1-2. Omauzeu yeṋe ovakarere va Jehova ovaṱakame ngu mape ya ave munu?

 EHUPO retu mari yenene okurunduruka tjimanga indu tji pa tjitwa otjiṋa otjivi kweṱe. Otjotjihorera, omurumendu omukambure omuṱakame wena Luis a wa munikwa omutjise wokangera. Onganga ye mu raera kutja eye ma ṱu kombunda yomieze omiṱiṱi uriri. Monika nomurumendu we aave karere Jehova pamwe. Eyuva rimwe, Monika wa muna kutja omurumendu we ngwa ri omunene wombongo, aa tjiti ouvi mongumumu oure woruveze orure. Omukazendu omukambure omukombe wena Olivia aa hepa okuisa onganda ye mena rotjivepo otjinamasa tja tji ya. Indu eye tja kotoka, wa muna kutja otjivepo tja nyona ondjuwo ye. Moruveze rwatjimanga, ehupo rovandu vetatu mba ra runduruka tjinene. Wa rora okutjitwa otjiṋa otjivi tji tja rundurura ehupo roye tjimanga?

² Nandarire kutja oweṱe ovakarere va Jehova ovaṱakame, eṱe wina tu muna omauzeu nu tu vera, tjimuna ovandu avehe. Eṱe nandarire mape ya atu hepa okutuurunga ondatumisire poo omapirukiro okuza ku imba mba tonda ovakarere va Mukuru. Nandarire kutja Jehova ke tu tjevere kutja atu ha munu omauzeu otja ingo, eye wa kwizika kutja me tu vatere. (Jes. 41:10) Nombatero ye, eṱe matu yenene okukara nondjoroka, okutoora omikambo omiwa, nokurira ovaṱakame ku ye nandarire tji tu kehi yozongaro ozonḓeu. Morupa ndwi, matu katara komiano vine Jehova me tu vatere. Eṱe wina matu katara ku imbi mbi matu hepa okutjita kutja tu mune ouwa okuza kombatero eye ndje yandja.

JEHOVA ME KU TJEVERE

3. Indu tji pa tjitwa otjiṋa otjivi, ovikwaye mbi mape ya avi rire ouzeu okutjita?

³ Ouzeu. Indu tji pa tjitwa otjiṋa otjivi, mape ya ai rire ouzeu  kweṱe okuripura nawa nokutoora omukambo omusemba. Omena raye? Mena rokutja eṱe mape ya atu kara nomuhihamwatima natu rikende tjinene. Eṱe mape ya atu pambauka natu ha tjiwa kutja matu sokutjita vi. Tara komuano ovakazendu ovakambure vevari mba tamunwa rukuru, maave fula indu tji va ri mouzeu. Olivia wa tja: “Kombunda yaindu otjivepo otjinamasa tji tja nyona ondjuwo yandje, ami ee rimunu okupandjara nu ee rimunu kutja hi nokuyenena okutjinda omauzeu ngo.” Monika wa tja nai ohunga noviṋa omurumendu we mbya tjita: “Ami mba hihamwa tjinene. Ami ee fula tjimuna omundu we ndji twere noruvyo. Ya ri ouzeu kwami okuungura oviungura vyeyuva. Ami hee munu kutja otjiṋa hi mape ya atji tjitwa kwami.” Hapo Jehova wa kwizika okutuvatera momuano uṋe, indu tji matu munu kutja katu nokuyenena okutjinda ouzeu?

4. Otja kOvafilipi 4:​6, 7, ovikwaye Jehova mbye tu kwizikira?

⁴ Jehova wa kwizika okutuvatera momuano uṋe? Eye wa kwizika okutupa ‘ohange yaNdjambi’ ndja tamunwa mOmbeibela. (Lesa Ovafilipi 4:​6, 7.) Ohange ndjo i tjita kutja tu porimane mena rokutja tu noupanga wopopezu ku na Jehova. Ohange ndji ya “kapita ozondunge azehe zovandu,” pu mape hee kutja oyo tjiri otjiṋa otjiwa. Ove mape ya wa rora okukara nohange momuinyo kombunda yokukumba nomasa ku Jehova. Ove oo fula nao mena rokutja Jehova we ku pa ohange ye.

5. Omomuano uṋe ohange ya Ndjambi mu i ṱakamisa omitima nouripura wetu?

⁵ Ovafilipi 4:7 wina ri tja ohange ya Ndjambi “mai ṱakamisa,” poo okutjevera, “omitima vyeṋu nouripura weṋu.” Embo ndi ‘okuṱakamisa’ aari ungurisiwa okuhungirira kovasorondate mbaave tjevere otjihuro kutja atji ha wirwa. Ovandu mba ri motjihuro tja tji tjeverwa i yovasorondate aave rara mohange, mena rokutja aave munu kutja ve ri mondjeverero. Momuano tjingewo, indu ohange ya Ndjambi tji mai ṱakamisa omitima nouripura wetu, eṱe tu porimana mena rokutja tu tjiwa kutja tu ri mondjeverero. (Eps. 4:8) Tjimuna Hana, nandarire kutja ongaro yetu kai nokuhakahana okurunduruka, eṱe matu yenene okukara nohange momuinyo. (1 Sam. 1:​16-18) Nu indu tji twa porimana, potuingi i rira oupupu okuripura nawa nokutoora omikambo omiwa.

6. Ovikwaye mbi matu yenene okutjita kutja tu mune ouwa okuza kohange ya Ndjambi? (Wina tara kotjiperendero.)

⁶ Ovikwaye mbi matu sokutjita? Tjimuna ovature votjihuro tji ve isana ovasorondate okuvetjevera, eṱe wina matu yenene okuningira Jehova okututjevera. Omomuano uṋe? Kumba ngandu tji wa munu ohange ya Mukuru.  (Luk. 11:9; 1 Tes. 5:17) Luis, ngwa tamunwa rukuru, wa kahurura omuano eye nomukazendu we Ana mu va yenena okutjinda ombuze yokutja eye ma ṱu kombunda yomieze omiṱiṱi uriri. Eye wa tja: “Moruveze otja indwo, ouzeu tjinene okutoora omikambo ohunga nouveruke noviṋa vyarwe. Posi yokutja, eṱe twa yenena okukara nohange moruveze oruzeu ndwo, mena rokutja aatu kumbu.” Luis nomukazendu we va tja owo aave kumbu tjinene nu aave kumbu povikando ovingi okuningira Jehova kutja me ve pe ohange momuinyo, omutima omupore, nounongo okutoora omikambo omiwa. Nu owo va muna omuano Jehova me ve vatera. Indu tji u ri mouzeu, panḓera pokukumba nove mo munu ohange ya Jehova tji mai tjevere omutima nouripura woye.—Rom. 12:12.

JEHOVA ME KU ZIKAMISA

7. Eṱe mape ya atu kara noumune uṋe indu tji tu ri kehi youzeu ounene?

⁷ Ouzeu. Indu tji tu ri mouzeu, mape ya atu he ripura nokutjita oviṋa tjimuna tji tu tjita aruhe. Tjimuna oskepi tji i hingwa i yozongazona motjivepo, eṱe wina mape ya atu hingwa i yomeripura omengi pekepeke. Ana, ngwa tamuna rukuru wa tja eye wa ri nomeripura omengi pekepeke kombunda onḓiro ya Luis. Eye wa tja: “Povikando tjiva, ee u momuinyo nu ee utu okuriṱira ondjenda. Ami wina ee pindike mena rokutja eye ke po rukwao.” Povikando vyarwe, Ana ee rimunu ourike nu aa handja mena rokutja aa sokutoora omikambo ohunga noviṋa mbya ri omerizirira wa Luis. Nu, eye ee rimunu kutja u ri motjivepo otjinamasa momuronga. Jehova u tu vatera vi, indu tji twa ha verwa i yomeripura otja ingo?

8. Otja tji pa tamunwa mu Jesaja 33:​6, ovikwaye Jehova mbya kwizika okututjitira?

⁸ Jehova wa kwizika okutuvatera momuano uṋe? Eye wa kwizika okutuzikamisa. (Lesa Jesaja 33:6.) Indu tji ku notjivepo otjinamasa momuronga, oskepi mape ya ai utu okunyinganyinga tjinene. Okutjita kutja oskepi ai ha nyinganyinga tjinene, oyo mape ya ai kara novivava mbi pita kehi yayo momeva. Ovivava mbi vi vatera kutja oskepi ai ha nyinganyinga tjinene. Ku nao, ovandu mbe ri moskepi ve kara mondjeverero nu ve kara nouyenda ouwa. Ovivava mbi vi ungura nawa indu oskepi tji mai kayenda komurungu. Omuano tjingewo, Jehova me tu zikamisa indu tji matu kayenda komurungu okumukarera nouṱakame moruveze rwouzeu.

9. Oviungurisiwa vyetu vyomakonḓononeno mavi yenene okutuvatera vi okukara nouripura ouwa? (Wina tara kotjiperendero.)

⁹ Ovikwaye mbi matu sokutjita? Indu tji wa ha verwa i yomeripura omazeu, kondja  okukayenda komurungu okukumba, okuyenda kozombongarero zombongo, nokuzuvarisa. Posi yokutja, zemburuka kutja Jehova ka undjire ko kutja tu tjite oviṋa mbi tu hi nokuyenena okutjita. (Sasaneka Lukas 21:​1-4.) Wina, twa po oruveze okutjita omakonḓononeno woye omuini nokuripurira ko oukoto. Omena raye? Okupitira motjira tje, Jehova u tu pa ondjivisiro ombwa ndja zikamena kOmbeibela okutuvatera indu tji tu nouzeu. Okumuna imbi mbi mo hepa ove mo yenene okuungurisa oviungurisiwa vyomakonḓononeno tjimuna oprograma ndji JW Library^®, Watch Tower Publications Index, nOkambo komakonḓononeno kOvahongonone vaJehova. Monika, ngwa tamunwa rukuru, wa tja eye wa ungurisa oviungurisiwa vyomakonḓononeno mbyo indu tja utu okuhihamwa momuinyo. Otjotjihorera, eye wa paha embo ndi “omapindi.” Povikando vyarwe, eye wa paha omambo nga “ovineya” poo “ouṱakame.” Okuzambo eye aa lese nga tja pupurukwa momuinyo. Eye wa tja: “Indu tji mba uta okutjita omakonḓononeno, ami mba ri nomerikendero. Posi yokutja, otja tjee kayenda komurungu okulesa, ya ri tjimuna Jehova ee ndji pukata. Otja tjee lese, ami mba muna kutja Jehova u tjiwa omuano mee fula, nu eye ee ndji vatere.” Ombatero otja indjo okuza ku Jehova wina mai yenene okukuvatera okutjinda ongaro mu u ri, ngandu tji wa kara nohange momuinyo.—Eps. 119:​143, 144.

JEHOVA ME KU VATERE

10. Eṱe mape ya atu kara noumune uṋe indu tji pa tjitwa otjiṋa otjivi mehupo retu?

¹⁰ Ouzeu. Indu tji kwa tjitwa otjiṋa otjivi tjinene kweṱe, mape ya ape kara omayuva eṱe mu matu rimunu oungundipare morutu na momuinyo. Eṱe mape ya atu rimunu tjimuna omundu ngwa tupuka otjikara, posi ya nai ngu ṱenḓuna. Mape ya ai rire ouzeu okutjita oviṋa mbyaa ri oupupu kweṱe okutjita, poo eṱe mape ya atu ha kara nonḓero yokutjita oviṋa mbyaavi tu pe ondjoroka. Nu mape ya atu vanga okurara uriri na i rire ouzeu kweṱe okupenduka, tjimuna Elia. (1 Ozomb. 19:​5-7) Jehova wa kwizika okutjita tjike indu tji twa ngundipara?

11. Jehova u tu vatera momuano uṋe warwe? (Epsalme 94:18)

¹¹ Jehova wa kwizika okutuvatera momuano uṋe? Eye wa kwizika okutuvatera. (Lesa Epsalme 94:18.) Tjimuna omutupuke wotjikara ngwa hihamwa tje hepa ombatero okukayenda, eṱe mape ya atu hepa ombatero okukayenda komurungu motjiungura tja Jehova. Mozongaro otja inḓo, Jehova u tu  kwizikira kutja: “OwAmi Muhona, Ndjambi woye; me ku zeuparisa ne tja: ‘O tira, Ami me ku vatere.’” (Jes. 41:13) Ombara David wa muna ombatero ndjo. Indu tjaa wirwa i yovanavita nokumuna omauzeu, eye wa tja nai ku Jehova: “Ombatero yoye ye ndji tjiukisa.” (Eps. 18:35) Posi ya, omomuano uṋe Jehova me yandja ombatero?

12. Jehova mape ya a ungurisa uṋe okutuvatera indu tji twa ngundipara?

¹² Jehova potuingi u ungurisa varwe okutuvatera. Otjotjihorera, otjikando tjimwe David tja ngundiparere, epanga re Jonatan re ya okumuryangera okumupa omasa nokumutunduuza. (1 Sam. 23:​16, 17) Momuano tjingewo, Jehova wa toorora Elisa okuyandja ombatero ku Elia. (1 Ozomb. 19:​16, 21; 2 Ozomb. 2:2) Ndino, Jehova mape ya a ungurisa eṱunḓu retu, omapanga, poo ovanene vombongo okutuvatera. Posi ya, indu tji twa u momuinyo, eṱe mape ya atu vanga okukara kokure novandu. Katjiṋa otjivi okufula nao. Ovikwaye mbi matu yenene okutjita kutja tu mune ombatero ya Jehova?

13. Eṱe matu sokutjita vi kutja tu mune ouwa okuza kombatero ya Jehova? (Wina tara kotjiperendero.)

¹³ Ovikwaye mbi matu sokutjita? Kondja oukukutu kutja o ha kara kokure novandu. Indu tji twa kara kokure novandu, eṱe mape ya atu uta okuripura ohunga na eṱe oveni uriri, nomauzeu ngu tu na wo. Nu mena ranao, iho mape ya atji tjiti kutja atu ha toora omikambo omisemba. (Omiano 18:1) Otjingaperi kutja eṱe atuhe tu hepa oruveze okukara kweṱe oveni, indu tji pa tjitwa otjiṋa otjivi mehupo retu. Posi yokutja, indu tji twa kara kokure novandu oure woruveze orure, eṱe mape ya atu ha yakura ombatero yovandu Jehova ndji ma ungurisa okutuvatera. Ku nao, nandarire kutja ongaro mu u ri mape ya ai rire onḓeu, yakura ombatero okuza keṱunḓu roye, omapanga, novanene vombongo. Zemburuka kutja owo mave ungurisiwa i Jehova okukuvatera.—Omiano 17:17; Jes. 32:​1, 2.

JEHOVA ME KU HUHUMIṊA

14. Ovikwaye mbi mape ya avi tjiti kutja tu tire?

¹⁴ Ouzeu. Mape ya ape kara otuveze eṱe mu matu tira. MOmbeibela, ovakarere va Mukuru ovaṱakame ve hungira ohunga noruveze indu tji va ri mombameno nu tjaave tira mena rovanavita na wo poo oṋiṋikizire. (Eps. 18:4; 55:​1, 5) Momuano tjingewo, eṱe mape ya atu munu omapirukiro poskole, poviungura, okuza keṱunḓu retu, poo okuza kohoromende. Eṱe mape ya atu tira okuṱa mena rouvere kaaṋi.  Mozongaro otja inḓo, eṱe mape ya atu rimunu tjimuna okanatje okaṱiṱi ku ke hi nokuyenena okurivatera. Omomuano uṋe Jehova me tu vatera mozongaro otja inḓo?

15. Ovikwaye Jehova mbi me tu tjitire otja kEpsalme 94:19?

¹⁵ Jehova wa kwizika okutuvatera momuano uṋe? Eye u tu huhumiṋa nokutuporimanisa. (Lesa Epsalme 94:19.) Epsalme ndi mape ya ari tjiti kutja tu ripure ohunga nokanatje okakazona okaṱiṱi ku make tira nu ku ke hi nokuyenena okurara, mena roruṱuṱumo ndu maru rokoha. Matu yenene okuripura na ihe ngwe ke toora, nu e ke pukata nga tji ka rara. Nandarire kutja ku noruṱuṱumo, omahuhumiṋino okuza ku ihe maye tjiti kutja ke rimune mondjeverero. Indu tji matu munu omauzeu omatirise, eṱe matu hepa Tate wetu womeyuru okutupukata momawoko we nga tjitwa porimana. Matu yenene vi okumuna omahuhumiṋino otja ingo okuza ku Jehova?

16. Ovikwaye mbi matu yenene okutjita kutja tu mune ouwa okuza komahuhumiṋino wa Jehova? (Wina tara kotjiperendero.)

¹⁶ Ovikwaye mbi matu sokutjita? Kara noruveze aruhe okukumba ku Jehova nokulesa Embo re. (Eps. 77:​1, 12-14) Indu tji wa iririra okutjita nao, otjiṋa otjitenga tji mape ya o tjiti indu tji u ri kehi yombameno, okuningira ombatero okuza ku Tate woye womeyuru. Raera Jehova kutja ovikwaye mbi mavi ku tirisa, nokutja ovikwaye mbi mavi ku kendisa. Okuzambo, puratena ku ye mokulesa Embo re nu mo munu omuano mu me ku huhumiṋa. (Eps. 119:28) Ove mape ya o munu kutja okulesa omambo kaaṋi mOmbeibela mape ya aye ku huhumiṋa indu tji mo tira. Otjotjihorera, ove mape ya o munu omayanḓiparisiro membo ra Job, Omapsalme, nOmiano, nu wina momambo wa Jesus nge ri mu Mateus ekondwa 6. Indu tji mo kumbu ku Jehova nokulesa Embo re, ove mo munu omuano mu me ku huhumiṋa.

17. Eṱe matu yenene okukara nongamburiro yaye?

¹⁷ Eṱe matu yenene okukara nongamburiro kutja Jehova ma kara pu na eṱe indu tji pa tjitwa oviṋa ovivi mehupo retu. Eṱe kamaatu sewa atuyerike. (Eps. 23:4; 94:14) Jehova wa kwizika okututjevera, okutuzikamisa, okutuvatera, nokutuhuhumiṋa. Jesaja 26:3 ri tja nai ohunga na Jehova: “Ove, Muhona, u yandja ohange ndja yenena ku imba mba zikama momeripura wawo, nu mbe riyameka kOve.” Ku nao, riyameka ku Jehova nu u tjite otja pu mo yenene kutja u mune ouwa okuza kombatero ye. Indu tji wa tjiti nao, ove komoo ngundipara, nandarire moruveze rwouzeu.