1. Otja kOvafilipi 2:3, ongwaye tji matu kara noupanga ouwa kuna varwe indu tji tu ri overisusuparise?

OMERISUSUPARISIRO ye tu tjita kutja tu kare nonḓuviro komirari vya Jehova mena rokutja eye u tjiwa imbi mbi ri ovisemba kweṱe. (Ef. 4:22-24) Indu tji tu ri overisusuparise tu vara oviṋa Jehova mbye vanga otjovinanḓengu pu imbi eṱe mbi tu vanga nu tu vara ovakwetu otja ovanene pu eṱe. Kunao tu yorokera oupanga ouwa kuna Jehova novakambure ovakwetu mombongo.—Lesa Ovafilipi 2:3.

2. Omuapostele Paulus wa ṋunisa ye, nu matu rihongo tjike morupa ndwi?

² Tji tu hi nokukengeza, matu yenene okuhorera kovandu mbe ritongamisa nokuripurira kuwo oveni mouye wa Satan mbwi. * Pe munika aayo otjiṋa ho tja tjitwa ku tjiva meserewondo etenga O.Z., omuapostele Paulus opa tjangera kOvaroma kutja, “Amu rivara oveni komeho yaimba pu mwa sokurivara, nungwari kareye noupukurukwe.” (Rom. 12:3) Paulus wa ṋunisa kutja ohepero kweṱe okurivara oveni. Nungwari, omerisusuparisiro ye tu vatera okukara noumune ouwa ohunga na eṱe oveni. Orupa ndwi maru tara koviṋa vitatu mu matu hepa omerisusuparisiro. Nu oviṋa mbyo ovyo mbi (1) orukupo, (2) omerizirira motjira tja Jehova (3) notungovi twomahakaeneno.

3. Ongwaye tji pe kara omauzeu morukupo, nu tjiva ve kondja vi okuzengurura omauzeu ngo?

³ Jehova u vanga kutja omurumendu nomukazendu mba kupasana  ve kare pamwe mondjoroka. Nu mena rokutja owo ka vandu ohomonena, mape ya ave pitasana oumune. Kunao, Paulus wa tjanga kutja imba mba kupasana mave kara nomauzeu. (1 Kor. 7:28) Tjiva ve tja aruhe ve posa ku nomundu ngu va kupasana, nu mape ya ave utu okumuna kutja andakuzu ka ve kupasanene. Tjiva horere kongaro youye mbwi, ve hakahana okuripura kutja mave sokuteya orukupo. Owo ve kara noumune wokutja otjiṋa otjinanḓengu okuripurira kuwo oveni nu ve muna kutja mave kara nondjoroka tji va teya orukupo.

4. Matu sokuyepa ye?

⁴ Ngatu yepe omeripura wokutja orukupo rwetu ka ruṋingandu. Eṱe tu tjiwa nawa kutja Ombeibela i yandjera omateero worukupo indu tji pa tjitwa oruvakiro uriri. (Mat. 5:32) Indu tji twa munu omauzeu morukupo Paulus nga tjanga, eṱe atu ritongamisa nokuripura kutja, ‘Hapo orukupo ndwi ru yenenisa oviṋa mbi me hepa? Hapo mbi pewa orusuvero ndwe ndji pwire? Hapo mape ya e kara nondjoroka pu nomundu warwe?’ Indu tji matu ripura omuano mbo, eṱe matu ripurire kweṱe oveni uriri nungwari katu nokuripurira komukwetu ngu twa kupasana. Ounongo wouye mau ku popo okukongorera omutima woye nokutja u tjite imbi mbi mavi ku yorokisa, nandarire okuteya orukupo. Nungwari Ombeibela i tja: “Amu tara ku imbi ovyeṋu porwavyo, nungwari tareye ku imbi ovyovakweṋu wina.” (Fil. 2:4) Jehova u vanga kutja oha teya orukupo nungwari mu kare pamwe na ingwi ngu mwa kupasana. (Mat. 19:6) Eye u vanga kutja u ripurire ku ye rutenga, amoo ripurire kove omuini.

5. Otja kOvaefese 5:33, omurumendu nomukazendu mba kupasana mave sokutjindasana vi?

⁵ Omurumendu nomukazendu mba kupasana mave sokutjindasana norusuvero nondengero. (Lesa Ovaefese 5:33.) Ombeibela i tu  honga kutja tu rihonge okuyandja pendje nokupewa. (Oviung. 20:35) Otjikaṋena tjiṋe tji matji vatere ovakupasane okuraisasana orusuvero nondengero? Otjikaṋena tjomerisusuparisiro. Ovakupasane tji mave risusuparisa, auhe ke ripahere ombwiro ye omuini nungwari u paha “ombwiro yomukwao.”—1 Kor. 10:24.

6. Mo rihongere ko ye komambo ya Steven na Stephanie?

⁶ Omerisusuparisiro ya vatera Ovakriste ovengi ovakupasane okukara nondjoroka morukupo rwawo. Otjotjihorera, omurumendu ngwa kupa wena Steven wa tja: “Tji mu ri omapanga omawa mu ungura kumwe nawa morukupo, tjinene tji pe nomauzeu. Pendje nokuripura kutja, ‘ovikeṋa mbi ri oviwa kwami?’ ripura kutja, ‘ovikeṋa mbi ri oviwa kweṱe?’” Omukazendu we Stephanie, u noumune otjinge wo. Eye wa tja: “Kape nomundu ngu vanga okukara pu nomundu ngu ku posisa aruhe. Tji twa pitasana oumune, tu kondja okutjiwa oviṋa mbya yetisa ouzeu. Okuzambo tu kumba, atu tjiti omakonḓononeno, nu atu hungirire kotjiṋa ho. Eṱe tu rwisa ouzeu nu ka tu ru oveni.” Ovakupasane mave kara nondjoroka indu tji pe hina ngu me rivara kutja omusemba pomukwao.

7. Omurumendu omukambure ma sokutjita ye indu tja pewa omerizirira motjira tja Jehova?

⁷ Eṱe tu muna kutja ondjingonekero yapeke okukarera Jehova momuano auhe mbu matu yenene. (Eps. 27:4; 84:10) Tjiri onawa omurumendu omukambure tji me riyandja omuini okuungura ovingi motjira tja Jehova. Ombeibela opu i zokutja, “Tji pe nomundu ngu ma zeri okurira omunane wombongo, eye ma zeri otjiungura otjiwatjiwa.” (1 Tim. 3:1) Posi yokutja, indu tja pewa omerizirira ngo, e ripura kutja wa rire omundu omunanḓengu. (Luk. 17:7-10) Ondando ye ma i sokurira okukarera varwe nomerisusuparisiro.—2 Kor. 12:15.

8. Matu rihongere ko tjike kovihorera vya Diotrefes, Usija, na Absalom?

⁸ Ombeibela i novihorera mbi mavi tu hongo ohunga novandu mbaave ripurire kuwo oveni. Diotrefes kaari omurisusuparise, nu aa “vanga okurira omunane wawo” mombongo. (3 Joh. 9) Mena routongatima Usija wa kondja okuungura otjiungura Jehova tje hina we mu pere ousemba okuungura. (2 Ekuruh. 26:16-21) Absalom wa vangere okurira ombara, notja kondja okupopa ovandu ovengi okumupa oruvara. (2 Sam. 15:2-6) Ovihorera vyOmbeibela mbyo mavi raisa oukahu kutja, Jehova ke nonyuṋe movandu mbe ri pahera ondjozikiro. (Omiano 25:27) Korusenina, ovandu mbe ritongamisa nokuritjatisa ku varwe ve riyetera onyonokero.—Omiano 16:18.

9. Jesus wa twapo otjihorera tjiṋe?

⁹ Jesus kaari nongaro tji muna ndjo, ‘eye aruhe wa ri mongaro ya Ndjambi, nungwari ke ripurire kutja u ṱeki pu Ndjambi.’ (Fil. 2:6) Nandarire kutja Jesus onguri omunauvara outjavari ku Jehova, eye ke ritongamisire ouvara we. Eye wa raera ovahongewa ve a tja: “Ingwi ngu ri okaṱiṱi pu eṋe amuhe ongu ri omunenenene.” (Luk. 9:48) Ondjingonekero onene kweṱe okuungura pu novakandjira, ovavatere vombongo, ovanene vombongo novatarere worukondwa mbe risusuparisa tjimuna Jesus. Indu tji twe risusuparisa tu raisa orusuvero kovakwetu nu Jesus wa tja ovakarere va Jehova mave tjiukirwa korusuvero ndu ve raisa ku varwe.—Joh. 13:35.

10. Mo sokutjita tjike indu tji mo munu kutja ovanene vombongo kave zengurura omauzeu mombongo momuano omusemba?

¹⁰ Mo sokutjita ye indu tji pe nouzeu mombongo mbu mo munu kutja ovanene vombongo kave u zengurura momuano omusemba? Pendje  nokuunauna, mo yenene okurisusuparisa nokuyandja oruyameto ku imba mbe hongorera ombongo. (Hebr. 13:17) Otjiṋa tji matji ku vatere okutjita nao okuripura omapuriro otja inga, ‘Hapo ouzeu mbu me munu ounene nu ma u hepa okuṱunwa? Hapo indwi ooruveze orusemba okuuṱuna? Hapo omerizirira wandje okuṱuna ouzeu mbwo? Hapo ami tjiri me kondjo okukurisa ombwaneno mombongo, poo me kondjo kutja mbi rimunikise otjomundu omunanḓengu?’

11. Otja kOvaefese 4:2, 3, maku kongorere tjike indu tji matu karere Jehova nomerisusuparisiro?

¹¹ Omerisusuparisiro wetu omanḓengu ku Jehova okukapita ounongo mbu tu nawo, nu ombwaneno onanḓengu okukapita oviungura vyetu oviwa. Kunao, ungura oukukutu okukarera Jehova nomerisusuparisiro. Tji wa tjiti nao, ove mokurisa ombwaneno mombongo. (Lesa Ovaefese 4:2, 3.) Rira omupyuke motjiungura tjokuzuvarisa. Paha omiano vyokukarera varwe mokuvetjitira ouwa. Sekirisa avehe, nandarire imba mbe hi nomerizirira kaaṋi mombongo. (Mat. 6:1-4; Luk. 14:12-14) Tji mo risusuparisa noungura pamwe novakambure ovakweṋu, mave munu ounongo woye nu otjinanḓengu tjinene mave munu omerisusuparisiro woye.

12. Hapo Ombeibela i tu tunduuza okukara nomapanga? Kahurura.

¹² Jehova u vanga kutja tu kare nondjoroka pu neṱunḓu retu nomapanga wetu. (Eps. 133:1) Jesus wa ri nomapanga omawa. (Joh. 15:15) Ombeibela i hungirira kouwa mbu matu munu tji twa kara nomapanga watjiri. (Omiano 17:17; 18:24) Nu i tu raera kutja ka nawa okurihumburura kokure novakwetu. (Omiano 18:1) Ovengi ve muna kutja otungovi  twomahakaeneno omuano wokupaha omapanga omengi nokuhina okurimuna ourike. Posi yokutja, matu hepa okukengeza tji matu ungurisa omuano womahakaeneno mbwi.

13. Ongwaye tjiva mbe ungurisa otungovi twomahakaeneno tji ve keri muna ourike nokukara nombameno?

¹³ Omakonḓononeno ya raisa kutja ovandu mbe ungurisa oruveze orwingi motungovi twomahakaeneno korusenina ve ke rimuna ourike nu ve ka kara nombameno. Ongwaye? Epu rimwe mape ya, omena rokutja ovandu tjiva potwingi ve twako oviperendero mbi raisa ehupo rawo, ombuniko yawo, omapanga wawo notuveze otuyorokise pu vari. Omundu ngu tara oviperendero mbyo mape ya a munu kutja ehupo re ri nonḓengu yokehi tji ma sasaneke na imbi mbi ma munu. Omukazendu omukambure wozombura 19 wa tja: “Ami mba uta okukara neruru tji me munu varwe ave ri mondjoroka komaandero wotjivike atjihe ngunda ami ambi ṱouza ponganda.”

14. 1 Petrus 3:8, mari tu vatere vi okuungurisa otungovi twomahakaeneno nounongo?

¹⁴ Otjiperi kutja otungovi twomahakaeneno matu yenene okuungurisiwa nondando ombwa, tjimuna okuhakaena ku neṱunḓu nomapanga. Hapo ove wa muna kutja oviṋa tjiva, tjimuna oviperendero nouvidio ovandu mbu ve twa kotungovi ve tjitira kutja varwe ve tjaterwe i wo? Pe munika aayo owo ve vanga okuhinda ombuze ku varwe ndji ma i tja, “Ndji tara.” Tjiva nandarire ve twako oviṋa ovivi nokuungurisa omambo omayamburure tji mave hungirire kovipendero mbi va twako poo ovandu varwe mbi va twako. Ovakriste ve tunduuzwa okurisusuparisa nokukara noumune ouwa, kunao owo kamaave ungurisa otungovi twomahakaeneno momuano mbwo.—Lesa 1 Petrus 3:8.

15. Ombeibela ma i tu vatere vi kutja atu he rimunu otja ovananḓengu pu varwe?

¹⁵ Tji u ungurisa otungovi twomahakaeneno, ripura omuini kutja, ‘Hapo omambo ngu mbi tjanga kotungovi, oviperendero nouvidio mbu mbi hinda vi tjita kutja varwe ve mune kutja me rihivi? Mape ya mavi tjiti kutja varwe ve ṱeruru?’ Ombeibela ma i tja: “Oviṋa avihe vyouye, okutja imbi omundu omunauvi mbye zera, na imbi ovandu mbi ve muna nu mbi  ve vanga, na imbi avihe mouye mbwi ovandu mbi ve rihivira, kape na nangarire tjimwe tji tji za ku Tate; avihe vi za mouye.” (1 Joh. 2:16) Ombeibela imwe ya toroka omambo nga “imbi avihe mouye mbwi ovandu mbi ve rihivira,” ai tja “ovandu ve vanga okuvarwa ovananḓengu.” Ovakriste kave rimunu otjovananḓengu poo okuvanga okuritjatisa ku varwe. Owo ve kongorera omurari wOmbeibela mbu ma u tja: “Atu he rihivi, atu ha rungisasana nu atu ha ṱasana eruru.” (Gal. 5:26) Indu tji twe risusuparisa, eṱe kamaatu kara tjimuna ovandu mouye mbe ritongamisa nokuripura kutja ovananḓengu pu varwe.

16. Ongwaye tji twa sokuyepa omeritongamisiro?

¹⁶ Matu hepa okurira overisusuparise mena rokutja imba mbe ritongamisa kave ‘kara noupukurukwe.’ (Rom. 12:3) Overitongamise ovandu mba suvera oviposa nu mbe ripurira kuwo oveni. Omeripura novitjitwa vyawo potwingi ye ve hihamisa nokuhihamisa varwe. Indu tji ve hi nokurundurura omeripura wawo mave poṱuparisiwa, nouripura wawo ma u paterwa monḓorera i Satan wina. (2 Kor. 4:4; 11:3) Nungwari omurisusuparise u kara noupukurukwe. Eye u noumune ouwa ohunga na ye omuini, nu u yakura kutja ovandu varwe ovanene pu ye momuano umwe poo omukwao. (Fil. 2:3) Nu eye u tjiwa kutja, “Ndjambi u pirukira overitongamise, nungwari imba overisusuparise e ve ṱire otjari.” (1 Petr. 5:5) Imba mbe noupukurukwe ka ve vanga kutja Jehova me ve pirukire.

17. Matu sokutjitavi kutja tu panḓere pokurisusuparisa?

¹⁷ Kutja tu panḓere pokurisusuparisa matu sokuyenenisa omurari mbu ri mOmbeibela wokutja ‘ngatu hukure omundu ingwi omukuru novikaro vye, nu tu rihwikike omundu omupe.’ Iho tjiri matji hepa ongondjero. Eṱe matu hepa okurihongera kovihorera vya Jesus nokukondja okuhorera ku ye otja pu matu yenene. (Kol. 3:9, 10; 1 Petr. 2:21) Nu tji twa tjiti nao, matu munu ouwa tjiri. Indu tjitwa rire overisusuparise, eṱunḓu retu ma ri kara nondjoroka, matu kurisa ombwaneno mombongo, nu kamaatu ungurisa otungovi twomahakaeneno momuano omuvi poo omuhasemba. Jehova metu sere ondaya nu metu ingoneke.