1. Jehova wa tjita vi indu Adam na Eva tji va za nokukatuka? (Genesis 3:15)

 TJIMANGA Adam na Eva tji va za nokukatuka, Jehova wa tjita kutja ozondekurona zawo ze kare nomaundjiro okupitira momaprofetero omananḓengu. Omaprofetero ngo ye ri mu Genesis 3:15.—Lesa.

2. Ongwaye omaprofetero ngo tji ye ri omananḓengu?

² Omaprofetero ngo ye ri membo etenga rOmbeibela. Nungwari, omambo ayehe mOmbeibela ye ṱuna komaprofetero ngo momuano umwe poo omukwao. Tjimuna otjikotji tjembo tji tji ṱizira ozombapira membo kumwe, omambo nge ri mu Genesis 3:15 ya tjita kutja omambo ayehe yOmbeibela ye kare nombuze imwe, yokutja Mukuru ma hindi Omuyame ngu ma kayandeka Omudiaboli na imba ovarunde avehe mbe mu kongorera. * Tjiri indjo mai rire ondjoroka ku imba avehe mba suvera Jehova.

3. Matu kahungirira ku ye morupa ndwi?

³ Morupa ndwi, matu kazira omapuriro ngu maye kongorere mba ohunga nomaprofetero nge ri mu Genesis 3:15. Oouṋe mba tamunwa momaprofetero ngo? Omaprofetero ngo ya yenenisiwa vi? Nu omomuano uṋe mu tu muna ouwa momaprofetero ngo?

4. ‘Onyoka’ ouṋe, neṱe matu tjiwa vi?

⁴ Genesis 3:14, 15 ri tamuna ‘onyoka norukwato’ rwonyoka, ‘nomukazendu norukwato’ rwomukazendu. Ombeibela mai tu vatere okutjiwa kutja oouṋe mba tamunwa momaprofetero  ngo. * Ngatu tare kutja ‘onyoka’ ouṋe. Onyoka oini katja i tjiwa imbi Jehova mbya hungira motjikunino tja Eden. Ku nao, ombanguriro ya Jehova mai sokuhungama otjiutwa otjinazondunge. Nu hapo Jehova aa hungire ku uṋe? Omavandururiro 12:9 ri raisa kutja onyoka ouṋe. Oro ri tja “onyoka onguru” oSatan Omudiaboli. Nu hapo oouṋe mbe ri orukwato rwonyoka?

5. Oouṋe mbe ri orukwato rwonyoka?

⁵ Indu Ombeibela tji mai hungire ohunga norukwato rwa Satan, mai hungirire ku imba mbe ripura nokuritjinda tjimuna ihe yawo Satan. Ku nao, orukwato rwonyoka ru kamburira mo ovaengeli ovarunde novandu mbe pirukira Jehova novakarere ve. Iho matji kamburire mo ovaengeli mba isa omaturiro wawo womeyuru moruveze rwa Noa, novandu ovarunde mbe ritjinda tjimuna ihe yawo Satan.—Gen. 6:1, 2; Joh. 8:44; 1 Joh. 5:19; Judas 6.

6. Ongwaye ‘omukazendu’ tje hi nokuyenena okurira Eva?

⁶ Nambano ngatu katare kutja ‘omukazendu’ ngwi ouṋe. Eye kamaa rire Eva. Omena raye? Ngatu tare kepu rimwe ndi. Omaprofetero ye tja orukwato rwomukazendu maru “nyainya” otjiuru tjonyoka. Otja tji twa hungire rukuru, onyoka mai kuramene po omuengeli omurunde Satan, nu kape norukwato rwa Eva ndwa tja ru yenena okumunyona. Ku nao, Satan ma nyonwa vi?

7. Otja kOmavandururiro 12:1, 2, 5, 10, omukazendu ngwa tamunwa mu Genesis 3:15 ouṋe?

⁷ Embo esenina rOmbeibela ri tu raera kutja omukazendu ngwa tamunwa mu Genesis 3:15 ouṋe. (Lesa Omavandururiro 12:1, 2, 5, 10.) Ingo kamaa rire omukazendu ngu ri kombanda yehi. Eye u nomueze kehi yozombaze ze, nekori rouhona rozonyose 12 kotjiuru tje. Eye wa  panduka omuatje omuhimise, ngu ri Ouhona wa Mukuru. Ouhona mbwo u ri meyuru, ku nao omukazendu ngo wina ma sokukara meyuru. Eye u kuramena po orupa rwotjira tja Jehova meyuru tji tja zikamena kovaengeli ve ovaṱakame.—Gal. 4:26.

8. Ouṋe ngu ri omutenga nomunanḓengu morukwato rwomukazendu, nu oruṋe tja rira omunanḓengu? (Genesis 22:15-18)

⁸ Embo ra Mukuru wina ri tu vatera okutjiwa kutja ingwi ngu ri omutenga morukwato rwomukazendu ouṋe. Orukwato ndwi aaru sokurira ondekurona ya Abraham. (Lesa Genesis 22:15-18.) Otja omaprofetero pu ya hunganeka, Jesus ongwa rira ondekurona yomurumendu omuṱakame ngo. (Luk. 3:23, 34) Posi yokutja, ondekurona ndji aai sokurira onamasa pomundu wonyama mena rokutja mai sokuyandeka Satan Omudiaboli. Ku nao, indu Jesus tja ri nozombura ape 30, eye wa twirisiwa nombepo ondjapuke otjOmuna wa Mukuru omukwatwaerike. Indu tja twirisiwa, Jesus otja rira orupa orunanḓengu morukwato rwomukazendu. (Gal. 3:16) Kombunda yonḓiro nombendukiro ye, Mukuru “we mu hareka nondatero nondjozikiro” nu we mu pa “ouvara auhe meyuru na kombanda yehi,” nu wina we mu pa ouyara “okuyekuyandeka imbi oviungura vyaSatan.”—Hebr. 2:7; Mat. 28:18; 1 Joh. 3:8.

9-10. (a) Oouṋe varwe mbe ri orupa rworukwato rwomukazendu, nu oruṋe tji ve rira orupa rworukwato ndwi? (b) Matu katara ku ye nai?

⁹ Nungwari pendje na Jesus wina pe na varwe mbe ri orupa rworukwato ndwo. Omuapostele Paulus wa tjiukisa orupa rworukwato ndwo, indu tja raera Ovakriste ovatwirisiwa mba ri Ovajuda na imba mbe ha ri Ovajuda omambo nga: “Tji mu ri ovaKristus, indino oweṋe ozondekurona zaAbraham, nu mamu pewa imbi Ndjambi mbya kwizika.” (Gal. 3:28, 29) Indu Jehova tja twirisa Omukriste nombepo ondjapuke, omundu ngo u rira orupa rworukwato rwomukazendu. Ku nao, orukwato ndwo ru kamburira mo Jesus Kristus novandu 144 000 mbu mave kahonapara pu na ye. (Omavan. 14:1) Avehe mba ve kondja okuripura nokuritjinda otja Ihe yawo Jehova Mukuru.

¹⁰ Nambano twa tjiwa kutja oouṋe mba tamunwa mu Genesis 3:15. Nai matu kerihonga imbi Jehova mbya tjita okuyenenisa omaprofetero nga nokutja ye tu vatera vi ndino.

11. Omaprofetero aaye hee tjike indu tji ya tja orukwato rwomukazendu maru vetwa “motjipanḓe”?

¹¹ Otja komaprofetero nge ri mu Genesis 3:15, onyoka aai sokuveta orukwato rwomukazendu “motjipanḓe.” Iho tja yenenisiwa indu Satan tja ungurisa Ovajuda nOvaroma okuzepa Omuna wa Mukuru. (Luk. 23:13, 20-24) Indu omundu tja hihamwa otjipanḓe, irira ouzeu ku ye okukayenda oure woruveze kaaṋi. Momuano otjingewo, Jesus kaari nomuinyo nu kaa yenene okutjita otjiṋa mena rokutja wa ri meyendo oure womayuva yetatu.—Mat. 16:21.

12. Omomuano uṋe, nu oruṋe onyoka mu mai kanyanyaurwa otjiuru?

¹² Omaprofetero nge ri mu Genesis 3:15 ye raisa kutja Jesus kamaa karerere meyendo. Omena raye? Mena rokutja otja komaprofetero ngo, ondekurona ndjo mai sokunyanyaura otjiuru tjonyoka. Ku nao Jesus aa sokupendurwa meyendo. Nu tjiri eye wa pendurwa. Kombunda yomayuva yetatu, Jesus wa pendurwa otjotjiutwa tjombepo okukahupa meyuru neye wa pewa omuinyo mbu ha koka. Jesus ma kayandeka Satan moruveze Mukuru nda twa po. (Hebr. 2:14) Imba mbu mave kahonapara pu na Kristus mave kayandeka  ovanavita avehe va Mukuru, owo mbe ri orukwato rwonyoka.—Omavan. 17:14; 20:4, 10. *

13. Eṱe tu muna vi ouwa momayenenisiro womaprofetero nga?

¹³ Ndoovazu oove omukarere wa Mukuru, ove u muna ouwa momayenenisiro womaprofetero nga. Jesus we ya kombanda yehi na kwatwa otjomundu. Eye aa horere kovikaṋena vya Ihe. (Joh. 14:9) Ku nao, mokurihonga ohunga na Jesus eṱe twa tjiwa nokusuvera Jehova Mukuru. Eṱe wina tu muna ouwa momahongero wa Jesus nomuano me hongorera po ozombongo zOvakriste ndino. Eye we tu honga okuhupa momuano mbu mau tu vatere okuyorokisa omutima wa Jehova. Nu mena rokutja Jesus wa vetwa motjipanḓe poo wa ṱa, eṱe atuhe tu muna mo ouwa. Omomuano uṋe? Jesus tja pendurwa kombunda yonḓiro ye, Jehova wa yakura ombunguhiro yOmuna we ndje “tu kohorora komauvi aehe.”—1 Joh. 1:7.

14. Matu tjiwa vi kutja omaprofetero Jehova nga yandja motjikunino tja Eden kaye yenenisirwe oruveze ndwo? Kahurura.

¹⁴ Omambo Jehova nga hungira motjikunino tja Eden ye raisa kutja mape kapita oruveze, omaprofetero ngo amaaye yenenisiwa. Aape hepa oruveze omukazendu okukara nondekurona ndja kwizikwa, nOmudiaboli okukara novakongorere ve. Nu wina aape hepa oruveze ovimbumba vivari mbi okurira ovinavita (poo, okutondasana). Eṱe matu munu ouwa okutjiwa omaprofetero nga mena rokutja maye tu rakiza kutja ouye mbu honaparerwa po i Satan mau tondo ovakarere va Jehova. Jesus kombunda wa yandja erakiza otjingero kovahongewa ve. (Mar. 13:13; Joh. 17:14) Eṱe tjiri twa muna omayenenisiro tjiva womaprofetero ngo nu tjinene mozombura 100 nḓa kapita. Omomuano uṋe?

15. Ongwaye ouye tji wa tonda orukwato rwomukazendu tjinene nao, posi yokutja ongwaye tji tu ha sokutira Satan?

¹⁵ Oruveze orusupi kombunda ya indu Jesus tja zikwa Otjombara meyuru mombura ndji 1914, Satan wa rambwa meyuru. Eye nai u ri kombanda yehi, nu u undja eyuva ndi ma yandekwa. (Omavan. 12:9, 12) Nungwari okuza koruveze ndwo, eye u ungura nomasa. Satan u nomazenge omanene nu u rwisa ovakarere va Mukuru. (Omavan. 12:13, 17) Mena repu ndo, ouye wa Satan we tu tonda tjinene. Nungwari, eṱe katu sokutira Satan novemukongorere. Posi yokutja, eṱe matu yenene okukara nongamburiro otjingeyo ndji omuapostele Paulus ndja ri na yo indu tja tja: “Ndjambi tje ri komunda wetu, owaṋi ngu me tu pirukire?” (Rom. 8:31) Eṱe matu yenene okukara nongamburiro okuura mu Jehova mena rokutja otja tji twa munu, omaprofetero tjiva nge ri mu Genesis 3:15 ya yenenisiwa rukuru.

16-18. Curtis, Ursula na Jessica va muna vi ouwa mokuzuva nawa Genesis 3:15?

¹⁶ Omakwizikiro wa Jehova nge ri mu Genesis 3:15 maye yenene okutuvatera okutjinda omauzeu ngu matu munu mehupo. Curtis ngu karera otjomuhindwa moGuam wa tja: “Povikando tjiva, oviṋa mbya tjitwa ku ami mehupo vya tjita kutja irire ouzeu okurira omuṱakame ku Jehova. Posi yokutja, okuripurira ko oukoto komaprofetero nge ri mu Genesis 3:15 kwe ndji vatera kutja mbi kare nongamburiro mu Tate womeyuru.” Curtis u undja nonḓero eyuva Jehova ndi ma yandisa omauzeu wetu.

¹⁷ Omukazendu omukambure moBavaria  wena Ursula wa tja, okuzuva nawa Genesis 3:15 kwe mu vatera okukara nongamburiro kutja Ombeibela Embo ra Mukuru. Eye wa muna omuano omaprofetero ayehe warwe mu ye hitasana nomaprofetero nga, nu otjiṋa ho tje mu ṱuna tjinene. Eye wina wa tja: “Indu tji mbe rihonga kutja Jehova wa toora omukambo tjimanga kokutja me tu pe omaundjiro, iho tja tjita kutja mbi mu suvere tjinene.”

¹⁸ Jessica ngwa za koMicronesia wa tja: “Ami ngamba mbi zemburuka omuano mee fula indu otjikando otjitenga tji mba muna kutja ami mba munu ouatjiri. Omaprofetero nge ri mu Genesis 3:15 aaye yenenisiwa. Iho aatji ndji zemburukisa kutja kaari ondando ya Jehova ku eṱe okumuna omuzeu. Omaprofetero nga wina ye pamisa ongamburiro yandje kutja okukarera Jehova maku ndji pe ehupo ewa nai nu nandarire moruyaveze.”

19. Ongwaye tji matu sokukara nongamburiro kutja orupa orusenina rwomaprofetero ngo maru yenenisiwa?

¹⁹ Otja tji twa munu, Genesis 3:15 nai ri yenenisiwa. Orukwato rwomukazendu norukwato rwonyoka vya tjiukwa. Otjipanḓe tja Jesus, ngu ri orupa orutenga rworukwato rwomukazendu, tja veruka nu eye nai Ombara onamasa ndji hi na maai koka. Jehova wa toorora imba mbu mave kahonapara pu nOmuna we meyuru, nu otjivaro ho nai tji ri pokuyenenisiwa. Mena rokutja orupa tjiva rwomaprofetero ngo rwa yenenisiwa, eṱe tu nongamburiro kutja orupa ndwa sewa ko maru yenenisiwa indu onyoka tji mai nyanyaurwa otjiuru. Ovakarere va Mukuru mave kara nondjoroka indu Satan tji ma kayandekwa. Ngunda oruveze ndo aru hi ye ya, amu rihahiza. Mukuru wetu omuṱakame. Okupitira morukwato rwomukazendu, eye ma eta ozondaya ozengi ‘komihoko avihe, mbi ri kombanda yehi.’—Gen. 22:18.