1. Ongwaye tje ri ounongo okurongerera oumba?

 OKURIRONGERERA otjiṋa ku yama omiinyo. Otjotjihorera, indu oumba tji we ya, ovandu mbe rirongerera wo ve hupa nu ve yenena okuvatera varwe wina. Otjira moEuropa tji tji kondja okuvatera ovandu tja tja: “Omerirongerero omawa ye yenena okuyama omiinyo.”

2. Omena raye tji twa sokurirongerera ozombamisiro ozonene tjinene? (Mateus 24:44)

² “Ozombamisiro ozonene tjinene” maze ya atu hi na ku undjira ko. (Mat. 24:21) Posi yokutja, ozombamisiro ozonene tjinene maze panguka komaumba warwe mena rokutja eṱe matu tjiwa kutja maze ya. Ape ozombura 2 000 nḓa kapita, Jesus wa rakiza ovahongewa ve okurongerera eyuva ndo. (Lesa Mateus 24:44.) Indu tji twe rirongere, ma rire oupupu kweṱe okutuurunga oruveze oruzeu ndwo nokuvatera varwe okutjita nao wina.—Luk. 21:36.

3. Onḓarorure, otjari, norusuvero mavi tu vatere vi okurirongerisira ozombamisiro ozonene tjinene?

³ Eṱe matu hepa okukara novikaṋena vitatu mbi mavi tu vatere okurongerera ozombamisiro ozonene tjinene. Matu tjiti vi indu tji twa raerwa okuzuvarisa ombuze yombanguriro na indu ovandu mbe he ri Ovahongonone va Jehova tji mave tu pirukire? (Omavan. 16:21) Eṱe matu hepa onḓarorure okukara nonḓuviro ku Jehova, atu nongamburiro kutja eye me tu tjevere. Matu tjiti vi indu ovakambure ovakwetu tji va pandjara omauini tjiva poo omauini wawo ayehe? (Hab. 3:17, 18) Mena rotjari tjetu ku wo, eṱe matu ve pe ombatero ndji mave hepa. Matu tjiti vi indu tji matu hepa okutura popezu tjinene pu novakambure ovakwetu mena roviwaṋa mbye rikutu kumwe tji vye tu rwisa? (Esek. 38:10-12) Matu hepa orusuvero rwomasa okutuvatera okutuurunga oruveze oruzeu ndwo.

4. Omomuano uṋe Ombeibela mu i raisa kutja matu sokukayenda komurungu okukurisa onḓarorure, otjari, norusuvero?

⁴ Embo ra Mukuru ri tu tunduuza okukurisa onḓarorure, otjari, norusuvero. Lukas 21:19 mari tja: “Panḓereye po, nu indino otji mamu yama omiinyo vyeṋu.” Ovakolose 3:12 mari tja: “Otji mamu sokukara notjari.” Nu 1 Ovatesalonika 4:9, 10 mari tja: “Eṋe oveni mwa hongwa i Ndjambi okusuverasana . . . nungwari matu riyarikaṋa ku eṋe, vakwetu, kutja mu ryamene ko tjinene moviṋa mbi.” Omambo ayehe nga ya tjangwa kovahongewa mba ve raisa onḓarorure, otjari, norusuvero. Posi ya, owo aave sokukayenda komurungu okukurisa ovikaṋena mbi. Eṱe matu sokutjita nao wina. Kutja vi tu vatere, matu katara komuano Ovakriste ovakuru mu va raisa ovikaṋena mbi. Nu okuzambo matu katara komuano mu matu yenene okuhorera kovahongewa mbo nokuraisa kutja twe rirongerera ozombamisiro ozonene tjinene.

5. Omomuano uṋe Ovakriste ovakuru mu va tuurunga omauzeu wawo?

⁵ Ovakriste ovakuru aave hepa okukara nonḓarorure. (Hebr. 10:36) Owo va ri nomauzeu tjingewo inga ovandu moruveze ndwo ngu va ri na wo, posi yokutja wina va ri nomauzeu mena rokutja va ri Ovakriste. Ovengi aave tatumisiwa i yovanane vozongamburiro zOvajuda nouhonapare wOvaroma, nu nandarire aave tatumisiwa i yomaṱunḓu wawo. (Mat. 10:21) Owo aave sokutjita kutja omahongero woposyo wovandu mba isa okukarera Jehova novandu nu mbe mu pirukira aye ha ṱunu ku wo, nu aye ha haṋa ombongo. (Oviung. 20:29, 30) Posi ya, Ovakriste mbo va panḓera po nouṱakame. (Omavan. 2:3) Omomuano uṋe? Owo aave ripurire kovihorera vyovandu mba raisa onḓarorure, tjimuna Job. (Jak. 5:10, 11) Owo aave kumbu okuningira omasa. (Oviung. 4:29-31) Nu owo aave zemburuka kutja Jehova me ve sere ondaya indu tji va raisa onḓarorure.—Oviung. 5:41.

6. Ovikwaye mbi mo rihongo okuza ku imbi Merita mbya tjita okutuurunga omapirukiro?

⁶ Matu yenene okukara nonḓarorure indu tji twa konḓonona nokuripurira ko oukoto kovihorera vyovandu mba raisa onḓarorure mbi ri mEmbo ra Mukuru nomambo wetu nga zikamena kOmbeibela. Mokutjita nao, Merita, omukazendu omukambure moAlbania, wa yenena okutuurunga omapirukiro okuza keṱunḓu re. Eye wa tja: “Ehungi ra Job ndi ri mOmbeibela re ndji tunduuza tjinene. Eye wa munine omauzeu omengi, nu nandarire kutja kaa tjiwa kutja maye zire pi, eye wa tja: ‘Me kara pokutja hi nondjo nga keyuva ronḓiro yandje.’ (Job 27:5) Ami ee ripura ohunga nomuano omauzeu wa Job mu ya ri omengi pu ingo oyandje. Nandarire kutja Job kaa tjiwa kutja ouṋe ngwa yeta omauzeu we, ami ee tjiwa kutja ouṋe ngwa ri kongotwe yomauzeu yandje.”

7. Nandarire kutja katu nomauzeu omanene, ovikwaye mbi tu sokurihonga okutjita nai?

⁷ Eṱe wina matu yenene okukurisa onḓarorure yetu mokukumba ku Jehova aruhe nokumuraera ozongendo zetu azehe. (Fil. 4:6; 1 Tes. 5:17) Ngahino nai ko nomauzeu omanene. Nandarire nao, hapo u ningira ombatero ya Jehova indu tji wa pindike poo tji u hi nokutjiwa kutja ngo tjite vi? Indu tji wa ningire ombatero ya Mukuru nai ngunda au nomauzeu omaṱiṱi, ove komoo keyakeya okutjita nao indu tji wa kamuna omauzeu omanene moruyaveze. Ove mo kara nongamburiro kutja ma tjiwa kutja oruṋe tji me ku vatere nokutja me ku vatere vi.—Eps. 27:1, 3.

8. Omomuano uṋe otjihorera tja Mira mu tji tu raisira kutja okutuurunga omauzeu ndino maku yenene okutuvatera okutuurunga omauzeu moruyaveze? (Jakobus 1:2-4) (Wina tara kotjiperendero.)

⁸ Eṱe mape ya atu tuurunga ozombamisiro ozonene tjinene moruyaveze indu tji twa tuurunga omauzeu ngu tu muna ndino. (Rom. 5:3)  Omena raye tji matu yenene okutja nao? Ovakambure ovakwetu ovengi ve tja otjikando atjihe tji va tuurunga omauzeu omanene, ku ve vatera okutuurunga omauzeu yarwe. Indu tji va tuurunga ouzeu nombatero ya Jehova, owo ve kara nongamburiro onyingi kutja Jehova u nonḓero okuvevatera. Nu mena rokutja ve nongamburiro mu Jehova, owo ve yenena okutuurunga ouzeu warwe. (Lesa Jakobus 1:2-4.) Mira, omukandjira moAlbania, wa muna kutja omauzeu ngaa muna morukapitaveze ye mu vatera okutuurunga omauzeu nge muna nai. Eye povikando tjiva u muna kutja eye erike ongu muna omauzeu omengi. Posi ya, u zemburuka omuano Jehova me mu vatera oure wozombura 20, nu u riraere omuini kutja: ‘Rira omuṱakame. O isa okukarera Jehova nai kombunda ya indu tjee ku vatera okutuurunga omauzeu omengi pekepeke.’ Ove wina mo yenene okuripurira komuano Jehova me ku vatera okutuurunga. Kara nongamburiro kutja eye u muna otjikando atjihe tji wa tuurunga ouzeu, nu me ku sere ondaya. (Mat. 5:10-12) Nu indu ozombamisiro ozonene tjinene tji za utu, ove tjandje we rihonga okupanḓera po nu mo rimanene okukayenda komurungu okutuurunga.

9. Omomuano une ombongo moAntiokie tja Sirie mu ya raisa otjari?

⁹ Tara ku imbi mbya tjitwa indu Ovakriste mba ri moJudea tji va munine ourumbu ounene. Indu ombongo moAntiokie tja Sirie tji ya zuva ohunga nourumbu mbwo, owo va ṱotjari novakambure ovakwao moJudea. Ku nao, owo va tjita otjiṋa okuvatera ovakambure ovakwao. Owo “va tya kutja auhe wawo ma yenene okuhinda po otjiṋa otja pu ma sora okuvatera ovakambure ovakwao mba tura mehi raJudea.” (Oviung. 11:27-30) Nandarire kutja va turire kokure, Ovakriste moAntiokie va tya okuvevatera.—1 Joh. 3:17, 18.

10. Omomiano viṋe mu matu yenene okuraisa otjari indu ovakambure ovakwetu tji va ṱunwa i youzeu? (Wina tara kotjiperendero.)

¹⁰ Eṱe wina matu yenene okuraisa otjari ndino indu tji twa tjiwa kutja ovakambure ovakwetu va munu ouzeu mena romipupo, poo omauzeu warwe. Eṱe tu hakahana okuyandja ombatero mokupura kovanene vombongo kutja matu yenene okuvatera notjiungura kaaṋi, mokuyandja oviyandjewa vyouharupu koviungura vyouye auhe nokukumbira imba mba ṱunwa i youzeu mbwo. b (Omiano 17:17) Otjotjihorera, mombura indji 2020, pa zikwa ozokomiti nḓe vatera imba mba wirwa i youmba nḓe ri kombanda 950 mouye auhe okuvatera imba mba ṱunwa i yomutjise wo-COVID 19 mbwa tambuka mouye. Eṱe tu nondangi kovakambure ovakwetu mbe norupa motjiungura tjokuvatera imba mba wirwa i youmba. Mena rokutja ve notjari novakambure ovakwao, owo va yandja ovihepwa nu ve ve vatera okukayenda komurungu okukarera Jehova. Nu movikando tjiva va ṱuna nokutungurura ozondjuwo notuveze twomerikotameneno.—Sasaneka 2 Ovakorinte 8:1-4.

11. Omomuano uṋe mu tu yozika Tate wetu womeyuru indu tji matu raisa otjari?

¹¹ Indu tji matu raisa otjari ku imba mba wirwa i youmba, varwe ve muna ozongondjero nḓu tu tjita. Otjotjihorera, mombura ndji 2019, ombepo otjisukusuku ndji Hurricane Dorian, ya nyona Etuwo rOmerikotameneno moBahamas. Indu ovakambure ovakwetu tjaave tungurura etuwo ndo, va pura komurumendu ngu he ri Omuhongonone wa Jehova kutja me ve pura vingapi okuungura oviungura mbyaavi heperwa po. Eye we ve raera kutja: “Ami me ungura otjari . . . nu me mu pe oviungurisiwa avihe. . . . Ami me  vanga okuungurira otjira tjeṋu oviṋa mbi avihe. Mba tjaterwa i yomuano mu [mu] tjindasana.” Ovandu ovengi mouye kave tjiwa Jehova. Posi yokutja ovengi ve muna oviṋa Ovahongonone va Jehova mbi ve tjita okuvatera varwe. Eṱe tu kara nondjoroka indu tji twa munu kutja tji twa raisa otjari ku varwe ku tjita kutja ovandu ve vange okutjiwa ovingi ohunga na Jehova ‘ngwe ura nounyaṋutima.’—Ef. 2:4.

12. Omomuano uṋe okukara notjari ndino mu ku tu rongerisira ozombamisiro ozonene tjinene? (Omavandururiro 13:16, 17)

¹² Omena raye tji matu hepa okuraisa otjari mozombamisiro ozonene tjinene? Ombeibela i raisa kutja imba mbe hi nokuyandja oruvara kozohoromende zouye mbwi mave munu omauzeu nai na mozombamisiro ozonene tjinene. (Lesa Omavandururiro 13:16, 17.) Ovakambure ovakwetu mape ya ave hepa ombatero yokumuna oviṋa mbi mave hepa kutja ve hupe. Indu Ombara yetu Jesus Kristus tji me ya okuyekupangura ovandu, matu vanga kutja me tu vaze amatu raisa otjari, nu me tu ṋange kutja tu “rumate ouhona.”—Mat. 25:34-40.

13. Otja tji pa raisiwa mOvaroma 15:7, omomuano uṋe Ovakriste ovatenga mu ve kurisa orusuvero mokati kawo?

¹³ Ovandu avehe aave tjiwa kutja Ovakriste ovatenga va suverasanene. Hapo ya ri oupupu ku wo okuraisa orusuvero? Tara komuano ombongo ya Roma mu ya pangukire. Tjiva va ri Ovajuda mba hongwa okukara nonḓuviro kOmatwako wa Moses, posi ya varwe va za komihoko vyarwe nu ve kurisiwa mozombazu pekepeke. Ovakriste tjiva mape ya va ri ovakarere ngunda varwe ava ri ovakutuke. Nu ngahino tjiva va ri novakarere wina. Ovakriste mbo va kayenda vi komurungu okuraisasana orusuvero nandarire kutja va pangukire? Omuapostele Paulus wa tja nai ku wo: “Opu mwa sokuyakurasana.” (Lesa Ovaroma 15:7.) Hapo eye aa hee tjike? Embo nda torokwa ‘okuyakurasana’ ri heya okusekirisa poo okuyakura omundu momuano omuwa, tjimuna tji mo yakura omundu ponganda yoye poo otjepanga roye. Otjotjihorera, Paulus wa raera Filemon kutja ma ‘sokuyakura’ omukarere omutaure Onesimus. (Filem. 17) Nu Priskila na Akuila va yakura Apolos ngu hi na a tjiwa ovingi ohunga nOukriste nu aave “mu twara koyawo.” (Oviung. 18:26) Ovakriste mbo va yakurasana nu kave yandjerere ombangu ndja ri pokati kawo okuvehaṋa.

14. Anna nomurumendu we va raisa vi orusuvero?

¹⁴ Eṱe wina matu yenene okuraisa orusuvero kovakambure ovakwetu mokurira omapanga wawo nokukara pu na wo. Okutjita nao maku ve hingi kutja ve raise orusuvero kweṱe wina. (2 Kor. 6:11-13) Tara kotjihorera tja Anna nomurumendu we. Ousupi tji va za nokuyenda koutokero wa Africa otjovahindwa, omutjise wo-COVID-19 otji wa uta. Mena romutjise mbwo, owo kaave yenene okuhakaena na imba vombongo yawo, nu kaya ri oupupu okutjiwa ovakambure ovakwao. Hapo ovakupasane mba va raisa vi orusuvero rwawo? Owo aave pitire motungovi okuhakaena ku novakambure ovakwao nokuveraera kutja mave vanga okuvetjiwa nawa. Ovakambure ovakwao va ri nondangi korusuvero ndu va raisa nu va uta okuvetonena ozongoze nokuvehindira ozombuze. Omena raye ovahindwa mba tjaave vanga okutjiwa ovakambure ovakwao mombongo yawo ombe? Anna wa tja: “Ami himee zembi orusuvero ovakambure ovakwetu ndu va raisa kwami neṱunḓu randje motuveze otuwa na motuveze otuzeu. Otjihorera tjawo tje ndji hinga kutja mbi raise orusuvero.”

15. Ovikwaye mbi mo rihongo okuza kotjihorera tja Vanessa ohunga nokusuvera ovakambure ovakwetu avehe? (Wina tara kotjiperendero.)

¹⁵ Ovengi vetu tu yenda kozombongo ku ku novarumendu novakazendu ovakambure mba panguka kweṱe. Eṱe matu yenene okukurisa orusuvero  rwetu ku wo mokuyandja ombango kovikaṋena vyawo oviwa. Ya ri ouzeu komukazendu omukambure wena Vanessa ngu karera moNew Zealand okukara noupanga ouwa ku na tjiva mombongo. Posi ya, eye wa tya okukara pu na wo tjinene pendje nokukara kokure na imba mbe novikaṋena mbya vi mu pindikisa. Okutjita nao, kwe mu vatera okumuna oviṋa Jehova mbya suvera ohunga na wo. Eye wa tja: “Indu omurumendu wandje tja rira omutarere worukondwa, eṱe tu kara pu novakambure ovakwetu ovengi mbe novikaṋena pekepeke, nu nai oupupu okuzuvasana ku na wo. Ami nai mba suvera ovikaṋena pekepeke mbyo. Jehova wa suvera ovandu avehe, mena rokutja eye u yandjera ovandu mba panguka okurikotamena ku ye.” Indu tji twe rihongo okumuna varwe otja Jehova tje ve muna, eṱe tu raisa kutja twe ve suvera.—2 Kor. 8:24.

16. Omena raye tji matu sokusuvera ovakambure ovakwetu mozombamisiro ozonene tjinene? (Wina tara kotjiperendero.)

¹⁶ Eṱe matu sokusuvera ovakambure ovakwetu mozombamisiro ozonene tjinene. Indu ozombamisiro ozonene tjinene tji za utu, omomuano uṋe Jehova mu me tu vatere? Tara ku imbi Jehova mbya raera kovakarere ve indu Babilon otjikuru tjaatji haverwa. Eye we ve raera kutja: “Hiteye momatuwo weṋu, vandu votjiwaṋa tjandje, nu mu pate omivero vyeṋu. Ṱareye oruveze orusupi nga omazenge waNdjambi tji ya yanda.” (Jes. 26:20) Eṱe wina mape ya matu hepa okukongorera omuhunga tjingewo mozombamisiro ozonene tjinene. ‘Omatuwo’ mape ya aye kuramene po ozombongo zetu. Mozombamisiro ozonene tjinene Jehova wa kwizika kutja me tu vatere indu tji twa kayenda komurungu okumukarera pu novakambure ovakwetu. Mena ranao, matu sokuungura oukukutu nai okusuvera ovakambure ovakwetu tjinene. Eṱe matu sokutjita nao kutja tu hupe.

17. Indu tji twe rirongerisa nai, ovikwaye mbi matu yenene okukatjita mozombamisiro ozonene tjinene?

¹⁷ “Eyuva enene raMuhona” mari rire oruveze oruzeu kovandu avehe. (Sef. 1:14, 15) Ovakarere va Jehova wina mave munu omauzeu. Posi ya, indu tji twe rirongerisa nai, matu yenene okuporimana nokuvatera varwe. Eṱe matu yenene okukara nonḓarorure okutuurunga omauzeu ayehe ngu matu munu. Indu ovakambure ovakwetu tji mave munu omauzeu, eṱe matu tjiti otja pu matu yenene okuvevatera mokuveraisira otjari nokuvepa imbi mbi mave hepa. Nu indu tji twe rihongo okusuvera ovakambure ovakwetu nai, eṱe matu ve raisire orusuvero moruyaveze. Jehova me ketupa otjisuta tjomuinyo waaruhe mouye omauzeu ayehe mu maye zembwa nu mu ye hi nokuzemburukwa rukwao.—Jes. 65:17.