1. Ouwa waye mbu tu muna indu tji twa kara pOmazemburukiro wonḓiro ya Jesus ombura aihe?

 JEHOVA we tu pa otjiyandjewa otjihuze indu tja hinda Omuna we okutuṱira. (2 Kor. 9:15) Mena rokutja Jesus we tu ṱira, ove mo yenene okurira epanga ra Jehova. Ove wina mo yenene okukara nondjingonekero yokukahupa nga aruhe. Eṱe tjiri tu nondangi ku Jehova ngwe tu pa otjisuta tjonguturiro mena rokutja we tu suvera tjinene. (Rom. 5:8) Kutja tu kayende komurungu okuraisa ondangi nu atu ha zembi imbi Jehova na Jesus mbi ve tu tjitira, Jesus we tu rakiza okuzemburuka onḓiro ye ombura aihe.—Luk. 22:​19, 20.

2. Matu katara ku ye morupa ndwi?

² Ombura ndji, Omazemburukiro wonḓiro ya Jesus maye kara mOroviungura, 12 ku April 2025. Otjingaperi kutja atuhe matu kara po. Matu munu ouwa indu tji twa twa po oruveze ovivike komurungu na kombunda wOmazemburukiro wonḓiro ya Jesus okuripura oukoto a ohunga noviṋa Jehova nOmuna we mbi ve tu tjitira. Morupa ndwi, matu katara kutja otjisuta tjonguturiro tji tu honga ye ohunga na Jehova nOmuna we. Orupa ndu maru kongorere ko maru tu vatere okuzuva nawa omuano mu matu yenene okumuna ouwa okuza kotjisuta tjonguturiro, nomuano mu matu yenene okuraisa ondangi.

OTJISUTA TJONGUTURIRO TJI TU HONGA TJIKE OHUNGA NA JEHOVA?

3. Omundu umwe aa yenene vi okukutura ovandu ovengi kouvi nonḓiro? (Wina tara kotjiperendero.)

³ Otjisuta tjonguturiro tji tu honga ohunga nousemba wa Jehova. (Deut. 32:4) Indu Adam tje hi na wa ri nonḓuviro ku Mukuru,  eye wa rira omunauvi na ṱu. Mena rokutja oweṱe ozondekurona ze, eṱe wina oweṱe ovanauvi nu tu ṱa. (Rom. 5:12) Jehova wa hinda Jesus okuyekutuṱira, kutja me tu kuture kouvi nonḓiro. Posi ya, onḓiro yomundu umwe ngu hi nouvi mai yenene vi okukutura ovandu ovengi kouvi nonḓiro? Omuapostele Paulus wa tja: “Ovandu avehe otja punga ava rira ovanauvi motjimbe tjokuhazuva kwomundu umwe [Adam], owo avehe wina opunga amave varwa otja ovasemba komurungu waNdjambi motjimbe tjonḓuviro yOmundu umwe [Jesus].” (Rom. 5:19; 1 Tim. 2:6) Paulus aa tja ovandu avehe ovanauvi, nu ve sokuṱa mena romundu umwe omunauvi ngu ha ri nonḓuviro. Ku nao, mena romundu umwe ngwa ri nonḓuviro nu ngu ha ri nouvi, eṱe matu yenene okukuturwa kouvi nonḓiro.

4. Ongwaye Jehova tje hi na wa yandjera ovanatje va Adam mba ri nonḓuviro okuhupa nga aruhe?

⁴ Hapo Jehova aa hepa okuhinda Jesus okutuṱira? Ongwaye Jehova tje hi na wa yandjera ovanatje va Adam mba ri nonḓuviro okuhupa nga aruhe? Eṱe mape ya atu munu kutja imbwi atjau rira omuano omuwa okuzengurura ouzeu mbwo, posi ya ihi katja tji rira otjiṋa otjisemba ku Jehova okutjita. Mena rokutja atja pe munika tjimuna Adam ka tjitire ouvi ounene, nu ovanatje ve kava ri ovanauvi.

5. Ongwaye tji matu sokukambura kutja Jehova aruhe ma tjiti imbi mbi ri ovisemba?

⁵ Nu wina andakuzu Jehova ka yandjere otjisuta tjonguturiro, nokuyandjera ovanatje va Adam na Eva okuhupa nga aruhe nandarire kutja va ri nouvi, eye katja kongorera omirari vye vyouwa nouvi. Mena ranao, ovandu mape ya ave munu kutja Jehova ma yenene okutjita nao rukwao nu a ha yenenisa omakwizikiro we ayehe. Posi ya eṱe katu hepa okurikenda. Omena raye? Mena rokutja Jehova wa tjita imbi mbi ri ovisemba, nandarire kutja aa sokupunguha Omuna we. Ku nao matu yenene okukambura kutja eye aruhe ma tjiti imbi mbi ri ovisemba.

6. Otjikaṋena tjiṋe tjarwe tji tja hinga Jehova okuhinda Omuna we? (1 Johanes 4:​9, 10)

⁶ Pe notjikaṋena tjarwe tji tja hinga Jehova okuhinda Jesus okutuṱira, tji tji ri orusuvero rwe kweṱe. (Joh. 3:16; lesa 1 Johanes 4:​9, 10.) Jehova wa hinda Omuna we okutuṱira mena rokutja u vanga kutja tu hupe nga aruhe, nu wina u vanga kutja tu rire orupa rweṱunḓu re. Indu Adam tja tjita ouvi, kaa yenene okurira orupa rweṱunḓu ra Jehova. Mena ranao, eṱe atuhe katu kwaterwe meṱunḓu ra Mukuru. Posi ya mena rokutja otjisuta tjonguturiro tja sutwa, ovandu avehe mbe nongamburiro mu Mukuru nu mbe nonḓuviro ku ye, eyuva rimwe mave karira orupa rweṱunḓu re.  Nandarire nai, Jehova ma yenene okutuisira omauvi wetu, nu matu yenene okukara noupanga wopopezu ku na ye novakambure ovakwetu. Jehova tjiri we tu suvera.—Rom. 5:​10, 11.

7. Omuano Jesus ma tatumisiwa u tu vatera vi okutjiwa kutja Jehova we tu suvera pu pe ṱa pi?

⁷ Indu tji twe ripura nomuano Jehova ma hihamwa indu tjaa munu Omuna we ama tatumisiwa, matu yenene okuzuva nawa kutja eye we tu suvera pu pe ṱa pi. Satan u tja kape nomukarere wa Mukuru ngu ma rire omuṱakame ku ye indu tje ri ouzeu okutjita nao. Okuraisa kutja Satan omunavizeze, Jehova wa yandjera Jesus okutatumisiwa ngunda e hi ya ṱa. (Job 2:​1-5; 1 Petr. 2:21) Jehova wa muna ovandu amave nyekerere Jesus, ovasorondate amave mu tono nokumupapera komuti. Okuzambo Jehova wa tarera Omuna we omusuverwa ama ṱu onḓiro ombi tjinene. (Mat. 27:​28-31, 39) Jehova aa yenene okutjaera kutja oviṋa avihe mbi avi ha tjitwa. Otjotjihorera, indu ovandu tjaave tja: “Ndjambi tjinangara u nonyuṋe mu Ye, nge Mu vatere nambano nai,” Jehova atja tjita nao. (Mat. 27:​42, 43) Andakuzu eye wa tjita nao, otjisuta tjonguturiro katja tji sutwa nu eṱe katja tu kara nomaundjiro. Ku nao, Jehova wa yandjera Omuna we okutatumisiwa nga tja ṱa.

8. Hapo Jehova wa hihamwa indu tjaa munu Omuna we ama tatumisiwa? Kahurura. (Wina tara kotjiperendero.)

⁸ Eṱe katu sokumuna kutja mena rokutja Jehova omunamasaayehe, ka ṱunwa i yoviṋa mbi tjitwa. Eṱe twa ungurwa kosaneno ye, ku nao oviṋa vi yenena okutuṱuna tjimuna tji vi ṱuna ku ye. Ombeibela i tja ovandu ve mu pa “omuhihamwatima” nu ve mu “hihamisa.” (Eps. 78:​40, 41, ONT) Ripura ohunga nehungi ra Abraham na Isak. Jehova wa raera Abraham okupunguha omuna we omukwatwaerike. (Gen. 22:​9-12; Hebr. 11:​17-19) Ripura nomuano Abraham maa fula indi tje rirongera okuzepa omuatje we noruvyo. Ripura nomuano Jehova ma hihamwa indu tjaa munu ovandu tjaave tatumisa Omuna we nokumuzepa.—Tarera okavidio nga, Imitate their faith—Abraham, Part 2, ko jw.org.

9. Ovikwaye mbi mo yenene okurihonga okuza mOvaroma 8:​32, 38, 39 ohunga norusuvero rwa Jehova?

⁹ Otjisuta tjonguturiro otjiraisiro kutja Jehova we tu suvera tjinene okukapita omuzamumwe wetu wopopezu poo epanga retu roposengo. (Lesa Ovaroma 8:​32, 38, 39.) Eṱe matu yenene okukara nongamburiro kutja Jehova we tu suvera tjinene okukapita omuano mbu twe risuvera oveni. Hapo ove u vanga okuhupa nga aruhe? Jehova u vanga nao wina. Hapo ove u vanga kutja ouvi woye u isirwe? Jehova wina u vanga kutja omauvi wetu ye isirwe. Eye u vanga kutja tu yakure otjiyandjewa tjotjisuta tjonguturiro mokuraisa ongamburiro nokukara nonḓuviro ku ye. Otjisuta tjonguturiro  otjiyandjewa otjihuze tji tji raisa kutja Jehova we tu suvera tjinene. Nu mouye oupe, matu kerihonga ovingi ohunga norusuvero rwa Jehova kweṱe.—Omuzuv. 3:11.

OTJISUTA TJONGUTURIRO TJI TU HONGA TJIKE OHUNGA NA JESUS?

10. (a) Omena raye Jesus tjee rikende ohunga nonḓiro ye? (b) Omomuano uṋe Jesus ma yapura ena ra Jehova? (Wina tara kokawongo nga “ Jesus wa yapura ena ra Jehova mokurira omuṱakame.”)

¹⁰ Jesus ee rikende tjinene noumune ovandu mbu ve na wo ohunga na Ihe. (Joh. 14:31) Jesus ee rikende tjinene kutja ovandu mave kara noumune ouvi ohunga na Ihe, mena rokutja eye aa sokuzepewa otjomundu ngwa yamburura Mukuru nu omutjite wouvi. Eye opa zokukumba kutja: “Tate, tji mape sorwa, varamisa otjinwino tjomihihamo hi na ami.” (Mat. 26:39) Posi ya mena rokutja Jesus wa kara omuṱakame ku Jehova nga konḓiro, eye wa raisa kutja ovizeze Satan mbya hungira ohunga na Ihe kauatjiri.

11. Omomuano uṋe Jesus ma raisira ovandu orusuvero? (Johanes 13:1)

¹¹ Otjisuta tjonguturiro tji tu honga omuano Jesus ma suvera ovandu, tjinenenene imba mbe mu kongorera. (Omiano 8:31; lesa Johanes 13:1.) Otjotjihorera, Jesus aa tjiwa kutja oviṋa tjiva mbi ma sokuyekutjita kombanda yehi mavi rire ovizeu, tjinene okuṱa onḓiro ohihamise. Posi ya Jesus wa tjita oviṋa avihe ovizeu mbyo, kamena rokutja Jehova we mu raera okutjita nao uriri, posi ya omena rokutja wa suvera ovandu. Jesus wa raisa orusuvero kovandu indu tjaa zuvarisa ku wo, tjee ve hongo, nokuvevatera. Nu nandarire ongurova komurungu wonḓiro ye, Jesus wa twa po oruveze okukoha ozombaze zovaapostele ve, okuvehonga, okuvetunduuza, nokuvehuhumiṋa. (Joh. 13:​12-15) Ngunda Jesus e ri komuti, Jesus wa yandja omaundjiro  komurumendu ngwa papererwe meṋe ye, kutja ma kakara moparadisa, nu wina wa ningira Johanes okutjevera ina. (Luk. 23:​42, 43; Joh. 19:​26, 27) Jesus wa raisa kutja wa suvera ovandu tjinene, ka mokuveṱira uriri, nungwari we ve raisira mokuvetjinda norusuvero nokuveraisira ouwa.

12. Ovikwaye Jesus mbye tu tjitira nai?

¹² Otjingaperi kutja Jesus “ua kokere omauvi rumue,” posi ya eye ngamba u tu tjitira oviṋa ovingi. (Rom. 6:​10, EEP) Ovikwaye mbye tu tjitira? Eye u kayenda komurungu okuungura kutja me tu pe oviṋa ovingi oviwa mbya etwa i yotjisuta tjonguturiro. Ngatu tare koviṋa mbye tjita. Eye Ombara yetu, Omupristeri Omunene, nu otjiuru tjombongo. (1 Kor. 15:25; Ef. 5:23; Hebr. 2:17) Eye u hongorera po otjiungura tjokuwonga ovatwirisiwa notjimbumba otjinene, nu otjiungura ho matji manuka ku ṱa komaandero wondatumisire ondirise. b (Mat. 25:32; Mar. 13:27) Eye wina u ungurisa omukarere omuṱakame nomunazondunge okutupa imbi mbi matu hepa kutja tu karere Jehova nouṱakame momayuva omasenina nga. (Mat. 24:45) Nu ma kayenda komurungu okututjitira oviṋa, indu tji ma kahonapara oure wozombura eyovi. Jehova tje tu pa Omuna we, ke tu pere kutja me tu ṱire uriri, nungwari me tu tjitire oviṋa ovingi.

KAYENDE KOMURUNGU OKURIHONGA OVIṊA OVIPE

13. Okuripura oukoto maku ku vatere vi okukayenda komurungu okurihonga ohunga norusuvero Mukuru na Kristus ndu ve na ro kweṱe?

¹³ Ove mo yenene okukayenda komurungu okurihonga ohunga norusuvero Jehova Mukuru na Jesus Kristus ndu ve tu raisira mokuripura oukoto koviṋa mbi ve ku tjitira. Ovivike komurungu na kombunda wOmazemburukiro wonḓiro ya Jesus ombura ndji, ove mo yenene okulesa Evangeli rimwe poo yevari. O lese omakondwa omengi motjikando tjimwe. Nungwari otja tji mo lese nokuhinokuhakahana, paha omiano vyarwe mbi mavi raisa kutja ongwaye tji twa sokusuvera Jehova na Jesus. Nu raera varwe oviṋa mbi wa munu momalesero woye.

14. Okutjita omakonḓononeno maku tu vatere vi okukayenda komurungu okurihonga ohunga notjisuta tjonguturiro noviṋa vyarwe? (Epsalme 119:97) (Wina tara kotjiperendero.)

¹⁴ Indu tji wa papitisiwa oure wozombura ozengi, ove mape ya o ripura kutja kape noviṋa  ovipe mbi mo rihongo ohunga nousemba wa Mukuru, orusuvero rwe, notjisuta tjonguturiro. Posi ya, aruhe mape kara oviṋa ovipe okurihonga ohunga noviṋa mbyo. Ku nao, ovikwaye mbi mo yenene okutjita? Lesa nokukonḓonona ondjivisiro ndja zikamena kOmbeibela ndji ri momambo wetu. Indu tji wa lese otjiṋa mOmbeibela tji u ha zuvire nawa, tjita omakonḓononeno. Momakayendero weyuva, ripurira ko oukoto koviṋa mbi wa konḓonona na imbi mbi we rihongo ohunga na Jehova, Omuna we, norusuvero rwawo kweṱe.—Lesa Epsalme 119:97.

15. Ongwaye tje ri ounanḓengu okukayenda komurungu okurihonga oviṋa ovipe okuza mOmbeibela?

¹⁵ O u momuinyo indu tji u ha munine otjiṋa otjipe poo otjinanambango otjikando atjihe tji mo lese Ombeibela, poo tji mo tjiti omakonḓononeno. Ove u ri tjimuna omundu ngu kondja okupaha ongoldo. Potuingi, omundu ngu paha ongoldo u hepa ozoiri ozengi poo omayuva omengi okumuna nandarire ongoldo onḓiṱi. Posi ya eye ka yumbu ohama, nungwari u kayenda komurungu okupaha nomuretima, mena rokutja ongoldo ndja munu nandarire kutja onḓiṱi, oyo ohuze ku ye. Momuano tjingewo, otjiṋa atjihe otjipe tji matu rihongo okuza mOmbeibela otjihuze okukapita ongoldo. (Eps. 119:127; Omiano 8:10) Ku nao, kayende komurungu okulesa Ombeibela nokupaha oviṋa ovipe kutja u rihongere ku vyo.—Eps. 1:2.

16. Matu horere vi ku Jehova na Jesus?

¹⁶ Indu tji mo rihongo, tara kutja oviṋa mbyo mo vi ṱakamisa vi mehupo roye. Otjotjihorera, horera kousemba wa Jehova mokutjinda varwe nokuhinombangu. Horera korusuvero Jesus ndwe na ro ku Ihe na ku varwe mokuriyandjera okutjita oviṋa Jehova mbi ma vanga, nokuvatera varwe nandarire kutja povikando tjiva ouzeu okutjita nao. Nu wina, horera ku Jesus mokuraera varwe oviṋa Jehova mbya tjitira ovandu, kutja owo wina ve raise ongamburiro motjisuta tjonguturiro.

17. Matu katara ku ye morupa ndu maru kongorere ko?

¹⁷ Indu tji twa kayenda komurungu okurihonga ohunga notjisuta tjonguturiro, orusuvero rwetu ku Jehova na Jesus maru kurire ko. Nu mena rokutja eṱe twe ve suvera tjinene, orusuvero rwawo kweṱe maru kurire ko. (Joh. 14:21; Jak. 4:8) Ku nao, ungurisa oviṋa avihe Jehova mbye tu pa okukayenda komurungu okurihonga ohunga notjisuta tjonguturiro. Morupa ndu maru kongorere ko, matu kerihonga ovingi ohunga nozondaya nḓu tu na zo mena rokutja Jesus we tu ṱira, nokutja matu yenene vi okuraisa ondangi korusuvero Jehova ndwe tu raisira.