1-2. Ongwaye tji tu kara pOmazemburukiro wonḓiro ya Jesus ombura aihe?

 OZOMBURA ape 2 000 nḓa kapita, Jesus wa yandjera eṱe omuinyo we kokutja tu kamune omuinyo waaruhe. Ongurova komurungu wonḓiro ye, Jesus wa rakiza ovemukongorere okuzemburuka ombunguhiro ye mokuungurisa omboroto nomavinu pomazemburukiro ngo.—1 Kor. 11:23-26.

² Eṱe tu nonḓuviro kerakiza ra Jesus mena rokutja twe mu suvera tjinene. (Joh. 14:15) Ombura aihe ovivike vyokomurungu na kombunda yOmazemburukiro wonḓiro ya Jesus, eṱe tu raisa ondangi ku imbi eye mbye tu tjitira mokutwa po oruveze okuripura nokukumba ohunga nomaheero wonḓiro ye kovandu. Eṱe wina tu kara nonyuṋe okuungura ovingi motjiungura tjokuzuvarisa, okutunduuza ovengi okuyekukara pu na eṱe potjitjitwa tjapeke ho. Nu eṱe tu kondja nomasa kutja atu ha yandjere otjiṋa okututjaera okukara pOmazemburukiro wonḓiro ya Jesus.

3. Matu katara ku ye morupa ndwi?

³ Morupa ndwi matu katara komiano vitatu ovakarere va Jehova mu ve kondja nomasa okuzemburuka onḓiro ya Jesus: (1) mo ku zemburuka Omazemburukiro wonḓiro ye momuano Jesus me ve honga okutjita nao, (2) mo ku ṋanga varwe kOmazemburukiro wonḓiro ya Jesus, (3) mo ku zemburuka Omazemburukiro wonḓiro ya Jesus nandarire kehi yozongaro ozonḓeu.

4. Ouatjiri uṋe mbu raisiwa pOmazemburukiro wonḓiro ya Jesus ombura aihe, nu ongwaye tji tu ha sokuvara ouatjiri mbo otjoviṋa uriri? (Lukas 22:19, 20)

⁴ Ombura aihe pOmazemburukiro wonḓiro ya Jesus, eṱe tu puratena kehungi nda zikamena kOmbeibela ndi yandja omaziriro  omakahu komapuriro omengi. Eṱe tu rihonga kutja ongwaye ovandu tjaave hepa otjisuta tjonguturiro, nomuano onḓiro yomundu umwe mu ya kutura ovengi komauvi. Eṱe tu zemburukisiwa kutja omboroto nomavinu vi kuramena po tjike, nokutja oouṋe mbe sokurya komboroto nokunwa komavinu. (Lesa Lukas 22:19, 20.) Nu eṱe tu ripura ohunga noruyaveze oruwa ku imba mbe nomaundjiro wokukahupa nga aruhe kombanda yehi. (Jes. 35:5, 6; 65:17, 21-23) Katu sokuvara ouatjiri mbwi otjoviṋa uriri. Ovandu ovengi kave tjiwa oviṋa mbi, nu kave raisa ondangi kounanḓengu wombunguhiro ya Jesus. Owo wina kave zemburuka onḓiro ye momuano eye ma honga ovemukongorere okutjita. Omena raye?

5. Indu otjingi tjovaapostele tji va ṱa, ovandu va uta okuzemburuka vi onḓiro ya Jesus?

⁵ Oruveze orusupi kombunda yovaapostele va Jesus ovengi tji va ṱa, Ovakriste voposyo va rira orupa rwombongo. (Mat. 13:24-27, 37-39) Owo va “kora ovizeze okupukisa ovakambure kutja ve ve kongorere.” (Oviung. 20:29, 30) Tjimwe ‘tjovizeze’ mbyo otjo hi tjokutja Ovakriste voposyo va uta okuhonga kutja Jesus ka punguhire orutu rwe “rumwe kutja a ise po omauvi wovengi” otja Ombeibela tji i heya. Nungwari ve tja ombunguhiro ye mai sokuyarukirwa po povikando ovingi. (Hebr. 9:27, 28) Ndino ovandu ovengi ve kambura momahongero woposyo ngo. Owo ve yenda kokereka otjivike atjihe, povikando tjiva eyuva arihe, okuzemburuka otjitjitwa tji tji isanewa “the Sacrifice of the Mass.” b Ovandu wozongamburiro zarwe kave zemburuka onḓiro ya Jesus tjinene, posi ya kave zuu nawa kutja okuzemburuka ombunguhiro ya Jesus i heya tjike. Ovandu tjiva ve himwa kutja, ‘Hapo onḓiro ya Jesus tjiri i heya kutja omauvi wandje mape ya aye isirwa?’ Ongwaye tji ve pura epuriro ndo? Povikando tjiva, omena rokutja ve popwa i imba mbe ha kambura kutja ombunguhiro ya Jesus mai yenene okutjita kutja omauvi wawo ye isirwe. Hapo ovakongorere va Jesus va tjinda vi otjiṋa hi?

6. Mombura ndji 1872, ovikeṋa okambumba kovakonḓonone vOmbeibela mbi va uta okuzuva nawa?

⁶ Meserewondo oritja-19, okambumba kovakonḓonone vOmbeibela mbaave hongorerwa po i Charles Taze Russell va uta okukonḓonona omatjangwa oukoto. Owo aave vanga okutjiwa ouatjiri ohunga nokutja ombunguhiro ya Jesus tjiri i heya tjike nokutja onḓiro ye mai sokuzemburukwa vi. Mombura ndji 1872, owo va uta okuzuva nawa kutja Jesus tjiri wa yandja otjisuta tjonguturiro kovandu avehe. Owo kave ṱizire ondjiviro ndji ku wo oveni. Nungwari owo va tjivisa kovandu varwe okupitira momambo, mozongoramambo na moumbo. Ousupi kombunda yanao, owo va uta okuhakaena otjikando tjimwe mombura okuzemburuka Omazemburukiro wonḓiro ya Jesus otja Ovakriste veserewondo etenga tjaave tjiti.

7. Eṱe tu muna vi ouwa momakonḓononeno nga tjitwa i yovakonḓonone vOmbeibela mbo?

⁷ Eṱe ndino tu muna ouwa moviṋa ovakambure ovakwetu mbwo mbi va konḓonona ozombura ozengi nḓa kapita. Omomuano uṋe? Jehova we tu vatera okuzuva nawa kutja ombunguhiro ya Jesus i heya tjike, nokutja mai eta ouwa wa ye kovandu avehe. (1 Joh. 2:1, 2) Eṱe wina twe rihonga kutja Ombeibela i yandja omaundjiro yevari kovandu mbe tjita ombango ya Mukuru. Omaundjiro wokukahupa meyuru nokuhinokukoka ku tjiva nomaundjiro womuinyo waaruhe kombanda yehi ku varwe ovengi. Eṱe tu tumbuka popezu na Jehova tji matu ripurire komuano eye me tu suvera nomuano auhe wetu me muna ouwa mombunguhiro ya Jesus. (1 Petr. 3:18; 1 Joh. 4:9) Otja ovakambure ovakwetu voruveze orukuru, eṱe tu ṋanga varwe okukara pu na  eṱe pOmazemburukiro wonḓiro ya Jesus otja Jesus pa honga ovemukongorere okutjita.

8. Ovikwaye ovakarere va Jehova mbi va tjita okuṋanga varwe kOmazemburukiro wonḓiro ya Jesus? (Tara kotjiperendero.)

⁸ Oure wozombura ozengi ovakarere va Jehova ve ṋanga ovandu kOmazemburukiro wonḓiro ya Jesus. Mombura ndji 1881, ovakambure ovakwetu moUnited States va ṋangwa okuyekuworongana pamwe mondjuwo yomurumendu omukambure moAllegheny, tja Pennsylvania kotjitjitwa otjinanḓengu ho. Kombunda, ombongo aihe aai kara nomazemburukiro wayo oini wonḓiro ya Jesus. Mu Marta mombura ndji 1940, ovazuvarise va raerwa kutja mave yenene okuṋanga omundu ngamwa auhe momaturiro wawo ngu ma raisa onḓero. Mombura ndji 1960, oBetel ya yandja oumbapira womaṋangero kozombongo otjikando otjitenga. Okuza koruveze ndwo, pa handjaurwa oumbapira womaṋangero ouingi tjinene. Ongwaye tji tu ungura oukukutu nao nokuungurisa oruveze oruingi okuṋanga ovandu varwe?

9-10. Oouṋe mbe muna ouwa mozongondjero zetu zokuṋanga varwe kOmazemburukiro wonḓiro ya Jesus? (Johanes 3:16)

⁹ Epu rimwe ndi tu ṋangera ovandu kOmazemburukiro wonḓiro ya Jesus omena rokutja tu vanga kutja imba mbe ya kotjitjitwa hi otjikando otjitenga, ve rihonge ouatjiri ohunga na imbi Jehova na Jesus mbi ve tu tjitira atuhe. (Lesa Johanes 3:16.) Eṱe tu zera kutja imbi mbi mave munu nokuzuva pOmazemburukiro wonḓiro ya Jesus mavi ve hingi okurihonga ovingi nokurira ovakarere va Jehova. Posi yokutja pe na varwe mbe muna mo ouwa wina.

¹⁰ Eṱe wina tu ṋanga imba mba isa okukarera Jehova. Eṱe tu tjita nao mena rokutja tu vanga  okuvezemburukisa kutja Mukuru ngunda we ve suvera. Ovengi ve yakura omaṋangero wetu, nu eṱe tu tjaterwa tjinene okuvemuna. Okukara pOmazemburukiro wonḓiro ya Jesus ku ve zemburukisa ondjoroka ndji vari na yo indu tjaave karere Jehova morukapitaveze. Ngatu tare kotjihorera tja Monica. c Eye wa uta okukarera Jehova rukwao moruveze rwo-COVID-19. Tjaa za nokuyenda kOmazemburukiro wonḓiro ya Jesus nga tjitwa mombura ndji 2021, eye wa tja: “Omazemburukiro wonḓiro ya Jesus nga, ya ri otjitjitwa tjapeke ku ami. Otjikando otjitenga kombunda yozombura 20, ami mba uta okuzuvarisa kovandu nokuveṋanga kOmazemburukiro wonḓiro ya Jesus. Ami mba kondja nomasa okuṋanga varwe mena rokutja mba ri nondangi tjinene ku imbi Jehova na Jesus mbi ve ndji tji tira.” (Eps. 103:1-4) Nandarire kutja ovandu tjiva kave yakura omaṋangero wetu, eṱe tu kondja nomasa okuveṋanga kOmazemburukiro wonḓiro ya Jesus, orondu tu tjiwa kutja Jehova u tjaterwa i yozongondjero zetu.

11. Jehova u sera vi ondaya ozongondjero zetu zokuṋanga ovandu kOmazemburukiro wonḓiro ya Jesus? (Hagai 2:7)

¹¹ Jehova wa sera ondaya kozongondjero zetu zokuṋanga ovandu kOmazemburukiro wonḓiro ya Jesus. Mombura ndji 2021, pOmazemburukiro wonḓiro ya Jesus pa ri novandu 21 367 603, nandarire kutja mena ro-COVID 19 ovandu kaave yenene okuworongana pamwe. Otjivarero ho tja ruruma otjivarero tjOvahongonone va Jehova mouye auhe. Otjiperi kutja Jehova ka yandja ombango kokutja ovandu vengapi mbe ya kOmazemburukiro wonḓiro ya Jesus, nungwari u yandja ombango komundu auhe ngu ri pOmazemburukiro ngo. (Luk. 15:7; 1 Tim. 2:3, 4) Matu yenene okukara nongamburiro kutja Jehova u ungurisa otjiungura tjomaṋangero okutuvatera okupaha imba mbe nomitima omiwa.—Lesa Hagai 2:7.

12. Ovikwaye mbi mape ya avi tjiti kutja irire ouzeu ku eṱe okukara pOmazemburukiro wonḓiro ya Jesus? (Tara kotjiperendero.)

¹² Jesus wa hunganeka kutja momayuva omasenina matu kara kehi yozongaro ozonḓeu tjimuna omapirukiro okuza keṱunḓu, ondatumisire, ovita, omitjise na vyarwe ovingi. (Mat. 10:36; Mar. 13:9; Luk. 21:10, 11) Povikando tjiva oviṋa otja imbyo vi tjita kutja irire ouzeu ku eṱe okuzemburuka onḓiro ya Jesus. Ovakambure ovakwetu va tjita vi okutuurunga omauzeu ngo, nu omomuano uṋe Jehova me ve vatera?

13. Omomuano uṋe Jehova ma sera Artem ondaya mena rouvanḓe nozongondjero okuzemburuka Omazemburukiro wonḓiro ya Jesus ngunda e ri monḓorongo?

¹³ Okupaterwa monḓorongo. Ovakambure ovakwetu mbe ri monḓorongo mena rongamburiro yawo ve tjita pu mave yenene okuzemburuka onḓiro ya Jesus. Tara kotjihorera tja Artem. Movivike komurungu na kombunda yOmazemburukiro wonḓiro ya Jesus yo-2020, eye wa patererwe mokatuwo okaṱiṱi pu novakamburwa varwe vetano. Nandarire kutja eye wa ri monḓorongo, eye wa yenena okumuna oviṋa mbya ungurisa nu mbya vi kuramene po omboroto notjinwino tjOmazemburukiro wonḓiro ya Jesus. Eye wa tya okuyandja ehungi rOmazemburukiro wonḓiro ya Jesus kutja ma mune mo ouwa. Posi ya ovarumendu varwe mba ri pu na ye mokatuwo ngo aave pepe omakaya nokutukana tjinene. Eye wa tjita vi? Eye we ve ningira okuisa okupepa omakaya nokutukana oure oiri imwe. Nokuhinokuundjira ko, owo va yakura okutjita nao indu tjaa zemburuka onḓiro ya Jesus. Artem wa tja: “Ami mbe ve raera kutja me yenene okuveraera ohunga notjitjitwa ho.” Nandarire kutja owo kaave vanga okutjiwa ohunga notjitjitwa ho, owo kombunda tji va muna nokuzuva kutja Artem wa ri pomazemburukiro wonḓiro ya Jesus, ve mu pura omapuriro.

14. Ovakarere va Jehova va zemburuka vi Omazemburukiro wonḓiro ya Jesus nandarire kehi yo-COVID-19?

 ¹⁴ Omahandjaukiro wo-COVID-19 mouye auhe. Mena romutjise mbwi, ovakarere va Jehova kaave yenene okuzemburuka Omazemburukiro wonḓiro ya Jesus pomatuwo womerikotameneno. Posi ya iho katji ve tjaerere. d Ozombongo tjiva za yenena okuzemburuka onḓiro ya Jesus okupitira morungovi. Posi yokutja hapo tjike ohunga na imba mbe hi na aave yenene okutarera motungovi? Momahi tjiva otutavi twozomberoo twa tjita kutja ovandu ve puratene kehungi okupitira motivii poo oradio. Nu wina otutavi twozomberoo twa toroka ehungi ndo momaraka wokombanda yo-500 kokutja imba mbe kara kotuveze twokokure ve yenene okuzemburuka onḓiro ya Jesus. Nu ovarumendu ovakambure ovaṱakame va vasisa omahungi ngo kovakambure ovakwetu mbe kara kotuveze two.

15. Hapo ovikwaye mbi mo rihongo okuza kotjihorera tjomuhongwa wOmbeibela wena Sue?

¹⁵ Omapirukiro okuza keṱunḓu. Ouzeu umwe tjiva mbu ve muna okukara pOmazemburukiro  wonḓiro ya Jesus, omapirukiro okuza keṱunḓu. Tara kotjihorera tjomuhongwa wOmbeibela wena Sue. Mo-2021, eyuva komurungu wOmazemburukiro wonḓiro ya Jesus, Sue wa raera omundu ngu ve ri honga pamwe Ombeibela kutja kamaa yenene okukara pOmazemburukiro wonḓiro ya Jesus mena rokupirukirwa i yeṱunḓu re. Omundu ngu ve ri honga pamwe Ombeibela wa lesa Lukas 22:44. Eye we mu kahururira kutja indu tji tu ri kehi yomauzeu, tu sokukongorera otjihorera tja Jesus mokukumba ku Jehova nokukara nongamburiro okuura mu ye. Meyuva ependukirwa, Sue wa rongerisa omboroto nomavinu na tarere oprograma yomerikotameneno womuhuka mo jw.org. Ongurova ndjo ngunda e ri erike metuwo re romara, wa puratena kOmazemburukiro wonḓiro ya Jesus mongoze ye. Kombunda eye wa raera omundu ngu ve rihonga pamwe Ombeibela na tja: “Ove we ndji yanḓiparisire tjinene erero. Ami mba tjiti avihe otja pu me yenene okukara pOmazemburukiro wonḓiro ya Jesus nu Jehova we ndji vatere. Tjiri mbi nondjoroka nondangi.” Hapo mo munu kutja Jehova ma yenene okukuvatera tji u ri mongaro otja indjo?

16. Ongwaye tji tu nongamburiro kutja Jehova ma sere ozongondjero zetu ondaya okukara pOmazemburukiro wonḓiro ya Jesus? (Ovaroma 8:31, 32)

¹⁶ Jehova u kara nondangi kozongondjero zetu zokuzemburuka onḓiro ya Jesus. Eṱe matu yenene okukara nongamburiro kutja Jehova me tu sere ondaya indu tji matu raisa ondangi ku imbi mbye tu tjitira. (Lesa Ovaroma 8:31, 32.) Ngatu rimanene okukara pOmazemburukiro wonḓiro ya Jesus ombura ndji. Ovivike komurungu na kombunda yOmazemburukiro ngo, matu vanga okuungurira Jehova ovingi.