ORUPA RWOMAKONḒONONENO 30
Kayende komurungu mouatjiri
“Kape notjiṋa tji tji ndji pa enyando tjinene komeho posi yaingwi okuzuva kutja ovanatje vandje ve nongarero ombwa youatjiri.”—3 JOH. 4.
EIMBURIRO 54 “Ondjira oyo ndji!”
OMAPU KU MATU KATARA *
1. Otja 3 Johanes 3, 4, otjikeṋa tji tji tupa ondjoroka?
HAPO omuapostele Johanes tjiri wa ri nondjoroka okuzuva kutja imba mba vatera okutjiwa ouatjiri ve kayenda komurungu okukarera Jehova? Owo aave munu ouzeu, nu Johanes aa ungura nomasa okukurisa ongamburiro yOvakriste ovaṱakame mba ri tjimuna ovanatje kuye. Momuano otjingewo, eṱe wina tu kara nondjoroka indu ovanatje vetu oveni poo imba mbu twa vatera okutjiwa ouatjiri tji mave kayenda komurungu okukarera Jehova.—Lesa 3 Johanes 3, 4.
2. Ondando yotutuu Johanes twa tjanga ya ri oyaye?
2 Mombura ndji 98 O.Z., Johanes mape ya wa turire moEfesus poo popezu natjo. Eye mape ya wa tjindira ngo ousupi kombunda ya indu tja pitisiwa motjovakamburwa mokakoverwahi ka Patmos. Moruveze ndwo, ombepo ya Jehova ye mu hinga okutjanga otutuu tutatu. Ondando yotutuu two ya ri okutunduuza Ovakriste ovaṱakame okukurisa ongamburiro yawo mu Jesus nokukayenda komurungu mouatjiri.
3. Matu ka zira omapuriro yeṋe?
3 Johanes ongwa ri omuapostele omusenina ngwa hupire, nu eye ee rikende ohunga nomuano ovahonge woposyo maave kurungisa ozombongo. * (1 Joh. 2:18, 19, 26) Ovandu mba isa okurikotamena ku Mukuru aave tja ve tjiwa Mukuru, posi yokutja owo ka vari nonḓuviro komatwako wa Jehova. Matu katara kerakiza Johanes nda yandja okupitira mombepo ondjapuke. Morupa ndwi matu ka zira omapuriro yetatu nga: Okukayenda mouatjiri ku heya tjike? Otjikeṋa tji mape ya atjitu tjaere okutjita nao? Nu matu vaterasana vi okukayenda komurungu mouatjiri?
OKUKAYENDA MOUATJIRI KU HEYA TJIKE?
4. Otja 1 Johanes 2:3-6 na 2 Johanes 4, 6, ovikwaye mbi matu sokutjita kutja tu kayende mouatjiri?
4 Okukayenda mouatjiri tu hepa okutjiwa ouatjiri mbu ri mEmbo ra Mukuru Ombeibela. Nu wina eṱe matu ‘sokuṱakamisa omatwako’ wa Jehova, pu mape hee kutja matu sokukara nonḓuviro kuwo. (Lesa 1 Johanes 2:3-6; 2 Johanes 4, 6.) Jesus wa twapo otjihorera otjiwa tjokukara nonḓuviro ku Jehova. Kunao omuano umwe wokukara nonḓuviro ku Jehova omokuhorera kotjihorera tja Jesus otja pu matu yenene.—Joh. 8:29; 1 Petr. 2:21.
5. Matu sokukara nongamburiro mu ye?
5 Kutja tu kayende mouatjiri, matu sokukara nongamburiro kutja Jehova ongu ri Mukuru watjiri nokutja oviṋa avihe mbye tu raera mEmbo re Ombeibela, ouatjiri. Nu wina matu sokukara nongamburiro kutja Jesus ongu ri Messias ngwa kwizikwa. Ovandu ovengi ndino kave kambura kutja Jesus wa zikwa otjOmbara yOuhona wa Mukuru. Johanes wa rakiza kutja “ovapukise ovengi,” mave pukisa imba mbe ha tjiwa ouatjiri ohunga na Jehova na Jesus. (2 Joh. 7-11) Johanes wa tjanga kutja, “Nu ingwi omunavizeze owaṋi? Eye ngwi auhe ngu tja Jesus kangu ri Kristus.” (1 Joh. 2:22) Omuano auyerike mbu mau tu vatere kutja atu ha pukisiwa omokukonḓonona Embo ra Mukuru. Indu tji twa tjiti nao, otji matu tjiwa Jehova na Jesus. (Joh. 17:3) Okuzambo otji matu kara nongamburiro kutja tu ri mouatjiri.
TU MUNA OMATOKERO YEṊE?
6. Omatokero yeṋe yemwe Ovakriste omitanda ngu ve muna?
6 Ovakriste avehe mave sokutjevera kutja ave ha pukisiwa i yomahongero wovandu. (1 Joh. 2:26) Tjinenenene Ovakriste omitanda mave sokukengeza koumba mbwo. Alexia, * omukazendu omukambure ngu hungira Otjifrench wozombura 25 wa tja: “Indu tji mba ri omuṱiṱi, mbe rihonga moskole kutja oviṋa kavi memenwe nu omahongero nga aaye ndji pambaukisa. Povikando tjiva omahongero ngo aa ye ndji tjatere. Posi yokutja ee munu kutja ka nawa okunakaura oviṋa Ombeibela mbi i honga nokukambura moviṋa avihe mbyee hongwa moskole.” Alexia wa konḓonona embo ndi Life—How Did It Get Here? By Evolution or by Creation? Movivike oviṱiṱi uriri kaari nomakeyakeyero rukwao. Alexia wa tja: “Mba muna omuini kutja Ombeibela i nouatjiri. Nu mba muna kutja okuhupa otja komirari vyOmbeibela ku ndji etera ondjoroka nohange.”
7. Matu sokukengeza ku ye, nu omena raye?
7 Ovakriste avehe, ovanene novaṱiṱi mave sokukengeza kutja ave ha hupu pevari. Johanes wa tja, ka tu sokukayenda mouatjiri nu oruveze rumwe atu hupu otja kozongaro ozombi. (1 Joh. 1:6) Indu tji matu vanga kutja tu yakurwe i Jehova nai na moruyaveze, matu sokuzemburuka kutja Jehova u muna oviṋa avihe mbi matu tjiti. Nandarire kutja ovandu kave munu imbi mbi matu tjiti mohamunika, Jehova u muna avihe mbi matu tjiti.—Hebr. 4:13.
8. Ovikeṋa mbi matu sokunakaura?
8 Eṱe tu sokunakaura oumune wovandu mouye ohunga nokutjita ouvi. Omuapostele Johanes wa tjanga kutja, “tji matu tja katu nouvi, matu riwovisa oveni.” (1 Joh. 1:8) Moruveze rwa Johanes, ovandu mba isa okurikotamena ku Jehova aave tja omundu ma yenene okutjitirowina oviṋa Mukuru mbya tonda nu wina a kara noupanga kuna ye. Ndino, tu hupa mokati kovandu mbe noumune otjingewo. Ovengi ve tja ve kambura mu Mukuru, posi yokutja kave yakura oumune wa Jehova ohunga nouvi, nu tjinenenene ohunga nomahakaeneno womonyama. Pe nozongaro tjiva zomahakaeneno womonyama Jehova nḓe ha yakura, posi yokutja ovandu ve tja omundu ma yenene okutjita ozongaro nḓo otja konḓero ye omuini.
Mitanda, konḓononeye kutja ongwaye Jehova tje tja oviṋa tjiva ovivi poo oviwa, nu okuzambo otji ma mu yenene okuraera kovandu varwe kutja ongwaye tji mu ha tjiti oviṋa imbi mbi ri ovivi (Lesa oparagrafa 9) *
9. Omomuano uṋe omitanda mu ve muna ouwa indu tji va kakatere komirari vyOmbeibela?
9 Irira ouzeu kOvakriste omitanda okukara noumune ouwa ohunga nomahakaeneno womonyama, indu imba mbu ve ungura pamwe poo mbe hita pamwe oskole tji ve ha yakura omahongero wOmbeibela ohunga nepu ndo. Iho tja tjitwa ku Aleksandar. Eye wa tja: “Ovanatje ovakazona tjiva poskole aave ndji ṋiṋikiza kutja mbi kare norukatuko kuna wo. Owo aave tja mape ya owami otjikazezere mena rokutja hi mba ri nepanga romorusuvero.” Indu tji mo munu omatokero otjingewo, zemburuka kutja tji wa kakatere komirari vyOmbeibela mo kara nondjoroka, mo tjevere ouveruke woye, mo yepe omihihamo, nu mo kara noupanga ouwa kuna Jehova. Nu oruveze aruhe tji mo pirukire omarorero ma irire oupupu kove okutjita oviṋa ovisemba. Wina zemburuka kutja oumune ouvi wouye mbwi ohunga nomahakaeneno womonyama wa za ku Satan. Kunao indu ove tji u hi nokuripura tjimuna ovandu mouye, ove u ‘toṋa ingwi Omunaurunde.’—1 Joh. 2:14.
10. 1 Johanes 1:9 ri tu vatera vi okukarera Jehova nomeritjiviro omawa womomutima?
10 Eṱe tu yakura kutja Jehova ongu nousemba okuturaera kutja ouvi otjikeṋa. Nu eṱe tu kondja pu matu yenene kutja atu ha tjiti ouvi. Nungwari indu tjitwa tjiti ouvi tu rihepura ozongatukiro zetu ku Jehova mongumbiro. (Lesa 1 Johanes 1:9.) Nu indu tji twa tjiti ouvi ounene, tu paha ombatero okuza kovanene vombongo mba zikwa i Jehova okututjevera. (Jak. 5:14-16) Posi yokutja ka tu sokuripa ondjo mena rouvi mbu twa tjita morukapitaveze. Omena raye? Mena rokutja Tate wetu worusuvero we tupa otjisuta tjonguturiro tjOmuna we kokutja ouvi wetu u isirwe. Jehova tja tja, ma isire ovandu mbe ritanaura komauvi wawo, eye tjiri u tjita nao. Kunao kape notjiṋa tji matji tu tjaere okukarera Jehova nomeritjiviro omawa womomutima.—1 Joh. 2:1, 2, 12; 3:19, 20.
11. Matu ritjevere vi komahongero ngu mape ya aye zunḓa ongamburiro yetu?
11 Matu sokupirukira omahongero woposyo. Okuza komautiro wombongo yOvakriste, Omudiaboli aa kondjo okungundiparisa ongamburiro yOvakriste. Mena ranao matu hepa okutjiwa okuhaṋa pokati kouatjiri novizeze. * Ovanavita na eṱe mape ya ave ungurisa otungovi pekepeke okuhandjaura ovizeze mokukondja okungundiparisa ongamburiro yetu mu Jehova, norusuvero kovakambure ovakwetu. Okambura movizeze mbi, ovyo vi za ku Satan.—1 Joh. 4:1, 6; Omavan. 12:9.
12. Ongwaye tji tu sokukurisa ongamburiro yetu mouatjiri mbu twe rihonga?
12 Kutja tu pirukire omarorero wa Satan nge ngundiparisa ongamburiro yetu, matu sokukurisa ongamburiro yetu mu Jesus na momuano Jehova me ungurisa Jesus okutjita ombango ye. Eṱe wina matu sokukara nongamburiro mu imba Jehova mbe ungurisa okuhongorera po otjira tje ndino. (Mat. 24:45-47) Eṱe tu kurisa ongamburiro yetu mokukonḓonona Embo ra Mukuru aruhe. Kunao ongamburiro yetu otji mai kuru tjimuna omuti mbwa nangananisa omize vyawo mehi. Paulus wa hungira ohunga notjiṋa ho indu tja tjanga orutuu kombongo yOvakolose. Eye wa tja: “Tjinga amwa yakura Kristus Jesus otja ngu ri Muhona, otjinga amamu sokukara noruwano na Ye. Nangananiseye omize vyeṋu mu Ye, tungeye ongarero yeṋu mu Ye, nu mu hare omasa mongamburiro yeṋu.” (Kol. 2:6, 7) Tji twa ungura nomasa okukurisa ongamburiro yetu, kamaa rire oupupu ku Satan novemukongorere okututjaera okukayenda mouatjiri.—2 Joh. 8, 9.
13. Ovikwaye mbi matu sokuundjira ko, nu omena raye?
13 Eṱe matu sokuundjira ko okutondwa i youye. (1 Joh. 3:13) Johanes we tu zemburukisa kutja, “ouye auhe u ri kehi youhonapare waingwi umwe Omunaurunde.” (1 Joh. 5:19) Ouye mbwi u ri pokuyanda, nu Satan u pindikira ko nomasa. (Omavan. 12:12) Eye ke tu wire momiano vyomovineya uriri, tjimuna okutjita kutja tu tjite ozongaro ozombi poo okuungurisa ovizeze okuza ku imba mba isa okurikotamena ku Mukuru, nungwari wina utu wira ongarate mokuungurisa ovandu okutuhihamisa kotutu. Satan u tjiwa kutja wa sewa noruveze orusupi nu u kondja okutjaera otjiungura tjetu tjokuzuvarisa poo okuteya ongamburiro yetu. Ihi katjikumise kutja oviungura vyetu momahi tjiva vya tjaerwa oparukaze. Nandarire kutja peri nao, ovakambure ovakwetu momahi ngo ve raisa ouṱakame. Kainatja kutja Satan u tjita tjike kovakarere va Jehova, eṱe matu yenene okurira ovaṱakame.
VATERASANEYE KUTJA MU KARE MOUATJIRI
14. Omomuano uṋe umwe mu matu yenene okuvatera ovakambure ovakwetu okukara mouatjiri?
14 Kutja tu vatere ovakambure ovakwetu okukara mouatjiri matu sokuveraisira orusuvero. (1 Joh. 3:10, 11, 16-18) Katu sokusuverasana indu tji pe noupupu uriri nungwari wina indu tji pe nouzeu. Otjotjihorera, ove mo tjiwa omundu ngwa zepaisa omusuverwa we nu ngu ma hepa omahuhumiṋino, poo ombatero momiano vyarwe? Poo ngahino wa zuvire kutja ovakambure ovakweṋu va wirwa i yotjivepo otjisukusuku nu mave hepa ombatero okutungurura Etuwo rawo rOmerikotameneno poo ozonganda zawo? Eṱe tu raisa kutja twa suvera ovakambure ovakwetu indu tji matu ve vatere nungwari karondu tji matu hungire notjinyo uriri.
15. Otja 1 Johanes 4:7, 8, ovikwaye mbi matu sokutjita?
15 Indu tji matu raisa orusuvero kovakwetu tu horera ku Tate wetu womeyuru nu worusuvero. (Lesa 1 Johanes 4:7, 8.) Omuano omunanḓengu mu tu raisa orusuvero omokuisirasana. Otjotjihorera, omundu mape ya etu pindikisa nu okuzambo a ningire ondjesiro. Eṱe tu raisa orusuvero mokumuisira nokuzemba oviṋa mbya tjiti kweṱe. (Kol. 3:13) Omurumendu omukambure wena Aldo wa pindikire indu omurumendu omukambure ngwa tengere tja hungira oviṋa ovivi ohunga novandu vombazu ye. Aldo wa tja: “Ami aruhe ee kumbu ku Jehova okundjivatera kutja e ha kara noumune ouvi ohunga nomurumendu omukambure ngo.” Posi yokutja Aldo wa tjita otjiṋa tjarwe. Eye wa ningira omurumendu omukambure ngo kutja ve pite pamwe motjiungura tjokuzuvarisa. Otja tjaa ve ungura pamwe, Aldo we mu raera kutja wa hihamisiwa i yomambo eye nga hungira. Aldo wa tja: “Indu omurumendu omukambure tja zuva kutja omambo we ye ndji hihamisire eye wa ningira ondjesiro. Okuza mombosiro yeraka re, ami ee munu omuhihamwatima mbwa ri nawo. Okuzambo eṱe twa rira omapanga omawa rukwao.”
16-17. Matu sokurimanena okutjita ye?
16 Omuapostele Johanes wa suverere ovakambure ovakwao tjinene nu aa vanga kutja ve kare nongamburiro yomasa, orusuvero rwe nongendo ndja ri nayo vya raisiwa oukahu motutuu tutatu twa tjanga. Tjiri otjiyanḓiparise okutjiwa kutja ovarumendu novakazendu mbu mave kahonapara meyuru pu na Jesus ve norusuvero tjimuna Johanes ndwa ri naro.—1 Joh. 2:27.
17 Ngatu ungurire komaronga ngu twe rihongo. Nu wina ngatu rimanene okukayenda mouatjiri, nokukara nonḓuviro ku Jehova moviṱo avihe mehupo retu. Konḓonona Embo re nu kara nongamburiro mu ro. Kara nongamburiro onḓikame mu Jesus. Nakaura omahongero wa imba mba isa okurikotamena ku Jehova nomahongero wovandu. Ohupu pevari nu oyandjere ouvi okukutaara. Hupa otja komirari vya Jehova omisemba. Nu ngatu vatere ovakambure ovakwetu okukara mouatjiri, okuisira imba mbe tu hihamisa nokuvatera imba mbe nouhepe. Nu kainatja kutja matu munu omauzeu matu kayenda komurungu mouatjiri.
EIMBURIRO 49 Yorokisa omutima waJehova
^ par. 5 Eṱe tu hupa mouye mbu honaparerwa po i Satan ngu ri ihe yovizeze avihe. Kunao mape ya a rire ouzeu kweṱe okukayenda komurungu mouatjiri. Ovakriste veserewondo etenga O.Z. va ri nouzeu otjingewo. Jehova wa hinga omuapostele Johanes okutjanga otutuu tutatu kutja tu vatere Ovakriste mbo nokutuvatera wina. Motutuu two matu ke rihonga kutja ovikwaye mbi mape ya avi tu tjaere okukayenda komurungu mouatjiri, nokutja matu sokutjita ye ohunga nomauzeu ngo.
^ par. 3 Lesa okaongo nga, “ Ekuruhungi rotutuu twa Johanes.”
^ par. 6 Omana tjiva ya rundururwa.
^ par. 11 Lesa orupa rwomakonḓononeno ndwi, “U nouatjiri auhe?” mokambo kOruhungu ka Auguste 2018.
^ par. 59 OMAKAHURURIRO WOVIPERENDERO: Ngunda e ri moskole omukazendu omukambure omutanda aruhe u zuva nokumuna oviṋa mbi tjita kutja ovandu mbe tundukasana ve munike aayo oviṋa uriri. (Mozombazu tjiva, ovivara vyouta wombura vi ungurisiwa okuyandja ondjozikiro kovandu mbe tundukasana.) Kombunda eye wa twapo oruveze okutjita omakonḓononeno okupamisa ongamburiro ye mu imbi mbi ma tjiwa kutja ouatjiri. Nu iho tje mu vatera okutoora omukambo mbu ri wo.
