1. Ovandu ovengi ndino ve yandja ombango ku ye?

 OVE mape ya u muna ovandu ovengi ndino mbe ripurira ku wo oveni tjinene moruveze rwokuripurira ku varwe. Otjotjihorera, tjiva ve ungurisa otungovi twomahakaeneno okunanena ombango ku wo oveni noviṋa mbi va yenenisa mehupo. Posi ya, ovandu ovaṱiṱi uriri ndino ombe yandja ondjozikiro ku Jehova Mukuru. Morupa ndwi, matu katara kutja okuyandja ondjozikiro ku Jehova ku heya tjike, nokutja ongwaye tji matu sokutjita nao. Eṱe wina matu kerihonga omuano mu matu yenene okuyandja ondjozikiro ku Mukuru ndje mu pwira, nokutja omomuano uṋe eye omuini mu ma kayozika ena re moruyaveze rwopopezu.

OKUYANDJA ONDJOZIKIRO KU JEHOVA KU HEYA TJIKE?

2. Omomuano uṋe Jehova ma raisa omasa we pOndundu Sinai? (Wina tara otjiperendero.)

² Ombeibela i raisa kutja Jehova oMukuru omunamasaayehe. Omayuva omaṱiṱi kombunda yaindu Jehova tja za nokukutura otjiwaṋa tjOvaisrael moEngipte, eye we ve raisira omasa we otja Mukuru wawo. Ripura notjiṋa hi: Ovaisrael omangete omengi va woronganene pOndundu Sinai okuzuva imbi Mukuru mbi ma sokuveraera. Otjikamba otjizorondu tja koverere ondundu. Tjimanga ehi ra nyinganyinga nomasa, nu wina pa ri otuṱuṱumo, notutjeno, nu pa ri ombosiro onamasa yohiva. (Eks. 19:​16-18; 24:17; Eps. 68:8) Indu Jehova tja tjita oviṋa mbi, Ovaisrael mape ya va urumine tjinene tji va muna omasa we omahimise.

3. Hapo okuyandja ondjozikiro ku Jehova ku heya tjike?

³ Hapo matu yenene okuyandja ondjozikiro ku Jehova? Ii, matu yenene. Omuano umwe mu tu yandja ondjozikiro ku Jehova omokuraera varwe ohunga noviṋa oviwa eye mbya tjita novikaṋena vye oviwa. Eṱe wina tu yandja ondjozikiro ku Mukuru indu tji matu yandja ohiviro ku ye koviṋa avihe mbye tu vatera okuyenenisa. (Jes. 26:12) Ombara David otjihorera tjimwe otjiwa tjomundu ngwa yandja ondjozikiro ku Jehova. Mongumbiro David ndja kumba komurungu wombongo yOvaisrael, wa tja nai  ku Mukuru: “OOve omunene nomunamasa nomunandjozikiro nomutjiukwa nomunauvara. Oviṋa avihe, mbi ri meyuru na kombanda yehi, ovyoye.” Kombunda yaindu David tja za nokumana okukumba, ‘ombongarero aihe ya tanga Muhona.’—1 Ekuruh. 29:​11, 20.

4. Omomuano uṋe Jesus ma yandja ohiviro ku Jehova?

⁴ Indu Jesus tja ri kombanda yehi, eye wa yandja ohiviro ku Ihe mokuraera varwe kutja Jehova ongwe mu pa omasa okutjita ovihimise. (Mar. 5:​18-20) Jesus wina wa vatera varwe okumuna ouwa wa Jehova. Otjikando tjimwe, Jesus aa hongo mondjuwo yomawongarero wombongo. Mokati kovandu mbaave puratene, pa ri nomukazendu ngwa ri nombepo ohakohoke oure wozombura 18. Ombepo ohakohoke ndjo ya tjita kutja orutu rwe ru rikote tjinene, nu kaa sora okuyeruruka oparukaze. Jesus wa muna omuano omukazendu ngo ma wire momuinyo tjinene nu aa vanga okumuvatera. Ku nao, eye wa ryama popezu nomukazendu na hungire ku na ye momuano omuwa. Eye wa tja: “Muatje, ove wa kuturwa kouvere woye!” Eye wa yambeka omake we ku ye, nu tjimanga omukazendu wa yeruruka nu “a hivirike Ndjambi.” Eye tjiri wa ri nondangi tjinene kutja Jehova we mu verukisa. (Luk. 13:​10-13) Omukazendu ngo wa ri nepu ewa okuyandja ohiviro ku Jehova, nu eṱe wina tu nepu ewa rokutjita nao.

OVIKWAYE MBI TU HINGA OKUYANDJA ONDJOZIKIRO KU JEHOVA?

5. Omapu yeṋe nge tu hinga kutja tu raise ondengero ku Jehova?

⁵ Eṱe tu yandja ondjozikiro ku Jehova mena rokutja tu nondengero tjinene ku ye. Tu nomapu omengi nge tjita kutja tu mu raisire ondengero. Jehova omunamasaayehe, nu omasa we kaye yanda. (Eps. 96:​4-7) Tu yenena okumuna ounongo we okupitira moviṋa mbya mema. Eye we tu pa omuinyo, noviṋa avihe mbi matu hepa kutja tu hupe. (Omavan. 4:11) Eye omuṱakame. (2 Sam. 22:26) Oviṋa avihe mbye tjita vi kara nondoṋeno, nu aruhe u yenenisa omakwizikiro we. (Jos. 23:14) Ku nao, omuprofete Jeremia opa zokutja nai ohunga na Jehova: “Kape na umwe ngu ri otja Ove mokati kozonongo azehe zoviwaṋa na mokati kozombara azehe zarwe.” (Jer. 10:​6, 7) Tjiri tu nomapu omengi ngu maye tu hingi okuraisa ondengero ku Tate wetu womeyuru. Eye u novikaṋena oviwa mbi tjita kutja tu mu suvere tjinene nokumuraisira ondengero.

6. Omena raye tji twa suvera Jehova?

⁶ Eṱe tu yandja ondjozikiro ku Jehova mena rokutja twe mu suvera tjinene. Eṱe twa suvera Jehova mena rovikaṋena vye ovingi oviwa. Eye u notjari. (Eps. 103:​8, 13) Eye u ṱunwa i yomihihamo vyetu. (Sak. 2:8) Eye u tu vatera kutja tu mu tjiwe nokutja tu rire omapanga we. (Eps. 25:14; Oviung. 17:27) Nu mena rokutja Jehova omurisusuparise, eye u “tara pehi na munu eyuru nehi. Eye u yera omusyona okumuisa mo moruuma.” (Eps. 113:​6, 7) Mena romapu ayehe nga, eṱe tu vanga okuyandja ondjozikiro ku Mukuru wetu wokombanda.—Eps. 86:12.

7. Ondjingonekero iṋe ndji tu na yo?

⁷ Eṱe tu yandja ondjozikiro ku Jehova mena rokutja tu vanga kutja varwe ve mu tjiwe. Ovandu ovengi kave tjiwa ouatjiri ohunga na Jehova. Omena raye? Mena rokutja Satan wa kora ovizeze ohunga na ye, nu ovandu ve kambura movizeze mbyo. (2 Kor. 4:4) Satan wa tjita kutja ovandu ve kambure kutja Jehova oMukuru otjindandi, ngu he rikendere kweṱe, nu ngu tjita kutja ovandu ve mune omauzeu. Posi ya matu tjiwa ouatjiri ohunga na Mukuru wetu. Nu tu nondjingonekero yokuraera varwe ouatjiri ohunga na Mukuru nokuvevatera kutja ve mu tange wina. (Jes. 43:10) Epsalme 96 ri hungirira kokuyandja ondjozikiro ku Jehova. Matu kerihonga kutja omomuano uṋe mu matu  yenene okuyandja ondjozikiro ku Jehova ndje mu pwire okuza kEpsalme ndi.

OMOMUANO UṊE MU MATU YANDJA ONDJOZIKIRO KU JEHOVA NDJE MU PWIRE?

8. Omomuano uṋe umwe mu matu yenene okuyandja ondjozikiro ku Jehova? (Epsalme 96:​1-3)

⁸ Lesa Epsalme 96:​1-3. Eṱe matu yenene okuyandja ondjozikiro ku Jehova okupitira moviṋa mbi matu hungire ohunga na ye. Omazeva ngo ye tu hinga kutja tu ‘imburire Muhona, nu tu Mu tange,’ tu ‘zuvarise ombuze ombwa yokutja Eye we tu yama,’ nu tu ‘zuvarise omasa we koviwaṋa ovinavisenginina.’ Avihe mbi omiano mu matu yenene okuyandja ondjozikiro ku Tate wetu womeyuru okupitira moviṋa mbi matu hungire. Ovakarere va Jehova ovaṱakame voruveze orukuru va ri nonḓero yokuraera varwe kutja Jehova tjiri omundu ngu ri vi nokuveraera oviṋa avihe oviwa mbye ve tjitira. (Dan. 3:​16-18; Oviung. 4:29) Omomuano uṋe mu matu yenene okutjita nao?

9-10. Ove we rihongo tjike okuza kotjihorera tja Angelena? (Wina tara kotjiperendero.)

⁹ Ngatu tare kotjihorera tja Angelena, a omukazendu omukambure ngwa tura moUnited States. Eye nouvanḓe wa hungira ohunga na Jehova poviungura vye. Otjomuungure omupe, Angelena wa ṋangwa kombongarero pu novakwao ovape. Pombongarero ndjo, omundu auhe aa sokuhungira ohunga na ye omuini. Angelena wa tya okuraisa oviperendero okuraera varwe ohunga nondjoroka ndje na yo otja umwe wOvahongonone va Jehova. Posi ya ngunda e hi ya uta okuhungira, omukwao ngu ve ungura pamwe we ritjiukisa omuini kutja we kurisiwa otjOmuhongonone wa Jehova. Eye wa uta okuhungira oviṋa ovivi ohunga nOvahongonone va Jehova nongamburiro yawo. Angelena wa tja: “Omutima wandje aau tono tjinene. Posi ya ami ee tjiwa kutja oviṋa mbyaa hungire ohunga na Jehova vya ri ovizeze. Ku nao, ami mba tya okuveraera ouatjiri.”

¹⁰ Indu omurumendu tja mana okuhungira, Angelena wa kumba ongumbiro osupi momutima. Nu okuzambo we mu raera momuano omuwa kutja: “Ami wina mbe kurisiwa otja umwe wOvahongonone va Jehova, nu ngamba owami umwe wawo.” Nandarire kutja ongaro Angelena maa ri kaya ri ombupu, eye wa porimana. Eye wa raisira ovakwao mbu ve ungura pamwe oviperendero mbi mavi raisa eye nomapanga we otja tji mave karere Jehova nondjoroka, nu wa kahurura ongamburiro ye ku wo momuano wondengero. (1 Petr. 3:15) Kwa kongorera tjike?  Indu Angelena tja za nokumana okuhungira, ongaro yomurumendu ya runduruka. Omurumendu ngo wina wa hungira ohunga noviṋa oviwa mbi ma zemburuka otja tjee kuru pu nOvahongonone va Jehova. Angelena wa tja: “Jehova wa pwa okuhivirikwa, nu ondjingonekero yapeke okuhungira ouatjiri ohunga na ye.” Eṱe wina matu yenene okuhivirika Jehova indu varwe tji ve hi nokumuraisira ondengero. Indjo ondjingonekero yapeke.

11. Omomuano uṋe ovakarere va Jehova vatjiri mu ve kayenda komurungu okukongorera omurari mbu ri mEpsalme 96:8 okuza koruveze orukuru nga ku nai?

¹¹ Lesa Epsalme 96:8. Eṱe matu yenene okuungurisa omauini wetu okuyandja ondjozikiro ku Jehova. Ovakarere va Jehova vatjiri aruhe aave hivirike Jehova momuano mbwo. (Omiano 3:9) Otjotjihorera, Ovaisrael va yandja ovimariva nomauini wawo okuvatera okutunga nokuṱuna ondjuwo ondjapuke. (2 Ozomb. 12:​4, 5; 1 Ekuruh. 29:​3-9) Ovahongewa tjiva va vatera Jesus novaapostele ve “nouini wawo oveni” kutja ve kare noviṋa mbyaave hepa. (Luk. 8:​1-3) Nu Ombeibela i tja indu ovakambure tjiva tji va ri mouzeu mena rondjara ndja ri ko, ovakambure ovakwao okuza kotuveze twarwe aave ve hindire ovimariva. (Oviung. 11:​27-29) Ndino, eṱe wina tu yandja oviyandjewa vyouharupu otjomuano wokuyandja ondjozikiro ku Jehova.

12. Omomuano uṋe oviyandjewa vyetu vyouharupu mu mavi yenene okuyandja ohiviro ku Jehova? (Wina tara kotjiperendero.)

¹² Ngatu tare kotjihorera tjimwe tji tji raisa omuano oviyandjewa vyetu vyouharupu mu vi yandja ondjozikiro ku Jehova. Mombura ndji 2020 moZimbabwe, mwa ri ourumbu oure woruveze orure. Ovandu ovengi atjave koka mena rokutja kapa ri ovikurya, mu mamu kamburire mo omukazendu omukambure wena Prisca. Nandarire kutja ongaro ya ri onḓeu, Prisca wa kayenda komurungu okuzuvarisa Oritjatatu nOritjatano arihe, nandarire moruveze rwokukuna. Ovararanganda ve aave mu hungire mena rokupita motjiungura tjokuzuvarisa pendje nokukuna. Owo aave tja: “Ove mo koka kondjara.” Prisca wa ri nongamburiro kutja Jehova me mu ṱakamisa, ku nao eye aruhe aa tja: “Jehova ke na pa rora okuisa ovakarere ve.” Katjisupi kombunda yanao, eye wa muna ombatero okuza kotjira tja Jehova. Prisca wa muna ovikurya noviṋa vyarwe mbyaa hepa mena roviyandjewa vyouharupu auhe wetu mbye yandja. Ovararanganda va Prisca va himisirwe i yotjiṋa hi, nu owo ve mu raera kutja: “Mukuru aruhe u ku vatera, ku nao matu vanga okurihonga  ovingi ohunga na ye.” Ovararanganda ve hambombari va uta okuyenda kozombongarero zombongo.

13. Omomuano uṋe ongaro yetu mu mai yenene okuyandja ondjozikiro ku Jehova? (Epsalme 96:9)

¹³ Lesa Epsalme 96:9. Ongaro yetu mai yenene okuyandja ondjozikiro ku Jehova. Ovakriste mbaave karere pondjuwo ondjapuke ya Jehova aave hepa okurira ovakohoke korutu. (Eks. 40:​30-32) Eṱe wina matu sokurira ovakohoke, nungwari kaukohoke korutu uriri, posi ya wina katu sokutjita oviṋa Jehova mbya tonda. (Eps. 24:​3, 4; 1 Petr. 1:​15, 16) Ombeibela i tja eṱe matu sokuhukura “omundu ingwi omukuru novikaro vye,” nokurihwikika “omundu omupe.” (Kol. 3:​9, 10) Ihi matji hee kutja eṱe matu sokukondja okunakaura omeripura novitjitwa ovivi mbi ha tjata ku Jehova. Nu matu sokurihonga okuripura nokutjita oviṋa momuano mbu mau raisa kutja matu horere ku Jehova na kovikaṋena vye oviwa. Nandarire ovandu mba tjita oviṋa ovivi tjinene, mave yenene okurundurura ongaro yawo nave rihwikike omundu omupe nombatero ya Jehova.

14. Ove we rihongo tjike okuza kotjihorera tja Jack? (Wina tara kotjiperendero.)

¹⁴ Ngatu tare kotjihorera tja Jack ngwa ri omurumendu omunautwe notjindandi. Eye nandarire aa isanewa kutja Ndemone. Jack aa sokuzepewa, mena roviṋa mbya tjita. Posi ya, ngunda Jack ama undju okuzepewa, omurumendu omukambure ngwaa varura onḓorongo mari, we mu ningira okurihonga Ombeibela. Nu Jack wa yakura omerihongero ngo. Nandarire kutja Jack wa tjita oviṋa ovingi ovivi, eye wa rundurura ongaro ye, nu kombunda yoruveze wa papitisiwa otja umwe wOvahongonone va Jehova. Jack wa rundurura ongaro ye tjinene nu eyuva ndaa sokuzepewa, ovatjevere tjiva wonḓorongo va ri nozonguizi momeho otja tjaave virikiza ku ye. Omurumendu omuporise ngwaa ungura monḓorongo wa tja: “Jack wa ri omukamburwa otjindandi tjinene, posi ya nai wa rira omundu omuwa tjinene.” Kombunda yotjivike Jack tja za nokuzepewa, ovarumendu ovakambure mbaave kayendisa ombongarero otjivike atjihe monḓorongo, va hakaena ku nomukamburwa ngwa ri pombongarero otjikando otjitenga. Otjikwaye tji tja hinga omukamburwa ngo okukara pombongarero ndjo? Eye wa himisirwe i yomarundurukiro Jack nga tjita, nu aa vanga okutjiwa oviṋa mbyaa hepa okutjita kutja me rikotamene ku Jehova. Otjingaperi kutja, omeritjindiro wetu maye yenene okuyandja ohiviro ku Tate wetu womeyuru.—1 Petr. 2:12.

 JEHOVA MA KARAISA VI KUTJA WA PWA OKURIKOTAMENWA?

15. Omomuano uṋe Jehova mu ma karaisa kutja eye wa pwa okurikotamenwa i yovandu avehe moruyaveze rwopopezu? (Epsalme 96:​10-13)

¹⁵ Lesa Epsalme 96:​10-13. Omazeva omasenina wEpsalme 96 ye tja Jehova Ombara nu Omupangure omusemba. Omomuano uṋe Jehova mu ma kayandja ondjozikiro kena re moruyaveze rwopopezu? Eye ma katjita nao mokupangura momuano omusemba. Moruveze rwatjimanga, eye ma nyono Babilon Otjinene mena rovizeze ozongamburiro zoposyo mbi ze honga ohunga na ye, noviṋa ovivi mbi ze tjita. (Omavan. 17:​5, 16; 19:​1, 2) Indu Babilon Otjinene tji tja isapewa, ovandu tjiva mape ya ave utu okukarera Jehova pu na eṱe. Korusenina, movita vya Armagedon, Jehova ma kanyona ouye wa Satan novemukongorere avehe, na imba avehe mbe mu pirukira nokukorovizeze ohunga na ye. Posi ya ma yama avehe mbe mu suvera, na imba mbe nonḓuviro ku ye, na mbe vanga okumuyozika. (Mar. 8:38; 2 Tes. 1:​6-10) Indu omarorero omasenina ngu maye ya kombunda yOzombura Eyovi zOuhonapare wa Jesus tji ya kapita, Jehova ma karaisa kutja eye ongwa pwa okurikotamenwa i yovandu avehe. (Omavan. 20:​7-10) Oruveze ndwo, “ehi mari ura nondjiviro younene waNdjambi tjimuna okuvare tji kwe ura nomeva.”—Hab. 2:14.

16. Ove we rimanene okutjita tjike? (Wina tara kotjiperendero.)

¹⁶ Tjiri ma rire otjiyorokise indu omundu auhe tji ma yandja ondjozikiro ku Jehova ndje mu pwire. Posi ya ngunda eyuva ndo ari hi ye ya, eṱe matu sokukondja pu matu yenene okuhungira ohunga na Mukuru wetu, nokuritjinda momuano mbu mau yandja ohiviro ku ye. Kutja tu yandje ombango komerizirira omanḓengu nga, Orutu Orunane rwa toorora Epsalme 96:8 otjetjangwa rombura ndji 2025: “Tangeye ena raMuhona enandjozikiro.”