1. Ovikwaye mbi matu yenene okutjita kutja tu yorokise Jehova?

 OTJOTJIHORERA, ngatu tje wa yandja otjiyandjewa otjiwa tjapeke komundu ngu wa suvera, nu tji ma yenene okuungurisa. Tjiri mo hihamwa omutima indu omundu ngo tja twa mo otjiyandjewa ho motjilae, nu a ha roro okuripurira ko rukwao. Posi ya, ove mo kara nondjoroka indu omundu ngo tja raisa ondangi kotjiyandjewa ho, nu tji me tji ungurisa. Otjihorera hi matji hitasana vi notjiyandjewa tjotjisuta tjonguturiro Jehova tje tu pa? Jehova wa yandja Omuna we okutuṱira. Ku nao, Jehova tjiri u nondjoroka tjinene indu tji matu raisa ondangi kotjiyandjewa tjapeke ho, na korusuvero rwe ndwe mu hingi okutupa otjisuta tjonguturiro.—Joh. 3:16; Rom. 5:​7, 8.

2. Morupa ndwi matu kahungirira ku ye?

² Otja ozombura tji maze kayenda, eṱe mape ya atu isa okumuna otjisuta tjonguturiro otjotjiyandjewa tjapeke. Posi ya, indu tji twa isa okukara nondangi kotjisuta tjonguturiro, mape sana tjimuna twa twa po otjiyandjewa otjiwa ho okuza ku Mukuru poruveze pu tu hi nokuyenena okutjimuna poo okuripurira ko. Kutja otjiṋa ho atji ha tjitwa, eṱe aruhe matu sokuripura ohunga noviṋa avihe Mukuru na Kristus mbi ve tu tjitira. Orupa ndwi maru tu vatere okutjita nao. Eṱe matu kahungirira komuano mu matu yenene okumuna ouwa motjisuta tjonguturiro nai na moruyaveze. Wina matu kahungirira komuano mu matu yenene okuraisa ondangi yetu korusuvero rwa Jehova, tjinenenene ovivike komurungu na kombunda wOmazemburukiro wOnḓiro ya Jesus.

OUWA MBU TU MUNA NAI

3. Ouwa waye mbu tu muna nai mena rotjisuta tjonguturiro?

³ Eṱe nai tu muna ouwa okuza kotjisuta tjonguturiro tja Kristus. Otjotjihorera, mena rotjisuta tjonguturiro, Jehova u tu isira  omauvi wetu. Eye ka hepa okutuisira, posi ya u vanga okutjita nao. Omutjange wEpsalme wa raisa ondangi ye komuano Jehova me isira mokuimbura kutja: “Muhona, oOve omuwa, nu u isira.”—Eps. 86:5; 103:​3, 10-13.

4. Jehova wa yandja otjisuta tjonguturiro koouṋe? (Lukas 5:32; 1 Timoteus 1:15)

⁴ Tjiva mape ya ave munu kutja kave ya pwa okuisirwa i Jehova. Otjingaperi kutja, atuhe katu ya pwa okuisirwa i Jehova. Omuapostele Paulus aa tjiwa kutja keya pwa “okuisanewa omuapostele.” Posi ya, eye wa tja: “Nungwari motjari tjaNdjambi ami mba tjitwa otja tjinga ambi ri nai.” (1 Kor. 15:​9, 10) Indu tji twe ritanaura komauvi wetu, Jehova u tu isira. Omena raye? Mena rokutja we tu suvera, nungwari kamena rokutja twa pwa okuisirwa. Indu tji wa wa momuinyo mena rokutja u muna kutja ko ya pwa okuisirwa i Jehova, zemburuka kutja Jehova ka yandjere otjisuta tjonguturiro kovandu mbe hi nouvi, posi ya wa yandja ku imba mbe ritanaura komauvi wawo nu mbe kondja okutjita omarundurukiro.—Lesa Lukas 5:32; 1 Timoteus 1:15.

5. Hapo matu sokumuna kutja Jehova ma sokutuisira? Kahurura.

⁵ Nandarire kutja twa karera Jehova oure wozombura ozengi, eṱe katu sokumuna kutja eye ma sokutuisira. Otjiperi kutja Jehova u zemburuka oviṋa avihe mbi twe mu tjitira. (Hebr. 6:10) Eye we tu pa otjisuta tjonguturiro otjari, nungwari ketu pere otjotjisuta koviṋa oviwa mbi twe mu tjitira. Ku nao, ma rire navi okuripura kutja Jehova ma sokutuisira mena rokutja twe mu tjitira oviṋa ovingi oviwa. Indu tji twe ripura nao, iho matji hee kutja tu muna kutja katu nokuhepa otjisuta tjonguturiro.—Sasaneka nOvagalate 2:21.

6. Ongwaye Paulus tjaa ungura oukukutu motjiungura tja Jehova?

⁶ Paulus aa tjiwa kutja Jehova kaa hepa okumuisira, nandarire kutja ee mu ungurire oviṋa ovingi. Nu hapo ongwaye tjaa ungura oukukutu motjiungura tja Jehova? Eye wa tjita nao okuraisa kutja wa ri nondangi kouwa notjari Jehova mbwe mu raisira. (Ef. 3:7) Tjimuna Paulus, eṱe tu kayenda komurungu okuungura oukukutu okumukarera kutja tu raise ondangi kotjari Jehova tje tu raisira, nungwari kamena rokuvanga okuisira i ye.

7. Ouwa uṋe warwe mbu tu muna nai mena rotjisuta tjonguturiro? (Ovaroma 5:1; Jakobus 2:23)

⁷ Eṱe wina tu yenena okukara noupanga wopopezu ku na Jehova mena rotjisuta tjonguturiro. a Otja tji pa raisiwa morupa ndwa kapita, eṱe katu kwaterwe noupanga ku na Mukuru. Posi ya, mena rotjisuta tjonguturiro tu yenena okuyorokera ‘ohange pokati ketu na Ndjambi,’ nu iho tji tjita kutja tu kare noupanga wopopezu ku na ye.—Lesa Ovaroma 5:1; Jakobus 2:23.

8. Ongwaye tji tu sokukara nondangi ku Jehova kondjingonekero yongumbiro?

⁸ Okukumba ku Jehova ondjingonekero yapeke ndji tu na yo mena rokukara noupanga wopopezu ku na ye. Jehova u zuvira ozongumbiro nḓu tu kumba pu novakambure ovakwetu pozombongarero zombongo, posi ya eye wina u zuvira ozongumbiro nḓu tu kumba indu tji tu ri atuyerike. Indu tji twa kumbu, eṱe katu rikende tjinene, posi ya imbwo kauwa auyerike mbu tu muna okuza mongumbiro. Ongumbiro i kurisa oupanga wetu ku na Mukuru. (Eps. 65:2; Jak. 4:8; 1 Joh. 5:14) Indu Jesus tja ri kombanda yehi, eye aa kumbu aruhe ku Jehova mena rokutja aa tjiwa kutja me mu puratene, nu aa tjiwa kutja ozongumbiro ze maze tjiti kutja oupanga we ku na Tate we u kurire ko. (Luk. 5:16) Eṱe tjiri tu nondangi kutja mena rombunguhiro ya Jesus, tu yenena okurira omapanga wa Jehova, nu nandarire okuhungira ku na ye mongumbiro.

 OUWA MBU MATU KAMUNA MORUYAVEZE

9. Ouwa waye ovakarere va Jehova ovaṱakame mbu mave kamuna moruyaveze mena rotjisuta tjonguturiro?

⁹ Ouwa waye ovakarere va Jehova ovaṱakame mbu mave kamuna moruyaveze mena rotjisuta tjonguturiro? Owo mave kamuna omuinyo waaruhe. Ovandu ovengi ve muna kutja otjiṋa ho kamaatji tjitwa, mena rokutja ovandu ve ṱa. Posi ya, ondando ya Jehova okuza kombutiro ya ri oyokutja ovandu ve hupe nga aruhe. Andakuzu Adam katjitire ouvi, ovandu katja ve muna kutja kamaave yenene okuhupa nga aruhe. Nu nandarire kutja nai ouzeu okuripura kutja ovandu mave yenene okukahupa nga aruhe, eṱe matu yenene okukara nongamburiro kutja iho matji katjitwa, mena rokutja Jehova wa suta otjisuta tjonḓengu yokombanda tjOmuna we omukwatwaerike kutja otjiṋa ho tji yenenisiwe.—Rom. 8:32.

10. Omaundjiro yeṋe ovatwirisiwa nozonḓu zarwe ngu ve undja nonḓero?

¹⁰ Nandarire kutja okukahupa nga aruhe ouwa mbu matu kamuna moruyaveze, Jehova u vanga kutja tu ripurire ko nai. Ovakriste ovatwirisiwa ve undja nonḓero okukahupa meyuru otja tji mave kahonaparera ehi pu na Kristus. (Omavan. 20:6) Ozonḓu zarwe ze undja nonḓero okukahupa kombanda yehi moparadisa mu mu hi nokukakara omihihamo, omauzeu, poo okuwa momuinyo. (Omavan. 21:​3, 4) Hapo oove umwe wozonḓu zarwe nḓe nomaundjiro wokukahupa nga aruhe kombanda yehi? Omaundjiro wokukahupa kombanda yehi ye nonḓengu imwe nomaundjiro wokukahupa meyuru. Jehova we tu mema kutja tu hupe kombanda yehi, ku nao okuhupa nga aruhe kombanda yehi maku tu etere ondjoroka yatjiri.

11-12. Ozondaya zeṋe nḓu tu u undja okukamuna mOparadisa? (Wina tara koviperendero.)

¹¹ Ripura uriri kutja ehupo mari sana pi mOparadisa kombanda yehi. Ove ko nokuhepa okurikenda rukwao ohunga nokuvera, poo okuṱa. (Jes. 25:8; 33:24) Jehova me ke ku pa oviṋa avihe oviwa mbi u zera. Hapo ove u vanga okurihonga ovingi ohunga novipuka, okuimbura, poo okuperenda? Otjiperi kutja moparadisa matu  kahepa ovanane vozoplana, ovatunge, novaṱuta. Nu wina mape kahepwa ovandu okukuna ovikunino nokuvitjevera, okurongerisa ovikurya, nokuungura oviungurisiwa mbi mavi heperwa po. (Jes. 35:1; 65:21) Ove tjiri mo kara noruveze rwokuungura oviṋa avihe mbi na vyarwe ovingi, indu tji mo hupu nga aruhe.

¹² Tjiri maru karira oruveze rwondjoroka indu tji matu kayakura ovasuverwa vetu mba ṱa. (Oviung. 24:15) Ripura uriri ohunga nondjoroka ndji mo kara na yo indu tji mo rihongo ohunga noviṋa ovingi Jehova mbya mema. (Eps. 104:24; Jes. 11:9) Otjiṋa otjiwa tjinene, ove komoo katjita ouvi, ku nao mo yenene okukarera Jehova nu komoo kahepa okuningira ondjesiro. Hapo ove mape ya o ha vanga okukakara mOparadisa mena rokuvanga okukara “mombyarero youvi yoruveze orusupi” ndwi? (Hebr. 11:25) Kako. Ehupo ewa ndi matu kakara na ro mari rire ewa tjinene okukapita oviṋa mouye mbwi. Zemburuka kutja, omaundjiro wetu wokukahupa mOparadisa maye yenenisiwa. Oparadisa korusenina mai karira oruveze mu matu katura mo. Nu oviṋa avihe mbi mavi yenenisiwa mena rokutja Jehova we tu suvera tjinene nga tja yandja Omuna we okutuṱira.

RAISA ONDANGI KORUSUVERO RWA JEHOVA

13. Omomuano uṋe mu matu yenene okuraisa ondangi yetu korusuvero rwa Jehova? (2 Ovakorinte 6:1)

¹³ Omomuano uṋe mu matu yenene okuraisa ondangi yetu ku Jehova kokutupa otjisuta tjonguturiro? Eṱe matu sokutjita kutja oviungura vye vi rire ovinanḓengu tjinene mehupo retu. (Mat. 6:33) Kombanda yaavihe, Jesus wa ṱa “kokutja imba mbe nomuinyo ave ha ngara ve nomuinyo mu wo oveni, nungwari a rire ingwi ngwa ṱira wo nu ngwa pendurirwa wo.” (2 Kor. 5:15) Jehova tjiri we tu raisira otjari nu we tu isira. Indu tji matu kondjo pu matu yenene okumukarera, tu raisa kutja tu zuva nawa oviṋa mbye tu tjitira nu tu nondangi tjiri.—Lesa 2 Ovakorinte 6:1.

14. Omomuano uṋe mu matu yenene okuraisa ongamburiro momuhunga wa Jehova?

¹⁴ Eṱe wina matu yenene okuraisa ondangi korusuvero rwa Jehova mokukara nongamburiro mu ye nokukongorera omuhunga we. Omomuano uṋe? Indu tji matu sokutoora omukambo kutja matu i komahongero wokombanda poo indee, poo kutja oviungura viṋe mbi matu sokuyakura, eṱe matu sokutara kutja omukambo uṋe Jehova mbu ma vanga kutja tu toore. (1 Kor. 10:31; 2 Kor. 5:7) Indu tji matu toora omikambo mbya zikamene kongamburiro yetu mu Jehova, ongamburiro yetu mu ye noupanga wetu ku na ye vi kurira ko. Nu tu kara nongamburiro yomasa momaundjiro wetu wokukahupa nga aruhe.—Rom. 5:​3-5; Jak. 2:​21, 22.

15. Omomuano uṋe mu matu yenene okuraisa ondangi yetu movivike komurungu na kombunda wOmazemburukiro wOnḓiro ya Jesus?

¹⁵ Pe nomuano warwe mu matu yenene okuraisa ondangi korusuvero rwa Jehova. Matu yenene okutjita nao mokuungura pu matu yenene movivike komurungu na kombunda wOmazemburukiro wOnḓiro ya Jesus. Eṱe matu  sokukondja okukara pOmazemburukiro ngo, nokuṋanga varwe wina. (1 Tim. 2:4) Raera imba mbu wa ṋanga kutja ovikwaye mbi mavi tjitwa pOmazemburukiro wOnḓiro ya Jesus. Ma rire nawa indu tji we ve raisire okavidio nga, Omena ratjike Jesus tja ṱa? na inga Zemburuka onḓiro ya Jesus, mbu u ri ko jw.org. Ovanene vombongo mave sokuṋanga imba mba yaruka ombunda mongamburiro. Ripura uriri nondjoroka ndji kara meyuru na kombanda yehi indu tjiva vozonḓu za Jehova nḓa pandjara tji za kotoka korupanda rwe. (Luk. 15:​4-7) POmazemburukiro wOnḓiro ya Jesus eṱe matu vanga okukorisa ovandu avehe, tjinenenene imba ovape poo imba mba kara orure nokuhinokukara pOmazemburukiro nga. Eṱe tjiri matu vanga kutja ve mune kutja va yakurwa.—Rom. 12:13.

16. Ongwaye tji matu vanga okuungura ovingi motjiungura tjokuzuvarisa ovivike vyokomurungu na kombunda wOmazemburukiro wOnḓiro ya Jesus?

¹⁶ Hapo ove mo yenene okuungura ovingi motjiungura tja Jehova movivike komurungu na kombunda wOmazemburukiro wOnḓiro ya Jesus? Indu tji twa tjiti nao, matu raisa ondangi koviṋa avihe Jehova na Jesus mbi ve tu tjitira. Indu tji matu ungura ovingi motjiungura tjokuzuvarisa, matu yenene okumuna omuano Jehova mu me tu vatere, nu ongamburiro yetu mu ye mai kurire ko. (1 Kor. 3:9) Ove wina mo yenene okutjita omalesero wOmbeibela wOmazemburukiro wOnḓiro ya Jesus nga raisiwa mokambo nga Konḓonona Omatjangwa Eyuva arihe, poo mongongorasaneno yomalesero wOmbeibela ndji ri mokambo komakonḓononeno wombongarero yomokati kotjivike. Ove mo yenene okuungurisa omalesero wOmbeibela nga okutjita omakonḓononeno woye omuini.

17. Ovikwaye mbi yorokisa omutima wa Jehova? (Wina tara kokawongo nga “ Omiano vyokuraisa ondangi korusuvero rwa Jehova.”)

¹⁷ Otjingaperi kutja, mena rongaro mu u ri mape ya o ha ungura oviṋa avihe mbya tamunwa morupa ndwi. Zemburuka kutja Jehova ka sasaneke oviungura mbi mo ungura ku na imbi vyovandu varwe, nungwari u muna imbi mbi ri momutima woye. Eye u tjaterwa indu tji ma munu omuano mu u nondangi kotjiyandjewa tjapeke tjotjisuta tjonguturiro.—1 Sam. 16:7; Mar. 12:​41-44.

18. Omena raye tji tu nondangi ku Jehova Mukuru na Jesus Kristus?

¹⁸ Mena rotjisuta tjonguturiro eṱe tu yenena okuisirwa omauvi wetu, okukara noupanga ku na Jehova, nu tu kara nomaundjiro wokukahupa nga aruhe. Eṱe ngatu kayende komurungu okuraisa ondangi yetu korusuvero rwa Jehova ndwe mu hinga kutja me tu pe ozondaya ozombwa nḓa. (1 Joh. 4:19) Nu wina ngatu kayende komurungu okuraisa ondangi ku Jesus ngwe tu raisira orusuvero tjinene mokuyandja omuinyo we mena retu.—Joh. 15:13.