EHUNGI
Mba yenenisa imbi mbyee sokuyenenisa
OURE wozombura zokombanda omirongo vitatu, Donald Ridley wa ri ohahende ndjaai kuramenepo Ovahongonone va Jehova motjombanguriro. Eye wa ri notjiungura otjinanḓengu tjokuvatera ovavere okumuna kutja ve nousemba wokupanḓa omaungurisiro wombinḓu momapangero wawo. Nu wa vatera Ovahongonone va Jehova okutaara oviposa ovingi motjombanguriro tjokambanda moUnited States. Omapanga we aaye mu tjiwa otja Don, nu wa ri omundu ngwaa ungura oukukutu, omurisusuparise nu ngwee ripunguha omuini.
Mombura ndji 2019, Don wa munikwa omutjise mbu ṱuna kouruvi na koruruvi rwetambo nu mbu ha ri nomuti omupange. Omutjise mbwo wa handjauka tjimanga mu ye, nu wa ṱa tji ya ri 16 ku Auguste, 2019. Indi ehungi re.
Ami mba kwaterwa moSt. Paul, Minnesota, U.S.A., mombura ndji 1954, ovanene vandje va ri nehupo ropokati nu va ri ouṋepo wokereka yOkatolika. Owami omuatje omutjavari omunene movanatje vetano. Tji mba ri omuṱiṱi ee hiti oskole yOkatolika, nu ee vatere Ovapristeri po altari tji pe novitjitwa vyokereka. Nandarire nao, ami hee tjiwa ovingi ohunga nOmbeibela. Nandarire kutja mba ri nongamburiro kutja mape ya ape kara Mukuru ngwa uta oviṋa avihe, mba pandjarere ongamburiro mokereka.
OKURIHONGA OUATJIRI
Mombura yandje ondenga tjee rihongo oveta, Ovahongonone va Jehova o tji ve ya okundjivarura. Ami ee koho ozombanda zandje, nu ovakupasane va itavera okukotoka kombunda. Nu tji va kotoka, mba ri nomapuriro yevari okuvepura: “Ongwaye ovandu mbe tjita oviṋa ovivi tji ve muna ondoṋeno mehupo povandu mbe tjita oviṋa oviwa?” nu “Omomiano viṋe ovandu mu mave yenene okukara nondjoroka yatjiri?” Ami mba yakura okambo nga The Truth That Leads to Eternal Life nOmbeibela ndji o-New World Translation of the Holy Scriptures, ndja ri ongirine kombanda. Nu wina mba itavera okurihonga Ombeibela. Omerihongero wOmbeibela ngo ye ndji vatera tjinene. Ami mba ri nondjoroka okurihonga kutja Ouhona wa Mukuru ohoromende ndji ma i honaparere po ovandu kombanda yehi. Ami mba muna kutja ouhonapare wovandu kau yeta omarundurukiro nu wa yetisa omihihamo omingi nouhasemba kovandu.
Ami mbe ri yandja ku Jehova mombura ndji 1982 nu mba papitisiwa kombunda pomaworonganeno wotukondwa nga “Kingdom Truth” nga ri moSt. Paul Civic Center. Otjivike tji tja kongongorera ko mba yaruka ko Minnesota okukatjanga omarorero kutja mbi rire ohahende. Momautiro wa Oktoba, otji mba zuva kutja mba tuurunga omarorero ngo.
Pomaworonganeno omanene nga “Kingdom Truth,” mba hakaena kuna Mike Richardson, ngwaa karere po Betel ya Brooklyn, ngwe ndji raera kutja omberoo yoveta ya patururwa pomberoo ohongora. Mba zemburuka omambo womuhona ombondo wa Etiopie nga tjangwa mOviungura 8:36 nu mbe ri pura omuini kutja, ‘Otjikwaye tji ma tji ndji tjaere okukaungura mOmberoo yOveta?’ Kunao ami mba tjita omaningiriro ko Betel.
Ovanene vandje ka va ri nohange indu tji mba rira Omuhongonone wa Jehova. Tate we ndji pura kutja okuungura po Betel ma ku ndji etere ouwa waye otjohahende. Mbe mu raera kutja me ungura oviungura vyokuvatera uriri. Ami mbe mu raera kutja me pewa $75 momueze, tji tja ri otjimariva tjaa tji yandjewa kovandu mbaave ungura po Betel.
Mena rokutja ee ungura potjombanguriro hee yenene okukaungura po Betel, nu mombura ndji 1984 otji mba uta okuungura po Betel moBrooklyn, tja New York. Ami mba pewa otjiungura tjokuungura mOmberoo yOveta. Ondjiviro ndji mba muna tjee ungura potjombanguriro ye ndji rongerisa kotjiungura tji mba pewa.
OMAṰUNINO WETUWO NDI O STANLEY THEATER
O Stanley Theater tjaai munika indu tji ya randwa
O Stanley Theater motjihuro hi Jersey, tja New Jersey, ya randwa mu Novemba mombura ndji 1983. Ovakambure ovakwetu va tjita omaningiriro wokuṱuna otutjeno nomiriu vyetuwo ndo. Indu tji va ha kaena novakuramene po votjihuro, ovakambure ovakwetu ve ve raera kutja mave vanga okuungurisa o Stanley Theater otja etuwo romaworonganeno wOvahongonone va Jehova. Iho tja etisa oumba. Otjihuro tja zikamisa oveta yokutja oruveze rwomerikotameneno karu sokukara mokati komaturiro wovandu. O Stanley Theater ya ri momaturiro mu mwari ozongetjefa, kunao ovakuramene po votjihuro va panḓa okuyandja ozombapira zousemba. Ovakambure ovakwetu va tjita omaningiriro wawo rukwao, posi yokutja omaningiriro ngo ya nakaurwa.
Motjivike tjandje otjitenga po Betel, otjira tja Jehova tja hitisa ouzeu wa tjo motjombanguriro, okurwira omaningiriro wawo. Mena rokutja mba ungura ozombura mbari motjombanguriro moSt. Paul, Minnesota, ee tjiwa oviposa otja imbyo. Umwe wozohahende zetu wa tja o Stanley Theater aai ungurisiwa i yovandu kovitjitwa pekepeke, tjimuna ozomuvi nomizumbi. Ongwaye tje ri pendje noveta okuungurisa etuwo ndo koviṋa mbi mavi tjama nomerikotameneno ku Mukuru? Otjombanguriro tja muna kutja ouhonapare wotjihuro hi o Jersey ka wa ri nondengero kouyara wetu womerikotameneno. Otjombanguriro tja rakiza otjihuro okutupa ozombapira zousemba, nu mba uta okumuna omuano Jehova ma sera ondaya komuano otjira tje mu tja ungurisa oveta okukayendisa otjiungura tje komurungu. Ami mba ri nondjoroka okukara norupa motjiṋa ho.
Ovakambure ovakwetu va uta okuṱuna etuwo, nu oklasa oitja 79 ya Gilead tji yeya komaandero ovitjitwa vyomapatero vya tjitirwa motjihuro hi o Jersey mEtuwo rOmaworonganeno omayuva tji ya ri 8 ku Septemba, mombura ndji 1985, ngunda ape hiya kapita ombura okuza komaṱunino wetuwo ndo. Ami mba ri nondjoroka yokuvatera motjiungura tja Jehova ho, otjo tje ndji etera ondjoroka onene okukapita otjiungura tji mba ungura otjohahende ngunda a mbi hiye ya ko Betel. Ami hee tjiwa kutja Jehova ma yenene okundjiungurisa moviṋa ovingi mbi mavi tjama noveta.
OKUKURAMENA PO OUSEMBA WOMAPANGERO NGE HA UNGURISA OMBINḒU
Mozombura nḓa 1980, ozonganga nozohospitala kaaze yakura ouyara wOvahongonone va Jehova wokupangwa nokuhina ombinḓu. Ovakazendu ovaṱumbapare aave munu ouzeu tjinene mena rotjiṋa ho, mena rokutja ovapangure aave munu kutja ovakazendu ovaṱumbapare kave nousemba wokupanḓa okupakerwa ombinḓu. Ovapangure aave tja omukazendu omuṱumbapare tje ha pakererwe ombinḓu mape ya aṱu nu omuatje a hupu nokuhina ina.
Omayuva tji ya ri 29 ku Desemba, mombura ndji 1988, omukazendu omukambure wena Denise Nicoleau wa pandjara ombinḓu onyingi kombunda yokupanduka omuatje we omuzandu. Orupa rwombinḓu ye ndu yandja omasa kombinḓu ndu isanewa o hemoglobin rwa yarukire kehi tjinene nu onganga ye yaningira ousemba ku ye okumupakera ombinḓu. Omukazendu omukambure Nicoleau wa panḓa. Eyuva ependukirwa ohospitala ya ningira omupangure okuyandja ousemba kovaungure vohospitala okumupakera ombinḓu. Omupangure ka yandjere oruveze ku Nicoleau poo komurumendu we okuyandja oumune wawo, nu wina keve raerere kutja wa yandja ousemba kohospitala kutja ma pakerwe ombinḓu.
Oritjatano tji ya ri 30 ku Desemba, ovaungure vohospitala va pakera omukazendu omukambure Nicoleau ombinḓu nandarire kutja omurumendu we noveṱunḓu re kaave yandja oruvara kotjiṋa ho. Ongurova ndjo, tjiva veṱunḓu re nomunene umwe poo vevari vombongo va kamburwa mena rokutja aave tjaere kutja omukazendu omukambure Nicoleau aha pakerwa ombinḓu. Oroviungura muhuka omunene omayuva tji ya ri 31 ku Desemba, ozongoramambo, ozotivii nozoratio motjihuro New York nongondoroka za tjivisa ohunga notjiṋa ho.
Puna Philip Brumley mozombura zetu zoumutanda
Omandaha omuhuka omunene, mba hungira ku nomupangure wotjombanguriro tjokombanda wena Milton Mollen. Ami mbe mu kahururira kutja omupangure ngo wa yandja ousemba wokupakera ombinḓu nokuhina ousemba womuvere. Omupangure Mollen we ndji ningira kutja mbi ye komberoo ye omahatenya ngo okuyekuhungirira koviṋa avihe mbi mavi tjama notjiposa ho. Omutarere wandje, Philip Brumley wa ya puna ami komberoo ya Mollen ongurova ndjo. Omupangure wina wa ṋanga ohahende yohospitala. Ehungi retu ra ri ezeu. Ngunda ama tu hungire, Mbuti Brumley wa tjanga membo re kutja “yarura eraka roye pehi.” Indo ra ri eronga ewa mena rokutja, ami ee vanga okuraisa kutja ohahende yohospitala ya ri posyo.
Okuza komamuho nga komanene: Richard Moake, Gregory Olds, Paul Polidoro, Philip Brumley, ami, na Mario Moreno. Ozohahende zetu indu otjiposa pokati ko Watchtower Bible and Tract Society nokarongo nga Village of Stratton tji tja hita mOtjombanguriro tjOkombanda moU.S.—Lesa okambo nga Awake! komayuva 8 ku Januari, 2003
Ape kombunda yoiri, omupangure Mollen wa tja otjiposa ho otji ma tji rire otjitenga eyuva ependukirwa. Otja tjaatu piti momberoo ye, omupangure Mollen wa tja ohahende yohospitala i “notjiungura otjizeu muhuka.” Ihi aa tji hee kutja kamaa rire oupupu kohahende okuraisa kutja ohospitala i nousemba okuṋiṋikiza omukazendu omukambure Nicoleau okuyakura omapakerero wombinḓu. Ami ee munu kutja ya ri tjimuna Jehova me ndji raere kutja matu taara otjiposa ho. Tjiri ya ri otjiṋa otjiwa okumuna omuano Jehova mee tuungurisa okuyenenisa ombango ye.
Eṱe aatu ungura nga ouṱuku okurirongerisa kutja matu ka tja vi eyuva ependukirwa. Otjombanguriro tja ri popezu tjinene no Betel ya Brooklyn kunao ovengi va imba mbaatu ungura pamwe va ya ngo pehi. Kombunda ya indu ovapangure vane tji va puratena kweṱe, owo va tja omapakerero wombinḓu ngo kaari ohepero okuyandjwa. Otjombanguriro tjokombanda tja toora omunda womukazendu omukambure Nicoleau nu tja tja kaveta ndji yakurwa okuhina okupuratena koumune womuvere rutenga ngunda au hiya yandja ousemba.
Ousupi kombunda ya nao otjombanguriro tjokombanda motjihuro tja New York tja tja omukazendu omukambure Nicoleau u nousemba wokupangwa nokuhina omaungurisiro wombinḓu. Nu otjiṋa ho tja ri otjiṋa otjitenga moviposa vine mbya tjama nomapakerero wombinḓu tji tja ya kotjombanguriro momahi pekepeke moUnited States. (Lesa okaongo nga, “ Outoṋi mOtjombanguriro tjOkombanda.”) Ami wina ee ungura ku nozohahende zarwe moviposa mbyaavi kamburire mo omatumbiro wovanatje, okuteya orukupo nozoveta zomarandisiro womahi nozondjuwo.
ORUKUPO NEṰUNḒU RANDJE
Pu nomukazendu wandje, wena Dawn
Otjikando otjitenga tji mba hakaena ku nomukazendu wandje Dawn, eye rutenga wa kupirwe nu ee kurisa ovanatje vetatu. Eye aa ungura oviungura vyokurihupisa omuini nu wa ri omukandjira. Eye wa ri nehupo ezeu, nu ami ee tjaterwa i yomuano ma ri nonḓero okukarera Jehova. Mombura ndji 1992, eṱe twa ya komaworonganeno wotukondwa nga “Light Bearers” kotjihuro tja New York nu mbe mu ningira kutja tu ute okotjiwasana nawa. Twa kupasana kombunda yombura imwe. Okukara nomukazendu ngwa suvera Jehova nu ngu ha pindike tjimanga tjiri ya ri otjiyandjewa okuza ku Jehova. Dawn tjiri we ndji pa ehupo ewa oruveze ndu twa kara pamwe.—Omiano 31:12.
Indu tji twa kupasana ovanatje va ri nozombura 11, 13, no 16. Ami ee vanga okurira ihe yawo omuwa, kunao mba lesa nokuungurira koviṋa mbyee lese momambo wetu ohunga nokutjinda ovanatje mbe he ri ovandje morukupo. Pa ri nomatokero oure wozombura, posi yokutja mbi nondjoroka kutja ovanatje ve ndji yakura otja epanga na ihe yawo worusuvero. Omapanga wovanatje vetu aruhe aave ya poyetu nu twa suverere okukara puna wo.
Mombura ndji 2013 ami na Dawn twa tjindira ko Wisconsin okukavatera ovanene vetu mba kurupire. Tja ri otjikumise kwami kutja otjiungura tjandje po Betel katjiyandere. Ami mba ṋangwa okukayenda komurungu okuvatera otjira tjetu moviṋa pekepeke vyoveta.
OMARUNDURUKIRO NGA TJITWA TJIMANGA
Mu Septemba mombura ndji 2018 mba uta okumuna kutja pa ri otjiṋa tji tji heri nawa momuriu wandje. Onganga yetu ye ndji tara nu kaai munu kutja otjikwaye tji tja yetisa oumba mbo. Kombunda onganga yarwe yatja mbi sokukamuna onganga ndji panga ozoseniviye. Nu kombunda mombura ndji 2019 onganga yarwe ye ndji raera kutja mape ya mbi nomutjise mbu ha munika tjinene nu otja oruveze tji maru kayenda omutjise mbo ma u ṱunu korutu rwandje aruhe.
Kombunda yomayuva yetatu ngunda ame nyanda enyando ndi mba suverere mba wa nu mba teka pokati kokuwoko neke rokunene. Ami mba nyanda enyando ndo oure womuinyo wandje nu ee ri tjiwa nawa. Kunao ee tjiwa kutja ozombwiṋi morutu rwandje aaze ngundipara. Ami mba himisirwe i yomuano omutjise mu wa ririra ko omuvi tjimanga, nu aai rire ouzeu kwami okuhungira, okukayenda nokuṋiṋa.
Ami tjiri mbi nondjoroka kutja mba yanena okuvatera otjira tja Jehova noviungura vyandje otjohahende. Nu mba ri nondjingonekero yokutjanga omambo omengi nge lesewa i yozonganga, ozohahende novapangure. Ami wina mba yandja omahungi omengi mouye ongondoroka okurwira ousemba wovakarere va Jehova okutoorora omapangero nge hi nombinḓu. Nandarire nao, ami mbi hungira omambo otjingewo nga tjangwa mu Lukas 17:10, EEP nge tja: ‘Ouami omukarere, ngu mbi ha sorere. Mba ungura uri oviṋa mbi mba sokuungura.’
