Jehova u vanga kutja ovandu vevari mbu mave kupasana ve kare nondjoroka nu ve kare noupanga mbu mau karerere. (Mat. 19:4-6) Indu tji mo vanga okukupa poo okukupwa, hapo mo yenene vi okuhakaena nomundu ngu ri ye? Mena rokutja, Jehova Omuute wetu eye u tjiwa kutja ovikwaye mbi matu sokutjita kutja tu kare norukupo oruṋingandu. Kunao, indu tji wa kongorere omirari Jehova mbye tu pa ove mo rire omuṋingandu tjiri. Tara komirari tjiva mbyo.

Rutenga, eṱe matu sokutjiwa kutja, ‘Kape notjiṋa tjarwe otjiwovise otja omutima womundu.’ (Jer. 17:9) Ovandu vevari mbu mave tarerasana ve hakahana okuuta okunanukirasana, nu iho tji tjita kutja irire ouzeu ku wo okutjita ozondando ozosemba. Indu ovandu vevari tji va tye okukupasana mena rozonḓuma, otjiṋa ho kombunda mape ya atji yeta omauzeu morukupo rwawo. (Omiano 28:26) Mena ranao, kanawa kovandu vevari mba utu okutarerasana okuraisasana orusuvero oruingi okukapita oruveze, poo okutjita omakwizikiro ngunda ave hi ya tjiwasana nawa.

Omiano 22:3 ri tja: “Omunazondunge u muna oumba tji mau ya na ṱara; nu ingwi ngu hi nondjiviro u hita mu wo na kamunina po otjipo.” Oumba uṋe mbu mape ya au yetwa i yokuungurisa otungovi okuhakaena ku nomundu okukupasana? Ouhumandu, ovandu tjiva va hakaena ku novandu mbu ve hi nokutjiwa kotungovi nave utu okutarerasana, nu kombunda va kamuna kutja omundu ngwaave tarerasana eeve korere ovizeze. Wina, ovandu mbe hi nouatjiri ve yenena okutwako ondjivisiro ndji he ri yo ohunga na wo oveni kotungovi kutja ve yenene okuwovisa ovandu nokuvaka ovimariva vyawo. Nu povikando tjiva, ovandu mbaave tjiti oviṋa mbyo aave ri tja Ovahongonone va Jehova.

Ripurira koumba warwe mbu mape ya au tjitwa. Otungovi tjiva ovandu ku ve hakaenena tu ungurisa ovivarero, okutara kutja ovandu veṋe mba pu okukupasana. Posi yokutja, kape notjiraisiro tjokutja omihingo mbyo tjiri vi ungura. Tjiri kaunongo okukambura moprograma yokombiuta ndja ungurwa i yovandu okutjita ondando onanḓengu yokupaha omundu omusemba okukupasana. Kunao, matu sokukambura momirari vyOmbeibela moruveze rwokukambura mozoprograma zokombiuta.—Omiano 1:7; 3:5-7.

Omurari mbu ri mOmiano 14:15 u tja: “Eyova ri kambura membo ngamwa arihe; nungwari omunazondunge u tjevera omikambo vye.” Ngunda au hi ya toorora kutja omundu ma rire omusemba  okukupasana, ove mo sokutjiwa omundu ngwo nawa. Posi yokutja okuhakaena morungovi tji tjita kutja irire ouzeu okutjiwa omundu ngwo nawa. Nandarire kutja ove u yenena okumuna ondjivisiro yomundu ngwo nokuhungira oruveze oruingi morungovi kuna ye, hapo ove mo yenene okutja omundu ngwo mo mu tjiwa nawa? Tjiva mbaave munu kutja va munu omundu ngu va suvera tjiri, owo kaave undjire ko okumuna oviṋa mbyaavi he ve tjatere ohunga nomundu ngwo indu tji va hakaena omurungu nomurungu.

Omutjange wepsalme wa tja: “Hi nehore novanavineya; nu kovanatjurutjutju hi ṱunu ko.” (Eps. 26:4) Ovandu ovengi ve muna kutja okukora ovizeze korungovi ohunga nondjivisiro yawo katjiṋa otjivi, owo ve tjita nao kutja ve yenene okunana ombango yovengi. Owo mape ya ave horeke ongaro yawo yomeritjindiro ombi poo eṱe atu ha yenene okuimuna, indu tji mave hindi ozombuze morungovi. Ma rire nawa okuripurira komapuriro otja inga: Nandarire kutja ovandu tjiva mave ri tja Ovahongonone va Jehova, hapo owo tjiri Ovakriste mba papitisiwa? Hapo owo ve noupanga ouwa kuna Jehova? Nu hapo ve raisa otjihorera otjiwa mombongo yawo? Poo ve novikaro ovivi mbi “zunḓa omihingo omiwa” vya varwe? (1 Kor. 15:33; 2 Tim. 2:20, 21) Nu otja komirari vyOmbeibela, hapo owo ve nouyara wokukupa poo wokukupwa? Ove mo hepa okutjiwa omaziriro komapuriro ngo, posi yokutja ma rire ouzeu indu tji u hi nokutjiwa Ovahongonone va Jehova varwe mbu mave tjiwa omundu ngwo nawa okupura ko. (Omiano 15:22) Omukarere wa Jehova omuṱakame kamaa vanga okukupa poo okukupwa i yomundu ngu “ha kambura mu Kristus!”—2 Kor. 6:14; 1 Kor. 7:39.

Mena rokutja ku yeta oumba okuungurisa otungovi okuhakaena ku nomundu okukupasana, pe nomiano vyarwe omisemba vyokuhakaena ku nomundu ngu mape ya a mu kupasana. Hapo opotuveze tuṋe pu mo yenene okuhakaena ku nomundu omusemba okukupasana? Indu tji twa utu okuyandjerwa okuworongana pamwe rukwao, Ovahongonone va Jehova ve kara novitjitwa mbi tjita kutja ve tjiwasane na varwe, tjimuna pozombongarero zombongo, pomaworonganeno worukondwa na ingo wotukondwa na wina povitjitwa vyarwe.

Indu tji tu hi na okuyandjerwa okuworongana pamwe tjimuna moruveze rwomutjise mbwi o-COVID-19, eṱe tu ungurisa otungovi okukara nozombongarero zetu zombongo, pu tu yenena okuhakaena ku nOvahongonone varwe ovakombe. Ove mo yenene okuvetjiwa indu tji mave yandja omahungi nomaziriro pozombongarero zombongo. (1 Tim. 6:11, 12) Eṋe wina mamu yenene okutjiwasana momatuwo yarwe nge tjitwa ko-Zoom kombunda yombongarero yombongo. Okupitira movitjitwa otja imbyo, ove mo yenene okutjiwa kutja omundu ove mu u nonḓero u tjinda vi varwe nokutja omundu wongaro iṋe. (1 Petr. 3:4) Nu otja tji mo utu okumutjiwa nawa, ove mo yenene okumuna kutja mu nozondando zemwe poo indee nokutja oweṋe ovandu mbu mape ya a mu kupasana.

Indu ovandu ovakombe tji mave ungurisa omirari mbi ri mOmbeibela okupaha omundu okukupasana, owo mave yenene okukara norukupo oruṋingandu. Otja embo rOmiano pu ri tja: “Tji wa munu omukazendu [poo omurumendu] ngu mo kupu, wa munu ouṋingandu; ihi matji raisa kutja Muhona u nonyuṋe move.”—Omiano 18:22.