Tjiva ve kurira mozombazu ovarumendu ovengi mu ve vara ovakazendu otjovandu mbe hi nonḓengu. Otjotjihorera, Hans, omutarere worukondwa moBolivia wa tja: “Ovarumendu tjiva ve kurisiwa mombazu ndji tunduuza ovarumendu okuritongamisa. Ovarumendu mba ve muna kutja owo ovananḓengu povakazendu nu potuingi kave ve raisire ondengero.” Shengxian, omunene wombongo moTaiwan wa tja: “Mehi retu ovarumendu ovengi ve muna kutja ovakazendu kave sokuyandja oumune wawo kovarumendu. Indu omurumendu tja hungire ohunga noumune womukazendu, ovarumendu varwe mape ya ave he mu raisire ondengero.” Ovarumendu tjiva ve raisira ovakazendu ombangu momiano varwe. Otjotjihorera, owo ve hungira omahungi nge ha raisa ondengero kovakazendu.

Omurumendu ma yenene okurunduruka, nandarire kutja we kurisiwa mombazu iṋe. Eye ma yenene okurihonga kutja omurumendu nomukazendu ve ṱeki pamwe. (Ef. 4:​22-24) Eye ma yenene okutjita nao mokuhorera ku Jehova. Morupa ndwi, matu kahungirira komuano Jehova me vara ovakazendu, omuano ovarumendu ovakambure mu mave yenene okurihonga okuvara ovakazendu ovakambure otja Jehova tje ve vara, nomuano ovanene vombongo mu mave yenene okuhongorera po mokuraisa ondengero kovakazendu ovakambure.

OMOMUANO UṊE JEHOVA ME VARA OVAKAZENDU?

Jehova wa twa po otjihorera otjiwa omuano me vara ovakazendu. Eye oIhe wotjari ngwa suvera ovanatje ve avehe. (Joh. 3:16) Ovakazendu mbe nongamburiro mu ye ovaingona ku ye. Ngatu tare komiano Jehova me raisa kutja wa suvera nokuraisa ondengero kovakazendu.

Eye ka tjiti ombangu kovakazendu. Jehova wa mema omurumendu nomukazendu otja kosaneno ye. (Gen. 1:27) Jehova ka memene omurumendu okukara nozondunge ozengi pomukazendu, nu wa suvera omurumendu nomukazendu pu pe ṱeki. (2 Ekuruh. 19:7) Jehova wa mema omurumendu nomukazendu okuyenena okuzuva nawa ouatjiri wOmbeibela  nokuhorera kovikaṋena vye oviwa. Jehova u raisa ondangi kovarumendu novakazendu mbe nongamburiro mu ye. Eye wa yandja omaundjiro kovarumendu novakazendu okukahupa nga aruhe kombanda yehi, poo omaundjiro wokukahonapara otjozombara novapristeri meyuru. (2 Petr. 1:1) Otjingaperi kutja Jehova ka raisa ombangu kovakazendu.

Eye u puratena ku wo. Jehova u rikendera kovakazendu nomauzeu ngu ve muna. Otjotjihorera, eye wa puratena nokuzira ozongumbiro za Rahel na Hana. (Gen. 30:22; 1 Sam. 1:​10, 11, 19, 20) Jehova wina wa hinga ovatjange vOmbeibela okutjanga ohunga nomahungi wovarumendu mba puratena kovakazendu. Otjotjihorera, Abraham wa puratena ku Jehova indu tje mu raera kutja nga puratene komukazendu we Sara. (Gen. 21:​12-14) Ombara David ya puratena ku Abigajil. Eye aa munu kutja Jehova we mu hinda kutja ma hungire ku na ye. (1 Sam. 25:​32-35) Jesus ngwaa raisa ovikaṋena vya Ihe, wa puratena ku ina Maria. (Joh. 2:​3-10) Ovihorera mbi mavi raisa kutja omuano umwe Jehova me raisa ondengero kovakazendu omokupuratena ku wo.

Eye u nongamburiro mu wo. Otjotjihorera, Jehova wa yandja oviungura ku Eva vyokuvatera okutjevera ehi. (Gen. 1:28) Mokutjita nao, eye wa raisa kutja Eva ke nonḓengu yokehi pomurumendu we Adam, posi ya ma yenene okumuvatera. Jehova wina wa ri nongamburiro movaprofete mba Debora na Hulda okuyandja ondunge kovakarere ve, ku maku kamburire mo ombara nomupangure. (Ovapang. 4:​4-9; 2 Ozomb. 22:​14-20) Ndino, Jehova u yandjera ovakazendu Ovakriste okuungura oviungura vye. Ovakazendu ovaṱakame mba ve karera otjovazuvarise, ovakandjira novahindwa. Owo ve vatera okuṱuna nokutunga Omatuwo wOmerikotameneno notutavi twozomberoo. Tjiva ve karera poBetel, nu varwe ve karera pozomberoo zomatorokero. Ovakazendu ve ri tjimuna “otjimbumba tjovita otjinene” Jehova tje ungurisa okuyenenisa ombango ye. (Eps. 68:​11, NWT) Otjingaperi kutja, Jehova ka vara ovakazendu otjovandu ovingundi.

OVARUMENDU OVAKAMBURE MAVE YENENE VI OKURIHONGA OKUVARA OVAKAZENDU OTJA JEHOVA TJE VE VARA?

Varumendu ovakambure, matu sokutara kutja tu vara ovakazendu ovakambure otja Jehova tje ve vara. Matu hepa okukonḓonona nawa omuano mbu tu ritjinda nokuripura. Kutja tu tjite nao, matu hepa ombatero. Onganga i ungurisa otjiungurisiwa okutara kutja omutima womundu omuveruke poo indee. Momuano tjingewo, omapanga omawa nEmbo ra Mukuru mavi yenene okutuvatera okutara kutja oumune wetu ohunga novakazendu u tjata ku Jehova poo indee. Kutja tu mune ombatero, matu yenene okutjita vi?

Pura epanga. (Omiano 18:17) Eṱe matu yenene okupura epanga mu tu nongamburiro mo nu ngu noumune ouwa notjari omapuriro nga: “Hapo u muna kutja mbi vara ovakazendu ovakambure momuano omuwa? Hapo owo ve muna kutja mbi ve raisira ondengero? Hapo pe notjiṋa tji me yenene okutjita kutja mbi ve vare momuano omuwa?” Indu epanga roye tji re ku raere oviṋa mbi mo sokuungurira ko, o pindike. Posi ya, kara nonḓero yokutjita omarundurukiro.

Konḓonona Embo ra Mukuru. Omuano omuwa mu matu yenene okutjiwa kutja tu vara ovakazendu ovakambure otja Jehova tje ve vara omokuungurisa Embo ra Mukuru okutuvatera okukonḓonona omeripura novitjitwa vyetu. (Hebr. 4:12) Otja tji matu konḓonona Ombeibela, eṱe tu rihonga ohunga novarumendu mbaave vara ovakazendu momuano omuwa novarumendu mbe hi na aave tjiti nao. Eṱe matu yenene okusasaneka ovihorera mbi ku nomuano eṱe mu tu tjinda ovakazendu. Ovarumendu ovambure kave sokutara kezeva rimwe uriri ndi mari ṋunisa oumune ouvi ohunga nokuvara ovakazendu, nungwari mave sokutara nawa komazeva omengi wOmbeibela ngu maye hungire omuano omurumendu mu ma sokuvara omukazendu. Momuano mbwi, owo mave yenene okuzuva nawa oumune wa Mukuru ohunga novakazendu. Otjotjihorera, otja ku 1 Petrus 3:7 ovakazendu ve sokuvarwa otja “ovandu ovingundi.” a Hapo ihi matji hee kutja ovandu vonḓengu yokehi, mbe hi na ozondunge povarumendu? Katjiperi. Sasaneka omambo wa Petrus ku nomambo nge ri mOvagalate 3:​26-29. Oyo ye raisa kutja Jehova wa toorora ovarumendu novakazendu okukahonapara pu na Jesus meyuru. Indu tji matu konḓonona Embo ra Mukuru  nokupura epanga oumune we ohunga nomuano mu tu vara ovakazendu, matu yenene okurihonga okuraisa ondengero kovakazendu ovakambure.

OVANENE VOMBONGO MAVE YENENE VI OKURAISA ONDENGERO KOVAKAZENDU OVAKAMBURE?

Ovarumendu ovakambure mombongo wina mave yenene okurihongera komuano ovanene vombongo mu ve vara ovakazendu ovakambure nondengero. Omomuano uṋe ovanene vombongo mu ve twa po otjihorera otjiwa mokuraisa ondengero kovakazendu ovakambure? Ngatu tare komiano tjiva.

Ovanene vombongo ve tanga ovakazendu ovakambure. Omuapostele Paulus otjihorera otjiwa kovanene vombongo. Eye wa tanga ovakazendu ovakambure ovengi morutuu rwe ndwa tjanga kombongo moRoma. (Rom. 16:12) Ripura ohunga nondjoroka ovakazendu ovakambure ndji va ri na yo indu orutuu rwomuapostele Paulus tji rwa lesewa mombongo. Momuano tjingewo, ovanene vombongo ve tanga ovakazendu ovakambure kovikaṋena vyawo oviwa noviungura mbi ve ungurira Jehova. Ihi tji vatera ovakazendu ovakambure okutjiwa kutja ovandu mombongo ve ve tenga nu ve ripurira ku wo. Omambo omayanḓiparise okuza komunene wombongo, ootjiṋa ovakazendu ovakambure tji ve hepa okukayenda komurungu okukarera Jehova nouṱakame.—Omiano 15:23.

Indu tji mave tanga ovakazendu ovakambure, ovanene vombongo mave sokutjita nao momuano wouatjiri nu omupaturuke. Omena raye? Omukazendu omukambure wena Jessica wa tja: “Onawa indu omurumendu omukambure tji ma raere omukazendu omukambure kutja, ‘wa ungura nawa.’ Posi ya, eṱe tu tjaterwa indu omurumendu omukambure tji me tu tanga kotjiṋa tji twa tjiti, tjimuna okuhonga ovanatje vetu okuhaama nokupuratena pozombongarero zombongo, poo indu tji twa kapaha omundu ngu tu rihonga pamwe okuya kozombongarero zombongo.” Indu ovanene vombongo tji mave tanga ovakazendu ovakambure koviṋa mbi va tjiti, iho tji tjita kutja ve mune kutja ovanahepero mombongo.

 Ovanene vombongo ve puratena kovakazendu ovakambure. Ovanene vombongo overisusuparise ve tjiwa kutja kawo aveyerike mbe yenena okuyandja ondunge ombwa. Ovanene vombongo ve pura ovakazendu ovakambure okuyandja oumune wawo nu ve puratena nawa owo tji mave hungire. Mokutjita nao, ovanene vombongo ve muna mo ouwa nu ve yenena okutunduuza ovakazendu ovakambure. Omomuano uṋe? Omunene wombongo wena Gerardo ngu karera poBetel wa tja: “Ami mbi pura ovakazendu ovakambure oumune wawo mena rokutja ihi tji ndji vatera okuungura oviungura vyandje nawa. Potuingi, owo va ungura oviungura orure okukapita ovarumendu ovakambure.” Mombongo, ovakazendu ovakambure ovengi ve karera otjovakandjira, ku nao ve tjiwa ovingi ohunga novandu mba tura moruveze ndwo. Omunene wombongo wena Bryan wa tja: “Ovakazendu ovakambure ve novikaṋena oviwa ovingi nondjiviro otjira tja Jehova mbi tji hepa. Ku nao, eṱe matu sokurihongera kovihorera vyawo oviwa.”

Ovanene vombongo mbe nondjiviro ombwa ve sokupuratena koumune wovakazendu ovakambure. Omena raye? Omunene wombongo wena Edward wa tja: “Oumune notjihorera tjomukazendu omukambure matji yenene okuvatera omurumendu omukambure okuzuva nawa epu kaaṋi, nu oumune we mau yenene okuvatera omurumendu omukambure okuzuva nawa oumune wavarwe.” (Omiano 1:5) Nandarire kutja omunene wombongo ke nokuyenena okuungurisa oumune womukazendu omukambure, eye ma yenene okutja ndangi koumune nondjivisiro yomukazendu omukambure.

Ovanene vombongo ve honga ovakazendu ovakambure. Ovanene wombongo mbe nondjiviro ombwa ve paha oruveze okuhonga ovakazendu ovakambure. Otjotjihorera, owo mave yenene okuhonga ovakazendu ovakambure omuano wokuhongorera po ozombongarero zotjiungura tjokuzuvarisa indu omurumendu ngwa papitisiwa tje he ri po. Owo mave yenene okuvehonga okuungurisa ozomahina kutja ve yenene okuvatera okutunga nokuṱuna Omatuwo wOmerikotameneno motjira tja Jehova. Ovatarere poBetel ve honga ovakazendu ovakambure okuungura otjiungura tjimuna okuṱuna, okuranda, okuvara ovimariva nozoprograma zokombiuta, noviṋa vyarwe. Indu ovanene vombongo tji mave hongo ovakazendu ovakambure, owo ve vara ovakazendu ovakambure otjovandu ovaṱakame nu mbe nondjiviro.

Ovakazendu ovakambure ovengi ve ungurisa ondjiviro ndji va munu okuza kovanene vombongo okuvatera varwe. Otjotjihorera, ovakazendu ovakambure tjiva ve ungurisa ondjiviro ndji va muna momatungiro okuvatera varwe okutungurura ozondjuwo zawo kombunda yomaumba. Ovakazendu ovakambure varwe ve ungurisa ondjiviro yawo momazuvarisiro womomivanda okuvatera ovakazendu ovakambure ovengi okukara norupa momazuvarisiro ngo. Ovakazendu ovakambure ve noumune uṋe ohunga novanene vombongo mba? Omukazendu omukambure wena Jennifer wa tja: “Indu tje ungura pomatungiro wetu wOmerikotameneno, omunene wombongo we ndji honga. Eye wa tara komuano mu mba ungura oviungura vyandje nu e ndji tanga. Ami ee tjaterwa okuungura pu na ye, mena rokutja eye u nongamburiro mu ami.”

OUWA MBU TU MUNA INDU MATU VARA OVAKAZENDU OVAKAMBURE OTJEṰUNḒU RETU

Eṱe twa suvera ovakazendu ovakambure ovaṱakame tjimuna Jehova tje ve suvera. (1 Tim. 5:​1, 2) Tjiri eṱe tu nondangi nu tu tjaterwa okuungura pamwe na wo. Nu eṱe tu nondjoroka indu owo tji mave tjiwa kutja twe ve suvera nu tu ve poruvara. Omukazendu omukambure wena Vanessa wa tja: “Tjiri ami mbi nondangi tjinene ku Jehova kokutja mbi ri motjira tje mu mwe ura ovarumendu ovakambure mbe ndji tunduuza.” Omukazendu omukambure moTaiwan wa tja: “Ami tjiri mbi nondangi ku Jehova notjira tje mena rokutja ve nondangi kovakazendu nu ve raisa ondengero koumune wawo. Otjiṋa hi tji kurisa ongamburiro yandje nu tji tjita kutja mbi kare nondangi tjinene okukara motjira tja Jehova.”

Tjiri Jehova u tjaterwa indu tji ma munu ovarumendu ovaṱakame mbe nondangi nu mbe raisa ondengero kovakazendu tjimuna eye. (Omiano 27:11) Omunene wombongo wena Benjamin moScotland wa tja: “Ovarumendu ovengi mouye ndino kave raisa ondengero kovakazendu. Ku nao, indu ovakazendu ovakambure tji ve ri pEtuwo rOmerikotameneno matu vanga kutja ve mune kutja tu ve raisira ondengero nu twe ve suvera.” Ngatu kondje pu matu yenene okuhorera ku Jehova mokuraisira ovakazendu ovakambure orusuvero nondengero ndje ve pwire.—Rom. 12:10.