1. Ovikeṋa omuapostele Paulus mbya tjiwa ohunga na ye omuini?

OMUAPOSTELE Paulus wa yakura kutja oruveze rumwe ee rimunu oungundi. Eye wa tja omasa worutu rwe aaye “yanda,” nu aa sokukondja okutjita imbi mbiri ovisemba, nu wina aa munu kutja Jehova kaa ziri ozongumbiro ze otja komuano mbwaa undjire ko. (2 Kor. 4:16; 12:7-9; Rom. 7:21-23) Paulus wina aa tjiwa kutja ovemupirukire aave mu vara otja nguri otjingundi. * Posi yokutja kena pa yandjera omambo omavi varwe ngaave hungire ohunga naye poo ozondataiziro ze omuini ze tjite kutja me ripure kutja ke nonḓengu.—2 Kor. 10:10-12, 17, 18.

2. Otja 2 Ovakorinte 12:9, 10, otjikeṋa otjinanḓengu Paulus tje rihonga?

² Paulus we rihonga otjiṋa otjinanḓengu kutja omundu u yenena okukara nomasa nandarire indu tja ngundipara. (Lesa 2 Ovakorinte 12:9, 10.) Jehova wa raera Paulus kutja omasa We ‘maye yenenisiwa indu tja ngundipara,’ pu mape hee kutja Jehova aa yandja omasa ku Paulus ngu ma hepa. Rutenga, ngatu tare kutja ongwaye tji tu ha sokupindika indu ovanavita na eṱe tji mave tu yamburura.

3. Ongwaye tji tu sokukara nenyando momayambururiro?

³ Kapena umwe wetu ngu vanga okunyekererwa. Posi yokutja, ovetupirukire tji mave tu nyekerere nu atu ṱunwa i yotjiṋa ho, mape ya atu u momuinyo. (Omiano 24:10) Hapo matu sokuvara vi omambo ovetupirukire ngu ve hungira? Tjimuna Paulus, eṱe matu yenene “okukara nenyando . . . momayambururiro.”  (2 Kor. 12:10) Omena raye? Mena rokutja indu ovandu tji mave tu yamburura nokutupirukira tji raisa kutja oweṱe ovahongewa va Jesus vatjiri. (1 Petr. 4:14) Jesus wa tja ovemukongorere mave tatumisiwa. (Joh. 15:18-20) Iho tja tjitwa kOvakriste woruveze orukuru. Imba mbaave kongorere ombazu yOvagrike aave vara Ovakriste otjovandu uriri mbe hi nounongo nu mba ri nonḓengu yokehi. Nu motjiwaṋa tjOvajuda, Ovakriste aave varwa otja “ovandu uriri mbe hi na indu va hongerwe,” tjimuna omuapostele Petrus na Johanes. (Oviung. 4:13) Ovandu ovengi aave ripura kutja Ovakriste ovandu ovingundi nu mbe he riyeura, mena rokutja kaave kara norupa mopolitika na morupa rwovita kunao kaave varwa otjovanarupa motjiwaṋa.

4. Ovakriste voruveze orukuru va tjita vi indu ovandu mbaave ve pirukire tjaave hungire oviṋa ovivi ohunga nawo?

⁴ Hapo Ovakriste voruveze orukuru va yandjera oumune ouvi wovapirukire okuvetjaera? Kako. Otjotjihorera, omuapostele Petrus na Johanes aave vara ondatumisire otjondjozikiro mena rokukongorera Jesus nokuhonga varwe ohunga na ye. (Oviung. 4:18-21; 5:27-29, 40-42) Kapa ri otjiṋa tjaa tji tjiti kutja Ovahongewa ve ṱohoṋi. Nandarire kutja ovandu ongondoroka kaave raisa ondengero ku wo, Ovakriste mbo va vatera ovandu varwe okukapita ovevepirukire. Otjotjihorera, omambo wOmbeibela Ovakriste tjiva ngu va tjanga ya vatera ovengi okuvepa omaundjiro. Nu Ouhona mbwaave zuvarisa, nai u honapara meyuru nu moruveze orusupi mau honaparere po ovandu avehe. (Mat. 24:14) Posi yokutja, ouhonapare ounamasa wa Roma otjikuru mbwaa u tatumisa Ovakriste wa wa oure wozombura ozengi, nu nai Ovakriste ovaṱakame mbo ve honapara otjozombara meyuru. Nu ovapirukire vawo va ṱa, nu tji va pendurwa mave u kehi yOuhona mbwaa u zuvarisiwa i yOvakriste mbu va tondere.—Omavan. 5:10.

5. Otja ku Johanes 15:19, omena raye ovandu mouye tji ve ha raisa ondengero kOvahongonone va Jehova?

⁵ Ndino, ovandu tjiva kave raisa ondengero kOvahongonone va Jehova nu ve tu nyekerera mena rokumuna kutja katu nounongo nu oweṱe ovingundi. Omena ratjike? Mena rokutja ka tui kumwe nongaro yovandu mbe ri ongondoroka na eṱe. Eṱe tu kondja okurisusuparisa, okurira ozongozu, nokukara nonḓuviro. Nungwari, ovandu mouye ndino ve tanga ovandu overitongamise, ovanautwe novapirukire. Nu wina eṱe katu kara norupa moviṋa vyopolotika na motupa twovita twomahi ngamwa. Eṱe twa panguka kovandu mbe ri mouye ndino, kunao owo vetu vara otja ovehinonḓengu.—Lesa Johanes 15:19; Rom. 12:2.

6. Otjiungura tjiṋe otjinene Jehova tje vatera ovakarere ve okuyenenisa?

⁶ Kainatja kutja ovandu mouye ve tu vara vi, Jehova u tu ungurisa moviungura ovinanḓengu. Eye u yenenisa otjiungura tjokuzuvarisa tji tji hina indu tja tjitirwe i yomundu mouye. Ovakarere ve ndino ve pitisa nokuhandjaura omambo nge ri momaraka pekepeke mouye, nu ve ungurisa Ombeibela okuvatera ovandu ovengi okurundurura ehupo rawo. Ondjozikiro aihe kondoṋeno ndjo i yenda ku Jehova, ngu ungurisa otjimbumba tjovandu mbe varwa i youye otja ovingundi okuyenenisa oviungura mbyo. Nambano tjike kweṱe kourike wetu? Hapo Jehova ma yenene okutuvatera kutja tu rire ovanamasa? Tjiperi nao, matu sokutjita vi kutja me tu vatere? Ngatu tare koviṋa vitatu mbi matu rihongo okuza kotjihorera tjomuapostele Paulus.

7. Otjikwaye tjimwe otjinanḓengu tji matu rihongo okuza kotjihorera tja Paulus?

⁷ Otjiṋa tjimwe tji matu rihongo okuza  kotjihorera tja Paulus otjo hi: O riyameke komasa woye poo kozondunge zoye omuini tji u karera Jehova. Ovandu ovengi va yozikire Paulus mena rongaro nounongo mbwa ri nawo, kunao atja rira oupupu kuye okuritongamisa nokurivara omuini. Eye we kurira moTarsus, otjihuro ohongora morukondwa rumwe rwa Roma. Tarsus yari otjihuro otjinene nu tjaatji tjiukirwa komahongero wokombanda. Paulus wa ri omuhongwandu, eye wa hongerwe i umwe wovanane wOvajuda ngwa yozikirwe tjinene moruveze rwe, wena Gamaliel. (Oviung. 5:34; 22:3) Moruveze ndwo, Paulus wa ri omundu omunanḓengu mokati kOvajuda ovakwao. Eye wa tja: “Momahongero wOvajuda ami mba ri komeho tjinene pomakura wandje omengi momuhoko wandje.” (Gal. 1:13, 14; Oviung. 26:4) Nungwari Paulus kee riyameke kuye omuini.

8. Otja kOvafilipi 3:8, Paulus aa vara vi oviṋa mbye vyesa kombunda, nu ongwaye tja kara “nenyando moungundi”?

⁸ Paulus wa ri nohange okuisa oviṋa kongotwe mbyaavi tjiti kutja varwe ve mu vare otjomundu omunahepero. Eye tjiri wa muna kutja oviṋa avihe mbya ri navyo “oviyaya porwavyo.” (Lesa Ovafilipi 3:8.) Paulus wa muna omauzeu omengi mena rokukongorera Kristus. Eye wa tonderwe i yotjiwaṋa tje omuini. (Oviung. 23:12-14) Nu wina wa tonwa na paterwa motjovakamburwa i yovature va Roma ovakwao. (Oviung. 16:19-24, 37) Kombanda ya nao, eye wina wa muna kutja ka homonena nu yari ouzeu okutjita imbi mbiri ovisemba. (Rom. 7:21-25) Posi yokutja eye kena paisa okukongorera Kristus mena rokutja aa munu omauzeu, kunao eye wa yenena “okukara nenyando moungundi.” Omena raye? Mena rokutja ya ri indu tja ngundiparere tja muna omuano Mukuru me mu vatera.—2 Kor. 4:7; 12:10.

9. Eṱe tu sokukara noumune uṋe ohunga noviṋa mbi tu ngundiparisa?

⁹ Indu tji matu vanga okumuna omasa wa Jehova, katu sokuripura kutja omasa wetu worutu, omahongero, ombazu, poo outumbe ombi mavi raisa kutja oweṱe ovananḓengu pu peṱa pi. Oviṋa mbyo ka mbi mavi tjiti kutja tu ungurisiwe i Jehova. Otjiperi kutja, ka vakarere avehe va Mukuru mbe ri “ozonongo poo ovengi  ovanauvara poo ovengi ovatjiukwa mokati keṋu.” Nungwari, Jehova wa toorora okuungurisa “imbi kouye mbi ri ovingundi.” (1 Kor. 1:26, 27) Kunao indu tji u hi noviṋa mbya tamunwa pomautiro woparagrafa ndji, ove mo yenene okukarera Jehova wina. Kara noumune ouwa ohunga nongaro mu uri. Mo yenene vi okutjita nao? Zemburuka kutja indu tji u hi noviṋa mbi tjita kutja ovandu ve rire ovanahepero mouye, mo yenene okumuna omuano Jehova mu me kupe omasa. Otjotjihorera, indu tji mo tira ovandu mbe pirukira ongamburiro yoye, kumba ku Jehova kutja me kupe omasa okuveraera imbi mbi u kambura mo. (Ef. 6:19, 20) Indu tji u kondja nomitjise omizeu, kumba ku Jehova me kupe omasa ngu mo hepa kutja u kare motjiungura tje. Oruveze aruhe tji mo munu omuano Jehova me ku vatera, ongamburiro yoye i kurira ko nu u kara nomasa.

10. Ongwaye tji matu sokukonḓonona ovihorera vya imba mba ri ovaṱakame mOmbeibela, tjimuna imba mba tamunwa mOvaheberi 11:32-34?

¹⁰ Paulus wa ri omuhongwa ngwaa konḓonona Omatjangwa nawa. Paulus potuingi aa konḓonona Embo ra Mukuru, nu we rihonga oviṋa ovingi okuza kovihorera vyovakarere ovaṱakame va Jehova mbya tjangwa mOmatjangwa. Indu tja tjanga kOvakriste Ovaheberi, Paulus we ve ningira kutja ve ripure novihorera ovingi vyovakarere va Jehova mba ri ko rutenga. (Lesa Ovaheberi 11:32-34.) Tara ku umwe wovakarere mbo Ombara David. Eye kaa sokutuurunga omapirukiro okuza kovanavita ve uriri, nungwari wina aa sokutuurunga omapirukiro okuza komapanga we. Otja tji matu ripura ohunga notjihorera tja David, matu munu omuano otjihorera tja David mu tja vatera Paulus nokutja matu horere vi ku Paulus.

11. Ongwaye David tjaa munika aayo otjingundi? (Tara kotjiperendero tjokombanda yokambo nga.)

¹¹ David aa varwa otjotjingundi i Goliat, omurwe wovita ngwa ri omunamasa morutu. Indu Goliat tja muna David, eye we mu ‘nyengurire.’ Kombanda yanao, Goliat we kurire, we ripangiṋine nawa, nu we rirongerisire nawa kovita. David wa ri omuzandona ngu hi nondjiviro nu aa munika aayo kee rirongerisa nawa kotjirwa. Posi yokutja David ongwa ri nomasa. Eye we riyameka ku Jehova nu Jehova we mu pa omasa okutaara Goliat.—1 Sam. 17:41-45, 50.

12. Omatokero yeṋe yarwe David ngaa sokutjinda?

¹² David aa sokutjinda omatokero warwe ngaa ye tjiti kutja ma munike aayo otjingundi. David wa ri nouṱakame ku Saul ngwa zikirwe i Jehova otjombara yOvaisrael. Rutenga Ombara Saul wa yozikire David. Nu kombunda, omeritongamisiro ya tjita kutja Saul ma ute okuṱira David eruru. Saul aa tjindi David momuano omuvi, nu aa vanga okumuzepa.—1 Sam. 18:6-9, 29; 19:9-11.

13. David wa tjita vi indu Ombara Saul tji ye mu tjinda momuano omuvi?

¹³ Pendje nomuano omuvi Ombara Saul mbwe mu tjinda, David wa kayenda komurungu okuraisa ondjozikiro kombara ndja zikwa i Jehova. (1 Sam. 24:6) David kena pa yandja ondjo ku Jehova komuano omuvi Saul me mu tjinda. Nungwari, David we riyameka ku Jehova okumupa omasa ngaa hepa kutja ma tuurunge omauzeu ngo.—Eps. 18:1.

14. Ongaro iṋe omuapostele Paulus ma tuurunga ndja ri tjimuna oya David?

¹⁴ Omuapostele Paulus wa ri mongaro tjimuna oya David. Ovanavita na Paulus va ri nomasa tjinene okukapita ye. Ovanane ovatjiukwa woruveze rwe ve mu tondere tjinene. Owo potwingi va tjita kutja ma tonwe nokupaterwa motjovakamburwa. Tjimuna David, Paulus  wina aa tjindwa navi i yovandu mbaave sokurira omapanga we. Nandarire tjiva mombongo yOukriste aave mu pirukire. (2 Kor. 12:11; Fil. 3:18) Posi yokutja Paulus wa taara ovemupirukire avehe mbo. Omomuano uṋe? Eye wa kayenda komurungu okuzuvarisa, nandarire kutja wa pirukirwa. Eye wa kara nouṱakame kovakambure ovakwao nandarire kutja ve mu hihamisa. Nu otjiṋa otjinanḓengu, eye wa kara omuṱakame ku Mukuru oure womuinyo we. (2 Tim. 4:8) Eye aa yenene okutjita avihe mbyo mena rokuriyameka ku Jehova, nungwari ka yari mena rokuriyameka komasa we omuini.

15. Ondando yetu oya tjike, nu matu i yenenisa vi?

¹⁵ Hapo ove u sokutjinda ondjambu poo ondatumisire okuza ku imba mbu mu hita pamwe oskole, mbu mu ungura pamwe poo ovazamumwe woye mbe heri Ovahongonone va Jehova? Hapo mape ya wa tjindwa navi i yomundu mombongo? Tji peri nao zemburuka ovihorera vya David na Paulus. Ove “nga rire ngu wa uru ouvi amo tjiti ouwa.” (Rom. 12:21) Indu ovandu tji ve tu pirukire, eṱe ka tu ve rwisa tjimuna David tja rwisa Goliat, nungwari tu toṋa ouvi mokuvatera ovandu okurihonga ohunga na Jehova nokurihonga Ombeibela wina. Ove mo yenene okuyenenisa ondando ndjo indu tji mo riyameke kOmbeibela tji mo ziri omapuriro wovandu, na indu tji mo raisa ondengero ku imba mbe ku tjinda navi nokutjita ouwa kovandu avehe nandarire ovanavita na ove.—Mat. 5:44; 1 Petr. 3:15-17.

16-17. Otjikeṋa Paulus tje hina wa zemba?

¹⁶ Ngunda omuapostele Paulus e hi ya rira omuhongewa wa Kristus, wa ri omurumendu omutanda ngu ha ri nondengero nu ngwaa tatumisa ovakongorere va Jesus. (Oviung. 7:58; 1 Tim. 1:13) Jesus omuini ongwa tjaera Paulus, ngwaa tjiukwa otja Saulus, kutja aha ungurisa ozondjito zoutwe kombongo yOvakriste. Jesus wa hungira na Paulus okuza meyuru ne mu poṱuparisa. Kutja ma mune rukwao, Paulus aa sokukapaha ombatero kovandu otjingewo mba mbaa tatumisa. Eye nomerisusuparisiro wa yakura ombatero okuza komuhongewa wena Ananias ngwa tjita kutja Paulus ma yenene okumuna rukwao.—Oviung. 9:3-9, 17, 18.

 ¹⁷ Kombunda yanao Paulus wa rira okaṋepo okatjiukwa kombongo yOvakriste, nungwari eye kena pa zemba omuano Jesus mbwe mu tjaera tja ri mondjira okuyenda ko Damaskus. Paulus wa kara pokurisusuparisa, nu eye omuini wa ri nombango okuyakura ombatero okuza kovakambure ovakwao. Eye wa tja: “Owo ve ndji tarareka omutima tjinene.”—Kol. 4:10, 11.

18. Omena ratjike rumwe tji tu ha vanga okuyakura ombatero okuza ku varwe?

¹⁸ Matu rihongere ko tjike okuza ku Paulus? Rutenga tji twa uta okukara noupanga ku novakarere va Jehova, eṱe mape ya aatu zeri okuyakura ombatero okuza ku wo, mena rokutja aatu tjiwa kutja tu novingi okurihonga. (1 Kor. 3:1, 2) Nu hapo matu sokutjita vi nai? Indu tji twa karera Jehova oure wozombura ozengi na tu kara nondjiviro onyingi, eṱe mape ya atu ha vanga okuyakura ombatero, indu rumwe tji yazu komundu ngu hi ya kara orure mouatjiri tjimuna eṱe. Posi yokutja, Jehova potwingi u ungurisa ovakambure ovakwetu okutuvatera. (Rom. 1:11, 12) Eṱe tji matu vanga okupewa omasa i Jehova matu sokuyakura ombatero okuza kovakambure ovakwetu.

19. Omomuano uṋe Paulus ma yenena okutjita oviṋa ovingi ovihimise?

¹⁹ Paulus wa tjita oviṋa ovingi ovihimise tja za nokurira Omukriste. Omena ra tjike? Mena rokutja eye we rihonga kutja outoṋi kau zu momasa worutu rwomundu, momahongero, moutumbe, poo kutja omundu wa za pi, nungwari u za momerisusuparisiro na momeriyamekero we ku Jehova. Eṱe atuhe nga tu horere ku Paulus (1) mokuriyameka ku Jehova, (2) mokurihongera kovihorera mbi ri mOmbeibela na (3) mokuyakura ombatero okuza kovakambure ovakwetu. Kunao, kainatja kutja mape ya atu rimunu oungundi, Jehova me tupe omasa.