1. Otjikwaye otjizeu eṱe atuhe tji tu sokutjita?

 EYUVA arihe eṱe tu hepa okutoora omikambo. Omikambo tjiva omipupu okutoora, tjimuna kutja ovikwaye mbi matu ri omuhukomunene poo oruṋe tji matu karara. Posi ya vyarwe omizeu okutoora. Ovyo mape ya avi ṱunu kouveruke wetu, kondjoroka yetu, kovasuverwa vetu, poo komerikotameneno wetu ku Jehova. Matu vanga kutja omikambo mbi matu toora vi ete ouwa kweṱe noveṱunḓu retu. Nu tjinenenene, matu vanga kutja omikambo mbi matu toorora vi tjate ku Jehova.—Rom. 12:​1, 2.

2. Ovikwaye mbi mavi ku vatere kutja u toore omikambo omiwa?

² Ove mo yenene okutoora omikambo omiwa indu (1) tji wa tara komapu ayehe nawa, (2) tji we ripurire koumune wa Jehova, na (3) tji we ripurire komukambo mbu mo toora. Orupa ndwi maru hungirire koviṋa vitatu mbyo. Nu wina maru tu vatere okumuna kutja omomuano uṋe mu matu yenene okuungurisa ozondunge zetu okutjiwa kutja omukambo uṋe mbu matu sokutoora.—Omiano 2:11.

TARA KOMAPU AYEHE

3. Yandja otjihorera tji matji raisa kutja ongwaye tji matu hepa okutara komapu ayehe nawa ngunda atu hi ya toora omukambo.

³ Otjiṋa otjitenga tji mo sokutjita kutja u toore omukambo omuwa, ove mo sokutara komapu ayehe nawa. Ongwaye okutjita nao tje ri otjiṋa otjinanḓengu? Otjotjihorera, ngatu tje omuvere wa i konganga mena romutjise omuzeu mbwe na wo. Hapo onganga mape ya ai yandja omiti komuvere ngo nokuhinokumutara poo okumupura omapuriro? Kako, kamaai tjiti nao. Ove wina mo toora omikambo omisemba indu rutenga tji wa tara komapu ayehe nawa ohunga nongaro mu u ri. Omomuano uṋe mu mo yenene okutjita nao?

4. Otja kOmiano 18:​13, mo yenene okutjita vi kutja u mune ondjivisiro ndji mo hepa? (Wina tara kotjiperendero.)

 ⁴ Ove potuingi mo yenene okumuna ondjivisiro ndji mo hepa indu tji wa pura omapuriro. Otjotjihorera, ngatu tje wa ṋangwa komeerowapamwe. Hapo ove mo sokuyakura omaṋangero ngo? Indu tji u hi nokutjiwa omukayendise womeerowapamwe poo tji u hi nokutjiwa kutja mape katjitwa tjike, ove mo hepa okumupura omapuriro tjimuna nga: “Omeerowapamwe nga maye tjitirwa pi nu oruṋe tji maye tjitwa? Mape kara ovandu vengapi? Ouṋe ngu me ye tjevere? Oouṋe mbu mave kara po? Ovitjitwa viṋe mbi mavi katjitwa? Mape kara otjikariha?” Omaziriro komapuriro nga maye ku vatere okutoora omukambo omusemba.—Lesa Omiano 18:13.

5. Ove mo sokutjita vi indu tji wa tjiwa omapu ayehe nawa?

⁵ Okuzambo ripura nawa ohunga notjitjitwa ho, tji wa zu nokutjiwa omapu ayehe. Otjotjihorera, hapo mo tjiti vi indu tja wa zuu kutja ovandu tjiva mbu mave kara pomeerowapamwe ngo kave nonḓuviro komirari vya Jehova, poo mape kara otjikariha nu kape nomundu ngu ma tjevere kutja ovandu ave ha nu tjinene? Mo munu kutja omeerowapamwe nga mape ya aye rire omavi? (1 Petr. 4:3) Poo mo tjiti vi indu omeerowapamwe nga tji maye tjiti kutja o ha kara pombongarero yombongo poo okuyenda motjiungura tjokuzuvarisa? Indu tji mo tjiwa oviṋa avihe ohunga nomeerowapamwe nga, mai rire oupupu kove okutoora omukambo omuwa. Posi ya pe notjiṋa tjarwe ove tji mo sokutjita.  Ove mo sokutara kutja Jehova u noumune uṋe ohunga notjiṋa hi.—Omiano 2:6.

RIPURIRA KOUMUNE WA JEHOVA

6. Otja ku Jakobus 1:​5, omena raye tji matu sokuningira ombatero ku Jehova mongumbiro?

⁶ Ningira Jehova me ku vatere okutjiwa omuano eye me muna oviṋa. Jehova wa kwizika kutja me tu pe ounongo okutuvatera okutjiwa kutja omukambo uṋe mbu mau tjata ku ye. Eye u yandja ounongo mbwo “nouharupu notjari ku avehe.”—Lesa Jakobus 1:5.

7. Mo yenene vi okurihonga omuano Jehova me muna oviṋa? Yandja otjihorera.

⁷ Indu tji wa kumbu ku Jehova okuningira omuhunga, yandja ombango komuano mu ma ziri ongumbiro yoye. Otjotjihorera, indu tji wa pandjara koṋa ku mo sokuyenda, ove mape ya o ningire ombatero komundu ngwa tura moruveze ndwo. Posi ya, hapo ove mape ya o kayenda ngunda e hi yekuzira? Kako. Ove mo puratene nombango komuhunga auhe mbu me ku pe. Momuano tjingewo, indu tji wa zu nokuningira ounongo ku Jehova, kondja okupaha eziriro kongumbiro yoye mokutjiwa ozoveta nomirari vyOmbeibela mbi mavi hungirire kongaro mu u ri. Otjotjihorera, indu tji mo tye kutja mo i komeerowapamwe nga tamunwa rukuru, ove mo sokutara kutja Ombeibela i tja vi ohunga nomikandi omivi, omapanga omavi, nounanḓengu wokutwa po Ouhona wa Mukuru komurungu yoviṋa mbi mo vanga okutjita.—Mat. 6:33; Rom. 13:13; 1 Kor. 15:33.

8. Mo yenene okutjita vi indu tji mo hepa ombatero kutja u mune ondjivisiro ndji mo paha? (Wina tara kotjiperendero.)

 ⁸ Povikando tjiva, ove mape ya o hepa ombatero okumuna ondjivisiro ndji mo paha. Ove mo yenene okuningira ondunge komukambure ngu nondjiviro. Nu wina mo munu ouwa mokutjita omakonḓononeno woye omuini. Pe nondjivisiro onyingi momambo wetu ndji mai yenene okukuvatera, tjimuna Okambo komakonḓononeno kOvahongonone vaJehova nokambo nga Scriptures for Christian Living. Zemburuka kutja ondando yoye okutoora omukambo mbu mau tjata ku Jehova.

9. Eṱe matu yenene okutjiwa vi kutja omukambo mbu matu toora mau tjata ku Jehova? (Ovaefese 5:17)

⁹ Eṱe matu yenene okutjiwa vi kutja omukambo mbu matu toora mau tjata ku Jehova? Rutenga matu hepa okutjiwa Jehova nawa. Ombeibela i tja ‘okutjiwa ingwi Omuyapuke Umwe okwo ondjiviro.’ (Omiano 9:10) Otjingaperi kutja, ondjiviro yatjiri i za kokutjiwa ovikaṋena vya Jehova, ondando ye, na imbi mbya suvera poo mbya tonda. Ripura omuini kutja, ‘Omukambo uṋe mbu me yenene okutoora mbu mau tjata ku Jehova otja ku imbi mbi me tjiwa ohunga na ye?’—Lesa Ovaefese 5:17.

10. Omena raye omirari vyOmbeibela tji vi ri ominanḓengu tjinene poruzo poo ombazu yetu?

¹⁰ Povikando tjiva, eṱe matu sokupirukira oumune wa imba mbu tu noupanga wopopezu na wo kutja tu yorokise Jehova. Otjotjihorera, ovanene tjiva mbu mave munu kutja mave vatere omuatje wawo, mape ya ave ṋiṋikiza omuatje wawo omukazona okukupwa i yomurumendu omutumbe poo ngu ma yenene okusuta ovitunya ovingi, nandarire kutja eye ka yandja ombango koupanga we ku na Jehova. Otjingaperi kutja owo mave vanga omuatje wawo ma kare nehupo ewa, posi yokutja omuatje ngo u sokuripura omuini kutja: “Hapo omurumendu ngwi me ndji vatere okukara noupanga ouwa ku na Jehova poo indee?” Jehova u noumune uṋe ohunga notjiṋa hi? Eziriro matu rivaza mu Mateus 6:33. Metjangwa ndo, Jesus wa tunduuza Ovakriste kutja: “Rutengatenga paheye ouhona waNdjambi.” Nandarire kutja eṱe tu yozika ovanene vetu, nu tu nondengero kovandu motjiwaṋa tjetu, otjiṋa otjinanḓengu tjinene kweṱe okuyorokisa Jehova.

RIPURIRA KOMUKAMBO MBU MO TOORA

11. Otjikaṋena tjiṋe tji tja tamunwa mOvaheberi 5:14 tji matji yenene okukuvatera okuripurira komukambo mbu mo toora?

¹¹ Indu tji wa tara komirari vyOmbeibela ohunga nomukambo mbu mo toora, ove mo sokuripurira ko nawa. (Lesa Ovaheberi 5:14.) Ozondunge maze ku vatere okuripurira ku imbi mbi mape ya avi tjitwa mena romukambo mbu mo toora. Povikando tjiva, omukambo u rira omupupu okutoora. Posi ya kamikambo avihe mbi ri omipupu okutoora. Ozondunge maze ku vatere okutoora omukambo omuwa nandarire mongaro onḓeu.

12-13. Ozondunge maze yenene okukuvatera vi okutoora omukambo omuwa indu tji mo paha oviungura?

¹² Tara kotjihorera hi. Ove mo paha oviungura okutumba eṱunḓu roye, nu pe nozonganda mbari nḓu maze yandja oviungura. Ove wa tara kutja oviungura mbyo mavi kamburire mo ye, nokutja mo sokuungura ozoiri nomayuva yeṋe, nokutja maku kambura orure ndu ṱa pi okuyenda koviungura, noviṋa vyarwe. Omukriste ma yenene okuyakura oviungura aviyevari mbyo, otja komirari vyOmbeibela. Ove mape ya o vanga okuungura ponganda imwe mena rokutja opu pe noviungura mbi mo vanga poo mena rokutja mavi ku sutu ovimariva ovingi. Posi yokutja pe noviṋa vyarwe ove mbi mo hepa okuripurira ko ngunda au hi ya toora omukambo.

¹³ Otjotjihorera, hapo tjimwe tjoviungura mbi  mape ya atji tjiti kutja o ha kara pozombongarero zombongo? Poo atji kambura oruveze ndu mo hepa okuvatera eṱunḓu roye okukara mondjeverero, nokukara nondjoroka, nokutumbuka popezu na Jehova? Okuripura omapuriro otja ingo, maku ku vatere okuyandja ombango komerikotameneno novihepwa vyeṱunḓu roye, mbi ri oviṋa “oviwaviwa” poo ovinahepero tjinene mehupo pendje nokumuna ovimariva ovingi. (Fil. 1:10) Tji wa tjiti nao mo yenene okutoora omukambo Jehova mbu ma sere ondaya.

14. Ozondunge norusuvero mavi tu vatere vi kutja atu ha putarisa varwe?

¹⁴ Ozondunge wina maze tu vatere okuripurira komuano omukambo wetu mu mape ya au ṱunu ku varwe, kutja atu ha kara ‘notjipo’ poo okuputarisa varwe. (Fil. 1:10) Otjiṋa hi otjinanḓengu indu tji matu toora omikambo ohunga noviṋa tjimuna ozombanda nḓu matu rihwikike poo omuano mbu matu munika. Otjotjihorera, eṱe mape ya twa suvera okumunika nokurihwikika momuano kaaṋi. Posi yokutja, hapo eṱe  matu tjiti vi indu varwe mombongo poo pendje nombongo tji mave ṱunwa i yomuano mbu tu rihwikika? Ozondunge maze tu vatere okuraisa ondengero koumune wawo. Orusuvero maru tu hingi okupaha ‘ombwiro yovakwetu’ nokurihwikika momuano omuhirona. (1 Kor. 10:​23, 24, 32; 1 Tim. 2:​9, 10) Okuzambo eṱe matu toora omukambo mbu mau raisa orusuvero nondengero yetu ku varwe.

15. Ove mo sokuripura ohunga na tjike ngunda au hi ya toora omukambo omunanḓengu?

¹⁵ Jesus we tu honga okuripurira ko nawa indu tji matu sokutoora omukambo omunanḓengu tjinene. (Luk. 14:28) Ku nao ripura ohunga na imbi mbi mo hepa okutjita indu tji mo sokutoora omukambo. Wina tara koruveze, nomauini, nozongondjero nḓu mo hepa okutjita kokutja omukambo mbu mo toora u kare nondoṋeno. Povikando tjiva ove mape o hungire ku neṱunḓu roye ohunga nokutja omundu auhe ma hepa okutjita vi okutjita kutja omukambo mbu wa toora u kare nondoṋeno. Ongwaye okutjita nao tji i ri ohepero? Mape ya aku ku vatere okumuna kutja omukambo mbu mo toora mau hepa omarundurukiro poo pe nomukambo warwe omusemba mbu mo yenene okutoora. Indu tji wa pura oumune wouṋepo weṱunḓu roye nu o puratene ku wo, mai rire oupupu ku wo okuungura ku na ove okutjita kutja omukambo mbu mo toora u kare nondoṋeno.—Omiano 15:22.

TOORA OMUKAMBO MBU MAU KARA NONDOṊENO

16. Ovikwaye mbi mavi ku vatere okutoora omukambo mbu mau kara nondoṋeno? (Wina tara kokawongo nga “ Mo yenene vi okutoora omikambo omisemba?”)

¹⁶ Indu tji wa tara komapu ayehe nawa, nu o konḓonona omirari vyOmbeibela, ove mo yenene okuningira ombatero ku Jehova kutja me ku vatere okutoora omukambo mbu mau kara nondoṋeno.

17. Otjikwaye tji matji ku vatere okutoora omikambo omiwa?

¹⁷ Nandarire kutja wa toora omikambo omiwa morukapitaveze, zemburuka kutja otjiṋa tji matji ku vatere okutoora omikambo omisemba, okuriyameka kounongo mbu za ku Jehova nu kakozondunge zoye omuini poo ondjiviro ndji u na yo. Eye erike ongu ma yenene okuyandja ondjiviro yatjiri, ounongo, nozondunge. (Omiano 2:​1-5) Jehova ma yenene okukuvatera okutoora omikambo mbi mavi tjata ku ye.—Eps. 23:​2, 3.