi ohunga na eṱe oveni.  Mena rokutja katu yenene okuungura oviṋa tjiva mbyaatu ungura, moruveze rouzeu ndo Jehova u tu yanḓiparisa. Omomuano uṋe?

10. Otja kOmiano 12:25, otjikeṋa tji matji tu vatere indu tji twa vere?

¹⁰ Tji twa vere, ‘embo ewa’ ri tu huhumiṋa. (Lesa Omiano 12:25.) MOmbeibela, Jehova wa tjanga omambo omawa nge tu zemburukisa kutja eye u nakonatja na eṱe nandarire kutja twa vera. (Eps. 31:19; 41:3) Tji matu lese omambo omawa ngo nokuyarukira po rukwao, Jehova me tu vatere kutja tu tjinde ozongendo nḓe yetwa i ouvere.

11. Omurumendu omukambure wa muna vi ombatero okuza ku Jehova?

¹¹ Tara kotjihorera tja Jorge. Omurumendu omutanda Jorge ngwa vera omutjise omuzeu mbwaa u handjauka tjimanga nu mbwa tjita kutja me rimune okuhina onḓengu. Jorge wa tja: “Ami hina pu mba undjira ko kutja me kara mongaro otja indjo mena romutjise mbo. Otja omutjise wandje tja u ririre ko omuvi ami ee ripura nomiano ehupo randje maari runduruka. Tjiri mba wire momuinyo nu mbe riyarikaṋa ombatero ku Jehova.” Hapo Jehova we mu vatera vi? Eye wa tja: “Mena rokutja mba ri nouzeu wokuzemburuka oviṋa, ami mba tunduuzwa okulesa omazeva omasupi mOmapsalme nge raisa kutja Jehova u rikendera ovakarere ve. Ami ee yarukire po okulesa omazeva ngo eyuva arihe, nu ye ndji huhumiṋa tjinene. Kombunda yoruveze orusupi ovandu va uta okumuna kutja mbi nondjoroka. Nu owo va uta okutja ongaro yandje ombwa aai ve tunduuza. Ami mba muna kutja Jehova wa zuvira ozongumbiro zandje. Eye we ndji vatera kutja mbi kare noumune ouwa ohunga na ami omuini. Ami mba uta okuyandja ombango koviṋa mbi ri mEmbo re ohunga nomuano eye me ndji vara nandarire kutja mba vera.”

12. Ovikwaye mbi mo yenene okutjita kutja u mune ombatero ya Jehova indu tji u kondja nouvere?

 ¹² Indu tji u kondja nouvere kara nongamburiro kutja Jehova ma tjiwa ongaro mu uri. Ningira ombatero ku ye kokutja u kare nomeripura omawa ohunga nongaro mu uri. Nu okuzambo paha omambo omahuhumiṋe mOmbeibela Jehova nge ku tjangera. Yandja ombango komazeva ngu maye raisa kutja Jehova tjiri u rikendera kovakarere ve. Tji wa tjiti nao, ove mo munu kutja Jehova u rikendera ku avehe mbe mu karera nouṱakame.—Eps. 84:11.

13. Okupandjara oviungura ku ṱuna vi kotjiuru tjeṱunḓu?

¹³ Omurumendu auhe ngu ri otjiuru tjeṱunḓu u vanga okuyandja oviṋa keṱunḓu re mbi ma ri hepa mehupo. Posi yokutja eye mape ya a pandjara oviungura, nandarire kutja ke notjiṋa otjivi tja tjiti. Eye mape ya a kondjo oukukutu okupaha oviungura vyarwe, posi yokutja ehe vi munu. Mena rongaro ndjo, eye mape ya a munu kutja kena ombatero. Hapo okuripurira komakwizikiro wa Jehova maku mu vatere vi?

14. Omena ra tjike Jehova tje yenenisa omakwizikiro we?

¹⁴ Jehova aruhe u yenenisa omakwizikiro we. (Jos. 21:45; 23:14) Eye u tjita nao mena romapu pekepeke. Rutenga, omena rokutja vi ṱuna kena re novikaṋena mbye tjiukirwa ko. Jehova wa kwizika kutja ma yama ovakarere ve ovaṱakame, neye ma yenenisa omakwizikiro we ngo. (Eps. 31:1-3) Nu wina, Jehova u tjiwa kutja matji rire otjihihamise kweṱe indu tje hi nakonatja na eṱe mbu turi orupa rweṱunḓu re. Eye wa kwizika kutja me tupe avihe mbi matu hepa mehupo, na mbi matu hepa okumukarera nouṱakame nu kape notjiṋa tji matji mu tjaere okuyenenisa omakwizikiro ngo.—Mat. 6:30-33; 24:45.

15. (a) Ouzeu uṋe Ovakriste veserewondo etenga mbu va muna? (b) Epsalme 37:18, 19 ri tupa ongamburiro ya ye?

 ¹⁵ Indu tjitwa tjiwa kutja ongwaye Jehova tje yenenisa omakwizikiro we eṱe matu kara nongamburiro yokutja eye ma yenene okutuvatera indu tji turi mouzeu wotjimariva. Tara kotjihorera tjOvakriste veserewondo etenga. Indu ombongo yOvakriste tjaai tatumisiwa mo Jerusalem, “ovakambure avehe, posi yovaapostele, va rimbarere akuhe.” (Oviung. 8:1) Hapo pa tjitwa tjike? Ovakriste mape ya va pandjara ozonganda zawo, ozongetjefa nu va kara nouzeu wotjimariva. Posi yokutja, Jehova ke ve imbirahire ko nu owo kave pandjarere ondjoroka ya wo. (Oviung. 8:4; Hebr. 13:5, 6; Jak. 1:2, 3) Jehova wa vatera Ovakriste ovaṱakame mbo neye wina metu vatere.—Lesa Epsalme 37:18, 19.

16. Otjikwaye tji mape ya a tji tjiti kutja tu kare noumune wokutja Jehova ka yakura omerikotameneno wetu?

¹⁶ Otja tji matu kurupa mape ya atu munu kutja tu ungurira Jehova oviṋa oviṱiṱi. Ombara David mape ya wa ri noumune mbo indu eye tjaa kurupa. (Eps. 71:9) Hapo Jehova me tu vatere vi?

17. Matu rihongo tjike okuza kotjihorera tjomukazendu omukambure wena Jheri?

¹⁷ Tara kotjihorera tjomukazendu omukambure wena Jheri. Eye wa ṋangwa kombongarero yokurihonga okuṱuna oviṋa ndja ri petuwo romerikotameneno, posi yokutja eye kaa vanga okuyenda. Eye wa tja: “Ami mba kurupa, owami omuhepundu, hi nondjiviro yokuungura otjiungura ho nu hi nonḓengu.” Ongurova komurungu yombongarero ndjo, eye wa kumba nomasa ku Jehova. Indu eye tjeya pEtuwo romerikotameneno meyuva ependukirwa, eye aa munu kutja ka sokukara  mbo. Omurumendu umwe omukambure pombongarero ndjo, wa ṋunisa kutja otjiṋa otjinanḓengu tjinene orondu tji tu nonḓero yokuhongwa i Jehova. Jheri wa tja: “Ami mba muna kutja ‘mbi nonḓero yokuhongwa i Jehova.’ Indu tji mba muna kutja Jehova wa zuvire ongumbiro yandje ami mba uta okurira. Ya ri tjimuna Jehova ee ndji raera kutja ami me yenene okumuungurira ovingi nu u nonḓero okundjihonga.” Jheri wa tja: “Pomautiro wombongarero ndjo ami ee tira, mba wire momuinyo nu mba ri nombameno. Posi yokutja kombunda yombongarero ndjo ami mba ri nongamburiro mu ami omuini, mba yanḓiparisiwa nu mba muna kutja me yenene okuungurira Jehova.”

18. Ombeibela i raisa vi kutja Jehova u yakura omerikotameneno wetu nandarire mokurundu?

¹⁸ Otja tji matu kurupa eṱe matu yenene okukara nongamburiro kutja Jehova we tupa oviungura mbye vanga kutja tu mu ungurire. (Eps. 92:12-15) Jesus wa honga kutja Jehova we tupa oviungura mbi ma vanga kutja tu mu ungurire, nandarire kutja eṱe tu vivara kutja ka vi nanḓengu. (Luk. 21:2-4) Kunao yandja ombango koviungura mbi mo yenene okuungura. Otjotjihorera, mo yenene okuzuvarisa, okukumbira ovakambure ovakweṋu nokuyanḓiparisa varwe kutja ve panḓere pouṱakame. Jehova u ku vara otja omuungure wa pamwe na ye mena ronḓuviro, nungwari ka mena roviungura mbi mo yenene okuungura.—1 Kor. 3:5-9.

19. Ovaroma 8:38, 39 ma ri tu hongo tjike?

¹⁹ Tjiri ondjingonekero onene okurikomena ku Jehova Mukuru ngu vara ovakarere ve avehe. Eye we tu uta kutja tu tjite ombango ye nu omerikotameneno watjiri ye tupa ondjoroka mehupo. (Omavan. 4:11) Nandarire kutja ouye kautu vara, Jehova eye u nakonatja na eṱe. (Hebr. 11:16, 38) Indu eṱe tji twau momuinyo mena rouvere, ouzeu wotjimariva noukurundu ngatu zemburuke kutja kape notjiṋa tji matji yenene okutupora korusuvero rwa Tatee wetu womeyuru.—Lesa Ovaroma 8:38, 39.