1. Ovikeṋa mbi matu yenene okuningira tjimuna Ombara David?

EṰE atuhe tu zera okuhupa ehupo rohange. Kape nomundu ngu kara nondjoroka indu tje ri mombameno. Oruveze rumwe mape ya tu kondja nomauzeu nge tu kendisa. Otjiperi kutja, ovakarere va Jehova tjiva mape ya ve pura omapuriro Ombara David nga pura ku Jehova. Eye wa pura kutja, “Hi tjinde ouzeu momuinyo wandje orure nai nga ruṋe? Hi kare noruhoze momutima wandje ouṱuku nomutenya nga ruṋe?”—Eps. 13:2.

2. Matu kahungirira ku ye morupa ndwi?

² Nandarire kutja eṱe povikando tjiva tu kara nomeripura nge tu kendisa, matu yenene okuritjaera komeripura ngo. Morupa ndwi matu katara koviṋa tjiva mbi tjita kutja tu rikende. Okuzambo matu kahungirira komiano hamboumwe mbi mavi tu vatere okutjinda omauzeu wetu noupore.

3. Ovikeṋa mbi tjita kutja tu rikende nu matu yenene okuviyepa vi?

³ Pe noviṋa ovingi mbi tu kendisa nu eṱe kamaatu yenene okuvitjaera. Otjotjihorera, eṱe kamaatu yenene okutjaera omuano opereisa yovikurya, ozombanda nozondjuwo mu vi yerurukira ko ombura aihe. Nu wina kamaatu yenene okutjaera omuano imba mbu tu ungura pamwe poo mbu tu hita pamwe oskole mu ve tu popa okukora ovizeze poo okutjita oruvakiro. Nu eṱe kamaatu yenene okutjaera ozondjito ozombi kutja aze ha tjitwa momaturiro wetu. Eṱe tu muna omauzeu  ngo mena rokutja tu hupa mouye ovandu ovengi mu ve ha hupu otja komirari vyOmbeibela. Satan, mukuru omurunde wouye mbwi, u tjiwa kutja ovandu tjiva mave isa okukarera Jehova mena ‘romerikendero wouye mbwi.’ (Mat. 13:22; 1 Joh. 5:19) Kunao eṱe katu temisiwa i yomauzeu wouye mbwi nge tjita kutja ovandu ve rikende.

4. Ovikwaye mbi mape ya a vi tjitwa indu omauzeu wetu tji ya utu okutukendisa tjinene?

⁴ Eṱe mape ya atu rikende ohunga nomauzeu wetu nga tji tu hi nokuripura notjiṋa tjarwe. Otjotjihorera, mape ya atu rikende kutja kamaatu munu ovimariva mbya yenene okuranda oviṋa mbi matu hepa. Poo atu rikende kutja tji twa vere kamaatu i koviungura poo matu pandjara oviungura vyetu. Nu wina mape ya atu rikende kutja kamaatu yenene okurira ovaṱakame tji twa rorwa okuteya omatwako wa Mukuru. Moruveze rwa tjimanga Satan ma ungurisa imba mbe ri kehi ye okurwisa ovakarere va Mukuru. Mape ya atu rikende kutja matu tjiti vi indu tja tjiti nao. Poo atu ripura kutja, ‘Hapo onavi okurikenda ohunga noviṋa mbyo?’

5. Hapo Jesus a hee tjike indu tja tja: ‘Amu rikende’?

⁵ Matu tjiwa kutja Jesus wa raera ovemukongorere kutja, ‘Amu rikende.’ (Mat. 6:25) Hapo Jesus a hee kutja katu sokurikendera otjiṋa? Kako! Zemburuka kutja moruveze orukuru ovakarere va Jehova ovaṱakame aave rikende wina, posi yokutja eye wa ri nonyuṋe mu wo. * (1 Ozomb. 19:4; Eps. 6:3) Otjiperi kutja Jesus u tu huhumiṋa nomambo ngo. Eye ka vanga kutja tu rikende ohunga noviṋa mbi matu hepa nga tji tu hi nokumuna kutja okukarera Jehova otji tji ri otjiṋa otjinanḓengu tjinene mehupo retu. Matu yenene okutjita vi indu tji matu rikende?—Lesa okaonga nga “ Oviṋa mbi mo yenene okutjita.”

6. Otja kOvafilipi 4:6, 7, otjikeṋa tji matji tu vatere okuporimana tji tu nozongendo?

⁶ (1) Kumba aruhe. Indu tji u nouzeu mbu mau ku kendisa, mo yenene okukumba ku Jehova kutja me ku vatere. (1 Petr. 5:7) Jehova ma yenene okuzuvira ozongumbiro zoye mokukupa ‘ohange ndja kapita ozondunge azehe zovandu.’ (Lesa Ovafilipi 4:6, 7.) Jehova me ku pe ohange ndjo okupitira mombepo ye ondjapuke onamasa.—Gal. 5:22.

7. Otjikeṋa tji matu sokuzemburuka tji matu kumbu ku Mukuru?

⁷ Indu tji mo kumbu ku Jehova mu raera oviṋa avihe mbi mavi ku kendisa. Mu raera ohunga nouzeu mbu u nawo nu mu kahururira kutja mau ku kendisa pu pe ṱa pi. Ouzeu mbwo tji mau yenene okuzengururwa, mu ningira ounongo mbu mau ku vatere okuuzengurura. Nu tji u hi nokuyenena okuzengurura ouzeu mbwo, ningira Jehova me ku vatere kutja o he rikende tjinene. Indu tji wa raere Jehova oviṋa avihe, otja oruveze tji maru kayenda ove mo utu okumuna omuano Jehova ma zira ozongumbiro zoye. Indu eziriro tji u heri mwine tjimanga, o yumbu ohama. Jehova u vanga kutja u mu raere avihe nu wina u kayende komurungu okukumba.—Luk. 11:8-10.

8. Ovikeṋa mbi matu sokutamuna mozongumbiro zetu?

⁸ Otja tji mo raere ozongendo zoye ku Jehova mongumbiro, raisa ondangi wina. Onawa okuripura ohunga noviṋa oviwa mbi tu navyo, nandarire kutja tu muna omauzeu omengi. Nu hapo ove mo yenene okutjita vi indu tji u hi nokutjiwa okuraera Jehova oviṋa  mbi mavi ku kendisa momuinyo? Zemburuka kutja Jehova ma ziri ongumbiro yoye nandarire tji wa tja ‘Ndji vatera!’—2 Ekuruh. 18:31; Rom. 8:26.

9. Matu sokutjita vi indu tji matu tira?

⁹ (2) Riyameka kounongo wa Jehova, o riyameke ku imbi mbi mo nangarasi motjiwa. Meserewondo oritjahambondatu K.O.Z., ovandu va Juda aave tira Ovaasirie. Nu mena romerihahiziro nokukondja kutja ave ha huurwa i Ovaasirie, owo va ka paha ombatero kOvaengipte. (Jes. 30:1, 2) Jehova we ve rakiza kutja okuriyameka kOvaengipte ombandjarero. (Jes. 30:7, 12, 13) Okupitira mu Jesaja, Jehova we ve raera omuano mu mave munu ondjeverero yatjiri. Eye wa tja: “Omasa weṋu maye zu mokuporimana na mokuriyameka” ku Jehova.—Jes. 30:15.

10. Omomiano viṋe mu matu yenene okuriyameka ku Jehova?

¹⁰ Omomiano viṋe mu matu yenene okuriyameka ku Jehova? Ngatu tare kovihorera tjiva. Ngatu tje wa munu oviungura mbi mavi sutu nawa, posi yokutja mavi hepa kutja u ungure ozoiri ozengi nu kavi nokukupa oruveze okuungurira Jehova tjimuna tji u tjita. Poo pe nomundu ngu mu ungura pamwe ngu ku vanga, posi yokutja kamukarere wa Mukuru ngwa papitisiwa. Poo mo tjiti vi indu okaṋepo keṱunḓu roye tji ka tja, tji wa kayenda komurungu okukarera Jehova me ku nakaura? Mozongaro azehe ozonḓeu nḓo, ove mo hepa okutoora omukambo. Posi yokutja, Jehova me ku pe omuhunga mbu mo hepa. (Mat. 6:33; 10:37; 1 Kor. 7:39) Epuriro orondi rokutja, Hapo mo riyameke ku Jehova nokukara nonḓuviro komuhunga mbwe ku pe?

11. Ovihorera viṋe vyOmbeibela mbi mavi tu vatere okuporimana indu tji matu pirukirwa?

¹¹ (3) Rihongera kovihorera oviwa novivi. Ombeibela i novihorera ovingi mbi raisa ounanḓengu wokukayenda komurungu okuporimana nokuriyameka ku Jehova. Otja tji mokonḓonona ovihorera mbyo, ripura ohunga nokutja ovikwaye mbya vatera ovakarere va Mukuru okuporimana nandarire kehi yomapirukiro omazeu. Otjotjihorera, indu otjombanguriro tjotjira tjOvajuda tji tja tjaera ovaapostele okuzuvarisa, owo kaave tira. Posi yokutja, va hungira nouvanḓe kutja, “Omundu wa sokukara nonḓuviro ku Ndjambi komeho yokukara nonḓuviro kovandu.” (Oviung. 5:29) Nandarire kombunda yokutonwa, ovaapostele kaave tira. Omena raye? Mena rokutja owo aave tjiwa kutja Jehova u ri munda wawo, nu u nonyuṋe mu wo. Kunao, va kayenda komurungu okuzuvarisa ombuze ombwa. (Oviung. 5:40-42) Nu wina, omuhongewa Stefanus ngunda e hiya ṱa, wa kayenda komurungu okukara nohange nu omurungu we aau munika “otja omurungu womuengeli.” (Oviung. 6:12-15) Omena raye tja ri nohange? Mena rokutja aa tjiwa kutja Jehova wari nonyuṋe mu ye.

12. Otja 1 Petrus 3:14 nekondwa 4:14, ongwaye tji matu yenene okukara nondjoroka indu tji matu tatumisiwa?

¹² Ovaapostele va ri noviraisiro kutja Jehova wa ri puna wo. Eye we ve pa omasa okutjita ovihimise. (Oviung. 5:12-16; 6:8) Nungwari Jehova ndino ke tupe omasa okutjita ovihimise. Posi yokutja, okupitira mEmbo re, Jehova u tu raera kutja tji twa tatumisirwa ousemba eye u ri puna eṱe nu me tupe ombepo ye ondjapuke. (Lesa 1 Petrus 3:14; 4:14.) Kunao, eṱe katu sokurikenda ohunga nondatumisire ndji matu kamuna moruyaveze nungwari matu sokupamisa ongamburiro yokutja Jehova ma kara puna eṱe nu me tu yama. Tjimuna ovahongewa tji va tjita, eṱe wina matu sokuzemburuka omakwizikiro wa Jesus nga: “Ami me mu pe omambo nounongo  kutja ape ha ningi omunavita na eṋe nangarire umwe ngu me mu pata momambo poo ngu ma pirukire imbi mbi mamu hungire.” Jesus wetu kwizikira kutja, “Panḓereye po, nu indino otji mamu yama omiinyo vyeṋu.” (Luk. 21:12-19) Nu ngatu zemburuke kutja Jehova u zemburuka oviṋa avihe ohunga novakarere ve ovaṱakame mba ṱa. Nu iho tji tjita kutja ma yenene okuvependura.

13. Matu rihongere ko ye kovihorera vya imba mbe hina va kayenda komurungu okuporimana nokuriyameka ku Jehova?

¹³ Eṱe wina matu rihongere kovihorera vya imba mbe hina va kayenda komurungu okuporimana nokuriyameka ku Jehova. Mokukonḓonona ovihorera ovivi mbyo maku tu vatere kutja atu ha tjiti ozondataiziro owo nḓu va tjita. Otjotjihorera, Ombara yOvajuda Asa we riyamekere ku Jehova indu otjimbumba otjinene tjovarwe wovita wOvaetopi tji tje ve rwisa nu Jehova we mu sera ondaya na taara. (2 Ekuruh. 14:9-12) Kombunda, indu Ombara yOvaisrael Basa tja rwisa Asa notjimbumba otjiṱiṱi tjovarwe wovita, eye ke riyamekere ku Jehova tjimuna tja tjitire. Nungwari wa suta otjimbumba tjovita tja Sirie okumuvatera. (2 Ekuruh. 16:1-3) Nu kuṱa komaandero womuinyo we indu tja verere tjinene, eye ke riyamekere ku Jehova.—2 Ekuruh. 16:12.

14. Matu rihongere ye kozondataiziro za Asa?

¹⁴ Asa rutenga wa paha ombatero ya Jehova indu tja muna ouzeu. Posi yokutja, kombunda eye ke riyamekere ku Mukuru okumuvatera. Nungwari wa kondja okuzengurura omauzeu we omuini. Indu Asa tja ningira ombatero okuza kOvasirie okurwisa Ovaisrael, mape ya poutenga aape munika tjimuna omukambo mbwa toora mau toṋa. Posi yokutja, Ovajuda kave karere nohange oure woruveze orure. Jehova wa hungira kuna ye okupitira momuprofete na tja: “Ove tjinga awe riyameka kombara ya Sirie moruveze rwokuriyameka ku Muhona, Ndjambi woye, otjimbumba tjovita tjombara ya Sirie otji tja hena kove.” (2 Ekuruh. 16:7, NW) Eṱe matu sokukengeza kutja atu ha munu kutja matu yenene okuzengurura omauzeu wetu oveni, nokuhina okupaha omuhunga okuza ku Jehova okupitira mEmbo re. Nandarire kutja matu sokutoora omukambo wa tjimanga, eṱe matu sokuporimana nokuriyameka ku Jehova, nu eye me tu vatere okutoora omukambo omusemba.

15. Ovikwaye mbi matu yenene okutjita indu tji matu lese Ombeibela?

¹⁵ (4) Zemburuka Omatjangwa motjiuru. Indu tji we rihaka komazeva wOmbeibela ngu maye raisa ounahepero wokuporimana nokuriyameka ku Jehova, kondja okuyezemburuka. Ove mo yenene okuyelesa kotjinyo poo okuyetjanga nokuyelesa povikando ovingi. Josua wa rakiziwa okulesa embo rOmatwako aruhe nokuripurira ko oukoto kokutja ma toore omikambo nounongo. Imbi mbyaa lese mOmatwako aavi sokumuvatera kutja aha tira nungwari ma kare nouvanḓe okuhongorera ovakarere va Mukuru. (Jos. 1:8, 9) Omazeva omengi mOmbeibela maye yenene okutuvatera kutja tu porimane, indu tji tu ri mozongaro nḓu maze tu kendisa poo nḓu maze tu pe emuma.—Eps. 27:1-3; Omiano 3:25, 26.

16. Omomuano uṋe Jehova me ungurisa ombongo okutuvatera okuporimana nokuriyameka ku ye?

¹⁶ (5) Kara pu novakarere va Mukuru. Jehova u ungurisa ovakambure ovakwetu okutuvatera okuporimana nokuriyameka ku ye. Pozombongarero zetu zombongo tu muna ouwa okuza komahungi nge yandjwa i ovarumendu ovakambure, omaziriro nge yandjwa,  na indu tji matu hungire oviṋa oviyanḓiparise pu novakambure ovakwetu. (Hebr. 10:24, 25) Nu wina tu yenena okuyanḓiparisiwa indu tji twa raere omapanga wopopezu mombongo oviṋa mbi mavi tu kendisa. “Embo rouwa” okuza kepanga mari yenene okutuvatera kutja atu he rikende tjinene.—Omiano 12:25.

17. Otja kOvaheberi 6:19, omomuano uṋe omaundjiro wetu ohunga nOuhona wa Mukuru mu maye tu vatere okuporimana nandarire kehi yozongaro ozonḓeu?

¹⁷ (6) Kara nomaundjiro omazikame. Omaundjiro wetu wOuhona wa Mukuru ye ri “otja otjihande tjomuinyo,” tji tji tu vatera kutja tu zikame nandarire tji tu ri momauzeu poo kehi yozongaro nḓu maze tu kendisa. (Lesa Ovaheberi 6:19.) Ripura ohunga nomakwizikiro wa Jehova woruyaveze mu mu hi nokukakara omerikendero. (Jes. 65:17) Nu wina ripura ohunga nouye oupe wohange mu mu hi nokutjitwa oviṋa ovivi. (Mika 4:4) Ove wina mo pamisa omaundjiro woye indu tji wa raere varwe ohunga nouye oupe. Kondja okuungura pu mo yenene motjiungura tjokuzuvarisa nokukaisapo ovandu ovahongewa. Indu tji wa tjiti nao ove ‘mo panḓere pongondjero yoye nga komaandero, nokutja oviṋa mbi u undja mavi yenenisiwa.’—Hebr. 6:11.

18. Omauzeu yeṋe ngu matu yenene okuundjira ko moruyaveze, nu matu yenene vi okutuurunga?

¹⁸ Mena rokutja tu ri komaandero wouye mbwi, matu munu omauzeu omengi ngu mape ya aye tu kendisa. Etjangwa retu rombura ndji 2021 ma ri tu vatere okutjinda omauzeu ngo nokuporimana, nu ka nomasa wetu oveni posi yokutja omokuriyameka ku Jehova. Momakayendero womburas ngatu raise movitjitwa kutja tu nongamburiro momakwizikiro wa Jehova nga: “Omasa weṋu maye zu mokuporimana na mokuriyameka.”—Jes. 30:15.