1-3. Ovikwaye tjiva mbi tjita kutja ovakarere va Jehova ve rire?

 OTJIKANDO otjisenina tji wa ririre ya ri ruṋe? Povikando tjiva tu rira mena rondjoroka. Posi ya potuingi tu rira mena romuhihamwatima. Otjotjihorera, mape ya atu riri indu tji twa zepaisa omusuverwa wetu. Omukazendu omukambure wena Lorilei ngwa tura moAmerica wa tja: “Ovikando tjiva mba ri noruhoze orunene mena rokuzepaisa omuatje wandje omukazona, nga tjee munu kutja kape notjiṋa tji matji yenene okundjihuhumiṋa. Oruveze ndwo hee munu kutja pe notjiṋa tji matji yenene okuyarura ko omutima wandje mbwa nyaika.” *

² Pe noviṋa vyarwe mbi mape ya avi tjiti kutja tu rire. Omukazendu omukandjira wena Hiromi ngwa tura moJapan wa tja: “Povikando tjiva mbi wa momuinyo mena rokutja ovandu ku mbi zuvarisa kave vanga okupuratena kombuze yOmbeibela. Nu rumwe nomahoze momeho, ami mbi ningira Jehova kutja me ndji vatere okuhakaena nomundu ngu ma vanga okupuratena kOmbeibela.”

³ Hapo wa rora okukara mongaro otjingeyo? Otjingi tjetu twa rora okukara mongaro otja indjo. (1 Petr. 5:9) Eṱe tu vanga ‘okukarera Muhona nenyando,’ posi yokutja povikando tjiva tu mu karera noruhoze, mena rokutja twa zepaisa omusuverwa wetu poo twa u momuinyo, poo mena rongaro onḓeu ndji tjita kutja i rire ouzeu ku eṱe okurira ovaṱakame ku Mukuru. (Eps. 6:6; 100:2) Otjikwaye tji matu yenene okutjita tji tu ri mozongaro otja inḓo?

4. Matu katara ku ye morupa ndwi?

 ⁴ Eṱe matu yenene okurihongera kotjihorera tja Jesus. Povikando tjiva pa ri noviṋa mbya tjita kutja ‘Jesus ma rire.’ (Joh. 11:35; Luk. 19:41; 22:44; Hebr. 5:7) Ngatu katare ku tjiva vyoviṋa mbyo. Nu tu tare kutja ovikwaye mbi matu yenene okurihonga ohunga na Jesus na Ihe Jehova. Nu wina matu katara kutja matu yenene okutjita vi indu tji tu ri mongaro ndji tjita kutja tu rire.

5. Matu rihongo ye ohunga na Jesus okuza kehungi ndi ri mu Johanes 11:32-36?

⁵ Mokupepera kwombura ndji 32 O.Z., epanga ra Jesus, Lasarus, wa vera na ṱu. (Joh. 11:3, 14) Eye wa ri novaṱena vevari, Maria na Marta, nu Jesus wa suverere eṱunḓu ndi tjinene. Ovakazendu mba va ri noruhoze tjinene mena ronḓiro yomuṱena kwawo. Lasarus tja za nokuṱa, Jesus wa ya koBetanie, Marta na Maria ku va turire. Indu Marta tja zuva kutja Jesus u ri mondjira, eye wa hakahana okukemutjakanena. Ripura noruhoze eye ndwa ri na rwo indu tja tja: “Muhona, Ove andakuzu wa ri mba omuṱena kwandje katja ṱa.” (Joh. 11:21) Ousupi kombunda yanao indu Jesus tja muna Maria novandu varwe amave riri, eye “wa rira.”—Lesa Johanes 11:32-36.

6. Ongwaye Jesus tja rira motjikando ho?

⁶ Ongwaye Jesus tja rira motjikando ho? Embo ndi Insight on the Scriptures mari ziri kutja, “Onḓiro yepanga re Lasarus noruhoze ovaṱena va Lasarus ndu va ri na rwo rwa tjita kutja Jesus ma ‘kurungisiwe tjinene mombepo nu ma rire.’” * Jesus mape ya ee ripura ohunga nomuhihamo epanga re Lasarus mbwa ri na wo mouvere we, nokutja Lasarus wa ri mongaro iṋe indu tjaa munu kutja u ri pokukoka. Jesus mape ya wina wa rira mena rokumuna omuano Maria na Marta mu va ṱuninwe i yonḓiro yomuṱena kwawo. Indu tji wa zepaisa epanga ropopezu poo okaṋepo keṱunḓu roye, mo yenene okutjiwa omuano onḓiro mu i ṱuna komundu. Tara koviṋa vitatu mbi mo yenene okurihonga okuza kotjitjitwa hi.

7. Omahoze Jesus nga ririra omapanga we maye tu hongo ye ohunga na Jehova?

 ⁷ Jehova u tjiwa omuano onḓiro mu i tu ṱuna. Jesus “osaneno” ya Ihe. (Hebr. 1:3) Indu Jesus tja rira, eye wa raisa omuano Jehova me ṱunwa tji twa zepaisa omusuverwa wetu. (Joh. 14:9) Indu ove tji wa zepaisa omusuverwa woye, tjiwa kutja Jehova ka munu oruhoze rwoye uriri nungwari u ku ṱira ondjenda wina. Jehova u vanga okuverukisa omuhihamwatima woye.—Eps. 34:18; 147:3.

8. Ongwaye tji matu yenene okukara nongamburiro kutja Jesus ma kapendura ovasuverwa vetu mba ṱa?

⁸ Jesus u vanga okupendura ovasuverwa voye mba ṱa. Ngunda Jesus e hi ya rira, eye wa raera Marta kutja, “Omuṱena kwoye ma penduka movakoke.” Marta wa ri nongamburiro mu Jesus. (Joh. 11:23-27) Mena rokutja Marta wa ri omukarere wa Jehova omuṱakame, eye aa tjiwa kutja omuprofete Elia na Elisa va pendurire ovandu movakoke morukapitaveze. (1 Ozomb. 17:17-24; 2 Ozomb. 4:32-37) Nu wina mape ya eye wa zuvire ohunga nozombendukiro Jesus nḓa tjita. (Luk. 7:11-15; 8:41, 42, 49-56) Ove wina mo yenene okukambura kutja mo kamuna ovasuverwa voye mba ṱa. Omahoze wa Jesus indu tjaa huhumiṋa omapanga we nga ri noruhoze, ya raisa kutja ombendukiro otjiṋa tje zera okutjita.

9. Ove mo yenene vi okuvatera poo okuhuhumiṋa imba mbe noruhoze otja Jesus tja tjita? Yandja otjihorera.

⁹ Ove mo yenene okuvatera imba mbe noruhoze. Jesus ka ririre pu na Marta na Maria uriri, nungwari wina aa puratene ku wo nokuvehuhumiṋa. Eṱe wina matu yenene okuraisa ongaro Jesus ndja raisa ku imba mbe noruhoze. Omunene wombongo wena Dan, ngwa tura moAustralia wa tja: “Tji mba za nokuzepaisa omukazendu wandje, ee hepa ombatero. Ovarumendu ovakambure novakazendu vawo pekepeke aruhe va ri noruveze okupuratena ku ami. Owo aave ndji yandjere okuraisa oruhoze rwandje nu kaave ṱohoṋi indu tjee riri. Owo wina aave ndji vatere noviṋa tjimuna okukoha otjihauto tjandje, okukendjirandera ovihepwa, nokundjizikira ovikurya indu tjee ha yenene okutjita nao omuini. Owo wina aave kumbu pu na ami tjinene. Owo va raisa kutja ovangu nomarumbi nu omapanga nge ‘riraisa moruveze rwombamisiro.’”—Omiano 17:17.

10. Etjangwa ra Lukas 19:36-40 ri hungirira kotjitjitwa tjiṋe?

¹⁰ Jesus wa vaza moJerusalem tji ya ri 9 komueze mbwi Nisan, mombura 33 O.Z. Eye tja vaza popezu notjihuro, otjimbumba otjinene tjovandu tja worongana, novandu va yara ozombanda zawo mondjira komurungu we, nave mu yakura otjOmbara yawo. Iho tjiri tja ri otjitjitwa tjondjoroka. (Lesa Lukas 19:36-40.) Mena ranao ovahongewa ve kaave undjire ko ihi tji tja tjitwa kombunda yanao. “Jesus wa tumbukire kotjihuro, nu tje tji muna, we tji rira.” Nomahoze momeho we, Jesus wa hunganeka imbi mbya katjitwa kovature va Jerusalem.—Luk. 19:41-44.

11. Ongwaye Jesus tja ririra ovature va Jerusalem?

¹¹ Nandarire kutja ovature va Jerusalem va yakura Jesus nawa, eye wa ri noruhoze momutima mena rokutja aa tjiwa kutja owo kamaave yakura ombuze yOuhona. Mena ranao Jerusalem aatji sokunyonwa, nOvajuda mba hupu aave sokukamburwa otjovahuurwa nokukarira ovakarere. (Luk. 21:20-24) Ouhumandu otja Jesus pa heya, ovandu ovengi ve mu nakaura. Hapo ovandu ovengi momaturiro woye ve yakura vi ombuze yOuhona? Omahoze wa Jesus nga ririra ovature va Jerusalem, maye ku hongo ye indu ovandu ovengi ku u zuvarisa ombuze youatjiri tji ve ha raisa onḓero? Tara koviṋa vitatu mbi mo yenene okurihonga.

12. Omahoze Jesus nga rira mena rovandu kaa zuvarisa, maye tu hongo ye ohunga na Jehova?

 ¹² Jehova u rikendera kovandu. Omahoze wa Jesus maye tu zemburukisa kutja Jehova u rikendera kovandu pu pe ṱa pi. Eye ka ‘vanga kutja omundu nangarire umwe a yandekwe, nungwari u vanga kutja avehe ve ritanaure komauvi wawo.’ (2 Petr. 3:9) Ndino tu raisa kutja twa suvera imba mbu tu zuvarisa ko, indu tji matu kondjo okuvevatera aruhe kutja ve rihonge ohunga nombuze ombwa yOuhona.—Mat. 22:39. *

13-14. Omomuano uṋe Jesus ma raisa otjari kovandu, neṱe matu sokutjita vi kutja tu raise otjikaṋena ho wina?

¹³ Jesus wa ungura oukukutu motjiungura tjokuzuvarisa. Eye wa raisa orusuvero rwe kovandu, mokuungurisa oruveze aruhe ndwa munu okuvehonga. (Luk. 19:47, 48) Otjikwaye tji tje mu hinga kutja ma tjite nao? Jesus aa ṱotjari na wo. Ovikando tjiva ovandu ovengi aave vanga okupuratena komambo wa Jesus ngandu eye novahongewa ve “tji ve ha ri na imbwi omuhingo wokurya ovikurya.” (Mar. 3:20) Indu omurumendu umwe tjaa vanga okuhungira ku na Jesus uṱuku, Jesus wa yenena okuhungira ku na ye. (Joh. 3:1, 2) Ovandu ovengi mba puratena ku Jesus kave ririre ovahongewa ve. Posi yokutja avehe mba puratena ku ye, va yenena okuzuva nawa imbi mbyaa zuvarisa. Ndino wina eṱe tu vanga kutja omundu auhe ma yenene okuzuva ombuze ombwa. (Oviung. 10:42) Kutja tu yenene okutjita nao, eṱe matu hepa okurundurura omuano wetu wokuzuvarisa.

¹⁴ Kara nonḓero okutjita omarundurukiro ngu maye heperwa po. Tji tu hi nokurundurura oruveze ndu tu zuvarisa, mape ya atu ha yenene okuhakaena novandu mbu mave vanga okuzuva ombuze ombwa. Omukandjira wena Matilda wa tja: “Ami nomurumendu wandje tu kondja okuvarura ovandu mozoiri pekepeke. Mozoiri zomuhuka omunene, tu kondja okuzuvarisa mozongetjefa. Ometaha tu ungurisa outemba okuzuvarisa ku imba mbe ri momivanda. Kombunda mapeta, ovandu ovengi tu yenena okuvevaza pozonganda.” Eṱe katu sokuzuvarisa indu oruveze tji rwe tu pwire uriri, nungwari tu sokukara nonḓero okurundurura oruveze ndu tu zuvarisa kutja tu  yenene okuhakaena novandu. Eṱe tji twa tjiti nao, matu yenene okukara nongamburiro kutja Jehova ma kara nohange.

15. Otjikwaye tji tja tjitwa mongurova yokomurungu wonḓiro ya Jesus otja ku Lukas 22:39-44?

¹⁵ Mongurova yomueze mbwi Nisan tji ya ri 14, mombura ndji 33 O.Z., Jesus wa ya kotjikunino tja Getsemane. Ngunda e ri ngo, eye wa kumba ku Jehova okuza komutima. (Lesa Lukas 22:39-44.) Ya ri moruveze oruzeu ndwo indu Jesus ‘tje riyarikaṋa mozongumbiro ze nondjuriro onene nomahoze ku Ndjambi.’ (Hebr. 5:7) Hapo Jesus wa kumba ohunga na iye mongurova osenina komurungu wonḓiro ye? Eye wa ningira omasa kutja ma rire omuṱakame ku Jehova nokutja ma tjite ombango ye. Jehova wa zuva ongendo Omuna we ndja ri na yo, ne mu hindire omuengeli okumuzeuparisa.

16. Omena raye Jesus tja ri nombameno indu tjaa kumbu motjikunino tja Getsemane?

¹⁶ Jesus aa riri ngunda ama kumbu motjikunino tja Getsemane, mena rokutja aa munu kutja ovandu mave mu vara otjomundu ngwa yamburura ena ra Mukuru. Eye wina aa tjiwa omerizirira omanene nga ri na wo wokurira omuṱakame kutja ma yapure ena raIhe. Mo yenene okurihongera ko ye komahoze wa Jesus, indu tji u ri mongaro onḓeu ndji mai tjiti kutja i rire ouzeu kove okurira omuṱakame ku Jehova? Tara koviṋa vyarwe vitatu mbi mo yenene okurihonga.

17. Omuano Jehova ma zira ondjuriro ya Jesus mau tu hongo ye ohunga na Jehova?

¹⁷ Jehova u puratena kondjuriro yoye. Jehova wa puratena kondjuriro ya Jesus. Omena raye? Omena rokutja otjiṋa otjinanḓengu ku Jesus ya ri okurira omuṱakame ku Ihe nokuyapura ena re. Jehova ma ziri ozongumbiro zetu, indu okurira ovaṱakame ku ye nokuyapura ena re tje ri oviṋa mbi ri ovinanḓengu ku eṱe.—Eps. 145:18, 19.

18. Omomiano viṋe mu matu yenene okusasaneka Jesus kepanga rotjari ndi tjiwa ongaro mu tu ri?

¹⁸ Jesus u tjiwa ongaro mu u ri. Indu tji twa u momuinyo poo tji tu nozongendo, tu kara nondjoroka tji tu nepanga ndi mari zuu ongaro mu tu ri, poo nda tuurunga omauzeu tjimuna inga owetu. Jesus ongu ri epanga ndo.  Eye u tjiwa kutja omundu tja ngundipara nu tji ma hepa ombatero u kara mongaro iṋe. Eye u tjiwa oungundipare wetu, nu ma kondjo kutja tu mune ombatero ndji matu hepa “moruveze orusemba.” (Hebr. 4:15, 16) Tjimuna Jesus tja yakura ombatero okuza komuengeli motjikunino tja Getsemane, eṱe wina otji twa sokuyakura ombatero Jehova ndji me tu pe, kutja okuza momambo wetu, mouvidio, mehungi poo indu omunene wombongo poo omukambure omukwetu tje ya okutuvarura.

19. Omomuano uṋe mu mo yenene okumuna omasa indu tji mo tuurunga ongaro onḓeu ndji mai roro ouṱakame woye ku Mukuru? Yandja otjihorera.

¹⁹ Jehova me ku pe ‘ohange yaNdjambi.’ Omomuano uṋe Jehova mu me tu pe omasa? Tji matu kumbu, matu munu ‘ohange yaNdjambi ndja kapita ozondunge azehe zovandu.’ (Fil. 4:6, 7) Ohange Jehova ndje yandja i tu yarura omitima pehi, nu i tu vatera kutja tu ripure momuano omusemba. Omukazendu omukambure wena Luz wa muna ouatjiri womambo nga, nu wa tja: “Povikando tjiva ami mbi rimuna ourike. Nu mena ranao pe ya e munu kutja Jehova kee ndji suvera. Tji mbi ri mongaro ndjo, ami mbi hakahana okuraera Jehova ouripura wandje. Ongumbiro i ndji vatera kutja mbi kare nouripura ouwa.” Otja otjihorera tje pu matji raisa, eṱe matu yenene okukara nohange indu tji twa kumbu.

20. Twe rihongere ko ye komahoze Jesus nga rira?

²⁰ Tjiri omapu omawa nomahuhumiṋe ngu matu yenene okurihonga okuza komahoze wa Jesus. Eṱe twa zemburukisiwa okuvatera omapanga wetu nge ri moruhoze, nokukara nongamburiro kutja Jehova na Jesus mave tu vatere indu tji twa zepaisa omusuverwa wetu. Eṱe twa tunduuzwa okuzuvarisa nokuhonga notjari, mena rokutja Jehova Mukuru na Jesus Kristus ve raisa otjikaṋena otjiwa hi wina. Nu wina eṱe tu muna omahuhumiṋino mokutjiwa kutja Jehova nOmuna we omusuverwa ve tjiwa oungundipare wetu, ve tu ṱira ondjenda, nu ve vanga okutuvatera okutjinda omauzeu wetu. Ngatu kayende komurungu okuṱakamisa oviṋa mbi twe rihonga, nga keyuva ndi Jehova tja yenenisa omakwizikiro we ‘wokupyoṋa omahoze aehe momeho wetu.’—Omavan. 21:4.