1. Otjikeṋa Jehova tje vanga ndino?

 KUNDINO Mukuru u vanga kutja ombuze ombwa yOuhona i zuvarisiwe mouye auhe. (Mar. 13:10; 1 Tim. 2:3, 4) Ihi otjiungura tja Jehova nu otjo otjinanḓengu tjinene ku ye. Ku nao Eye wa toorora Omuna we omusuverwa kutja me tji hongorere. Mena rokutja Jesus u tu hongorera po, eṱe matu yenene okukara nongamburiro kutja otjiungura tjokuzuvarisa matji yenenisiwa otja kombango ya Jehova, ngunda omaandero aye hi ye ya.—Mat. 24:14.

2. Morupa ndwi matu kahungirira ku ye?

² Morupa ndwi, matu katara kutja Jesus u ungurisa vi “omukarere omuṱakame nomunazondunge” okuyandja omahongero okuza mEmbo ra Mukuru, nokurongerisa ovakarere ve kotjiungura otjinenenene momakuruhungi, tjokuzuvarisa ombuze ombwa. (Mat. 24:45) Wina matu katara kutja auhe kourike we ma yenene okutjita vi kutja ma yandje oruvara ku Jesus na komukarere omuṱakame.

3. Ouvara uṋe Jesus mbwa pewa?

³ Jesus u hongorera po otjiungura tjokuzuvarisa. Eṱe matu tjiwa vi? Ousupi ngunda e hi ya yaruka keyuru, Jesus wa hakaena ku novahongewa ve tjiva ovaṱakame kondundu moGalilea. Eye we ve raera nai: “Ami mba pewa ouvara auhe meyuru na kombanda yehi.” Okuzambo eye wa tja: “Otji mwa sokuyenda koviwaṋa avihe ngamwa akuhe mu kaise po ovandu ovahongewa vandje.” (Mat. 28:18, 19) Ku nao pendje noviṋa  vyarwe mbyaa ungura, Jesus wa pewa ouvara wokuhongorera otjiungura tjokuzuvarisa.

4. Ongwaye tji matu yenene okukara nongamburiro kutja Jesus ngamba u hongorera po otjiungura tjokuzuvarisa?

⁴ Jesus wa tja otjiungura tjokuzuvarisa nokukaisa po ovandu ovahongewa matji yenenisiwa “koviwaṋa avihe,” nu eye ma kara pu novahongewa ve “omayuva aehe nga komaandero wouye.” (Mat. 28:20) Omambo ngo maye raisa oukahu kutja Jesus ma kayenda komurungu okuhongorera po otjiungura tjokuzuvarisa nga ku ndino.

5. Eṱe tu vatera vi okuyenenisa omambo nge ri mEpsalme 110:3?

⁵ Jesus kee rikende kutja kaku nokukara ovaungure mba yenene moruveze rwomaandero wouye mbwi. Eye aa tjiwa kutja omambo womaprofetero womutjange wEpsalme maye yenenisiwa. Owo maye tja: “Otjiwaṋa tjoye tje rirongerera eyuva, ndi mo rwisa ovanavita na ove.” (Eps. 110:3) Indu tji u zuvarisa ombuze ombwa, u yandja oruvara ku Jesus nomukarere omuṱakame nu u vatera okuyenenisa omaprofetero ngo. Oviungura vi kayenda komurungu, posi yokutja pe nomauzeu.

6. Ouzeu uṋe ovazuvarise vOuhona mbu ve muna ndino?

⁶ Ovazuvarise vOuhona ve muna ouzeu wokupirukirwa. Ovandu mba isa okurikotamena ku Jehova, ovanane vozongamburiro novanane vopolotika ve raera ovandu ovengi ovizeze ohunga noviungura vyetu. Indu ovazamumwe na eṱe, ovandu mbu matu tjiwa na imba mbu tu ungura pamwe tji va pukisiwa i yovizeze mbyo, owo mape ya ave tu ṋiṋikiza kutja tu ise okukarera Jehova nokuisa okuzuvarisa. Momahi tjiva, ovanavita na eṱe ve tirisa nokurwisa poo okukambura ovakambure ovakwetu, nu nandarire ave ve twa motjovakamburwa. Eṱe katu kumisiwa i yomuano ovandu mu ve tu tjinda. Jesus wa hunganeka nai: “Ovandu avehe mave mu tondo motjimbe tjandje.” (Mat. 24:9) Epu rokutja ovandu ve tu tonda otjiraisiro tjokutja twa yakurwa i Jehova. (Mat. 5:11, 12) Omudiaboli ongu tjita kutja pe kare omapirukiro ngo. Posi yokutja Jesus u nomasa pu Satan. Nombatero ya Jesus, ombuze ombwa i zuvarisiwa kovandu woviwaṋa avihe. Ngatu tare koviraisiro.

7. Oviraisiro viṋe mbi raisa kutja Omavandururiro 14:6, 7 ri yenenisiwa?

⁷ Ouzeu warwe mbu tu muna indu tji matu zuvarisa, owombwi wokutja ovandu ve hungira omaraka omengi pekepeke. Momavandururiro Jesus nga yandja komuapostele Johanes, eye wa hunganeka kutja momayuva wetu ombuze ombwa mai tuurunga ouzeu mbwo. (Lesa Omavandururiro 14:6, 7.) Omomuano uṋe? Eṱe tu yandja oruveze kovandu ovengi okuyakura ombuze ombwa yOuhona. Ndino ovandu ovengi mouye auhe ve lesa omambo nga zikamena kOmbeibela morungovi rwetu ndwi jw.org, mena rokutja mu nondjivisiro ndji ri momaraka wokombanda 1 000. Orutu Orunane rwa yandjera kutja embo ndi Yorokera ehupo nga aruhe, ri torokwe momaraka wokombanda 700. Oro ondi ri embo ndi tu ungurisa motjiungura tjokukaisa po ovandu ovahongewa. Omahongero wOmbeibela wina ye munikwa mouvidio mbwa rongerisirwa ozomboro na momambo meraka rovapoṱu. Eṱe tu muna omuano omaprofetero wOmbeibela mu ye yenenisiwa. “Ovandu vozonganda” poo ovandu womaraka ayehe ve rihonga ouatjiri wOmbeibela. (Sak. 8:23) Avihe mbi vi yenenisiwa mena rokutja Jesus Kristus ongu ri omuhongore.

8. Otjiungura tjokuzuvarisa tji yenenisa ye ndino?

⁸ Ndino ovandu vokombanda 8 000 000 mbe ri momahi 240 orupa rwotjira tja Jehova, nu ombura aihe ovandu ovengi ve papitisiwa. Posi yokutja, ovahongewa ovape mba ve  rihwikika “omundu omupe” mokukara novikaṋena vyOukriste mbi ri otjiṋa otjinanḓengu potjivarero tjovandu. (Kol. 3:8-10) Ovandu ovengi va isa oruvakiro, outwe nombangu. Omaprofetero nge ri mu Jesaja 2:4 ye yenenisiwa, ngu maye tja: ‘Owo kamaave rirongerere okurwa ovita rukwao.’ Otja tji matu ungura oukukutu okurihwikika omundu omupe, tu vatera ovandu okuya popezu notjira tja Mukruru, nu tu raisa kutja tu kongorera omuhongore wetu Jesus Kristus. (Joh. 13:35; 1 Petr. 2:12) Ongwaye tji pe tjitwa nao? Mena rokutja Jesus u tu pa ombatero ndji matu hepa.

9. Otja ku Mateus 24:45-47, Jesus wa hunganeka tjike ohunga noruveze rwomaandero?

⁹ Lesa Mateus 24:45-47. Jesus wa hunganeka kutja moruveze rwomaandero, eye ma ziki “omukarere omuṱakame nomunazondunge” okuyandja omahongero okuza mEmbo ra Mukuru. Ku nao, eṱe matu undjire ko kutja omukarere ngo ma ungura oukukutu moruveze rwetu. Iho tjiri tji tjitwa. Jesus u ungurisa okambumba kovarumendu ovatwirisiwa, okuyandja “ovikurya moruveze ndwa tuwa po,” kovakarere va Mukuru na imba mbe nonḓero. Ovarumendu mbo kave honaparere po ongamburiro yovakwao. (2 Kor. 1:24) Nungwari, owo ve yakura kutja Jesus Kristus “omunane nomuhongore” wovakarere ve.—Jes. 55:4.

10. Omambo yeṋe nga raisiwa moviperendero nge ku vatera okuuta okukarera Jehova?

¹⁰ Okuza mombura ndji 1919, omukarere omuṱakame wa pitisa omambo pekepeke okuvatera ovandu mbe nonḓero okurihonga ouatjiri okuza mEmbo ra Mukuru. Mombura ndji 1921, omukarere wa pitisa embo ndi The Harp of God okuvatera imba mba ri nonḓero okurihonga Ombeibela. Otja oruveze tji rwa runduruka, pa pitisiwa omambo warwe. Embo riṋe nde ku vatera okutjiwa nokusuvera Tate  wetu womeyuru? Mape ya ra ri embo ndi “Let God Be True,” The Truth That Leads to Eternal Life, Ove Mape Ya O Kara nOmuinyo Nga Aruhe mOparadisa Kombanda yEhi, Ondjiviro Ndji Twara kOmuinyo Waaruhe, Ombeibela tjiri i honga tjike?, Ombeibela mai yenene okutuhonga tjike?, poo embo epe ndi Yorokera ehupo nga aruhe. Omambo ayehe nga ya rongerisiwa okutuvatera okuisa po ovandu ovahongewa nu oyo ya ri oviṋa mbyaatu hepa moruveze oyo mu ya pitisiwa.

11. Ongwaye tje ri ohepero ku eṱe okurihonga ovingi ohunga na Jehova nOmbeibela?

¹¹ Atuhe tu hepa ondjiviro onyingi ohunga na Jehova nOmbeibela, nungwari kawomba aveyerike mba uta okurihonga Ombeibela. Omuapostele Paulus wa tja: “Ovikurya oviṱaṱunwa ovyo ovyovandu ovanene.” Eye wina wa tja okuṱakamisa imbi mbi twe rihongo okuza mOmbeibela maku tu vatere “okupangura pokati kouwa nouvi.” (Hebr. 5:14) Okuṱakamisa omirari vya Jehova moruveze ndwi katjiṋa otjipupu, mena rokutja ovandu ovengi kave kongorere omirari mbyo. Posi yokutja Jesus u tjita kutja tu kare noviṋa mbi matu hepa kutja ongamburiro yetu i kare nomasa. Omahongero ngu tu muna ngo ya zikamena kEmbo ra Mukuru Ombeibela. Jesus u hongorera po omukarere omuṱakame okurongerisa nokuhandjaura omahongero ngo.

12. Omomuano uṋe eṱe mu twa yandja ondjozikiro kena ra Mukuru, tjimuna Jesus?

¹² Eṱe twa yandja ondjozikiro ndja pwira ena ra Mukuru, tjimuna Jesus tjaa tjiti. (Joh. 17:6, 26) Otjotjihorera, mombura ndji 1931 eṱe twa yakura ena nda zikamena kOmbeibela ndi, Ovahongonone va Jehova. Ku nao, eṱe twa raisa kutja ena ra Mukuru enanḓengu ku eṱe, nokutja aatu vanga okutjiukirwa kena ra Tate wetu womeyuru. (Jes. 43:10-12) Nu okuza mu Oktoba ombura ndjo, ena ra Mukuru ra uta  okumunika kombanda yokambo nga. Nu wina Ombeibela ndji o-New World Translation of the Holy Scriptures ya kotora ena ra Mukuru poruveze pu ra sokukara. Tjiri eṱe twa panguka tjinene kozokereka nḓa pitisa ena ra Jehova momatorokero wOzombeibela zawo ozengi.

13. Ongwaye tji u nongamburiro kutja Jesus u ungurisa “omukarere omuṱakame nomunazondunge” ndino? (Joh. 6:68)

¹³ Okupitira ‘momukarere omuṱakame nomunazondunge,’ Jesus wa zika otjira tjapeke kombanda yehi okuhandjaura omerikotameneno wouatjiri. Hapo ove u fula vi notjira ho? Mape ya ove u ripura nomambo womuapostele Petrus, ngwa tja nai ku Jesus: “Matu yaruka ku aṋi? Ove u nomambo womuinyo waaruhe.” (Joh. 6:68) Ripura uriri kutja auhe wetu atja kara pi ndino andakuzu karupa rwotjira tja Jehova. Kristus u ungurisa otjira hi okutupa avihe mbi matu hepa kutja tu rire ovaṱakame ku Mukuru. Eye wina u tu vatera kutja tu kayendise otjiungura tjokuzuvarisa momuano omusemba. Nu eye u tu vatera ‘okurihwikika omundu omupe,’ kokutja tu tjate ku Jehova.—Ef. 4:24.

14. Ouwa waye ove mbu wa muna mokurira orupa rwotjira tja Jehova moruveze rwokorona?

¹⁴ Jesus u tu pa omuhunga omusemba moruveze rwouzeu. Indu omutjise wokorona tji wa handjauka, eṱe twa yenena okumuna ouwa womirari mbyo. Ovandu ovengi mouye kaave tjiwa kutja nga ve tjite vi, posi yokutja Jesus wa yenena okutjita kutja tu mune omuhunga omusemba kutja tu kare mondjeverero. Eṱe twa tunduuzwa okuzara oumaska indu tji tu ri mokati kovandu nokutwa po omikato pokati ketu. Ovanene vombongo va zemburukisiwa okukondja okuhakaena aruhe ku novakambure avehe mombongo, nokutjiwa imbi  mbi mave hepa kutja ve kare mondjeverero, ve kare nouveruke ouwa nokukara noupanga wopopezu ku na Jehova. (Jes. 32:1, 2) Eṱe wina twa muna omuhunga nomatunduuziro okupitira momatjivisiro omape okuza kOrutu Orunane.

15. Omuhunga uṋe mbwa yandjewa ohunga nomakayendisiro wozombongarero zombongo notjiungura tjokuzuvarisa moruveze rwokorona, nu ouwa waye mbwa kongorera ko?

¹⁵ Moruveze rwokorona, eṱe wina twa muna omuhunga ohunga nomuano mu matu sokukayendisa ozombongarero zombongo notjiungura tjokuzuvarisa. Katjisupi, eṱe twa uta okukara nozombongarero zombongo, omaworonganeno worukondwa na inga wotukondwa okupitira morungovi. Nu wina twa uta okuzuvarisa tjinene okupitira motutuu na mongoze. Jehova wa sera ondaya kozongondjero zetu nḓo. Otutavi otuingi twa tjivisa kutja otjivarero tjovazuvarise tja yeruruka. Nu ovengi va yenena okukara nomahungi omayanḓiparise moruveze ndwo.—Tara kokawongo nga “ Jehova u sera ondaya kotjiungura tjetu tjokuzuvarisa.”

16. Eṱe tu nongamburiro mu ye?

¹⁶ Tjiva mape ya aave munu kutja otjira tja hakahanena po okutoora omikambo indu omutjise wokorona tji wa uta. Posi ya, otja oruveze tjaaru kayenda eṱe twa yenena okumuna kutja omirari mbi twa muna vye tu etera ouwa. (Mat. 11:19) Nu otja tji matu ripurire komuano Jesus me hongorera po ovakarere ve, eṱe tu nongamburiro kutja kainatja kutja pa tjitwa tjike moruyaveze, Jehova nOmuna we omusuverwa mave kara pu na eṱe.—Lesa Ovaheberi 13:5, 6.

17. Okutjiwa kutja Jesus ongu tu hongorera po ku ku ṱuna vi?

¹⁷ Eṱe tjiri tu nondjoroka tjinene kutja Jesus u tu hongorera po. Oweṱe orupa rwotjira tji tji ha haṋwa i yozombazu, omuhoko nomaraka. Eṱe tu muna omahongero omengi okuza mEmbo ra Mukuru nombatero yokukayendisa otjiungura tjokuzuvarisa. Auhe wetu u vaterwa okurihwikika omundu omupe nokurihonga okusuverasana. Eṱe tjiri tu nomapu omawa wokurihiva mena rokutja Jesus omuhongore wetu.