JOSUA wa hungamenwe i omatokero nga ye mu pe omakeyakeyero. Eye aa sokuhongorera otjiwaṋa tja Israel kEhi rOruyano ngunda aa kuramenwa i omatokero omanene. Jehova we mu kwizikira kutja me mu pe outoṋi, nu we mu vanḓiparisa: ‘Ngoo zembi Embo ndi rOmatwako. Rihonga ro omutenya nouṱuku, nu u yenenise nouṱakame avihe mbya tjangwa mu ro. Indino mo rire omuindandu, nu mo ṋingapara.’—Jos. 1:7, 8.

‘Momayuva omasenina nu omazeu nga,’ eṱe wina twa hungamwa i omatokero omazeu. (2 Tim. 3:1) Tjimuna Josua, eṱe matu yenene okutoṋa mokukongorera ondunge ndja pe wa i Jehova. Matu yenene okulesa Ombeibela aruhe, nu atu ungurisa omirari vya yo nawa komauzeu ngu matu munu.

Posi yokutja, otjingi tje tu matu yakura kutja tjiri ka tu konḓonona Ombeibela nawa pu pe ṱa pi, nokutja noho okutjita nao kaupupu. Tjinga ama tu tjiwa nawa kutja okukonḓonona Ombeibela otjiṋa otjinanḓengu tjinene, lesa okaongo nga “ Rora ondunge ndji” u mune omapu ngu maye yenene okukuvatera kutja omakonḓononeno woye wOmbeibela ye ku vatere nu ye tjate.

Omutjange wEpsalme wa tja: “Ndji tjita kutja mbi panḓere pomatwako woye, orondu mu wo omu mbi muna mo enyando.” (Eps. 119:35) Mo kara nonyuṋe mokurihonga embo ra Mukuru. Indu tji mo tjiti nao, mo munu ovihuze mEmbo ra Mukuru.

Nandarire kutja ko nokuhongorera otjiwaṋa tjimuna Josua, ove u nomauzeu woye omuini ngu wa sokuyehunguma. Okutja tjimuna Josua, rihonga nu u ṱakamise imbi mbya tjangwa mo kutja u mune mo ouwa. Tji wa tjiti nao, ove wina moṋingapara nu mo rire onongo.