1. Eṱe tu nongamburiro mu ye, nu omena raye?

 HAPO ouzeu kove okukambura kutja oviṋa mape ya avi ya kouwa indu tji mo munu omauzeu ayehe mouye ndino? Ouṋepo weṱunḓu kau norusuvero rukwao otja tji pari rukuru. Ovandu ve ririra ko ovanautwe nu ve ripurira ku wo oveni. Ovandu ovengi va pandjara ongamburiro mu imba mbe ri mounane. Posi yokutja, ozongaro nḓa maze yenene okukupa ongamburiro yokutja oviṋa mavi ya kouwa. Omena raye? Mena rokutja ovandu ve ritjinda otja tji pa hunganekwa momaprofetero ohunga ‘nomayuva omasenina.’ (2 Tim. 3:1-5) Omundu auhe ngu nouatjiri ma yenene okuitavera kutja omaprofetero nga ye yenenisiwa, nu omayenenisiro wayo ye raisa kutja Jesus Kristus wa rira Ombara yOuhona wa Mukuru. Posi yokutja, inga omaprofetero yemwe uriri momaprofetero omengi ohunga nOuhona wa Mukuru. Indu tji twa konḓonona omaprofetero warwe wOmbeibela nga yenenisiwa mozombura nḓa, maku yanḓiparisa ongamburiro yetu.

2. Morupa ndwi matu kahungirira ku ye, nu omena raye? (Tara kotjiperendero tjokombanda yokambo nga.)

² Morupa ndwi, matu katara koviṋa mbi, (1) omaprofetero ngu maye tu vatere okutjiwa kutja Ouhona wa Mukuru wa uta ruṋe okuhonapara, (2) omaprofetero ngu maye tu vatere okutjiwa kutja Jesus wa rira Ombara yOuhona wa Mukuru meyuru, (3) nomaprofetero ngu maye raisa kutja ovanavita vOuhona wa Mukuru mave yandekwa vi. Matu kamuna kutja omaprofetero nga ye hitasana, nu ye tu pa otjiperendero otjikahu kutja omaandero  maye ya moruyaveze rwatjimanga tjimuna Jehova pa kwizika.

3. Omaprofetero nge ri mu Daniel 7:13, 14 ye tu pa ongamburiro ya tjike ohunga nOmbara yOuhona wa Mukuru?

³ Omaprofetero nge ri mu Daniel 7:13, 14 ye tu pa ongamburiro kutja Jesus Kristus ma rire Omuhonapare omusemba wOuhona wa Mukuru. Ovandu okuza moviwaṋa avihe mave “rikotamene ku ye” nu kape nomuhonapare warwe ngu me mu pingene. Omaprofetero warwe nge ri membo ra Daniel ya hunganeka kutja Jesus ma utu okuhonapara mOuhona mbwo komaandero woruveze ndu isanewa ozombura hambombari. Hapo matu yenene okutjiwa kutja oruṋe Jesus tja rira Ombara?

4. Kahurura kutja omomuano uṋe Daniel 4:10-17 mu ri tu vatera okutjiwa kutja ombura iṋe Kristus ma rira Ombara. (Wina tara komambo wokehi.)

⁴ Lesa Daniel 4:10-17. ‘Ozombura hambombari’ ze kuramena po oure wozombura 2 520. Ozombura nḓo za uta mombura ndji 607 K.O.Z. indu Ovababilon tji va isa po ombara osenina ndja zikwa i Jehova okuhonapara moJerusalem. Nu ozombura nḓo za yanda mombura ndji 1914 O.Z., indu Jehova tja zika Jesus ngu ri ‘ingwi ngwa toororwa’ okurira Ombara yOuhona wa Mukuru. *—Esek. 21:25-27.

5. Omomuano uṋe mu matu yenene okumuna mo ouwa okuza momaprofetero “wozombura hambombari”?

⁵ Ouwa waye mbu matu munu okuza komaprofetero nga? Indu tji twa zuu nawa omaprofetero ohunga ‘nozombura hambombari,’ ye tu pa ongamburiro kutja Jehova ma yenenisa omakwizikiro nga tjita moruveze ndu ri ro. Tjimuna Jehova tja tya kutja oruṋe tji ma ziki Jesus okurira Ombara yOuhona we, Eye wina ma tjiti kutja omaprofetero warwe ayehe ye yenenisiwe otja koruveze nda twa po. Otjingaperi kutja eyuva ra Jehova kari ‘nokuwomba.’—Hab. 2:3.

6. (a) Ovikwaye mbi tu muna kombanda yehi mbi raisa kutja Kristus u honapara meyuru? (b) Omaprofetero nge ri mOmavandururiro 6:2-8 ye raisa vi kutja oviṋa mbyo mavi tjitwa?

⁶ Ku ṱa komaandero wotjiungura tje tjokuzuvarisa kombanda yehi, Jesus wa hunganeka ovitjitwa tjiva mbi mavi tjitwa mouye, okuvatera ovemukongorere okutjiwa kutja oruṋe tji ma utu okuhonapara meyuru. Oviṋa tjiva mbya tamuna vya ri ovita, ondjara nomanyinganyingiro wehi. Eye wina wa hunganeka ovitjitwa tjimuna omitjise “koṋa akuhe,” nu omutjise wokorona otjihorera tjimwe. Ombeibela i tja ovitjitwa mbyo ‘oviraisiro’ vyomeero wa Kristus. (Mat. 24:3, 7; Luk. 21:7, 10, 11) Ozombura zokombanda 60 kombunda yonḓiro ya Jesus na indu tja yaruka keyuru, Jesus wa raisira omuapostele Johanes kutja oviṋa mbyo mavi tjitwa tjiri. (Lesa Omavandururiro 6:2-8.) Ovitjitwa avihe mbi, vya uta okuyenenisiwa okuza koruveze indu Jesus tja rira Ombara mombura ndji 1914.

7. Ongwaye tji ku tjitwa oviṋa ovingi ovivi kombanda yehi okuza koruveze Jesus tja rira Ombara?

⁷ Ongwaye oviṋa mouye tji vya ririra ko ovivi indu Jesus tja rira Ombara? Omavandururiro 6:2 ri yandja epu enanḓengu. Otjiṋa otjitenga Jesus tjaa sokutjita indu tja rira Ombara yOuhona wa Mukuru, aa sokurwa ovita. Ku na uṋe? Ku nOmudiaboli nozondemone ze. Otja kOmavandururiro 12, Satan wa pandjara otjirwa ho, nu eye nozondemone ze va yumbwa  kombanda yehi. Otjiṋa ho tja pindikisa Satan tjinene, nu u ungurisa omazenge we okurwisa ovandu kombanda yehi. Ku nao Ombeibela opu i zokutja “owee ku eṋe, mahi.”—Omavan. 12:7-12.

8. Okumuna omaprofetero ohunga nOuhona tji maye yenenisiwa maku tu vatere vi?

⁸ Ouwa waye mbu matu munu okuza komaprofetero nga? Oukahu kutja ongaro yovandu novitjitwa mouye vi tu vatera okumuna kutja Jesus wa rira Ombara. Ku nao, iho katji tu pindikisa indu tji matu munu ovandu amave ripurire ku wo oveni nokuraisa ongaro youtwe, mena rokutja ovitjitwa vyawo vi tu zemburukisa omayenenisiro womaprofetero nge ri mOmbeibela. Tjiri Ouhona wa zikwa. (Eps. 37:1) Nu eṱe matu yenene okuundjira ko kutja oviṋa mouye mavi ririre ko ovivi otja Armagedon tji mai tumbuka popezu. (Mar. 13:8; 2 Tim. 3:13) Eṱe tjiri tu nondangi tjinene ku Tate wetu womeyuru kutja u tu vatera okuzuva nawa kutja ongwaye tji ku nomauzeu omengi mouye.

9. Omaprofetero nge ri mu Daniel 2:28, 31-35, ye kahurura vi ouhona ounamasa ousenina, nu owo wa uta ruṋe okuhonapara?

⁹ Lesa Daniel 2:28, 31-35. Eṱe tu muna omayenenisiro womaprofetero nga ndino. Oruroto rwa Nebukadnesar aaru raisa imbi mbi mavi katjitwa “moruveze ndu maru ya,” kombunda ya indu Kristus tji ma utu okuhonapara. Ovanavita va Jesus vokombanda yehi ve kamburira mo ouhona ousenina ounamasa wouye mbwa hunganekwa mOmbeibela, owo mbu kuramenwa po i ‘yozombaze zotjitenda nozomunoko.’ Ouhona ounamasa mbwo wa uta rukuru okuhonapara. Owo wa uta okuhonapara mOvita vyOuye Ovitenga  indu oBritain na America tji ya uta okuungura kumwe. Otjirimunikise Nebukadnesar tja muna moruroto rwe wina tja hunganeka oviṋa vivari ohunga nouhona ounamasa mbwo, mbi tjita kutja u panguke komauhona nga ri ko.

10. (a) Ovikeṋa ndino mbi tu muna mouhonapare ounamasa mbwi oAmerica na Britain, mbya hunganekwa momaprofetero wa Daniel? (b) Matu sokuritjevera ku ye? (Tara kokawongo nga “ Ritjevera komunoko mbu ri kozombaze zotjiserekarera.”)

¹⁰ Otjitenga, ouhonapare ounamasa wouye wa America na Britain kau ri tjimuna omauhonapare nga ri po, owo kau kuramenwa po i yongoldo nosilveri. Nungwari u kuramenwa po i yotjitenda nomunoko. Omunoko u kuramena po ovandu. (Dan. 2:43) Ndino ongaro yovandu tji mave toorora ovanane, ovimbumba mbi rwira ousemba wovandu, omaraisiro wonyengo novira vyovaungure vi tjita kutja ovanane vouhona ounamasa wouye mbwi ave ha yenenisa ozondando otja konḓero yawo.

11. Ouhonapare wouye ounamasa mbwi oAmerica noBritain mau kurisa vi ongamburiro yetu yokutja tu hupa komaandero wouye mbwi?

¹¹ Otjitjavari, ounane wa America na Britain mbu kuramenwa po i yozombaze motjirimunikise otjinene, owo ombu ri ouhona ousenina wouye mbwa hunganekwa mOmbeibela. Owo kau nokupingenwa i youhonapare warwe wovandu. Nungwari owo mau nyonwa i yOuhona wa Mukuru movita vya Armagedon pu nozohoromende azehe zovandu. *—Omavan. 16:13, 14, 16; 19:19, 20.

12. Omaprofetero wa Daniel ye raisa ye nu omomuano uṋe mu ye tu pa omahuhumiṋino nomaundjiro?

¹² Ouwa waye mbu matu munu okuza komaprofetero nga? Omaprofetero wa Daniel ye yandja oviraisiro vyarwe mbi raisa kutja tu hupa komaandero wouye. Ozombura zokombanda 2 500 nḓa kapita, Daniel wa hunganeka kutja kombunda youhonapare wa Babilon maku ya omauhonapare warwe wouye yane, ngu maye honaparere po ovakarere va Mukuru. Wina eye wa vandurura kutja oAmerica na Britain ombu mau rire ouhona ousenina. Ihi matji tu yanḓiparisa nokutupa omaundjiro wokutja moruyaveze rwopopezu Ouhona wa Mukuru mau nyono ozohoromende azehe zovandu nau honaparere po ehi arihe.—Dan. 2:44.

13. “Ombara oitjahambondatu” ‘nozombara omurongo’ nḓa tamunwa mOmavandururiro 17:9-12, ze kuramena po ye, nu omaprofetero ngo ya yenenisiwa vi?

¹³ Lesa Omavandururiro 17:9-12. Omaprofetero warwe wOmbeibela ya yenenisiwa ohunga nomayuva omasenina, mena romanyoneno omanene nga etwa i yOvita vyOuye Ovitenga. Ovanane vouye aave vanga okueta ohange mouye. Ku nao, mu Januari 1920 owo va zika otjira hi League of Nations, tji tja pingenwa i yOmihoko omikutasane (United Nations) mu Oktoba 1945. Otjira ho tji isanewa “ombara oitjahambondatu.” Nungwari owo kauhona wouye mbwe ri kuramena ouini. Owo u pewa oruvara i yozohoromende. Ombeibela i sasaneka ozohoromende nḓo otja “ozombara omurongo.”

14-15. (a) Omavandururiro 17:3-5 ri raisa ye ohunga na “Babilon otjinene”? (b) Oruvara rwozongamburiro zoposyo ru ṱunwa vi?

¹⁴ Lesa Omavandururiro 17:3-5. Motjirimunikise okuza ku Mukuru, Johanes wa muna omukazendu omukorondu ngu ri “Babilon otjinene,” tji tji kuramena po ozongamburiro azehe zoposyo mouye. Otjirimunikise hi tja yenenisiwa vi? Oure woruveze orure ozongamburiro zoposyo ze ungura kumwe nu ze pewa oruvara i yozohoromende zouye. Nungwari, moruyaveze rwopopezu Jehova ma tjiti kutja  ovanane vouye ve “tjite avihe otja kombango ye.” Maku kongorere tjike? Ovanane vouye mbe ri “ozombara omurongo,” mave nyono ozongamburiro azehe zoposyo.—Omavan. 17:1, 2, 16, 17.

¹⁵ Matu tjiwa vi kutja omaandero wa Babilon Otjinene ye ri popezu? Okuzira epuriro ndo, matu hepa okuzemburuka otjihuro otjikuru Babilon tji tja kovererwe i yomeva wOnḓonḓu Eufrat. Embo rOmavandururiro ri sasaneka ovayandjaruvara ovengi va Babilon Otjinene ku ‘nomeva.’ (Omavan. 17:15) Nungwari wina ri raisa kutja omeva ngo maye “pwire.” Pu mape hee kutja ozongamburiro zoposyo mouye, maze pandjara ovayandjaruvara ovengi. (Omavan. 16:12) Ndino, omaprofetero ngo ye yenenisiwa mena rokutja ovandu ovengi va isa ozongamburiro zoposyo, nowo ve paha omiano vyarwe okuzengurura omauzeu wawo.

16. Ouwa waye mbu matu munu mokuzuva nawa omaprofetero ohunga nomazikiro wOmihoko omikutasane, na indu Babilon Otjinene tji matji yandekwa?

¹⁶ Ouwa waye mbu matu munu okuza komaprofetero nga? Omazikiro wOmihoko omikutasane nokutja ovandu ovengi kave  nokuuhara amave yandja oruvara kozongamburiro zoposyo, oviraisiro vyokutja tu hupa momayuva omasenina. Nandarire kutja ovandu ovengi mave isa okuyandja oruvara ku Babilon Otjinene, iho katji matji tjiti kutja ozongamburiro zoposyo ze yandekwe. Otja tji pa hungirwa rukuru, Jehova ma tjiti kutja “ozombara omurongo” nḓu maze kuramene po ovanane mbe yandja oruvara kOmihoko omikutasane, ze “tjite avihe otja kombango ye.” Oviwaṋa mbyo mavi nyono Babilon tjimanga nu iho matji temisa ouye. * (Omavan. 18:8-10) Omanyoneno wa Babilon Otjinene maye ṱunu kouye auhe nu mape ya aye eta omauzeu. Posi yokutja ovakarere va Mukuru mave yoroka mena romapu yevari. Ozongamburiro zoposyo, ozonavita na Jehova Mukuru maze nyonwa oparukaze, nu moruyaveze rwopopezu eṱe matu yamwa kouye ourunde mbwi.—Luk. 21:28.

17-18. (a) Matu yenene vi okukayenda komurungu okukurisa ongamburiro yetu? (b) Matu katara ku ye morupa ndu maru kongorere ko?

¹⁷ Daniel wa hunganeka kutja “ondjiviro youatjiri mai handjauka,” [NW]. Nu tjiri otjingaperi. Eṱe twa muna ounongo momaprofetero ohunga noruveze rwetu. (Dan. 12:4, 9, 10) Omuano omaprofetero nga mu ye yenenisiwa moruveze ndu ri ro, ye tu hinga okuyozika Jehova nEmbo re. (Jes. 46:10; 55:11) Ku nao, kayende komurungu okukurisa ongamburiro yoye mokukonḓonona Omatjangwa nawa, nu vatera varwe okukara noupanga ouwa ku na Jehova. Eye ma tjevere avehe mbe riyameka ku ye, nu me ve pe ‘ohange ndja yenene.’—Jes. 26:3.

¹⁸ Morupa ndu maru kongorere ko, matu katara komaprofetero ohunga nombongo yOukriste moruveze rwomaandero. Otja tji matu kerihonga, omaprofetero ngo ye hitasana nawa nomaprofetero ohunga nomayuva omasenina. Wina matu katara koviraisiro mbi mavi raisa kutja Jesus ngu ri Ombara yetu u kayenda komurungu okuungura kumwe novakongorere ve ovaṱakame.