1. Ehungi nda yandjwa pomaworonganeno wotukondwa mombura ndji 1935 ra ṱuna vi komurumendu omutanda?

PA RI eṱunḓu rOvakonḓonone vOmbeibela, nda ri ena rOvahongonone va Jehova morukapitaveze. Ovanene mba va ri novanatje vetatu ovazandu na vevari ovakazona, nu owo ve ve honga okukarera Jehova Mukuru nokuhorera ku Jesus Kristus. Omuatje wawo umwe omuzandu wa ri nozombura 18 indu tja papitisiwa mombura ndji 1926. Otja Ovakonḓonone avehe vOmbeibela tjaave tjiti ombura aihe, omuzandona omutanda ngwi aari komboroto nokunwa kotjinwino pOmariro Omayapuke wa Muhona. Posi yokutja, omaundjiro we woruyaveze ya runduruka indu tja zuva ehungi rOtjiingirisa enanḓengu nda ri nepu rOtjiingirisa ndi, “Otjimbumba otjinene tjovandu.” Ehungi ndo ra yandjwa mombura ndji 1935 i J.  F.  Rutherford pomaworonganeno wotukondwa moWashington D.C. tja U.S.A. Hapo Ovakonḓonone vOmbeibela ve rihonga ye pomaworonganeno ngo?

2. Ouatjiri uṋe Mbuti Rutherford mbwa kahurura mehungi re?

² Mehungi re Mbuti Rutherford wa kahurura kutja oouṋe mbe ri “otjimbumba otjingi tjovandu” (King James Version) poo “otjimbumba otjinene tjovandu,” mba tamunwa mOmavandururiro 7:9. Ovakonḓonone vOmbeibela rutenga aave munu kutja otjimbumba otjinene tjovandu aatji hee ovandu mbu mave i keyuru, posi yokutja mbe hi nokukanana puna Jesus mena rokutja kava ri ovaṱakame tjinene. Mbuti Rutherford wa ungurisa Omatjangwa okukahurura kutja otjimbumba otjinene tjovandu  kawomba mba toororwa okukahupa meyuru. Posi yokutja owo ozonḓu zarwe * za Kristus nḓu maze tuurunga “ondatumisire ondirise” nokukahupa nga aruhe kombanda yehi. (Omavan. 7:14) Jesus wa kwizika kutja, “Ami mbi nozonḓu zarwe nḓe hiya rira ozotjunda hi. Ozo wina mbi sokukezeeta; ozo maze puratene keraka randje aze rire orupanda rumwe rwozonḓu nḓe nomurise umwe.” (Joh. 10:16) Ozonḓu zarwe nḓa Ovahongonone va Jehova ovaṱakame mbe nomaundjiro wokukahupa nga aruhe mOparadisa kombanda yehi. (Mat. 25:31-33, 46) Ngatu tare komuano omazuviro omape wOmbeibela mu ya rundurura ehupo rovakarere ovengi va Jehova, tjimuna omuzandona wozombura 18 ngwa tamunwa rukuru.—Eps. 97:11; Omiano 4:18.

3-4. Pomaworonganeno wotukondwa wombura ndji 1935, ovandu ovengi va tjiwa ye ohunga nomaundjiro wawo, nu ongwaye?

³ Tjiri ingo ya ri omaworonganeno wotukondwa omawa tjinene. Omuyandje wehungi wa ningira ovapuratene kutja, “Avehe mbe nomaundjiro wokukahupa nga aruhe kombanda yehi arikaneye sekamee.” Omurumendu omukambure umwe ngwa ri pomaworonganeno ngo wa tja, otjingi tjovandu tja sekama. Nu Mbuti Rutherford wa tja: “Taree! Otjimbumba otjinene tjovandu!” Ovandu va ri nondjoroka. Imba mba kuramene va muna kutja owo kave nomaundjiro wokukahupa meyuru. Owo aave tjiwa kutja Mukuru kee ve twirisa nombepo ye ondjapuke. Meyuva ependukirwa romaworonganeno ovandu 840 va papitisiwa, nu ovengi va ri orupa rwozonḓu zarwe.

⁴ Kombunda yehungi ndo, omutanda ngwa tamunwa rukuru na varwe ovengi va isa okurya komboroto nokunwa kotjinwino pOmariro Omayapuke wa Muhona. Ovengi va ri noumune tjimuna womurumendu omukambure ngwa tja: “Omazemburukiro wonḓiro ya Jesus wombura ndji 1935, ongari omariro wandje omasenina okurya komboroto nokunwa kotjinwino. Mba muna kutja Jehova kaungurisire ombepo ye ondjapuke okundjipa omaundjiro wokukahupa meyuru. Nungwari, eye we ndji pa omaundjiro wokukahupa kombanda yehi nokukara norupa mokutjita kutja ehi ri rire oparadisa.” (Rom. 8:16, 17; 2 Kor. 1:21, 22) Okuza koruveze ndwo otjimbumba otjinene tjovandu tji yerurukira ko, nu owo ve ungura pu notjihupe tjovatwirisiwa. *

5. Jehova u ripura vi ohunga na imba mbe isa okurya komboroto nokunwa kotjinwino?

⁵ Hapo Jehova u noumune uṋe ohunga na imba mba isa okurya komboroto nokunwa kotjinwino kombunda yombura ndji 1935? Nu hapo ndino Jehova u noumuṋe uṋe na imba mba papitisiwa mbe muna kutja mave sokurya komboroto nokunwa kotjinwino pOmariro Omayapuke wa Muhona, posi yokutja kombunda mbe kamuna kutja owo kave ya twirisiwa nombepo ondjapuke? (1 Kor. 11:28) Tjiva aave ri komboroto nokunwa kotjinwino mena rokutja kaave tjiwa kutja ve nomaundjiro yeṋe. Posi yokutja, indu owo tji va yakura ondataiziro yawo nu ave isa okukara norupa nokukayenda komurungu okukarera Jehova nouṱakame, eye me ve vara otjorupa rwozonḓu zarwe. Nandarire kutja kave nokukara norupa  rukwao, owo mave kayenda komurungu okukara pOmariro Omayapuke wa Muhona mena rokutja ve nondangi tjinene ku imbi Jehova na Jesus mbi ve ve tjitira.

6. Jesus wa raera ovaengeli okutjita ye?

⁶ Mena rokutja ondatumisire ondirise iri popezu, eṱe matu tunduuzwa okutara ku imbi Omavandururiro ekondwa 7 mbi ri hungira ohunga nOvakriste ovatwirisiwa notjimbumba otjinene tjozonḓu zarwe. Mekondwa ndo Jesus wa raera ovaengeli okukayenda komurungu okuhanda ozombepo ine nḓu maze yeta omanyoneno. Owo va raerwa kutja ave ha isa ozombepo nḓo okuhinga kombanda yehi nga ovatwisirsiwa avehe tji va twakewa otjiyambo, pu mape hee kutja Jehova we ve yakura kutja ovaṱakame. (Omavan. 7:1-4) Mena rouṱakame wawo, ovangu va Kristus ovatwirisiwa mave pewa ondjambi yokukarira ozombara novapristeri puna ye meyuru. (Omavan. 20:6) Jehova, Jesus novaengeli mave kara nondjoroka tjinene indu imba 144 000 tji mave munu ondjambi yawo yomeyuru.

7. Johanes wa muna oouṋe motjirimunikise, nu owo aave ungura ye otja kOmavandururiro 7:9, 10? (Tara kotjiperendero tjokombanda yokambo nga.)

⁷ Kombunda yokuhungira ohunga nozombara novapristeri 144 000, Johanes wina wa muna otjiṋa tjarwe otjinanambango. Eye wa muna “otjimbumba otjinene tjovandu” mba tuurunga oArmagedon. Ovimbumba vivari mbi vya panguka, mena rokutja otjimbumba otjinene tjovandu tji novandu ovengi okukapita imba 144 000 nu eṱe katu nokutjiwa kutja ovandu vengapi mbe ri orupa rotjimbumba ho. (Lesa Omavandururiro 7:9, 10.) Owo va hwikikire “ozombanda ozombapa ozonde,” iho tji raisa kutja owo ve kayenda komurungu ‘okuritjevera’ kouye wa Satan nokurira ovaṱakame ku Mukuru na Kristus. (Jak. 1:27) Owo va ravaera kutja va yamwa mena ra imbi Jehova na Jesus ngu ri Ondjona ya Mukuru, mbi va tjita. Wina owo va toora otutavi twomavare, okuraisa kutja va yakura Jesus otjOmbara ndja zikwa i Jehova.—Sasaneka Johanes 12:12, 13.

8. Omavandururiro 7:11, 12 ri tu raera tjike ohunga na Jehova, Jesus, ovaengeli novatwirisiwa mbu mave pendurwa?

⁸ Lesa Omavandururiro 7:11, 12. Hapo pa tjitwa tjike indu imba mba ri meyuru tji va muna otjimbumba otjinene tjovandu? Johanes wa muna ovandu avehe meyuru ave nondjoroka nokutanga Mukuru, indu tji va mu notjimbumba otjinene tjovandu. Jehova, Jesus, ovaengeli novatwirisiwa mbu mave pendurwa mave kakara nondjoroka okumuna omayenenisiro wotjirimunikise ho indu tji mave munu otjimbumba otjinene tjovandu mba tuurunga ondatumisire ondirise.

9. Otja kOmavandururiro 7:13-15, imba mbe ri orupa rotjimbumba otjinene ve ungura ye ndino?

⁹ Lesa Omavandururiro 7:13-15. Johanes wa tjanga kutja otjimbumba otjinene tjovandu ‘tja koha ozombanda zatjo ozonde natji ze pembayerisa nombinḓu yOndjona.’ Iho matji hee kutja owo ve nomeritjiviro omawa womomutima nu Jehova u ve vara otjovasemba komurungu we. (Jes. 1:18) Owo Ovakriste mbe riyandja ku Jehova nokupapitisiwa. Nu ve nongamburiro yomasa mombunguhiro ya Jesus noupanga ouwa kuna Jehova. (Joh. 3:36; 1 Petr. 3:21) Kunao, Jehova u nondjoroka nawo nu owo mave yenene ‘okumukarera omutenya nouṱuku’ kombanda yehi. Owo nai ve zuvarisa ombuze ombwa yOuhona nonḓero nokukaisapo ovandu ovahongewa, mena rokutja Ouhona wa Mukuru ootjiṋa otjinanḓengu tjinene kuwo.—Mat. 6:33; 24:14; 28:19, 20.

10. Otjimbumba otjinene tjovandu tji nongamburiro mu ye, nu matji kamuna omayenenisiro womakwizikiro yeṋe?

 ¹⁰ Otjimbumba otjinene tjovandu mba tuurunga ondatumisire ondirise tji nongamburiro kutja Mukuru ma kayenda komurungu okuveṱakamisa mena rokutja, “ingwi ngwa haama kotjihavero tjouhona me ve yama mokukara popezu na wo.” Ozonḓu zarwe ze undja nonḓero omayenenisiro womakwizikiro nga: “Eye ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao.”—Omavan. 21:3, 4.

11-12. (a) Ozondaya zeṋe otjimbumba otjinene tjovandu nḓu mave kamuna otja kOmavandururiro 7:16, 17? (b) Ovikwaye ozonḓu zarwe mbi mave yenene okutjita pOmazemburukiro wonḓiro ya Jesus nu ongwaye?

¹¹ Lesa Omavandururiro 7:16, 17. Moruveze ndwi ovakarere va Jehova tjiva ve muna ouzeu wondjara mena rokuhinovimariva mbya yenene okuranda ovikurya mbi mave hepa, poo mena romauzeu warwe nge yetwa i yovita. Nu varwe va paterwa motjovakamburwa mena rongamburiro yawo. Posi yokutja, imba mbe ri orupa rotjimbumba otjinene ve nondjoroka nomasa. Mena rokutja ve tjiwa kutja kombunda yokutuurunga omanyoneno wouye ourunde mbwi owo aruhe mave kara novikurya ovingi, noviṋa mbi mavi kurisa oupanga wawo kuna Jehova. Indu ouye wa Satan tji wa nyonwa, Jehova ma tjiti kutja imba wotjimumba otjinene ave ha munu otjipo tjomazenge we tji matji kara tjimuna ‘oupyu ousesete.’ Kombunda yondatumisire ondirise imba mba tuurunga mave kamuna ‘omeva omanamuinyo’ nga aruhe. Tjiri otjimbumba otjinene tjovandu tji nomaundjiro omawa. Ovandu omangete omengi mave hupu nga aruhe, nokuhinokukoka.—Joh. 11:26.

¹² Ozonḓu zarwe ze nondangi ku Jehova na Jesus mena romaundjiro omawa. Nandarire kutja Jehova kee ve toorora okukahupa meyuru, eye we ve suvera nomasa tjimuna tja suvera ovatwirisiwa. Ovatwirisiwa nozonḓu zarwe mave yenene okutanga Mukuru na Kristus. Omuano umwe mu mave yenene okutjita nao okukara pOmariro Omayapuke wa Muhona.

13-14. Ongwaye ovandu avehe tji mave sokukara pOmazemburukiro wonḓiro ya Kristus?

¹³ Mozombura nḓa, ape omundu umwe movandu 1 000 ongurya komboroto nokunwa  kotjinwino pOmariro Omayapuke. Ozombongo ozengi mouye kaze novandu mbe rya komboroto nokunwa kotjinwino. Ovandu ovengi mbe kara pOmazemburukiro ngo ve nomaundjiro wokukahupa kombanda yehi. Nu hapo ongwaye owo tji ve kara pOmariro Omayapuke wa Muhona? Owo ve kara pOmazemburukiro ngo tjimuna omundu tje yenda korukupo rwepanga re. Ovandu ve yenda komikandi vyomapanga wawo mena rokutja mave vanga okuveraisira orusuvero nokuyandja oruvara kovakupasane. Kunao, ozonḓu zarwe ze kara pOmazemburukiro wonḓiro ya Jesus mena rokutja ve vanga okuraisa orusuvero rwawo nokuyandja oruvara ku Kristus novatwirisiwa. Nu wina ve vanga okuraisa ondangi kombunguhiro ya Jesus ndja tjita kutja ve yenene okukahupa nga aruhe kombanda yehi.

¹⁴ Epu rarwe enanḓengu ozonḓu zarwe mu ze kara pOmazemburukiro wonḓiro ya Kristus, omena rokuvanga okukara nonḓuviro ketwako ra Jesus. Indu Jesus tja zikamisa Omariro Omayapuke ngo kovaapostele ve ovaṱakame, eye wa tja: “Ihi tjiteye kokuzemburuka Ami.” (1 Kor. 11:23-26) Ozonḓu zarwe ze kayenda komurungu okukara pOmariro Omayapuke wa Muhona, mena rokutja pe novatwirisiwa tjiva ngamba kombanda yehi. Nu owo ve ṋanga varwe okukara pOmazemburukiro ngo puna wo.

15. Ovikwaye mbi matu yenene okutjita okutanga Mukuru na Kristus pOmazemburukiro ngo?

¹⁵ POmariro Omayapuke wa Kristus, eṱe tu kara nondjingonekero okutanga Mukuru na Kristus indu tji matu imbura nokukumba. Ombura ndji ehungi ndo ri nepu ndi, “Kara nondangu ku imbi Mukuru na Kristus mbi ve kutjitira.” Oro ma ri tu vatere okukara nondangi ku Jehova na Kristus. Kunao, indu omboroto notjinwino tji mavi yandjwa, eṱe matu yenene okuripura ohunga nokutja vi kuramena po orutu nombinḓu ya Jesus. Nu matu ripura ohunga nomuano Jehova me tu raisira orusuvero mokuyandja Omuna we okutuṱira kokutja tu kare nomuinyo. (Mat. 20:28) Auhe ngwa suvera Tate wetu womeyuru nOmuna we ma vanga okukara pOmazemburukiro wonḓiro ya Jesus.

16. Omomiano viṋe ovatwirisiwa nozonḓu zarwe mu ve ri tjimwe?

¹⁶ Momiano tjiva ovatwirisiwa nozonḓu zarwe ve ri tjimwe. Jehova wa suvera ovimbumba aviyevari mbi pu pe ṱeki nu ovyo ovinanḓengu ku ye. Eṱe matu tjiwa otjiṋa ho mena rokutja eye wa yandja Omuna we okuyekuṱira ovimbumba aviyevari mbyo. Posi yokutja, ovimbumba mbi vi nomaundjiro nga panguka. Nungwari ovyo mavi sokurira oviṱakame ku Mukuru na Kristus. (Eps. 31:23) Nu zemburuka kutja ombepo ya Mukuru ondjapuke i ungura  pu pe ṱeki pamwe ku eṱe atuhe. Iho matji hee kutja Jehova u yandja ombepo ye ondjapuke komundu auhe otja pu ma hepa.

17. Otjihupe tjovatwirisiwa ve nomaundjiro waye?

¹⁷ Ovakriste ovatwirisiwa kave kwatwa nomaundjiro wokukahupa meyuru. Mukuru u ve pa omaundjiro ngo. Owo ve ripura ohunga nomaundjiro wawo, ve kumba nu ve nonḓero yokukamuna otjiyandjewa tjawo tjomeyuru. Owo nandarire kave tjiwa kutja otutu twawo twombepo matu kasana pi meyuru. (Fil. 3:20, 21; 1 Joh. 3:2) Posi yokutja ve nonḓero yokukahakaena kuna Jehova, Jesus, ovaengeli novatwirisiwa imba ovarwe mOuhona womayuru.

18. Ozonḓu zarwe ze nomaundjiro waye?

¹⁸ Ozonḓu zarwe ze nomaundjiro wokukahupa nga aruhe kombanda yehi. Indjo onḓero ovandu avehe ndji ve nayo. (Omuzuv. 3:11) Owo ve undja oruveze indu tji mave vatere okutjita kutja ehi arihe ri rire oparadisa. Owo mave tungu ozondjuwo zawo, ave kunu nokuyorokera ouveruke ouwa pu nomaṱunḓu wawo. (Jes. 65:21-23) Nu ve nomaundjiro wokukaryangera otuveze otuingi kombanda yehi, okukamuna ozondundu, omahwa nomironga nu wina okukakonḓonona oviutwa avihe vya Jehova. Nu tjinenenene owo ve nondjoroka kutja oupanga wawo kuna Jehova mau ke kurira ko.

19. Auhe wetu ma sokutjita ye pOmazemburukiro wonḓiro ya Kristus, nu ombura ndji maye zemburukwa ruṋe?

¹⁹ Jehova wa yandja ku auhe wovakarere ve omaundjiro omawa woruyaveze. (Jer. 29:11) Omazemburukiro wonḓiro ya Kristus, oruveze orunanḓengu kweṱe atuhe okutanga Mukuru na Kristus ku avihe mbi ve tu tjitira kokutja tu kakare nomuinyo waaruhe. Nu otjo otjitjitwa otjinanḓengu tjinene kOvakriste vatjiri tji ve kara natjo ombura aihe. Ombura ndji Omazemburukiro wonḓiro ya Kristus maye zemburukwa tji yeri 27 ku Marta 2021 Oroviungura, eyuva tji ra kahita. Ovengi va tura motuveze mu mave yenene okukara norupa motjitjitwa otjinanḓengu ho. Nu varwe, nandarire kehi yomapirukiro ve yenena okukara potjitjitwa ho. Tjiva ve zemburuka otjitjitwa ho ngunda ave ri motjovakamburwa. Otja Jehova, Jesus, ovaengeli novatwirisiwa mba pendurwa tji mave tarere auhe wetu, kutja ombongo aihe ovandu motjimbumba poo omundu kourike we, atuhe ngatu kare nomazemburukiro omawa wonḓiro ya Kristus.