1-2. Omambo nge ri mu Jesaja 65:16, 17 ye tu vatera vi okupanḓera po?

“O YUMBU OHAMA,” onda ri epu rOtjiingirisa enanyuṋe romaworonganeno wotukondwa wombura ndji 2017. Oprograma ndjo ye tu raisira omuano mu matu yenene okutjinda omauzeu ngu maye tu wire. Pa kapita ozombura ine okuza komaworonganeno ngo, nu eṱe ngamba tu tjinda omauzeu nomuretima mouye ourunde mbwi.

² Omauzeu yeṋe ngu u nawo nai? Hapo wa zepaisa omuzamumwe poo epanga roye? U hupa nomutjise omuzeu? Hapo u tjinda omauzeu mena roukurundu? Hapo ove wa ṱunwa i omaumba tjimuna omanyinganyingiro wehi, otjitandi poo ondatumisire? Poo u muna ouzeu mena romutjise mbwi o-COVID-19 poo omitjise vyarwe? Tjiri tu undja eyuva indu oviṋa avihe mbyo tji mavi kapita nu tji tu hi nokuvizemburuka rukwao.​—Lesa Jesaja 65:16, 17.

3. Ovikwaye mbi matu sokutjita nai, nu omena raye?

³ Ehupo mouye mbwi ezeu nu mape ya atu munu omauzeu omanene pu inga moruyaveze. (Mat. 24:21) Kunao, otji matu hepa okurihonga okukara nomuretima poo onḓarorure. Omena raye? Mena rokutja Jesus wa tja: “Panḓereye po, nu indino otji mamu yama omiinyo vyeṋu.” (Luk. 21:19) Tji matu ripura ohunga nomuano ovandu varwe mu ve tuurunga omauzeu wawo nge ri tjimuna owetu, iho tji tjita kutja tu panḓere po.

4. Omena raye tji matu yenene okutja Jehova ongu ri otjihorera otjiwa tjomuretima?

⁴ Ouṋe ngu ri otjihorera otjiwa tjomuretima? OJehova Mukuru. Ngahino eziriro ndo re ku himisa, posi yokutja indu tji we ripurire ko komoo himwa. Satan ongu honaparera po ouye mbwi nu owo we ura nomauzeu. Jehova u nomasa wokunyona ouye mbwi mombapaiziro yeho, posi yokutja eye u undja eyuva ndi ri ro okutjita nao. (Rom. 9:22) Moruveze rwanao, Mukuru u kayenda  komurungu okuraisa omuretima nga oruveze ndwo tji rwe ya. Indjo tu tare koviṋa muvyu Jehova me raisa omuretima we.

5. Omomuano uṋe ena ra Mukuru mu ra yambururwa, nu ove u noumune uṋe ohunga notjiṋa ho?

⁵ Ondjambu ndja etwa kena re. Jehova wa suvera ena re nu u vanga kutja ovandu avehe ve raise ondengero ku ro. (Jes. 42:8) Posi yokutja, oure wozombura 6 000 nḓa kapita ena re ra yambururwa. (Eps. 74:10, 18, 23) Otjiṋa hi tja uta motjikunino tja Eden, indu Satan Omudiaboli (ndi heya “Omuyamburure”) tja kuminina Mukuru kutja u rurupara Adam na Eva oviṋa mbi mave hepa kutja ve kare nondjoroka. (Gen. 3:1-5) Okuza koruveze ndwo nga ku nai, Jehova u kumininwa kutja u rurupara ovandu oviṋa mbi mave hepa tjiri. Jesus ee rikende ohunga nomuano ena ra Ihe maari yambururwa. Mena ranao, eye wa honga ovahongewa ve okukumba kutja, “Tate yetu ngu u ri momayuru: Ena roye ngari yapurwe.”—Mat. 6:9.

6. Ongwaye Jehova tja yandjera oruveze oruingi okuraisa kutja eye ongu nousemba wokuhonaparera po eyuru nehi?

⁶ Omapirukiro kousemba we womananeno. Jehova ongu nousemba wokuhonaparera po eyuru nehi nu omuano we wokuhonapara ombu ri omusemba. (Omavan. 4:11) Posi yokutja, Satan wa kondja okupukisa ovandu novaengeli kutja ve ute okumuna kutja Mukuru ke nousemba mbwo. Aape hepa oruveze okuraisa kutja Jehova ongu nousemba wokuhonapara nu ongu ri omunane omusemba. Mukuru wa yandjera ovandu okurihonaparera po oveni oure woruveze orure, kokutja ve yenene okurimunina oveni kutja kamaave yenene okurinana oveni nokuhina Omuute. (Jer. 10:23) Mena rokutja Mukuru u nomuretima, ombata ndjo mai kazengururwa. Ovandu avehe mave katjiwa kutja omuano wa Jehova wokunana ombu ri omusemba nokutja Ouhona we auyerike ombu mau yenene okuyeta ohange nondjeverero kombanda yehi.

7. Oouṋe mba pirukira Jehova, nu eye me ke ve tjita vi?

⁷ Omuano ovanatje ve tjiva mu ve mu pirukira. Jehova wa mema ovaengeli novandu otjovanatje ve ohomonena. Posi yokutja, omuengeli ngwi Satan (ndi heya “Omupirukire”) wa tjita kutja ooAdam na Eva mba ri ohomonena ve pirukire Jehova. Ovaengeli varwe novandu wina va pirukira Jehova. (Judas 6) Nandarire kombunda, Ovaisrael mba ri ovakarere va Mukuru ovatoororwa, ve mu nakaura nu va uta okurikotamena koomukuru wovisenginina. (Jes. 63:8, 10) Tjiri otjiṋa ho tja hihamisa Jehova. Nungwari, eye wa raisa omuretima nu ma kayenda komurungu okutjita nao nga indu oruveze tji rweya okunyona ovapirukire mbo. Okuzambo Jehova na imba mbe ri ovaṱakame ku ye mave kara nondjoroka mena rokutja kave nokuhepa okutjinda omauzeu ngu ve tjinda mouye ourunde mbwi.

8-9. Ovizeze viṋe mbi hungirwa ohunga na Jehova, nu eṱe matu yenene okutjita vi?

⁸ Ovizeze vya Satan. Satan wa kumunina Job novakarere va Jehova avehe ovaṱakame kutja ve rikotamena ku ye mena rokuvanga ombwiro yawo oveni. (Job 1:8-11; 2:3-5) Omudiaboli u kayenda komurungu okukuminina ovandu momuano mbwo nga ku ndino. (Omavan. 12:10) Matu yenene okuraisa kutja Satan omunavizeze indu tji matu tjindi omauzeu wetu nomuretima, nokukara nouṱakame ku Jehova mena rokutja twe mu suvera. Jehova wa sera Job ondaya, nu wina eye me tu sere ondaya indu tji twa panḓere po.—Jak. 5:11.

⁹ Satan u ungurisa ovanane vozongamburiro zoposyo okuraisa kutja Jehova ke notjari, nu ongu tjita kutja ovandu ve mune omauzeu. Nu indu ovanatje tji va ṱu, tjiva ve tja  Mukuru ongwe ve toora mena rokutja ma hepa ovaengeli ovengi meyuru. Ovizeze mbyo tjiri kavi raisa ondengero ku Mukuru, posi yokutja eṱe matu tjiwa kutja Jehova oIhe worusuvero. Indu tji tu nomutjise omuzeu poo omusuverwa wetu tja ṱu, eṱe katu yandja ondjo ku Mukuru. Nungwari, tu nongamburiro kutja moruyaveze Mukuru ma kaverukisa ovavere nu ma kapendura ovaṱi. Matu yenene okuraera ku auhe ngu ma puratene kutja Jehova oMukuru worusuvero. Iho matji tjiti kutja Jehova ma yenene okuzira ingwi ngu mu yamburura.—Omiano 27:11.

10. Epsalme 22:23, 24 ri tu raera ye ohunga na Jehova?

¹⁰ Omauzeu ovakarere ve ngu ve muna. Jehova oMukuru wotjari. Indu tji ma munu ovakarere ve tji mave munu omauzeu, ngahino mena rondatumisire, ouvere poo mena rokutja kavandu ohomonena, tji mu hihamisa. (Lesa Epsalme 22:23, 24.) Jehova u tjiwa omihihamo vyetu nu eye me ke vi isapo. (Sasaneka na Eksodus 3:7, 8; Jesaja 63:9.) Oruveze maru ya indu eye tji ‘ma pyoṋa omahoze aehe momeho wetu. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao.’—Omavan. 21:4.

11. Omomuano uṋe Jehova me hihamenwa i yovakarere ve mba ṱa?

¹¹ Okuhihamenwa i yomapanga we nga ṱa. Hapo Jehova u fula vi ohunga novarumendu novakazendu ovaṱakame mba ṱa? Eye tjiri u vanga okuvemuna rukwao. (Job 14:15) Ripura nomuano Jehova me vanga okumuna epanga re Abraham rukwao. (Jak. 2:23) Poo Moses, ngu va hungira kumwe “amave tarasana.” (Eks. 33:11) Nomuano Eye me vanga okuzuva David novatjange varwe vomapsalme amave imbura omaimburiro omawa wondangero. (Eps. 104:33) Nandarire kutja omapanga wa Mukuru nga ya ṱa, Jehova ingee keye ve zemba. (Jes. 49:15) Eye u zemburuka oviṋa avihe ohunga na wo.  Ombeibela i tja: “Ovandu avehe ku Ye ve nomuinyo.” (Luk. 20:38) Moruyaveze Eye me ve kotora komuinyo, nu ma puratene kozongumbiro zawo zomourekoto na yakura omerikotameneno wawo. Omambo ngo, nga ye ku huhumiṋe indu tji wa zepaisa omusuverwa woye.

12. Otjikeṋa tji tji hihamisa Jehova tjinene momayuva omasenina wouye ourunde mbwi?

¹² Omuano ovandu ovarunde mu ve tatumisa varwe. Indu omapirukiro motjikunino tja Eden tji ya uta, Jehova aa tjiwa kutja oviṋa mavi ri rire ko ovivi ngunda avi hi yeya kouwa. Jehova wa tonda ourunde, ouhasemba, notjitandi mouye mbwi. Eye tjinenenene u rikendera imba mbe ha yenene okurivatera oveni, tjimuna ovahepundu nozosewa. (Sak. 7:9, 10) Jehova wina u ṱoruhoze tjinene indu tji ma munu ovakarere ve ovaṱakame amave tatumisiwa nokupaterwa motjovakamburwa. Matu yenene okukara nongamburiro kutja eye wa suvera avehe mbe raisa omuretima tjimuna ye.

13. Ovikwaye oviyaukise Mukuru mbye muna movandu, nu eye ma katjita tjike?

¹³ Omeritjindiro wovandu ye ririra ko omavi tji pe ya komahakaeneno womonyama. Ovandu va memwa otja kosaneno ya Mukuru, posi yokutja Satan u vanga okutjita kutja owo ve tjite oviṋa oviyaukise. Moruveze rwa Noa, “Muhona wa muna kutja ourunde wovandu wa takavara kombanda yehi, . . . Muhona opa hihamenwa omutima kutja wa ungura ovandu ne ve twa kombanda yehi; nEye wa ṱoruhoze tjinene.” (Gen. 6:5, 6, 11) Hapo oviṋa vya runduruka okurira oviwa okuza koruveze ndwo? Kako katjiperi. Satan u kara nondjoroka indu tji ma munu omuano omuvi ovandu mu ve ritjinda tji pe ya komahakaeneno womonyama, tjimuna oruvakiro pokati komurumendu nomukazendu mbe hi ya kupasana poo pokati komurumendu nomurumendu. (Ef. 4:18, 19) Eye tjinene u kara nondjoroka indu tji ma munu imba mbe rikotamena ku Jehova amave tjiti ouvi ounene. Indu omuretima wa Jehova tji we ya komaandero, eye ma raisa kutja wa tonda ozongaro azehe ozombi zomeritjindiro mokuisapo imba avehe mbe ha vanga okurundurura ozongaro zawo.

14. Ovandu ve nyona vi ehi novipuka?

¹⁴ Omuano ovandu mu ve nyona oviutwa vya Mukuru. Ovandu kave ‘honaparere ovakwao nga tji mave humapara’ uriri, nungwari owo wina kave yandja ombango kehi novipuka Jehova mbya twa kehi yondjeverero yawo. (Omuzuv. 8:9; Gen. 1:28) Ovanongonone tjiva ve tja mena rovitjitwa vyovandu, omuhoko umwe wovipuka mape ya au yanda mozombura nḓu maze ya. Katjikumise kutja ovandu tjiva ve tja okuti nozondendera vi ri moumba. Ouṋingandu, Jehova wa kwizika ‘okuyandeka imba mbe nyona ehi’ nokutjita kutja ehi arihe ri rire oparadisa.—Omavan. 11:18; Jes. 35:1.

15-16. Otjikwaye tji matji tjiti kutja tu kare nomuretima tjimuna Jehova? Sasaneka.

¹⁵ Ripura ohunga noviṋa avihe Tate wetu womeyuru me raisa omuretima oure wozombura ozengi. (Lesa okaongo nga “ Oviṋa Jehova me raisa omuretima.”) Jehova ma yenene okunyona ouye ourunde mbwi oruveze ngamwa aruhe. Posi yokutja omuretima we we tu vatera tjinene. Ripura ohunga notjihorera hi. Ngatu tje ovakupasane va raerwa kutja okanatje kawo ku ke hi ya pandukwa make kwatwa nomutjise omuzeu, nu tji kapandukwa make kara nehupo ezeu nu make ṱu ngunda a ke ri okaṱiṱi. Posi yokutja ovanene mave kara nondjoroka, indu okanatje tji kapandukwa nandarire kutja ma rire ouzeu ku wo okuketjevera. Mena rokutja va suvera okanatje kawo, owo mave kondjo pu mave yenene okukepa ehupo ewa nandarire kutja ouzeu.

 ¹⁶ Momuano otjingewo, ozondekurona azehe za Adam na Eva ze kwatwa mouvi. Nandarire nao, Jehova we ve suvera nu u rikendera ku wo. (1 Joh. 4:19) Jehova ke ri tjimuna ovanene mba tamunwa kombanda mba, eye ma yenene okuisapo omauzeu wovanatje ve. Eye wa twapo oruveze ndu ma isapo omauzeu wovandu aehe. (Mat. 24:36) Orusuvero rwa Jehova maru yenene okutuvatera kutja eṱe wina tu kare nomuretima, nandarire kutja mape kambura orure ngunda ozongaro kombanda yehi a ze hi ya runduruka.

17. Omena raye otjihorera tja Jesus tji tji ri mu 1 Petrus 2:21-24 tji tji tu pa omasa okupanḓera po?

¹⁷ Jehova otjihorera otjiwa tjomuretima. Jesus wa horera komuretima wa Ihe. Indu tja ri kombanda yehi eye wa hungirwa omambo omavi, wa yambururwa nu korusenina wa kaṱa onḓiro ombi komuti wondatumisire mena retu. (Lesa 1 Petrus 2:21-24, EEP.) Otjihorera tja Jehova tjomuretima tja tjita kutja Jesus ma panḓere po. Otjo wina matji yenene okutupa omasa.

18. Omomuano uṋe 2 Petrus 3:9 mu ri tu vatera okuzuva nawa imbi mbi yenenisiwa mena romuretima wa Jehova?

¹⁸ Lesa 2 Petrus 3:9. Jehova u tjiwa oruveze orusemba okuyandeka ouye ourunde mbwi. Mena rokutja u nomuretima, ovandu ovengi ve yenena okurihonga ohunga na ye nu otjimbumba otjinene tjovandu nai tji rikotamena ku ye. Nu owo ve tjaterwa kutja Jehova wa yenena okukara nomuretima oure woruveze orure kokutja ve yenene okukwatwa, okurihonga ohunga na ye nokuriyandja ku ye. Indu tji pe novandu ovengi mba raisa omuretima nga komaandero, iho matji raisa nawa kutja Jehova wa tjita ondando ombwa indu tja toorora okukara nomuretima.

19. Matu sokurimanena okutjita ye, nu ondjambi iṋe ndji matu kapewa?

¹⁹ Tu rihongera ku Jehova okupanḓera po nondjoroka. Nandarire kehi yomuhihamwatima nomauzeu nga etwa i Satan, Jehova ngamba oMukuru “omuwa omumanisa.” (1 Tim. 1:11) Eṱe wina matu yenene okukara nondjoroka ngunda amatu undju nomuretima kutja Jehova ma yapure ena re, ma tongamise ouvara we womananeno nokuisapo ourunde auhe nomauzeu ngu tu muna nai. Ngatu rimanene okukara nomuretima nokuyanḓipara mena rokutja matu tjiwa kutja Tate wetu womeyuru wina u nomuretima. Indu tji twa tjiti nao, matu yenene okukamuna omayenenisiro womambo nga: “Omuṋingandu omundu ngu zara omarorero, orondu tja toṋa momarorero nga, eye otja ondjambi ye ma pewa omuinyo Ndjambi mbwa kwizikira imba mbe Mu suvera.”—Jak. 1:12.