1. Ovikeṋa Jehova mbye ku tjitira?

PE YA vi u rire umwe wOvahongonone va Jehova? Rutenga, ngahino ove wa zuva “ombuze” ombwa okuza kovanene voye, omukweṋu ngu mu ungura pamwe poo ngu mu hita pamwe oskole, poo okuza momazuvarisiro wondjuwo nondjuwo. (Mar. 13:10) Nu okuzambo, pa ri omundu ngwa tjita ozongondjero nokuungurisa oruveze rwe oruingi okukuhonga Ombeibela. Omerihongero ngo, onga tjita kutja u suvere Jehova nu u tjiwe kutja eye we ku suvera wina. Jehova we ku nanena kouatjiri, nu mena rokutja wa rira omuhongewa wa Jesus Kristus ove u nomaundjiro womuinyo waaruhe. (Joh. 6:44) Ove tjiri u nondangi ku Jehova kutja wa hinda omundu okukuhonga ouatjiri nokutja we ku yakura otja umwe wovakarere ve.

2. Morupa ndwi matu kahungirira ku ye?

² Mena rokutja matu tjiwa ouatjiri, tu nondjingonekero yokuvatera varwe okukayenda puna eṱe mondjira ndji twara komuinyo. Mape ya a rire oupupu okuzuvarisa okuza kondjuwo nondjuwo, posi yokutja a rire ouzeu okuningira omundu okurihonga Ombeibela kuna eṱe, poo okukayendisa omakonḓononeno wOmbeibela. Hapo ove u noumune otja imbwo? Ndoovazu peri nao, orupa ndwi mape ya a ru ku vatere. Matu kahungirira koviṋa mbi tu hinga okuvatera ovandu okurira ovahongewa. Wina matu katara komuano mu matu yenene okuzengurura omauzeu ngu mape ya aye tjiti kutja atu ha utu omerihongero wOmbeibela ku nomundu. Rutenga, ngatu tare kutja ongwaye tji matu sokurira ovazuvarise novahonge vombuze ombwa.

3. Omena raye tji tu zuvarisa?

³ Indu Jesus tja ri kombanda yehi, eye wa rakiza ovahongewa  ve okuungura otjiungura tjaatji kamburire mo oviṋa vivari. Rutenga, we ve raera kutja ngave zuvarise ombuze ombwa yOuhona wa Mukuru nu e ve raisire omuano mu mave yenene okutjita nao. (Mat. 10:7; Luk. 8:1) Otjotjihorera, Jesus wa raera ovahongewa ve oviṋa mbi mave sokutjita, indu ovandu tji va yakura poo tji va nakaura ombuze yOuhona wa Mukuru. (Luk. 9:2-5) Eye wina wa hunganeka kutja ovahongewa ve mave zuvarisa “koviwaṋa avihe” mouye auhe. (Mat. 24:14; Oviung. 1:8) Ovahongewa aave sokuraera ovandu ohunga nOuhona wa Mukuru na imbi mbi mau kayenenisa, nandarire kutja ovandu mave yakura poo kave nokuyakura ombuze ndjo.

4. Otja ku Mateus 28:18-20, ovikeṋa vyarwe mbi matu sokutjita tji matu zuvarisa ohunga nOuhona wa Mukuru?

⁴ Otjiungura otjitjavari Jesus tja rakiza kovahongewa ve ootjiṋe? Eye wa raera ovemukongorere okuhonga ovandu okuṱakamisa oviṋa avihe mbya rakiza. Hapo otjiungura tjokuzuvarisa nokuhonga tja yandjerwe ku imba veserewondo etenga uriri, otja tjiva tji ve muna? Kako, Jesus wa raisa kutja otjiungura otjinanḓengu ho matji kayenda komurungu “nga komaandero wouye.” (Lesa Mateus 28:18-20.) Jesus mape ya wa yandja erakiza ndo indu tje rimunikisa kovahongewa mba ri kombanda 500. (1 Kor. 15:6) Nu momavandururiro nga yandja ku Johanes, Jesus wa raisa oukahu kutja ovahongewa ve avehe ve sokuvatera varwe okurihonga ohunga na Jehova.—Omavan. 22:17.

5. Otja 1 Ovakorinte 3:6-9, Paulus wa sasaneka vi otjiungura tjokuzuvarisa na ihi tjokuhonga ku nomakunino wovikunwa?

⁵ Omuapostele Paulus wa sasaneka otjiungura tjokukaisapo ovandu ovahongewa ku nomakunino wovikunwa, tji matji raisa kutja pe novingi mbi twa sokutjita pendje nokukuna ozondwi uriri. Eye wa zemburukisa Ovakriste moKorinte kutja, “Ami vari mba kuna, nu Apolos a tjatja . . . neṋe oweṋe ehi romakunino ra Ndjambi.” (Lesa 1 Ovakorinte 3:6-9.) Oweṱe ovaungure ‘mehi romakunino ra Ndjambi,’ kunao tu kuna ozondwi indu tji matu zuvarisa nu tu ze tjatja indu tji matu hongo. (Joh. 4:35) Posi yokutja, tu tjiwa nawa kutja Mukuru ongu ze hapisa mokunanena ovandu ku ye.

6. Otjiungura tjetu tjokuhonga tji kamburira mo ye?

⁶ Eṱe tu paha imba mbe ‘nomitima omiwa okukamuna omuinyo waaruhe.’ (Oviung. 13:48, NW) Kutja ovandu mbo ve rire ovahongewa, eṱe matu sokuvevatera kutja ve (1) zuve, (2) ve yakure (3) nokuṱakamisa oviṋa mbi mave rihongo okuza mOmbeibela. (Joh. 17:3; Kol. 2:6, 7; 1 Tes. 2:13) Avehe mombongo mave yenene okuvatera ovahongwa vOmbeibela mokuveraisira orusuvero nokuveyakura nawa tji mave ya kozombongarero zombongo. (Joh. 13:35) Ingwi ngu ma hongo ma sokuungurisa omasa noruveze rwe oruingi okuvatera omuhongwa okuisa oviṋa mbye kambura mo mbi ri “oviṱunga ovizeu” okuvyesa. (2 Kor. 10:4, 5) Mape ya ape kambura omieze omingi okuvatera omundu okutjita omarundurukiro mehupo re kutja ma vaze pondondo yokupapitisiwa. Posi yokutja, okutjita omarundurukiro ngo otjiṋa otjinahepero tjinene.

7. Otjikeṋa tji tji tjita kutja tu kare norupa motjiungura tjokuzuvarisa nokukaisapo ovandu ovahongewa?

⁷ Omena raye tji tu kara norupa motjiungura tjokuzuvarisa nokukaisapo ovandu ovahongewa? Rutenga, omena rokutja twa suvera Jehova. Indu tji mo kondjo pu mo yenene okuṱamisa erakiza rokuzuvarisa nokukaisapo ovandu ovahongewa, mo raisa orusuvero rwoye ku Mukuru. (1 Joh. 5:3) Zemburuka kutja orusuvero ndu u naro kuna Jehova, ondu tjita kutja u zuvarise okuza kondjuwo nondjuwo. Hapo ya ri oupupu kove okukara nonḓuviro kerakiza  ndo? Mape ya kaari oupupu. Hapo otjikando otjitenga tji wa pita motjiungura tjokuzuvarisa ootira? Ii, posi yokutja ootjiwa kutja ootjiungura Jesus tje vanga kutja u tjite nu ove wa puratena kerakiza ndo. Nu kombunda yoruveze kaaṋi mape ya ya rira oupupu kove okukara norupa motjiungura tjokuzuvarisa. Nai u noumune uṋe ohunga nokukara nomuhongwa wOmbeibela? Hapo omeripura otja ingo ye ku pa omburuma? Ngahino. Posi yokutja, indu tji wa ningire ouvanḓe ku Jehova mongumbiro, eye me ku vatere okuuta omerihongero wOmbeibela ku nomundu nu me ku vatere kutja u kare nonḓero yokukaisapo ovandu ovahongewa.

8. Otja ku Markus 6:34, otjikwaye tjarwe tji tji tjita kutja tu honge varwe?

⁸ Otjitjavari, orusuvero rwetu kovandu ondu tjita kutja tu ve honge ouatjiri. Otjikando tjimwe, Jesus novahongewa ve va urirwe tjinene kombunda ya indu tji va za nokuzuvarisa. Otjimbumba tjovandu tje ya ku wo indu tjaave paha oruveze okusuva. Eye we ve ṱira ondjenda nu otja uta “okuvehonga oviṋa ovingi.” (Lesa Markus 6:34.) Nandarire kutja wa ri a urwa, omena raye tja zuvarisa kovandu motjimbumba ho? Eye ee rikendere ku wo. Eye aa vanga okuvevatera mena rokutja wa muna omuano maave hepa omaundjiro nomuano maave munu omauzeu. Ovandu ndino wina ve ri mongaro ndjo. O pukisiwa i yomuano mu ve munika kombanda uriri. Owo ve ri tjimuna ozonḓu nḓa pandjara nu nḓe hi nomurise. Omuapostele Paulus wa tja ovandu tjimuna imbo kave tjiwa Mukuru nu kave nomaundjiro. (Ef. 2:12) Owo ve kayenda mondjira ndji “twara kombandjarero.” (Mat. 7:13) Indu tji matu munu omuano ovandu momaturiro wetu mu ve hepa Mukuru, orusuvero notjari vi tjita kutja tu ve vatere. Nu omuano omusemba mu matu yenene okuvevatera omokurihonga Ombeibela kuna wo.

9. Otja kOvafilipi 2:13, omomuano uṋe Jehova mu me ku vatere?

⁹ Ngahino, ove u keyakeya okuuta omerihongero wOmbeibela ku nomundu mena rokutja u muna kutja maku kambura oruveze oruingi. Indu tji u noumune mbwo, raera Jehova oumune woye. Mu ningira kutja me ku vatere okukara nonḓero yokupaha omundu ngu mamu rihongo pamwe Ombeibela. (Lesa Ovafilipi 2:13.) Omuapostele Johanes we tu raera kutja Mukuru u zuvira ozongumbiro nḓe ri otja kombango Ye. (1 Joh. 5:14, 15) Kunao, mo yenene okukara nongamburiro kutja Jehova me ku vatere okukara nonḓero yokuhonga ovandu.

10-11. Ongwaye tji mape ya atu keyakeya okurihonga Ombeibela ku nomundu?

¹⁰ Tu tjiwa kutja otjiungura tjokukaisapo ovandu ovahongewa otjinanḓengu nandarire kutja mape ya a rire ouzeu kweṱe okutjitjita. Ngatu tare komauzeu tjiva ngo nomuano mu matu yenene okuyetuurunga.

¹¹ Mape ya atu munu kutja ozongaro mu tu ri kamaaze tu yandjere. Otjotjihorera, ovazuvarise tjiva ovanene motjiwondo poo kave nouveruke ouwa. Hapo ove u ri mongaro ndjo? Ndoovazu peri nao, tara koviṋa mbi twe rihonga okuza komutjise mbwi o-COVID-19. Eṱe twa muna kutja matu yenene okuhonga ovandu Ombeibela okupitira mozongoze noviṋa vyarwe. Kunao, mo yenene okurihonga Ombeibela ku nomundu ngunda au ri poyoye. Nu wina pe notjiṋa tjarwe otjiwa. Ovandu tjiva ve vanga okurihonga, posi yokutja kave kara noruveze moiri ovakambure ovakwetu ndji ve zuvarisa. Mape ya ave kara noruveze rukuru muhukomunene poo ongurova. Hapo mape ya orihongo Ombeibela pu nomundu mozoiri nḓo? Jesus aa hongo Nikodemus ongurova,  orwo ndwa ri oruveze Nikodemus ndwaa zeri.—Joh. 3:1, 2.

12. Ovikeṋa mbi tu pa ongamburiro yokutja matu yenene okurira ovahonge ovawa vOmbeibela?

¹² Mape ya atu ripura kutja katu nokuyenena okuhonga omundu Ombeibela. Mape ya atu munu kutja matu hepa ondjiviro onyingi ngunda atu hi ya uta okuhonga omundu. Ndoovazu u muna nao, tara koviṋa vitatu mbi mavi ku vatere okukara nongamburiro kutja mo yenene okuhonga omundu Ombeibela. Otjitenga, Jehova u muna kutja ove wa yenene okuhonga varwe. (2 Kor. 3:5) Otjitjavari, Jesus ngu ‘nouvara auhe meyuru na kombanda yehi’ we tu rakiza okuhonga. (Mat. 28:18) Nu otjitjatatu, ove mo yenene okuningira varwe okukuvatera. Otjotjihorera, Jesus aa hongo imbi mbya hongwa i Ihe, ove wina mo yenene okutjita nao. (Joh. 8:28; 12:49) Wina ove mo yenene okuningira omutarere wokambumba kokuzuvarisa, omukandjira poo omuzuvarise okukuvatera okuuta omerihongero wOmbeibela ku nomundu. Omuano umwe mbu mau ku vatere kutja u kare nongamburiro move omuini omokuyenda pu novazuvarise mbo kovahongwa vawo.

13. Ongwaye tji matu sokuiririra omiano pekepeke vyokuhonga?

¹³ Mape ya a rire ouzeu okuungurisa omiano omipe noviungurisiwa ovipe vyokuhonga. Omuano mbu tu honga Ombeibela nai wa runduruka. Embo ndi tu hongera ko ovandu ndi, Yorokera ehupo nga aruhe, ri hepa omerirongerisiro nomahongero nga panguka komuano mbwaatu ungura rukuru. Tu lesa ozoparagrafa ozonḓiṱi natu hungirire tjinene ku imbi mbi twe rihongo ku nomuhongwa. Tji matu hongo, tu ungurisa ouvidio ouingi noviṋa vyarwe tjimuna o-JW Library^®. Indu tji u hi nokutjiwa kutja oviṋa mbi vi ungurisiwa vi, ningira omundu okukuvatera. Eṱe otjovandu katu iririre oviṋa ovipe tjimanga. Posi yokutja, nombatero ya Jehova na varwe matu yenene okuiririra nokukara nondjoroka tji matu rihongo ku novandu. Omukandjira umwe wa tja, omuano wokurihonga mbwi “omuwa tjinene komuhongwa na ku ingwi ngu ma hongo.”

14. Matu sokuzemburuka ye indu tji matu ungura momaturiro ovandu mu ve ha puratene, nu 1 Ovakorinte 3:6, 7 mari tu tunduuza vi?

¹⁴ Mape ya a rire ouzeu okurihonga Ombeibela ku novandu momaturiro mu twa tura. Ovandu tjiva mape ya ave ha puratene kombuze yetu poo ave i pirukire. Otjikwaye tji matji tu vatere okukara noumune ouwa momaturiro otja ingo? Zemburuka kutja ongaro yovandu i yenena okurunduruka tjimanga mouye wouzeu mbwi, nu imba mbaave ha raisa onḓero mape ya ave utu okuvanga okutjiwa Mukuru. (Mat. 5:3) Tjiva mbaave ha vanga okukambura omambo wetu, kombunda va kayakura omerihongero wOmbeibela. Eṱe wina matu tjiwa kutja Jehova ongu ri Omuini womakondero. (Mat. 9:38) Eye u vanga kutja tu kune nokutjatja, posi yokutja eye Omuini ongu ma hapisa. (1 Kor. 3:6, 7) Nu tjiri otjiyanḓiparise okutjiwa kutja Jehova u sera ondaya kozongondjero zarwe nḓu matu tjiti, nandarire kutja katu nomundu okurihonga pamwe Ombeibela. *

15. Jehova u fula vi indu omundu tja yakura omerihongero wOmbeibela na ṱakamisa imbi mbye rihongo?

¹⁵ Jehova u kara nondjoroka indu omundu tja yakura ouatjiri wOmbeibela na raere varwe ohunga noviṋa mbye rihonga. (Omiano 23: 15, 16) Jehova wina u kara nondjoroka onene indu tji ma munu ovakarere ve tji mave zuvarisa nokuhonga noupatje. Otjotjihorera, nandarire kehi yomutjise mbwa handjauka mouye mombura yoviungura vyetu ndji 2020, pa ri ovandu 7 705 765 mbaave rihonga Ombeibela nu tji tja tjita kutja ovandu votjivarero 241 994 ve riyandje ku Jehova nokupapitisiwa. Nu ovahongewa ovape mbo mave utu okuhonga ovandu Ombeibela nu ave vatere ovandu ovengi okurira ovahongewa. (Luk. 6:40) Matu yenene okukara nongamburiro kutja tu yorokisa omutima wa Jehova, indu tji tu norupa motjiungura tjokuzuvarisa nokuisapo ovandu ovahongewa.

16. Ondando iṋe ombwa ndji mo yenene okutwapo?

¹⁶ Okukaisapo ovandu ovahongewa katjiungura otjipupu, posi yokutja nombatero ya Jehova matu yenene okukara norupa okuhonga ovandu ovape okusuvera Tate wetu womeyuru. Hapo matu yenene okutwapo ondando yokuuta omerihongero wOmbeibela ku nomundu nangarire umwe? Indu tji matu ungurisa oruveze aruhe ndu tu na ro okuningira ovandu mbu matu hakaene okurihonga Ombeibela, mape ya ovandu ovengi ave vanga okurihonga. Matu yenene okukara nongamburiro kutja Jehova ma sere ozongondjero zetu ondaya.

17. Tu muna ondjoroka iṋe indu tji matu hongo ovandu Ombeibela?

¹⁷ Tjiri ondjingonekero yapeke kweṱe okuzuvarisa nokuhonga ouatjiri ku varwe. Otjiungura hi tji tu pa ondjoroka yatjiri. Omuapostele Paulus ngwa vatera ovandu ovengi moTesalonika okurira ovahongewa, wa tja: “Oweṋe omaundjiro wetu nenyando retu nohiviro yondoṋeno yetu komurungu wa Muhona wetu Jesus, indu tji me ya rukwao. Eṋe vari oweṋe ondjozikiro yetu nenyando retu!” (1 Tes. 2:19, 20; Oviung. 17:1-4) Ovandu ovengi ndino ve muna nao wina. Omukazendu omukambure wena Stéphanie nomurumendu we va vatera ovandu ovengi okupapitisiwa. Nu Stéphanie wa tja: “Okuvatera ovandu okuriyandja oveni ku Jehova otjiṋa tji tji tu pa ondjoroka onene.”