1. Ovikwaye mbi ya mouripura woye indu tji mo ripura ohunga na Jehova?

 HAPO wa rora okukondja okuripura kutja Jehova omundu ngu ri vi? Otjikeṋa tji tji ya mourizemburuka woye indu tji mo kumbu ku ye? Eṱe kamaatu yenene okumuna Jehova, nungwari Ombeibela i mu kahurura momiano pekepeke. Jehova u isanewa “eyuva noruvao” nokutja “omuriro omusesete.” (Eps. 84:​11, EEP; Hebr. 12:29) Omutjange umwe wOmbeibela we mu sasaneka ku newe rosafira, omakeṋakeṋeno wongoporo nondjerera youta wombura. (Esek. 1:​26-28) Omakahururiro tjiva ohunga na Jehova mape ya aye tu nyaṋukisa poo nandarire mape ya aye tjiti kutja tu rimune okuhinonḓengu.

2. Ovikwaye mbi mape ya avi tjiti kutja irire ouzeu okuya popezu na Jehova?

² Mape ya a rire ouzeu kweṱe okukambura kutja Jehova we tu suvera, mena rokutja katu yenene okumumuna. Tjiva ve ripura kutja Jehova kee ve suvera mena romauzeu ngu va muna mehupo. Poo mape ya omena rokutja ootate kave tu raisire orusuvero. Jehova u tjiwa ongaro yetu nu u tjiwa kutja ongwaye tji i ri ouzeu kweṱe okutumbuka ku ye. Eye u vandurura ovikaṋena vye mOmbeibela kokutja tu yenene okumutjiwa nawa.

3. Ongwaye tji tu sokutara korusuvero rwa Jehova?

³ Embo rimwe ndi kahurura Jehova nawa orusuvero. (1 Joh. 4:8) Ombeibela i tja Mukuru orusuvero. Oviṋa avihe mbye tjita omena rorusuvero. Mukuru u raisa orusuvero rwe kovandu avehe nandarire ku imba mbe hi ye mu suvera. (Mat. 5:​44, 45) Morupa ndwi matu kahungirira ku Jehova norusuvero rwe. Otja pu matu rihongo ovingi ohunga na Mukuru wetu, opu matu mu suverere ko tjinene.

 JEHOVA WE TU SUVERA TJINENE

4. Otjari tja Jehova tji ku ṱuna vi? (Wina tara kotjiperendero.)

⁴ “Muhona we ura notjari.” (Jak. 5:11) MOmbeibela eye u risasaneka ku ina worusuvero. (Jes. 66:​12, 13) Ripura uriri nomuano ina me rikendera okanatje ke. Eye u ke ṱizira pomatumbo we na hungire momuano omuwa neraka epore. Indu tji make riri poo tji make hihamwa, eye u ke pa atjihe tji make hepa. Indu tji tu ri mombameno, eṱe matu yenene okukara nongamburiro morusuvero rwa Jehova. Omutjange wEpsalme wa tja: “Tji mba ri nomeripuriro omazeu morukoro rwandje, omahuhumiṋino woye ya tarareka omuinyo wandje.”—Eps. 94:19.

5. Orusuvero rwa Jehova oruṱakame ru heya ye kove?

⁵ Jehova omuṱakame. (Eps. 103:8) Jehova ka isa okutusuvera indu tji twa tjiti ozondataiziro. Ovaisrael va hihamisa Jehova povikando ovingi, posi yokutja indu tji ve ritanaura kozondataiziro zawo, Jehova ee ve raisire orusuvero oruṱakame. Otjotjihorera eye wa tja: “Ove tjinga au ri otjihuze ku Ami, nu ambe ku suvera nokukuyozika.” (Jes. 43:​4, 5) Jehova u norusuvero tjingero kweṱe ndino. Eṱe matu yenene okuriyameka ku ye aruhe. Nandarire tji twa tjiti ozondataiziro ozonene, Jehova ke nokutwesa ko. Indu tji twe ritanaura na tu kotoka ku Jehova, eṱe matu yenene okumuna kutja eye ngunda we tu suvera. Eye u tja “wa tumba ondjesiro.” (Jes. 55:7) Ombeibela i tja eṱe matu yenene okumuna “otuveze twomasuviro tu matu zu ku Muhona.”—Oviung. 3:​19, 20.

6. Matu rihongo ye mu Sakarja 2:8 ohunga na Jehova?

⁶ Lesa Sakarja 2:8. Jehova u tu sasaneka ku nonḓoromwina yeho re. Eho otjiṋa otjitarazu notjinanḓengu korutu. Ku nao, i ri tjimuna Jehova ma tja, ‘Vandu vandje, ingwi auhe ngu me mu hihamisa ma hihamisa otjiṋa otjihuze ku ami.’ Mena rokutja Jehova we tu suvera, eye u muna omauzeu mu tu ri nu u vanga okutuvatera. Eye u hihamisiwa i yomauzeu wetu. Ku nao, matu yenene okukumba kutja: “Ndji ṱakamisa otja onḓoromwina meho roye.”—Eps. 17:8.

7. Omena raye tji matu hepa okupamisa ongamburiro yetu morusuvero rwa Jehova?

⁷ Jehova u vanga kutja tu tjiwe kutja eye we tu suvera. Posi ya eye ma tjiwa kutja eṱe mape ya atu ha munu kutja eye we  tu suvera, mena romauzeu ngu twa tuurunga morukapitaveze. Poo nai mape ya tu tuurunga omauzeu ngu maye roro ongamburiro yetu mu Jehova. Otjikwaye tji matji yenene okuzeuparisa ongamburiro yetu? Omokurihonga omuano Jehova me raisa orusuvero rwe ku Jesus, ovatwirisiwa na kweṱe atuhe.

OMUANO JEHOVA ME RAISA ORUSUVERO RWE

8. Omena raye Jesus tja ri nongamburiro kutja Ihe we mu suvera?

⁸ Jehova nOmuna we va kara pamwe orure okukapita omundu kaaṋi. Mena rozombura ozengi tjinene nḓu va kara pamwe meyuru,ihi tja tjita kutja ve kare noupanga wopopezu nokutja orusuvero rwawo ru kurire ko. Jehova wa raisa kutja wa suvera Jesus otja tji matu lese mu Mateus 17:5. Jehova a tja tja, ‘Ingwi omu mbi nonyuṋe.’ Posi ya eye aa vanga kutja tu tjiwe kutja eye wa suvera Jesus. Eye opa zokumuisana “Omuna wandje omusuverwa.” Jehova wa ri nonyuṋe mu Jesus. Nu wina wa ri nonyuṋe mu ye mena rokutja Jesus we riyandjera okuyandja omuinyo we. (Ef. 1:7) Nu Jesus kaa keyakeya kutja Ihe we mu suvera. Eye, aa tjiwa nawa kutja Jehova we mu suvera. Jesus wa hungira ovikando ovingi kutja Jehova we mu suvera.—Joh. 3:35; 10:17; 17:24.

9. Omambo yeṋe nge raisa orusuvero rwa Jehova kovatwirisiwa? Kahurura. (Ovaroma 5:5)

⁹ Jehova wina u raisa orusuvero rwe kovatwirisiwa. (Lesa Ovaroma 5:5.) Tara komambo nga, “tjinga a tirira.” Embo rimwe romambo ra tja orusuvero rwe “ru ya kombanda yetu tjimuna omeva ngu maye randata.” Omambo nga tjiri maye raisa omuano Jehova ma suvera ovatwirisiwa. Ovatwirisiwa ve tjiwa kutja ve ri “morusuvero rwaNdjambi.” (Judas 1) Omuapostele Johanes wa yandja oumune wawo indu tja tjanga kutja: “Tareye indwi orusuvero orunene Tate ndwe tu suvera na rwo! Eye u tu tja oweṱe ovanatje vaNdjambi.” (1 Joh. 3:1) Hapo Jehova wa suvera ovatwirisiwa uriri? Kako, Jehova wa raisa orusuvero rwe kweṱe atuhe.

10. Otjiraisiro tjiṋe otjinene tji tji raisa kutja Jehova we ku suvera?

¹⁰ Otjikwaye Jehova tja tjita okuturaisira kutja we tu suvera? Okupitira motjisuta tjonguturiro, Jehova wa raisa orusuvero oruingi okukapita omundu kangamwa. (Joh. 3:16; Rom. 5:8) Jehova wa yandja Omuna we kutja ma ṱire ovandu avehe kutja omauvi wetu ye isirwe nu tu yenene okurira omapanga we. (1 Joh. 4:10) Indu tji matu ripurire ko oukoto ohunga notjisuta Jehova na Jesus tji va suta, otji matu yenene okuzuva nawa omuano mu ve tu suvera kourike wetu. (Gal. 2:20) Otjisuta tjonguturiro katji sutirwe mena rokutja Jehova oMukuru omunausemba nu aa sokutjita nao. Otjo otjiyandjewa tjorusuvero. Jehova wa raisa orusuvero rwe kweṱe tja punguha Jesus, ngu ri omuingona ku ye. Jehova wa yandjera Omuna we okuhihamisiwa nokutuṱira.

11. Matu rihongere ko ye okuza ku Jeremia 31:3?

¹¹ Jehova we tu suvera posi ya eye wina u tu raera omuano me tu suvera tjinene. (Lesa Jeremia 31:3.) Jehova we tu nanena ku ye mena rokutja we tu suvera. (Sasaneka Deuteronomium 7:​7, 8.) Kape notjiṋa poo omundu ngu me tu pora korusuvero ndwo. (Rom. 8:​38, 39) Orusuvero ndwi ru tjita kutja ove u kare noumune uṋe? Lesa Epsalme 23 nu u mune kutja David wa ri noumune uṋe ohunga norusuvero rwa Jehova nokutja ove mo yenene okukara noumune uṋe.

HAPO ORUSUVERO RWA JEHOVA RU KU ṰUNA VI?

12. Mo yenene vi okukahurura ousupi Epsalme 23?

¹² Lesa Epsalme 23:​1-6. MEpsalme ekondwa 23 David wa raisa kutja Jehova we mu  suvera nu ee mu tjevere. Eye wa hungirira koupanga wopopezu pokati ke na Jehova, ngwa isana kutja Omurise we. David aa yandjere Jehova okumuhongorera po nu eye ee riyameke ku ye. David aa tjiwa kutja Jehova me mu raisire orusuvero eyuva arihe mehupo re. Otjikeṋa tji tja tjita kutja ma kare noumune mbwo?

13. Omena raye David tja ri nongamburiro kutja Jehova u rikendera ye?

¹³ “Hi na tji me hepa.” David aa munu kutja Jehova me mu tjevere nawa mena rokutja ee mu parura nawa. David aa tjiwa nawa kutja Jehova epanga re nokutja Jehova wa ri nonyuṋe mu ye. Ku nao, opa zokukambura kutja nandarire kutja pa tjitwa tjike moruyaveze, Jehova me mu parura noviṋa avihe mbi ma hepa. Mena rokutja David wa ri nongamburiro morusuvero rwa Jehova nokutja me mu parura, iho tja tjita kutja ehe rikende posi ya a kare nondjoroka nokukowa mu imbi mbye na vyo.—Eps. 16:11.

14. Jehova ma yenene vi okurikendera kweṱe norusuvero?

¹⁴ Jehova u tu tjevera norusuvero, tjinene indu oviṋa ovivi tji mavi tjitwa mehupo retu. Claire, a ngwa karera poBetel oure wozombura 20, kaa tjiwa kutja nga tjite vi indu eṱunḓu re tji ra wirwa i yomauzeu omanene. Ihe wa wa orumbembera, omuangu we wa kondwa kombongo nu eṱunḓu re ra ri nouzeu wotjimariva na ri pandjara ondjuwo yawo. Jehova we ve raisira vi orusuvero? Claire wa tja: “Jehova aa tjiti kutja eṱunḓu randje ri kare noviṋa mbya ve hepa eyuva arihe. Povikando ovingi Jehova we tu pa ovingi okukapita imbi mbyaatu hepa. Popengi mbi ripura ohunga novikando  Jehova mbye tu vatera nu himee zembi orusuvero rwe ndo. Okuripura noviṋa mbi kwe ndji vatera okukayenda komurungu okukarera Jehova nandarire kehi yomauzeu.”

15. Omena raye David tje ri munu okuyarurwa koupe? (Wina tara kotjiperendero.)

¹⁵ “Eye me ndji yarura koupe.” Povikando tjiva David aa u momuinyo mena romauzeu ngaa munu. (Eps. 18:​4-6) Posi ya orusuvero rwa Jehova nomuano me rikendera ye aa ku mu yarura koupe. Jehova wa suvisa epanga re “momaryo wondjoura” nu e mu “twara komeva omatarareke.” Mena ranao David wa hara omasa nu wa kayenda komurungu okukarera Jehova nondjoroka.—Eps. 18:​28-32.

16. Omomuano uṋe orusuvero rwa Jehova mu rwe ku yarura koupe?

¹⁶ Momuano tjingewo ndino, eṱe tu yenena okutuurunga omauzeu mena ‘rorusuvero rwaMuhona orukarerere.” (Omiimbo 3:22; Kol. 1:11) Tara kotjihorera tja Rachel. Eye wa wire momuinyo tjinene indu omurumendu tje mwesa na tja isa Jehova indu omutjise wokorona tji wa handjauka mouye. Ovikwaye Jehova mbye mu tjitira? Eye wa tja: “Jehova ee ndji raisire kutja mba suverwa. Eye we ndji pa omapanga nga ye twa po oruveze okukara pu na ami, okundjiyetera ovikurya, okuhinda ozombuze ozombwa nozoyanḓiparise, nokumeṱameṱa pu na ami, nokundjizemburukisa kutja Jehova u rikendera ami. Ami aruhe mbi tja ndangi ku Jehova okundjipa eṱunḓu enene ndi norusuvero.”

17. Omena raye David tje ‘hi na a tira’?

¹⁷ “Hi na tji me tira, orondu Ove tjinga au ri puna ami.” Omuinyo wa David potuingi au kara moumba nu wa ri novanavita ovengi ovanamasa. Posi yokutja orusuvero rwa Jehova aaru tjiti kutja me rimune ondjeverero. David aa yenene okumuna kutja Jehova u ri pu na ye mongaro aihe nu iho aatji mu yanḓiparisa. Ku nao, eye opa zokuyenena okuimbura kutja: “Eye we ndji yama kozondiriro zandje azehe.” (Eps. 34:4) Nandarire kutja David povikando tjiva aa tira tjinene, eye wa yenena okutuurunga mena rokutja aa tjiwa kutja Jehova we mu suvera.

18. Omomuano uṋe orusuvero rwa Jehova mu maru yenene okukupa omasa indu tji mo tira?

¹⁸ Okutjiwa kutja Jehova we tu suvera ku tu pa vi omasa indu tji tu ri mozongaro ozonaumba? Omukazendu omukandjira wena Susi  wa hungirira komuhihamwatima eye nomurumendu we mbu va ri na wo indu omuatje wawo omuzandu tje rizepa. Eye wa tja: “Indu otjiṋa otjivi tjinene tji tja tjitwa mehupo roye, tji ṱuna kove tjinene nu u tira kutja mape tjitwa oviṋa varwe ovivi. Posi yokutja orusuvero rwa Jehova rwa tjita kutja tu rimune mondjeverero.” Rachel ngwa tamunwa rukuru wa zemburuka kutja: “Ongurova imwe indu tji mba wire momuinyo nokurikenda tjinene nokutira, ami mba kumba tjinene ku Jehova. Katjisupi, eye wa wisa omutima wandje pehi nu mba porimana tjimuna ina tje tjita kokanatje ke, nu okuzambo e rara. Ami himee roro okuzemba eyuva ndo.” Omunene wombongo wena Tasos wa kara monḓorongo oure wozombura 4 mena rokutja aa panḓa okurira omusorondate. Omomuano uṋe ma muna orusuvero nomerikendero wa Jehova? Eye wa tja: “Jehova we ndji pa ovingi okukapita imbi mbyee hepa. Iho tja tjita kutja mbi kare nongamburiro okuura mu ye. Nu wina okupitira mombepo ye, Jehova we ndji pa ondjoroka nandarire kutja onḓorongo ya ri oruveze oruvi. Iho tje ndji vatera okumuna kutja tji mba kara nongamburiro onyingi mu Jehova, me munu omuano mu me ndji raisire orusuvero rwe. Ku nao mba uta okumukarera otjomukandjira omukarerere ngunda mbi ri monḓorongo.”

TUMBUKA POPEZU KU MUKURU WOYE WORUSUVERO

19. (a) Okutjiwa kutja Muhona we tu suvera, ku ṱuna vi kozongumbiro zetu? (b) Omambo yeṋe nge ku ṱuna tjinene nge hungira ohunga norusuvero rwa Jehova? (Tara okawongo nga “ Omambo nge tu vatera okumuna orusuvero rwa Jehova.”)

¹⁹ Ovihorera ku twa hungirire ko vi raisa kutja Jehova ngu ri “Ndjambi worusuvero,” u ri pu na eṱe. (2 Kor. 13:11) Eye u nonḓero mweṱe kourike wetu. Eṱe tu nongamburiro kutja eṱe tu “yamwa i yotjari tje.” (Eps. 32:10) Otja tji matu ripurire ko oukoto komuano me tu raisira orusuvero, otji tu muna omuano me rikendera eṱe nu iho tji tjita kutja tu tumbuke popezu na ye. Eṱe matu yenene okukumba ku ye nokuhinokutira nokumuraera kutja tu hepa orusuvero rwe. Eṱe matu yenene okumuraera omerikendero wetu ayehe mena rokutja tu nongamburiro kutja u tu zuva nawa nu u vanga okutuvatera.—Eps. 145:​18, 19.

20. Orusuvero rwa Jehova ru tu vatera vi okuya popezu na ye?

²⁰ Tjimuna tji tu nanukirwa okuhaama pomuriro tji ku nombepera, momuano tjingewo orusuvero rwa Jehova ru tu nanena ku ye. Orusuvero rwa Jehova ru nomasa nu rwe ura nounyaṋutima. Ku nao kara nondjoroka kutja Jehova we ku suvera. Indu tji matu tja: “Ami mba suvera Muhona.” ku raisa kutja twa suvera Jehova.—Eps. 116:1.