1-2. (a) Mape ya atu kara noumune uṋe indu tji matu ripura ohunga nehupo ra Jesus notjiungura tje tjokuzuvarisa? (b) Matu kahungirira ku ye morupa ndwi?

 TJI TWA zepaisa omusuverwa wetu, tu hihamenwa i yomundu ngo tjinene. Poutenga, mape ya atu kara nomihihamo tjinene indu tji matu ripura noruveze ngunda omusuverwa wetu ehi ya ṱa, nu tjinene tjaari momihihamo omingi ngunda ehi ya ṱa. Kombunda yoruveze tu uta okukara nondjoroka rukwao, indu tji matu ripura notjiṋa tje tu honga, poo tja tjita, poo tja hungira okututunduuza, poo tja tjita kutja tu meṱameṱe.

² Momuano otjingewo, otjihihamise okulesa ohunga nomuano Jesus ma hihamwa nonḓiro ye. Komurungu na kombunda yOmazemburukiro wonḓiro ya Jesus, tu twa po oruveze okuripurira kounanḓengu wotjisuta tjonguturiro. (1 Kor. 11:24, 25) Posi yokutja, tu kara nondjoroka onyingi okuripurira koviṋa avihe Jesus mbya hungira nokutjita indu tjaari kombanda yehi. Nu wina tu yanḓiparisiwa indu tji matu ripura kutja eye u ungura ye nai, nokutja me ketu tjitira tjike moruyaveze. Okuripurira ko oukoto koviṋa mbi norusuvero rwe ku eṱe, mavi yenene okutuhinga okuraisa ondangi momiano pekepeke otja tji matu kamuna morupa ndwi.

3. Omapu yeṋe nge tjita kutja tu kare nondangi kotjisuta tjonguturiro?

³ Tu kara nondangi indu tji matu ripurire kehupo ra Jesus nonḓiro ye. Indu tja ri kombanda yehi, Jesus aa hongo ovandu ohunga noviṋa oviwa Ouhona wa Mukuru mbu mau katjita. Eṱe tu tjaterwa i yoviṋa Ombeibela mbi honga ohunga notjisuta tjonguturiro noviṋa oviwa mbi etwa i tjo. Eṱe tu nondangi kotjisuta tjonguturiro mena rokutja tji tjita kutja tu yorokere  oupanga wopopezu ku na Jehova na Jesus. Imba mbe raisa ongamburiro mu Jesus, wina mave kahupa nga aruhe nokukamuna ovasuverwa vawo mba ṱa. (Joh. 5:28, 29; Rom. 6:23) Eṱe katu ya pwa okumuna ozondaya nḓa nu kamaatu yenene okusuta Mukuru na Kristus koviṋa mbi ve tu tjitira. (Rom. 5:8, 20, 21) Posi ya matu yenene okuveraisira kutja tu nondangi. Omomuano uṋe?

4. Maria Magdalena wa raisa vi ondangi ku imbi Jesus mbye mu tjitira? (Tara kotjiperendero.)

⁴ Tara kotjihorera tjomukazendu Omujuda wena Maria Magdalena. Eye wa munine ouzeu mena rokutja aa tatumisiwa i ozondemone hambombari nḓa ri mu ye. Eye mape ya aa munu kutja kape nomundu ngu me mu vatere. Ripura nondangi ndja ri na yo indu Jesus tje mu kutura okuza kozondemone nḓo. Mena rondangi ye, iho tje mu hinga okurira omukongorere wa Jesus, okuungurisa oruveze rwe, omasa nomauini okumuvatera motjiungura tjokuzuvarisa. (Luk. 8:1-3) Nandarire kutja Maria wa raisa ondangi ku imbi Jesus mbye mu tjitira, eye mape ya kaa tjiwa kutja Jesus me kemutjitira ovingi moruyaveze. Eye aa sokuyandja omuinyo we “kokutja auhe ngu ma kambura mu Ye” a kare nomuinyo waaruhe. (Joh. 3:16) Posi ya Maria wa raisa ondangi ku Jesus mokurira omuṱakame. Indu Jesus tja ri komuti wondatumisire, Maria wa kuramene mbo mena rokutja ee rikendere Jesus nokuhuhumiṋa varwe mba ri mbo. (Joh. 19:25) Kombunda yonḓiro ya Jesus, Maria novakazendu varwe vevari va eta ovyomoro omuwa okukatwirisa na vyo orutu rwa Jesus. (Mar. 16:1, 2) Maria wa muna ondjambi mena rouṱakame we ku Jesus. Eye wa ri nondjingonekero okuhakaena nokuhungira ku na Jesus tja za nokupendurwa. Indjo ya ri ondjingonekero ovahongewa varwe ndji ve hi na vari na yo.—Joh. 20:11-18.

5. Eṱe matu yenene vi okuraisa ondangi ku avihe Jehova na Jesus mbi ve tu tjitira?

⁵ Eṱe wina matu yenene okuraisa ondangi yetu ku avihe Jehova na Jesus mbi ve tu tjitira  mokuungurisa oruveze rwetu, omasa novimariva okukarera Jehova. Otjotjihorera, eṱe matu yenene okuvatera okutunga nokuṱuna omatuwo womerikotameneno.

6. Ongwaye tji matu yenene okutja otjisuta tjonguturiro otjiyandjewa ku auhe wetu?

⁶ Indu tji twa tara komuano Jehova na Jesus mu ve tu suvera, iho tji tjita kutja tu ve suvere wina. (1 Joh. 4:10, 19) Eṱe tu ve suverera ko tjinene indu tji twa tjiwa kutja Jesus wa ṱira eṱe kourike wetu. Omuapostele Paulus wa yakura otjiṋa hi nu a raisa ondangi ye indu tja tjanga kOvagalate na tja: ‘Omuna waNdjambi, we ndji suverere nu we riyandjera ami omuinyo we.’ (Gal. 2:20) Mena rokutja Jesus we tu ṱira, Jehova ma yenene okutjita kutja u tumbuke popezu na ye nu u rire epanga re. (Joh. 6:44) Hapo katji ku pe onyuṋe okutjiwa kutja Jehova wa muna otjiṋa otjiwa move nokutja wa suta ondjambi yokombanda kutja u rire epanga re? Hapo katji kurisa orusuvero rwoye ku Jehova na Jesus? Ku nao matu sokuripura oveni kutja, ‘Hapo orusuvero ndo ru ndji hinga okutjita tjike?’

7. Otja tji mo munu motjiperendero, omomuano uṋe auhe wetu mu ma yenene okuraisa orusuvero ku Jehova na Jesus? (2 Kor. 5:14, 15; 6:1, 2)

⁷ Orusuvero rwetu ku Mukuru na Kristus ru tu hinga okuraisa orusuvero ku varwe. (Lesa 2 Ovakorinte 5:14, 15; 6:1, 2.) Omuano umwe mu tu raisa kutja twe ve suvera omokuungura otjiungura tjokuzuvarisa noupyuke. Eṱe tu hungira ku novandu avehe. Eṱe katu raisa ombangu nu tu hungira ku novandu avehe kutja va za momuhoko uṋe, kutja ovatumbe poo ovasyona, kutja va hongwa poo kave hongerwe. Indu tji matu hungire ku nomundu auhe, tu tjita ombango ya Jehova mena rokutja ombango ye oyokutja “ovandu avehe ve ṋingapare nu ve vaze kondjiviro youatjiri.”—1 Tim. 2:4.

8. Omomuano uṋe mu matu yenene okuraisa kutja twa suvera ovakambure ovakwetu?

 ⁸ Eṱe wina tu raisa kutja twa suvera Mukuru na Kristus mokusuvera ovakambure ovakwetu. (1 Joh. 4:21) Eṱe tu rikendera kovihepwa vyawo nokuvevatera indu tji ve ri momauzeu. Eṱe tu ve huhumiṋa indu tji va zepaisa ovasuverwa vawo nokukevetara tji va vere nokutjita pu matu yenene okuveyanḓiparisa tji va u momuinyo. (2 Kor. 1:3-7; 1 Tes. 5:11, 14) Eṱe tu kayenda komurungu okuvekumbira mena rokutja tu tjiwa kutja “ongumbiro yomunangamburiro i sora oviṋa avihe.”—Jak. 5:16.

9. Omuano uṋe warwe mu matu yenene okuraisa orusuvero kovakambure ovakwetu?

⁹ Eṱe wina tu raisa orusuvero kovakambure ovakwetu mokuungura oukukutu okukara nohange na wo. Eṱe tu kondja okuhorera komuano Jehova me isira varwe. Jehova wa ri nonḓero okuhinda omuna we okuyekuṱira omauvi wetu. Ku nao, eṱe matu sokukara nonḓero okuisira ovakambure ovakwetu indu tji ve tu hihamisa. Eṱe katu nokuvanga okukara otjomukarere omurunde ngwa tamunwa momasasanekero wa Jesus. Nandarire kutja kombunda omuhona we we mu isira ondjo ye onene, omukarere ngo kaisirire omukarere omukwao, ngwa ri nondjo ye onḓiṱi. (Mat. 18:23-35) Indu tji mwa pitasana nomukweṋu mombongo, hapo mo yenene okutoora omukambo omutenga wokutjita ohange ngunda au hi ya ya kOmazemburukiro wonḓiro ya Jesus? (Mat. 5:23, 24) Indu tji wa tjiti nao, mo raisa kutja wa suvera Jehova na Jesus tjinene.

10-11. Ovanene vombongo mave raisa vi orusuvero ku Jehova na Jesus? (1 Petr. 5:1, 2)

¹⁰ Ovanene vombongo mave yenene vi okuraisa kutja va suvera Jehova na Jesus? Omuano umwe omunanḓengu omokuvatera ozonḓu za Jesus noviṋa mbi maze hepa. (Lesa 1 Petrus 5:1, 2.) Jesus wa kahurura epu ndo komuapostele Petrus. Kombunda yokupataṋa Jesus povikando vitatu, Petrus wa ri nonḓero okuraisa kutja wa suvera Jesus. Kombunda yombendukiro ye, Jesus wa pura Petrus nai: “Simon, muatje waJohanes, ove we Ndji suvera?” Eṱe matu tjiwa nawa kutja Petrus atja tjita otjiṋa ngamwa okuraisa kutja wa suvera Omuhona we. Jesus wa raera Petrus nai: “Risa ozonḓu zandje.” (Joh. 21:15-17) Nu mehupo re, Petrus aa tjevere ozonḓu zOmuhona we norusuvero. Iho aatji raisa kutja eye wa suvera Jesus.

¹¹ Vanene vombongo, ovivike komurungu na kombunda yOmazemburukiro wonḓiro ya Jesus, mamu yenene okuraisa vi kutja omambo wa Jesus ku Petrus omanḓengu ku eṋe? Eṋe mamu yenene okuraisa kutja mwa suvera Jehova na Jesus, mokukondja okukara noruveze aruhe okuyanḓiparisa ovakambure ovakweṋu. Nu wina okuungura ovingi okuvatera imba mba yaruka ombunda mongamburiro okukotoka ku Jehova. (Esek. 34:11, 12) Eṋe wina mamu yenene okukondja okuyanḓiparisa imba mbe rihonga Ombeibela na imba mba raisa ombango mokukara pOmazemburukiro wonḓiro ya Jesus. Eṱe tu vanga okuveyakura nawa mena rokutja tu undjira ko kutja mave rire ovahongewa va Jesus.

12. Ongwaye okuripurira komambo Jesus nga hungira mongurova komurungu wonḓiro ye tji ye tu pa ouvanḓe? (Joh. 16:32, 33)

¹² Mongurova ngunda eye ehi ya ṱa, Jesus wa raera ovahongewa ve na tja: “Mamu munu ouzeu mouye. Nungwari yanḓipareye! Ami ouye mba toṋa!” (Lesa Johanes 16:32, 33.) Otjikeṋa tji tja vatera Jesus okukara nouvanḓe nokupanḓera pouṱakame nga konḓiro indu ovanavita na ye tja ve mu tirisa? Eye we riyameka ku Jehova. Jesus wa ningira Jehova okutjevera ovahongewa ve, eye tjinga aa tjiwa kutja  mave munu omarorero otjingewo. (Joh. 17:11) Ongwaye iho tji matji tu pe ouvanḓe? Mena rokutja Jehova u nomasa okukapita ovanavita na eṱe. (1 Joh. 4:4) Jehova u muna oviṋa avihe. Eṱe tu nongamburiro kutja, indu tji twe riyameke ku Jehova, eye me tu vatere kutja atu ha tira nu tu kare nouvanḓe.

13. Josef ngwa zire ko Arimatea wa raisa vi ouvanḓe?

¹³ Tara kotjihorera tja Josef ngwa zire ko Arimatea. Eye wa tengerwe tjinene i yOvajuda. Eye wa ri okaṋepo kotjira tjOvajuda ngwa karere motjombanguriro tjokombanda. Nungwari, indu Jesus tja zuvarisa kombanda yehi, Josef karaisire ouvanḓe. Johanes wa tja: “Josef wa ri omuhongewa waJesus nu mongumumu, tjinga iya tira ovanane vOvajuda.” (Joh. 19:38) Nandarire kutja Josef wa ri nonḓero mombuze yOuhona, eye we rihoreka ku varwe kutja ave ha tjiwa kutja u nongamburiro mu Jesus. Eye mape ya aa tira kutja ovandu kamaave mu raisire ondengero indu tji va tjiwa kutja eye omuhongewa wa Jesus. Posi yokutja Ombeibela i tja kombunda yonḓiro ya Jesus, Josef “wa kahita moyaPilatus nokuhinemuma, nu e kemuningira orutu rwaJesus.” (Mar. 15:42, 43) Josef kee rihoreke rukwao kutja eye omuhongewa wa Jesus.

14. Mo sokutjita vi indu tji u tira ovandu?

¹⁴ Hapo ove u tira ovandu tjimuna Josef? Hapo tji u ri poskole poo poviungura, u ṱohoṋi okuraera ovandu povikando tjiva kutja oove Omuhongonone wa Jehova? Hapo ove u keyakeya okuuta okuzuvarisa poo okupapitisiwa mena rokutja u rikenda kutja varwe mave kara noumune uṋe ohunga na ove? O yandjere oumune mbo okukutjaera okutjita otjiṋa tji mo tjiwa kutja otjisemba. Kumba ku Jehova okuza komutima. Mu ningira kutja me ku pe ouvanḓe okutjita ombango ye. Otja tji mo munu omuano Jehova mu ma ziri ozongumbiro zoye, ove mo yanḓipara nu ko nokutira.—Jes. 41:10, 13.

15. Indu Jesus tje rimunikisa kovahongewa ve, ondjoroka yawo ye ve hinga okutjita vi? (Luk. 24:52, 53)

¹⁵ Ovahongewa va ri nomuhihamwatima indu Jesus tja ṱa. Ripura omuini andakuzu wa ri mongaro yawo. Owo va pandjara epanga rawo esuverwa nu wina kava ri nomaundjiro rukwao. (Luk. 24:17-21) Nungwari indu Jesus tje rimunikisa ku wo, eye we ve vatera okuzuva omuano ma yenenisa omaprofetero wOmbeibela. Eye wina we ve pa oviungura ovinanḓengu okuungura. (Luk. 24:26, 27, 45-48) Indu Jesus tja ronda keyuru kombunda yomayuva 40, ovahongewa kava ri nomuhihamwatima rukwao nungwari owo va ri nondjoroka onene. Owo va ri nondjoroka mena rokutja aave tjiwa  kutja Jesus u nomuinyo nu me ve vatere okuyenenisa oviungura mbye ve pa. Ondjoroka yawo ye ve hinga okuhinokuisa okutanga Jehova.—Lesa Lukas 24:52, 53; Oviung. 5:42.

16. Matu yenene vi okuhorera kovahongewa va Jesus?

¹⁶ Matu yenene vi okuhorera kovahongewa va Jesus? Eṱe matu yenene okukara nondjoroka okurikotamena ku Jehova ovivike komurungu na kombunda yOmazemburukiro wonḓiro ya Jesus, nu wina momakayendero wombura aihe. Iho matji hee kutja matu sokutwa po Ouhona wa Mukuru poruveze orutenga mehupo retu. Otjotjihorera, ovandu ovengi va rundurura oprograma yawo yoviungura kokutja ve yenene okuzuvarisa, okuyenda kozombongarero zombongo, nokukara nomerikotameneno weṱunḓu aruhe. Tjiva nandarire va tya okuhinokukara nomauini varwe ngu ve muna kutja omanahepero, kokutja ve yenene okuungura ovingi mombongo poo ve tjindire koṋa ku ku nouhepe wovazuvarise. Nandarire kutja matu hepa onḓaro orure okukarera Jehova, eye wa kwizika kutja me tu sere ondaya indu tji twa twa po Ouhona we poruveze orutenga mehupo retu.—Omiano 10:22; Mat. 6:32, 33.

17. Ove we rimanene okutjita tjike ovivike komurungu na kombunda yOmazemburukiro wonḓiro ya Jesus? (Tara kotjiperendero.)

¹⁷ Tu nondjoroka okuzemburuka Omazemburukiro wonḓiro ya Jesus Oritjavari, tji ye ri 4 ku April. Posi yokutja, o undju nga keyuva ndo tji re ya okuripurira kehupo nonḓiro ya Jesus, norusuvero eye na Jehova ndu ve tu raisira. Ripura noviṋa mbi aruhe otja pu mo yenene, ovivike komurungu na kombunda yOmazemburukiro wonḓiro ya Jesus. Otjotjihorera, twa po oruveze okulesa nokuripurira ko oukoto kovitjitwa mbi ri mokakarata nga “Otjivike tjaJesus otjisenina kombanda yehi,” mOrupa 16 mokambo nga Okambo kokukonḓonona Embo raMukuru. Otja tji mo lese ohunga nehupo ra Jesus, paha otupa twOmbeibela tu matu tjiti kutja ondangi, orusuvero, ouvanḓe nondjoroka yoye vi kurire ko. Okuzambo ripura nomiano mu mo yenene okuraisa ondangi yoye. Ove mo yenene okukara nongamburiro kutja Jesus u nonyuṋe tjinene moviṋa avihe mbi u tjita, okuzemburuka onḓiro ye ovivike komurungu na kombunda wOmazemburukiro wonḓiro ye.—Omavan. 2:19.