Pe noviṋa mbi raisa kutja Jesus wa rira Omupristeri Otjiuru indu tja papitisiwa mombura ndji 29 O.Z. Ovikeṋa mbi raisa nao? Indu Jesus tja papitisiwa wa raisa kutja wa ri nonḓero okuyandja omuinyo we otjombunguhiro kotjipunguhiro tji tji kuramenapo “ombango” ya Mukuru. (Gal. 1:4; Hebr. 10:5-10) Mena rokutja otjipunguhiro ho tja ri ko okuza kombapitisimo ya Jesus, mape hee kutja omerikotameneno wouatjiri kombanda yehi nga zikamena kotjisuta tjonguturiro wina ya uta oruveze ndwo. Otjipunguhiro otji tjiri otjiṋa otjinanḓengu tjinene momazikamisiro womerikotameneno wouatjiri kombanda yehi.—Mat. 3:16, 17; Hebr. 5:4-6.

Omazikamisiro womerikotameneno wouatjiri kombanda yehi aaye hepa omupristeri otjiuru. Kunao Jehova wa twirisa Jesus “nOmbepo Ondjapuke nomasa” okurira omupristeri otjiuru. (Oviung. 10:37, 38; Mar. 1:9-11) Nu hapo, eṱe matu tjiwa vi kutja Jesus wa zikwa otja Omupristeri Otjiuru ngunda e hi ya ṱa nokupendurwa? Otjihorera tja Aron novapristeri oviuru mbe ya kombunda ye matji tu vatere okumuna eziriro kepuriro ndo.

Etwako Jehova nda yandja ku Moses aari tja omupristeri otjiuru ongwa sokuhita mOtjouyapukeyapuke tjondanda yomaturiro, nu kombunda ongwaa sokukahita mOtjouyapukeyapuke tjondjuwo ondjapuke ya Muhona. Otjouyapuke notjouyapukeyapuke vya haṋenwe i yonguyu. Nu omupristeri otjiuru aa sokukapita munda mbwina wonguyu mEyuva rOhanganisiro uriri. (Hebr. 9:1-3, 6, 7) Aron novapristeri mba zikwa kombunda ye va twirisiwa otjovapristeri oviuru ngunda ave hiya tuurungira monguyu okuhita motjouyapukeyapuke tjondanda yomaturiro, Jesus wina mape ya wa zikwa otjOmupristeri Otjiuru ngunda e hiya ṱa nu okuzambo wa ‘tuurungira monguyu ondjizikize, ndji ri orutu rwe omuini’ okukahupa meyuru. (Hebr. 10:20) Mena repu ndo, omuapostele Paulus wa tja Jesus we ya “otja omupristeri otjiuru” nu “tje ja, ua hitire mondjuuo ombua omanise, ndji ha ungurirue nomake,” na hiti “meyuru orini.”—Hebr. 9:11, 24, EEP.

Kape nombangu pokati ka indu omerikutiropamwe omape tji ya zikwa na indu tji ya uta okuungura. Omena raye? Indu Jesus tja ronda keyuru, na raisa onḓengu yombunguhiro yorutu rwe ndji hi notjipo mena retu, eye wa tjita otjiṋa otjitenga mu imbi ovitatu mbya zikamisa omerikutiropamwe omape. Oviṋa vitatu mbyo wina vya tjita kutja omerikutiropamwe omape ngo ye ute okuungura. Oviṋa vitatu mbyo vya ri viṋe?

Rutenga, Jesus we rimunikisa komurungu wa Jehova, okuzambo wa yandja onḓengu yombunguhiro ye ku Jehova, nu korusenina Jehova wa yakura onḓengu yombinḓu ya Jesus ndja tika. Omerikutiropamwe omape kaaye ungura ngandu oviṋa vitatu mbyo avi hiya tjitwa.

Ombeibela kai tu raere kutja oruṋe Jehova tja yakura ombunguhiro ya Jesus. Kunao katu nokutjiwa kutja oruṋe omerikutiropamwe omape tji ya zikamisiwa na wina tji ya uta okuungura. Posi yokutja, tu tjiwa kutja Jesus wa ronda keyuru omayuva omurongo komurungu womatiririro wombepo. (Oviung. 1:3) Moruveze orusupi ndwo, eye wa yandja onḓengu yombunguhiro ye ku Jehova ngwe i yakura. (Hebr. 9:12) Meyuva ra Pentekoste, ya ri oukahu kutja omerikutiropamwe omape otji ya uta okuungura. (Oviung. 2:1-4, 32, 33) Oukahu kutja omerikutiropamwe omape oruveze ndwo tjandje ya zikama nu aaye ungura.

Omerikutiropamwe omape ya zikwa nokuuta okuungura kombunda ya indu Jehova tja yakura onḓengu yombinḓu ya Jesus ndja tika, nu a tjiti kutja ovatwirisiwa ve rire orupa rwomerikutiropamwe ngo. Omerikutiropamwe ya uta okuungura nu Jesus ongu ri Omupristeri Otjiuru, ngu ri pokati ketu na Jehova.—Hebr. 7:25; 8:1-3, 6; 9:13-15