1-2. (a) Oruṋe tjinene tji tu zemburuka ovasuverwa vetu mba ṱa? (b) Jesus wa tjita tjike ongurova komurungu wonḓiro ye?

 EṰE ngamba tu zemburuka ovasuverwa vetu mba ṱa nandarire kutja pa kapita oruveze orure. Eṱe tjinene tu ve zemburuka meyuva ndi va ṱa.

² Mombura aihe, eṱe tu rira orupa rwovandu omangete mouparanga wouye mbe worongana okuzemburuka onḓiro yomundu ngu twa suvera tjinene, Jesus Kristus. (1 Petr. 1:8) Tu worongana pamwe okuzemburuka omundu ngwa yandja omuinyo we otjotjisuta tjonguturiro okutuyama kouvi nonḓiro. (Mat. 20:28) Otjiperi kutja Jesus aa vanga ovemukongorere okuzemburuka onḓiro ye. Mongurova komurungu wonḓiro ye, eye wa ṱuna omariro wapeke wongurova na rakiza kutja, “Ihi tjiteye kokuzemburuka Ami.”—Luk. 22:19.

3. Matu kahungirira ku ye morupa ndwi?

³ Ovandu ovaṱiṱi motjivaro mu imba mbe kara pOmazemburukiro wOnḓiro ya Kristus mbe nomaundjiro wokukahupa meyuru. Nungwari wina pe kara omangete omengi waimba mbe nomaundjiro wokukahupa kombanda yehi. Morupa ndwi, matu katara komapu ngu maye raisa kutja ongwaye ovimbumba aviyevari tji vi zera okukara pomazemburukiro ngo ombura aihe. Wina matu kakonḓonona kutja ouwa waye mbu matu munu mokukara pomazemburukiro ngo. Rutenga ngatu katare komapu tjiva kutja ongwaye ovatwirisiwa tji ve kara pomazemburukiro ngo.

4. Ongwaye imba mba twirisiwa tji ve rya komboroto nokunwa komavinu pOmazemburukiro wOnḓiro ya Jesus?

⁴ Ombura aihe, ovatwirisiwa mbe kara pOmazemburukiro wOnḓiro ya Jesus ve rya komboroto nokunwa komavinu. Ongwaye tje ri wo mbe sokurya komboroto nokunwa komavinu? Okumuna eziriro ndo, ngatu katare ku imbi mbya tjitwa ongurova osenina komurungu wonḓiro ya Jesus. Kombunda yeriro rOpaska, Jesus wa zika eyuva ndi tjiukwa otja Omariro Omayapuke wa Muhona. Eye wa yandja omboroto okurya nomavinu okunwa kovaapostele ve 11 ovaṱakame. Jesus we ve raera ohunga nomerikutiropamwe poo omazuvasaneno yevari, omerikutiropamwe omape nomerikutiropamwe wouhona. * (Luk. 22:19, 20, 28-30) Omerikutiropamwe ngo ya tjita kutja ovaapostele mbo novandu varwe ovaṱiṱi motjivaro, ve rire ozombara novapristeri meyuru. (Omavan. 5:10; 14:1) Otjihupe tjovatwirisiwa * uriri ombe rya komboroto nokunwa komavinu pOmazemburukiro wOnḓiro ya Jesus.

5. Ovikwaye ovatwirisiwa mbi mave tjiwa ohunga nomaundjiro ngu va pewa?

⁵ Epu rarwe ovatwirisiwa ndi ve zerira okukara pOmazemburukiro wOnḓiro ya Jesus orondi: Omazemburukiro ngo ye ve pa oruveze okuripurira komaundjiro wawo. Jehova we ve pa omaundjiro omawa wokukakara meyuru nokuhina okuṱa, nokukahonapara pamwe nomuhivirikwa Jesus Kristus na varwe 144 000. Nu kombanda yaavihe owo mave kakara pu na Jehova Mukuru. (1 Kor. 15:51-53; 1 Joh. 3:2) Ovatwirisiwa ve tjiwa kutja va ṋangwa okukayorokera ondjingonekero ndjo meyuru. Nungwari kokutja ve yakurwe meyuru, owo mave sokurira ovaṱakame nga konḓiro. (2 Tim. 4:7, 8) Iho tji etera ovatwirisiwa ondjoroka onene tji mave ripurire komaundjiro wawo wokukahupa meyuru. (Tit. 2:13) Nu tjike ohunga “nozonḓu zarwe”? (Joh. 10:16) Omapu yeṋe tjiva ngu ve karera pOmazemburukiro wOnḓiro ya Jesus?

6. Ongwaye ozonḓu zarwe tji ze kara pOmazemburukiro wOnḓiro ya Jesus ombura aihe?

⁶ Ozonḓu zarwe ze kara pomazemburukiro ngo otjovayandjaruvara nungwari kave ri komboroto nokunwa komavinu. Mombura ndji 1938, imba mbe nomaundjiro wokukahupa kombanda yehi, va ṋangwa kotjikando otjitenga okukara pOmazemburukiro wOnḓiro ya Jesus. Okambo kOruhungu ketenga ku Marta, 1938, ka tja: “Ma rire nawa [kozonḓu zarwe] okukara pombongarero otja indjo ve mune kutja pe tjitwa ye. . . . Indwo maru sokurira oruveze rwondjoroka ku wo wina.” Tjimuna ovaṋangwa tji ve kara pomukandi worukupo nondjoroka, ozonḓu zarwe ze nondjoroka okukara pOmazemburukiro wOnḓiro ya Jesus.

7. Ongwaye ozonḓu zarwe tji ze zera okukara pehungi rOmazemburukiro wOnḓiro ya Jesus?

⁷ Ozonḓu zarwe wina ze ripurira komaundjiro wawo. Owo ve zera okukapuratena kehungi rOmazemburukiro wOnḓiro ya Jesus, mena rokutja oro ri yandja ombango ku imbi Kristus novahonapare va pu na ye 144 000, mbi mave katjitira imba ovaṱakame mouhonapare wawo wozombura eyovi. Kehi youhonapare wOmbara yawo Jesus Kristus, imba mbu mave kahonapara meyuru mave katjita kutja ehi ri rire oparadisa nu mave kavatera ovandu  okurira ohomonena. Tjiri ondjoroka onene kovandu omangete omengi mbu mave kara pOmazemburukiro wOnḓiro ya Jesus, okuripurira komaprofetero wOmbeibela ohunga noruyaveze ngu maye kayenenisiwa, tjimuna nge ri mu Jesaja 35:5, 6; 65:21-23; nOmavandururiro 21:3, 4. Owo novasuverwa vawo tji mave ripurire kouye oupe mbwo, ku yanḓiparisa omaundjiro wawo woruyaveze nu ku ve vatera kutja ave ha isa okukarera Jehova.—Mat. 24:13; Gal. 6:9.

8. Epu riṋe rarwe ndi hinga ozonḓu zarwe okukara pOmazemburukiro wOnḓiro ya Jesus?

⁸ Tara kepu rarwe kutja ongwaye ozonḓu zarwe tji ze kara pOmazemburukiro wOnḓiro ya Jesus. Owo ve vanga okuraisa orusuvero rwawo nokuyandja oruvara kovatwirisiwa. Embo ra Mukuru ra hunganeka kutja mape kara ombwaneno yomasa pokati kovatwirisiwa na imba mbe nomaundjiro wokukahupa kombanda yehi. Omomuano uṋe? Ngatu katare kovihorera tjiva.

9. Ozonḓu zarwe ze vara vi ovatwirisiwa otja komaprofetero nge ri mu Sakarja 8:23?

⁹ Lesa Sakarja 8:23. Omahunganekero ngo ye raisa orusuvero ozonḓu zarwe ndu ve na ro kovakambure ovatwirisiwa. Embo ndi ‘Omujuda’ na indi “eṋe” maye hee otjihupe tjovatwirisiwa. (Rom. 2:28, 29) “Ovandu vozonganda omurongo” mave kuramene po ozonḓu zarwe. Owo ve ‘rikuta kuna’ ovatwirisiwa momerikotameneno wawo ku Jehova. Ku nao, mongurova yOmazemburukiro wOnḓiro ya Jesus, ozonḓu zarwe ze raisa kutja ze rikuta ku novatwirisiwa mokukara pu na wo pomazemburukiro ngo.

10. Jehova wa tjita vi okuyenenisa omaprofetero nge ri mu Esekiel 37:15-19, 24, 25?

¹⁰ Lesa Esekiel 37:15-19, 24, 25. Jehova wa yenenisa omaprofetero ngo, mokutjita kutja ovatwirisiwa nozonḓu zarwe ve ungure kumwe mombwaneno. Omaprofetero ngo ya tamuna outi uvari. Imba mbe nomaundjiro wokukahupa meyuru ve ri tjimuna okati ‘kOuhona waJuda’ (omuhoko ozombara za Israel maaze toororwa), nu imba mbe nomaundjiro wokukahupa kombanda yehi ve ri tjimuna okati ‘kOuhona waIsrael.’ * Jehova ma waneke ovimbumba vivari mbi kokutja vi rire “okati kemwe.” Ihi matji hee kutja owo mave rikotamene pamwe kehi yOmbara imwe Kristus Jesus. Ombura aihe ovatwirisiwa nozonḓu zarwe ve kara pOmazemburukiro wOnḓiro ya Jesus ‘otjorupanda rumwe’ kehi ‘yomurise umwe,’ nungwari katjovimbumba vivari pekepeke.—Joh. 10:16.

11. Omomuano uṋe omunanḓengu “ozonḓu” nḓa tamunwa mu Mateus 25:31-36, 40 mu ve vatera ovangu va Kristus?

¹¹ Lesa Mateus 25:31-36, 40. “Ozonḓu” Jesus nḓa hungirira ko mehungi re ndi, maze kuramene po imba ovasemba moruveze rwomaandero wouye mbe nomaundjiro wokukahupa kombanda yehi, owo mbe ri ozonḓu zarwe. Owo ve raisa ouṱakame kovangu va Kristus ovatwirisiwa, nu tjinene mokuvevatera okuyenenisa otjiungura otjinanḓengu tjinene tjokuzuvarisa ombuze mouye auhe, nokuisa po ovandu ovahongewa va Jesus.—Mat. 24:14; 28:19, 20.

12-13. Omomiano viṋe vyarwe ozonḓu zarwe mu ze vatera ovangu va Kristus?

¹² Ombura aihe movivike vyokomurungu wOmazemburukiro wOnḓiro ya Jesus, ozonḓu zarwe ze yandja oruvara kovangu va Kristus mokukara norupa okuura momaṋangero wovandu kOmazemburukiro wOnḓiro ya Jesus. (Twende kokawongo nga “ Hapo mo rirongerisa komurungu woruveze kOmazemburukiro wOnḓiro ya Jesus?”) Owo wina ve kondja okutjita kutja oviṋa avihe vi rongerisiwe nawa  komurungu woruveze kOmazemburukiro wOnḓiro ya Jesus, nandarire kutja kave novatwirisiwa mombongo yawo. Ozonḓu zarwe tjiri ze kara nondjoroka okuvatera ovangu va Kristus momiano otja imbyo. Ozonḓu nḓa ze tjiwa kutja Jesus u vara oviṋa avihe owo mbi ve tjita okuvatera ovakambure ovatwirisiwa aayo ve tjita ku ye.—Mat. 25:37-40.

¹³ Omapu yeṋe yarwe nge tu hinga atuhe okukara pOmazemburukiro wOnḓiro ya Jesus, kainatja kutja tu nomaundjiro yeṋe?

14. Jehova na Jesus ve tu raisira vi orusuvero orunene?

¹⁴ Eṱe tu nondangi korusuvero Jehova na Jesus ndu ve tu raisira. Jehova we tu raisira orusuvero rwe momiano omingi. Posi yokutja omuano umwe omunanḓengu tjinene eye me tu raisira orusuvero, orondu tja hinda Omuna we omuingona okuyekutatumisiwa nokuṱira omauvi wetu. (Joh. 3:16) Nu Jesus wina wa raisa orusuvero orunene indu tje riyandjera okuṱira omauvi wetu. (Joh. 15:13) Eṱe kamaatu yenene okusuta onḓengu yorusuvero Jehova na Jesus ndu ve tu raisira. Posi yokutja eṱe matu yenene okuraisa ondangi yetu momuano mu matu hupu eyuva arihe. (Kol. 3:15) Nu tu kara pOmazemburukiro wOnḓiro ya Jesus mena rokutja tu vanga okuripurira korusuvero ndu ve tu raisira, nokuraisa orusuvero rwetu ku wo.

15. Ongwaye ovatwirisiwa nozonḓu zarwe tji ve vara otjisuta tjonguturiro otjotjiyandjewa otjihuze?

¹⁵ Eṱe tu nondangi tjinene kotjiyandjewa tjotjisuta tjonguturiro. (Mat. 20:28) Ovatwirisiwa ve vara otjisuta tjonguturiro otjotjiyandjewa otjihuze, mena rokutja otjo tja tjita kutja ve mune omaundjiro omawa. Mena rongamburiro yawo mombunguhiro ya Kristus, Jehova we ve vara otjovasemba, ne ve yakura otjovanatje ve. (Rom. 5:1; 8:15-17, 23) Ozonḓu zarwe wina ze nondangi kotjisuta tjonguturiro. Mena rongamburiro ndji ve na yo mombunguhiro ya Kristus, owo va rira ovakohoke komurungu wa Mukuru, ve yenena okumukarera nu ve nomaundjiro wokutja mave tuurunga “mondatumisire ondirise.” (Omavan. 7:13-15) Omuano umwe ovatwirisiwa nozonḓu zarwe mu ve raisa ondangi onene kotjisuta tjonguturiro, omokukara pOmazemburukiro wOnḓiro ya Jesus ombura aihe.

16. Epu riṋe rarwe ndi tu karera pOmazemburukiro wOnḓiro ya Jesus?

¹⁶ Epu rarwe ndi tu karera pOmazemburukiro wOnḓiro ya Jesus, omena rokutja tu vanga okukara nonḓuviro ku Jesus. Kainatja kutja tu nomaundjiro waye, auhe wetu u vanga okukara nonḓuviro kerakiza Jesus nda yandja mongurova ndja zikamisa Omazemburukiro wOnḓiro ye. Eye wa tja: “Ihi tjiteye kokuzemburuka Ami.”—1 Kor. 11:23, 24.

17. Omazemburukiro wOnḓiro ya Jesus ye tu vatera vi okutumbuka popezu na Jehova?

¹⁷ Eṱe tu tumbuka popezu na Jehova. (Jak. 4:8) Otja tji twe rihongo, Omazemburukiro wOnḓiro ya Jesus ye tu pa oruveze okuripura ohunga nomaundjiro Jehova nge tu pa, nu ye tu vatera okuripurira ko oukoto korusuvero orunene eye ndwe tu raisira. (Jer. 29:11; 1 Joh. 4:8-10) Indu tji matu ripurire komaundjiro woruyaveze ngu tu na wo, norusuvero orukarerere Mukuru ndwe tu raisira, ku kurisa orusuvero rwetu ku Jehova nu ku pamisa oupanga wetu ku na ye.—Rom. 8:38, 39.

18. Okuripurira ko oukoto kotjihorera tja Jesus ku tu hinga okutjita tjike?

¹⁸ Ku tu hinga okuhorera ku Jesus. (1 Petr. 2:21) Omayuva wokomurungu wOmazemburukiro wOnḓiro ya Jesus, eṱe tu yandja  ombango komahungi wOmbeibela ohunga notjivike otjisenina tja Jesus kombanda yehi, onḓiro ye, nombendukiro ye. Nehungi ndi yandjwa mongurova yOmazemburukiro wOnḓiro ya Jesus, ri tu zemburukisa orusuvero Jesus ndwe tu raisira. (Ef. 5:2; 1 Joh. 3:16) Indu tji matu lese ohunga notjihorera tjomeriyandjerero Jesus tja raisa nokuripurira ko oukoto, ku tu hinga ‘okukara nongaro ohamukwao na indji oyaJesus Kristus.’—1 Joh. 2:6.

19. Matu yenene vi okuriṱizira morusuvero rwa Mukuru?

¹⁹ Eṱe tu zera nomasa okuriṱizira morusuvero rwa Mukuru. (Judas 20, 21) Eṱe tu riṱizira morusuvero rwa Mukuru mokukondja pu matu yenene okukara nonḓuviro ku ye, okuyapura ena re, nokuyorokisa omutima we. (Omiano 27:11; Mat. 6:9; 1 Joh. 5:3) Okukara pOmazemburukiro wOnḓiro ya Jesus ku tu hinga kutja, tu rimanene okuhupa eyuva arihe momuano mbu mau raere Jehova kutja, ‘Ami me vanga okuriṱizira morusuvero rwoye nga aruhe.’

20. Omapu yeṋe omawa nge tu hinga okukara pOmazemburukiro wOnḓiro ya Jesus?

²⁰ Eṱe tu nomapu omawa ngu matu sokukarera pOmazemburukiro wOnḓiro ya Jesus, kainatja kutja tu nomaundjiro wokukahupa meyuru poo kombanda yehi. Indu tji twa worongana pamwe ombura aihe meyuva ndo, eṱe tu zemburuka onḓiro yomundu ngu twa suvera tjinene, Jesus Kristus. Nu tjinene, eṱe tu zemburuka orusuvero orunenenene Jehova ndwe tu raisira indu tje tu pa Omuna we otjotjisuta tjonguturiro. Ombura ndji, Omazemburukiro wOnḓiro ya Jesus maye kara mOritjatano ngurova tji ye ri 15 ku April, 2022. Eṱe twa suvera Jehova nOmuna we tjinene. Ku nao, meyuva rOmazemburukiro wOnḓiro ya Jesus, kape notjiṋa tji matji rire otjinanḓengu pendje nokukara pomazemburukiro ngo.