ORUPA RWOMAKONḒONONENO 4
‘Ombepo ya Ndjambi i hongonona’
‘Ombepo ya Ndjambi i hongonona pamwe nombepo yetu kutja oweṱe ovanatje va Ndjambi.’—ROM. 8:16.
EIMBURIRO 25 Otjiwaṋa otjitoororwa
OMAPU KU MATU KATARA *
Jehova wa tirira ombepo ye ondjapuke momuano omuhimise meyuva ra Pentekoste kombanda yotjimbumba tjOvakriste ape 120 (Lesa oparagrafa 1-2)
1-2. Ovikwaye ovihimisa mbya tjitwa meyuva ra Pentekoste 33 O.Z.?
YA RI Osondaha omuhukomunene moJerusalem, mombura ndji 33 O.Z., nu indo onda ri eyuva ra Pentekoste. Otjimbumba tjovahongewa mba ri ape 120 tja woronganena metuwo rokombanda. (Oviung. 1:13-15; 2:1) Omayuva omaṱiṱi komurungu wa nao Jesus we ve rakiza kutja ve kare moJerusalem mena rokutja owo aave sokumuna otjiyandjewa tjapeke. (Oviung. 1:4, 5) Hapo pa tjitwa tjike okuza mbo?
2 Ombeibela i tja:“Kamanga otji pa tjitwa ombosiro ndja zire meyuru tjimuna oyotjivepo tji matji hingi nomasa.” Ombosiro ndjo aai zuvakwa mondjuwo aihe. Nu okuzambo owo va muna ‘omaraka tjimuna owomuriro’ kombanda yoviuru vyovahongewa nu owo avehe ve “urisiwa nOmbepo Ondjapuke.” (Oviung. 2:2-4) Jehova wa tirira ombepo ye ondjapuke komabanda yotjimbumba ho momuano omuhimise. (Oviung. 1:8) Owo vari ovandu ovatenga okutwirisiwa i yombepo ondjapuke * nokupewa omaundjiro wokukahonapara puna Jesus meyuru.
OVIKWAYE MBI TJITWA OMUNDU TJA TWIRISIWA?
3. Imba mba ri po meyuva ra Pentekoste ongwaye tji ve hina va ri nomakeyakeyero kutja va twirisiwa nombepo ondjapuke?
3 Andakuzu ove wa ri umwe wovahongewa mba woronganene metuwo rokambanda meyuva ndo, ove kotjozemba otjiṋa ho. Otjiṋa tjaa tji munika tjimuna eraka romuriro reya kombanda yotjiuru tjoye nu ove wa uta okuhungira momaraka pekepeke. (Oviung. 2:5-12) Ove tjiri mo kara nongamburiro kutja wa twirisiwa nombepo ondjapuke. Hapo imba avehe mbe twirisiwa nombepo ondjapuke ve twirisiwa momuano umwe nu moruveze rumwe? Kako. Hapo eṱe matu tjiwa vi?
4. Hapo imba avehe mba twirisiwa meserewondo etenga va twirisiwa moruveze rumwe? Kahurura.
4 Ngatu tare kutja oruṋe omundu tji mape ya a twirisiwa. Otjimbumba tjOvakriste mba ri ape 120 mba twirisiwa nombepo ondjapuke meyuva ra Pentekoste, 33 O.Z., kawo aveyerike mba twirisiwa eyuva ndo. Kombunda meyuva otjingero ovandu ape 3 000 varwe wina va muna ombepo ondjapuke. Owo va twirisiwa indu tji va papitisiwa. (Oviung. 2:37, 38, 41) Posi yokutja ozombura kombunda yanao, kavakriste avehe mba twirisiwa pombapitisimo yawo. Ovasamaria va twirisiwa oruveze oruṱiṱi kombunda yokupapitisiwa. (Oviung. 8:14-17) Nu Kornelius neṱunḓu re va twirisiwa komurungu yombapitisimo yawo tji tja ri otjiṋa tjapeke.—Oviung. 10:44-48.
5. Otja 2 Ovakorinte 1:21, 22, ovikwaye mbi tjitwa indu omundu tja twirisiwa nombepo ondjapuke?
5 Wina ngatu tare kutja pe tjitwa tjike indu omundu tja twirisiwa nombepo ondjapuke. Irira ouzeu kovandu tjiva okuyakura kutja Jehova we ve toorora. Owo mape ya ave ripura kutja, ‘Ongwaye Jehova tje ndji toorora?’ Varwe mape ya kave kara noumune mbo. Kainatja kutja omundu u noumune uṋe, omuapostele Paulus wa kahurura ku imba avehe mba twirisiwa. Nu wa tja: ‘Eṋe mwa kambura mu Kristus, nu Ndjambi wa twa ko otjihako * tjouini we ku eṋe mokumupa Ombepo Ondjapuke ndja kwizikire. Ombepo Ondjapuke ndji oyo otjiyambo tjokutja eṱe matu pewa imbi Ndjambi mbya kwizika.’ (Ef. 1:13, 14.) Kunao Jehova u ungurisa ombepo ye ondjapuke okuraisa oukahu kOvakriste mbo kokutja eye we ve toorora. Momuano mbo ombepo ondjapuke “otjiyambo” poo omakwizikiro nge yandjwa kuwo kokutja moruyaveze mave kahupa meyuru nu ka kombanda yehi.—Lesa 2 Ovakorinte 1:21, 22.
6. Omukriste ngwa twirisiwa ma sokutjita ye kutja ma kamune ondjambi ye yomeyuru?
6 Indu Omukriste tja twirisiwa ihi katji hee kutja ma kamuna ondjambi yomeyuru? Otjingaperi kutja eye u kara nongamburiro kutja mai keyuru. Posi yokutja eye ma sokuzemburuka erakiza ndi: “Vakwetu ovasuverwa, otji mamu sokukondja tjinene komeho okuraisa mongarero yeṋu kutja Ndjambi we mu isana nu we mu toorora. Tji mwa tjiti oviṋa mbi, indino kamaamu poka ko kongamburiro yeṋu.” (2 Petr. 1:10) Kunao nandarire kutja Omukriste omutwirisiwa wa toororwa okuyenda keyuru, eye ma munu ondjambi ye indu tje ri omuṱakame uriri.—Fil. 3:12-14; Hebr. 3:1; Omavan. 2:10.
OMUNDU MA YENENE OKUTJIWA VI KUTJA OMUTWIRISIWA?
7. Ovatwirisiwa ve tjiwa vi kutja owo ve nomaundjiro wokukahupa meyuru?
7 Omundu ma yenene okutjiwa vi kutja eye u nomaundjiro wokukahupa meyuru? Eziriro ma ri munikwa momambo wa Paulus indu tja raera imba mba ri moRoma kutja oweṋe “ovatoororua ovajapuke.” Eye wina wa tja: “Orondu Ombepo Ndjambi ndje mu pa kai nakumuisa po ovakarere nu kai nakumumumaparisa; moruveze rwanao Ombepo mai mu isa po ovanatje va Ndjambi, nu momasa wOmbepo ndji eṱe matu ku ku Ndjambi atu tja: ‘Aba,’ okutja Tate. Ombepo ya Ndjambi mai hongonona pamwe nombepo yetu kutja oweṱe ovanatje va Ndjambi.” (Rom. 1:7; 8:15, 16) Okupitira mombepo ye ondjapuke Mukuru wa raisira ovatwirisiwa kutja owo ve nomaundjiro wokukahupa meyuru.—1 Tes. 2:12.
8. 1 Johanes 2:20, 27 ma ri raisa vi kutja ovatwirisiwa kave hepa okuraerwa kutja va twirisiwa?
8 Jehova u ve raisira oukahu momitima na mourizemburuka wawo kutja owo ve nomaṋangero wokuyenda keyuru. (Lesa 1 Johanes 2:20, 27.) Otjiperi kutja Ovakriste ovatwirisiwa ve hongwa i Jehova mombongo tjimuna ovakarere ve avehe. Posi yokutja kave hepa okuraerwa kutja owo ovatwirisiwa. Jehova wa ungurisa omasa wombepo ye ondjapuke okutjita kutja ovatwirisiwa ave haivaiva.
OWO VA ‘KWATWA RUKWAO’
9. Otja kOvaefese 1:18, omarundurukiro yeṋe omutwirisiwa nge muna?
9 Irira ouzeu kovakambure ovengi ndino okuzuva nawa kutja pe tjitwa tjike indu omundu tja twirisiwa. Omena ra tjike? Mena rokutja owo kave ya twirisiwa. Mukuru wa mema ovandu kutja ve hupe kombanda yehi, nungwari ka meyuru. (Gen. 1:28; Eps. 37:29) Posi yokutja Jehova wa toorora tjiva okukahupa meyuru. Indu Jehova tje ve twirisa eye u rundurura omaundjiro nomeripura wawo momuano omuhimise, kutja ve kare nomaundjiro wokukahupa meyuru.—Lesa Ovaefese 1:18.
10. ‘Okukwatwa rukwao’ ku heya tjike? (Wina lesa omambo wokehi.)
10 Indu Ovakriste tji va twirisiwa nombepo ondjapuke owo ve ‘kwatwa rukwao.’ * Jesus wina wa raisa kutja ouzeu okukahururira omundu ngu hiya twirisiwa kutja omundu tja ‘kwatwa rukwao’ poo tja ‘kwatwa mOmbepo’ u kara mongaro iṋe.—Joh. 3:3-8.
11. Kahurura kutja omundu tja twirisiwa omeripura we ye runduruka vi.
11 Ovakriste tji va twirisiwa ve rundurura vi omeripura wawo? Ovakriste mbo ngunda ave hiya twirisiwa i Jehova, owo ve kara nomaundjiro wokukahupa nga aruhe kombanda yehi. Owo ve undja nonḓero indu Jehova tji ma kaisapo ovarunde nokuyeta oparadisa kombanda yehi. Ngahino owo ve ripura ohunga nokuyakura okaṋepo keṱunḓu poo epanga rawo nda ṱa tji ma ri pendurwa. Posi yokutja indu tji va twirisiwa omeripura wawo ye runduruka. Omena ra tjike? Owo kave utu okuripura kutja okukahupa kombanda yehi nga aruhe katjiṋa otjiwa rukawo. Nu kave rundurura omeripura wawo mena rozombameno poo omauzeu omengi ngu ve muna. Owo kave utu okumuna kutja okuhupa kombanda yehi nga aruhe otjiṋa tji tji hi nokuvepa ondjoroka. Nungwari, Jehova u ungurisa ombepo ye ondjapuke okurundurura omeripura nomaundjiro wawo.
12. Otja ku 1 Petrus 1:3, 4, Ovakriste ovatwirisiwa ve noumune uṋe ohunga nomaundjiro wawo?
12 Omundu ngwa twirisiwa mape ya a munu kutja ke nonḓengu yokupewa ondjingonekero yapeke ndjo. Posi yokutja eye karoro okuivaiva kutja Jehova we mu toorora. Eye u kara nondjoroka nondangi indu tji me ripura ohunga nomaundjiro we wokukahupa meyuru.—Lesa 1 Petrus 1:3, 4.
13. Imba mba twirisiwa ve noumune uṋe ohunga nehupo rawo kombanda yehi?
13 Hapo iho tji heya kutja ovatwirisiwa ve vanga okukoka? Omuapostele Paulus wa zira epuriro ndo. Eye wa sasaneka orutu rwawo ku notjiṋa tji tji ha karerere, nu wa tja: “Eṱe mba ingee mbu twa tura otjihandura kombanda yehi tu tjema nu tu tjinda ouzeu, tjinga atu ha vanga okuisa po orutu ndwi rwoundu; tu vanga okuhwikika indwi rwomeyuru kombanda yaindwi rwoundu kutja ihi otjikoke tji ṋiṋiwe i omuinyo.” (2 Kor. 5:4) Ovakriste mbo kave vanga okukoka tjimanga orondu ngunda ve nonḓero mehupo ndi. Owo ve yorokera ehupo ndi nu ve vanga okukarera Jehova ku nomaṱunḓu nomapanga wawo eyuva arihe. Nungwari mu avihe mbi mave ungura, owo aruhe ve ripura ohunga nomaundjiro wawo woruyaveze.—1 Kor. 15:53; 2 Petr. 1:4; 1 Joh. 3:2, 3; Omavan. 20:6.
HAPO OVE WA TWIRISIWA I JEHOVA?
14. Ovikwaye mbi ha raisa kutja omundu wa twirisiwa nombepo ondjapuke?
14 Mape ya ove u ripura kutja wa twirisiwa i yombepo ondjapuke. Indu tji pe ri nao, ripura nomapuriro omananḓengu nga: Hapo u nonḓero yokutjita ombango ya Jehova? U muna kutja oove omupyuke motjiungura tjokuzuvarisa? Hapo oove omuhongwa wOmbeibela ngwa suvera okukonḓonona “oviundikwa ovikoto tjinene vya Ndjambi”? (1 Kor. 2:10) Hapo u muna kutja Jehova we kupa ondoṋeno motjiungura tjokuzuvarisa? U muna kutja u nomerizirira omanene wokuhonga varwe ohunga na Jehova? Hapo u muna kutja Jehova we ku vatera momiano omingi pekepeke mehupo roye? Indu tji wa ziri kutja ii komapuriro aehe nga, hapo iho matji hee kutja u nomaundjiro wokuyenda keyuru? Kako katjiperi. Omena ra tjike? Mena rokutja ovakarere va Mukuru avehe ve kara noumune otjingewo, nandarire kutja va twirisiwa poo kaveya twirisiwa. Nu okupitira mombepo ye ondjapuke, Jehova u yenena okuvatera ovakarere ve okutjita oviṋa mbyo, nandarire kutja mave kahupa meyuru poo kombanda yehi. Indu tji u nomakeyakeyero wokutja wa twirisiwa nombepo ondjapuke, ku raisa kutja ove koya twirisiwa. Imba mba twirisiwa kave kara nomakeyakeyero wokutja va twirisiwa i Jehova poo indee. Owo tjiri ve tjiwa.
Jehova wa yandja ombepo ye ondjapuke ku Abraham, Sara, David na Johanes omupapitise okutjita oviṋa ovihimise, posi yokutja eye ka ungurisire ombepo ndjo okuvepa omaundjiro wokukahupa meyuru (Lesa oparagrafa 15-16) *
15. Matu tjiwa vi kutja ka avehe mba muna ombepo ya Mukuru mbu mave i keyuru?
15 MOmbeibela mu novihorera ovingi vyovarumendu mba ri nongamburiro nu mba perwe ombepo ondjapuke, nungwari owo kava ri nomaundjiro wokuyenda keyuru. David aa hongorerwa po i yombepo ondjapuke. (1 Sam. 16:13) Ombepo ondjapuke ye mu vatera okuzuva oviṋa ovikoto ohunga na Jehova nu wina ye mu vatera okutjanga otupa tjiva twOmbeibela. (Mar. 12:36) Nu nandarire omuapostele Petrus wa tja David “ke na pa rondere keyuru.” (Oviung. 2:34) Johanes Omupapitise we ‘urisirwe nOmbepo ondjapuke.’ (Luk. 1:13-16) Jesus wa tja Johanes wa ri omunene povandu avehe, posi yokutja ke nokukara norupa mOuhona womeyuru. (Mat. 11:10, 11) Jehova wa ungurisa ombepo ye ondjapuke okuyandja omasa kovarumendu mbo kutja ve tjite oviṋa ovihimise, posi yokutja eye ka ungurisire ombepo ndjo okuvetoorora okukahupa meyuru. Hapo iho tji heya kutja owo kava ri ovaṱakame pu imba mbu mave kahupa meyuru? Kako. Iho tji heya kutja Jehova me keve pendura kombanda yehi mOparadisa.—Joh. 5:28, 29; Oviung. 24:15.
16. Ovakarere va Mukuru ovengi ve nomaundjiro yeṋe ndino?
16 Ovakarere ovengi va Mukuru mbe ri kombanda yehi ndino kave nomaundjiro wokukahupa meyuru. Tjimuna Abraham, Sara, David, Johanes omupapitise, novarumendu novakazendu varwe mba hupire moruveze Ombeibela tjaai tjangwa, ve nomaundjiro wokukahupa kombanda yehi indu Ouhona wa Mukuru tji wa utu okuhonapara.—Hebr. 11:10.
17. Omapuriro yeṋe ngu matu kazira morupa ndu maru kongorere ko?
17 Ndino mu novatwirisiwa mokati ketu, kunao mape ya atu kara nomapuriro. (Omavan. 12:17) Otjotjihorera, ovatwirisiwa mave sokukara noumune uṋe ohunga nawo oveni? Indu omundu mombongo yeṋu tja utu okurya komboroto nokunwa kotjinwino mOmazemburukiro wonḓiro ya Jesus, hapo ove mo sokumutjinda vi? Nu tjike otjivaro tja imba mbe ritja ovatwirisiwa tji matji yerurukire ko? Hapo otjiṋa ho tji sokukukendisa? Morupa ndu maru kongorere ko matu kazira omapuriro ngo.
^ par. 5 Okuza ku Pentekoste 33 O.Z., nga ku nai Jehova wa yandja kOvakriste tjiva omaundjiro wapeke wokukahonapara puna Omuna we meyuru. Hapo Ovakriste mbo ve tjiwa vi kutja va toororwa okukamuna omaundjiro wapeke ngo? Ovikwaye mbi tji twa indu omundu ngo tja ṋangwa okuyenda keyuru? Orupa ndwi rwa zikamene kepu rimwe tjimuna indi ndwa ri mokambo kOruhungu ka Januari 2016. Orupa ndwi maru ziri omapuriro omananambango ngo.
^ par. 2 OMAMBO NGA KAHURURWA: Okutwirisiwa nombepo ondjapuke: Jehova u ungurisa ombepo ye ondjapuke okutoorora omundu okukahonapara puna Jesus meyuru. Okupitira mombepo ye, Mukuru u kwizikira omundu ngo poo u yandja ‘otjiyambo tjokutja eye ma pewa imbi Ndjambi mbya kwizika’ moruyaveze. (Ef. 1:13, 14) Ovakriste mbo ve yenena okutja ombepo ondjapuke ‘i hongonona’ poo i raisa oukahu kuwo kutja ve nomaundjiro wokukahonapara meyuru.—Rom. 8:16.
^ par. 5 OMAMBO NGA KAHURURWA: Otjihako. Otjihako ovatwirisiwa tji ve muna katji karerere. Otjo tji karerera indu owo tji va rire ovaṱakame nga konḓiro poo oruveze orusupi ngunda ondatumisire ondirise ai hiya uta.—Ef. 4:30; Omavan. 7:2-4; lesa “Omapuriro okuza kovalese” mokambo kOruhungu ka April 2016.
^ par. 10 Tji mo vanga ondjivisiro yokomurungu ohunga nokutja “okukwatwa rukwao” ku heya tjike, lesa okambo kOruhungu 1 ku April 2009, omuk. 3-12.
EIMBURIRO 27 Okutjiukisa ovanatje vaMukuru
^ par. 57 OMAKAHURURIRO WOTJIPERENDERO:Nandarire kutja twa kamburwa mena rongamburiro yetu poo tu nouyara wokuzuvarisa nokuhonga ouatjiri, eṱe tu nomaundjiro wokukahupa kombanda yehi indu Ouhona wa Mukuru tji wa utu okuhonapara.
