ORUPA RWOMAKONḒONONENO 30
Kurisa orusuvero rwoye ku Jehova na ku varwe
“Mena rorusuvero eṱe matu panḓere pouatjiri, nu komuhingo mbwi atu kuru.”—EF. 4:15.
EIMBURIRO 2 Jehova ena roye
OMAPU KU MATU KATARA a
1. Ouatjiri uṋe mbu we rihonga indu tji wa uta okurihonga Ombeibela?
HAPO ove u zemburuka oviṋa avihe mbi we rihonga tji wa uta okurihonga Ombeibela? Ove mape ya wa temenwe indu tji wa tjiwa kutja Mukuru u ena. Ngahino ove o tjaterwa indu tji we rihonga kutja Mukuru ka tatumisa ovandu motjovasengwa. Ove wina mape ya wa ri nondjoroka okurihonga ohunga nomaundjiro wokukamuna ovaṱi voye rukwao nokukahupa ku na wo moparadisa kombanda yehi.
2. Omarundurukiro yeṋe ngu wa tjita otja tjoo rihongo ouatjiri wOmbeibela? (Ovaefese 5:1, 2)
2 Otja tjoo rihongo Embo ra Mukuru, orusuvero rwoye ku Jehova aaru kurire ko. Orusuvero ndwo aaru ku hingi kutja u ṱakamise imbi mbi mo rihongo. Ove wa yenena okutoora omikambo omisemba otja komirari vyOmbeibela. Ove wa rundurura ongaro nomeritjindiro woye mena rokutja oo vanga okuyorokisa omutima wa Mukuru. Tjimuna omuatje tje horera komunene ngu norusuvero, ove oo horere ku Iho womeyuru.—Lesa Ovaefese 5:1, 2.
3. Omapuriro yeṋe ngu mape ya atu ripura oveni?
3 Eṱe mape ya atu ripura oveni kutja: ‘Hapo orusuvero rwandje ku Jehova rwe kurira ko nai pu indu tji mba rira Omukriste? Okuza kombapitisimo yandje, hapo ami mbi raisa orusuvero kovakambure ovakwetu tjimuna Jehova?’ Indu tji twa munu kutja orusuvero rwetu ku Jehova na ku varwe karu ri tjimuna tji rwa ri katu nokuhepa okuwa momuinyo. Otjiṋa tjingeyo tjo tja tjitwa kOvakriste veserewondo etenga. Jesus ke na pe ve nakaura neye wina ke mee tu nakaura. (Omavan. 2:4, 7) Eye ma tjiwa kutja eṱe matu yenene okukara norusuvero ndu twa ri na ro indu tji twa uta okurihonga ouatjiri.
4. Matu katara ku ye morupa ndwi?
4 Orupa ndwi maru kahungirira komuano mu matu yenene okukayenda komurungu okukurisa orusuvero rwetu ku Jehova na ku varwe. Okuzambo matu kerihonga ohunga noviṋa tjiva oviwa mbi mavi tjitwa indu tji twa suvere Jehova novakambure ovakwetu tjinene.
KURISA ORUSUVERO RWOYE KU JEHOVA
5-6. Omauzeu yeṋe omuapostele Paulus nga ri na wo motjiungura tje tjokuzuvarisa, posi yokutja otjikeṋa tji tje mu tunduuza okukayenda komurungu okukarera Jehova?
5 Omuapostele Paulus wa ri nondjoroka okukarera Jehova, posi yokutja kaya ri oupupu ku ye okutjita nao aruhe. Potuingi Paulus aa toora ouyenda oure, nu okutoora ouyenda momayuva ngo ka kwa ri oupupu. Mouyenda we Paulus wa ri ‘momaumba wozonḓonḓu, nomaumba wovapunde voviṋa.’ Wina pa ri ovikando ovanavita na ye tji ve mu tona. (2 Kor. 11:23-27) Nu kaaruhe ovakambure ovakwao tjaave raisa ondangi ku ye koviṋa mbya tjita okuvevatera.—2 Kor. 10:10; Fil. 4:15.
6 Ovikwaye mbya vatera Paulus okukayenda komurungu okukarera Jehova? Paulus we rihonga ovingi ohunga novikaṋena vya Jehova okuza kOmatjangwa na koviṋa mbya tjitwa ku ye omuini. Paulus wa ri nongamburiro yokutja Jehova we mu suverere. (Rom. 8:38, 39; Ef. 2:4, 5) Nu eye wa suverere Jehova tjinene. Paulus wa raisa orusuvero rwe ku Jehova ‘mokukarera ovakriste ovakwao.’—Hebr. 6:10.
7. Omuano uṋe umwe mu matu yenene okukurisa orusuvero rwetu ku Jehova?
7 Eṱe matu yenene okukurisa orusuvero rwetu ku Mukuru mokukonḓonona Embo re oukoto. Otja tji mo lese Ombeibela, kondja okumuna kutja orupa aruhe maru raisa tjike ohunga na Jehova. Ripura omuini kutja: ‘Orupa ndwi maru raisa vi kutja Jehova we ndji suvera? Ovikwaye mbi ri mu ro mbi mavi tjiti kutja mbi suvere Jehova?’
8. Ongumbiro mai yenene okutuvatera vi okukurisa orusuvero rwetu ku Mukuru?
8 Omuano warwe mu matu yenene okukurisa orusuvero rwetu ku Jehova omokukumba ku ye eyuva arihe nokumuraera omuano mu matu fula. (Eps. 25:4, 5) Tji twa tjiti nao, Jehova ma ziri ozongumbiro zetu. (1 Joh. 3:21, 22) Khanh omukazendu omukambure moAsia, wa tja: “Orusuvero rwandje ku Jehova rutenga rwa zikamene ku imbi mbye rihongo ohunga na ye, posi yokutja oro rwe kurira ko otja tje munu omuano eye ma ziri ozongumbiro zandje. Iho tja tjita kutja mbi tjite oviṋa mbi tjata ku ye.” b
KURISA ORUSUVERO RWOYE KU VARWE
9. Timoteus wa raisa vi kutja aa kurisa orusuvero rwe kovakambure ovakwao?
9 Ozombura ozonḓiṱi kombunda yaindu tja rira Omukriste, Paulus wa hakaena nomurumendu omutanda wena Timoteus wotjihorera otjiwa. Timoteus wa suverere Jehova nu wa suverere ovandu. Paulus wa raera Ovafilipi kutja: “[Timoteus] erike ongu nomutima umwe otja ami, nu tjiri, ongu rikendera eṋe.” (Fil. 2:20) Imba Paulus kaa tanga Timoteus mena rozongondjero ze otjomusembamise omuwa poo omuhungire omuwa, posi yokutja, Paulus aa munu kutja Timoteus wa suvera ovakambure ovakwao tjinene. Otjingaperi kutja, ozombongo Timoteus nḓa kavarura aaze mu undju nonḓero.—1 Kor. 4:17.
10. Anna nomurumendu we va raisa vi orusuvero kovakambure ovakwao?
10 Eṱe wina tu paha omiano okuvatera ovakambure ovakwetu. (Hebr. 13:16) Tara kotjihorera tja Anna ngwa tamunwa morupa ndwa kapita. Kombunda yotjivepo otjinamasa, eye nomurumendu we va karyangera ondjuwo yovakambure ovakwao nu owo va muna kutja omututu wondjuwo yeṱunḓu ndi, wa wira moukoto. Ku nao eṱunḓu ndo kara ri nozombanda ozongohoke. Anna wa tja: “Eṱe twa toora ozombanda zawo natu ke ze koha natu ze kotora aza kangurwa nokuyangwa. Iho katja ri otjiṋa otjizeu kweṱe okutjita nungwari mena rokutja twa tjita nao, eṱe twa rira omapanga omawa nga ku ndino.” Orusuvero Anna nomurumendu we ndu ve na ro kovakambure ovakwao rwe ve hinga kutja ve ve vatere.—1 Joh 3:17, 18.
11. (a) Ozongondjero nḓu tu tjita okuraisa orusuvero ze ṱuna vi ku varwe? (b) Otja kOmiano 19:17, Jehova u tjita tjike indu tji matu raisa orusuvero?
11 Indu tji matu raisa ouwa norusuvero ku varwe, owo ve muna kutja matu kondjisa okuhorera ku Jehova. Nu owo mape ya ave kara nondangi tjinene kouwa mbu tu ve raisira. Khanh ngwa tamunwa rukuru u zemburuka imba mbe mu vatera. Eye wa tja: “Ami mbi nondangi tjinene kovakazendu ovakambure avehe mbu twa ka zuvarisa pamwe. Owo ve ke ndji paha ponganda ave ndji ṋanga okukarya pu na wo nu ave ndji kotora ponganda nokuhinotjipo. Nai ami mbi muna kutja ya ri oviungura ovingi ku wo okutjita nao. Nu owo va ri nondjoroka okutjita nao.” Otjiperi kutja, kavandu avehe mbu mave tja ndangi ku imbi mbi twe ve ungurire. Khanh wa tja nai ohunga na imba mbe mu vatera: “Ami mbi zera okuvesutira ouwa auhe mbu ve ndji raisira, posi yokutja ami hi nokutjiwa kutja ve kara pi. Nungwari Jehova ma tjiwa nami me kumbu kutja eye me ve sutire po mena randje.” Khanh ma sora. Jehova u muna ouwa auhe mbu tu tjitira varwe nandarire kutja ouṱiṱi. Eye u vara ozongondjero nḓu tu tjita nu me tu sutire po ouwa mbu tu raisa.—Lesa Omiano 19:17.
Indu omundu tji ma vanga okuungura ovingi motjiungura tja Jehova, eye u paha omiano okuvatera varwe (Oparagrafa 12)
12. Ovarumendu ovakambure mave yenene okuraisa vi orusuvero kovakambure ovakwao mombongo? (Wina tara koviperendero.)
12 Indu tji u ri omurumendu omukambure, mo yenene vi okuraisa orusuvero ku varwe nokuvevatera? Omurumendu omukambure omutanda wena Jordan wa pura omunene wombongo kutja ma yenene vi okuvatera mombongo. Omunene wombongo we mu tanga koviṋa mbya yenenisa rukuru ne mu raere omuano mu ma yenene okuungura ovingi. Otjotjihorera, eye wa raera Jordan okuya rukuru kEtuwo rwOmerikotameneno kutja ma korise varwe nokukara norupa pozombongarero zombongo, okuzuvarisa aruhe ku nokambumba ke kokuzuvarisa nokuripura ohunga noviṋa mbi ma yenene okutjita okuvatera varwe. Indu Jordan tja ṱakamisa omaronga ngo, eye we rihonga okutjita oviṋa tjiva nu wina we rihonga okusuvera ovakambure ovakwao tjinene. Jordan we rihonga okutja indu omurumendu omukambure tja rire omuvatere wombongo eye ka utu okuvatera varwe posi ya u kayenda komurungu okuvevatera.—1 Tim. 3:8-10, 13.
13. Orusuvero rwa hinga vi omurumendu omukambure wena Christian okuyenena okukarera otjomunene wombongo rukwao?
13 Hapo tjike indu tjo karere otjomuvatere poo omunene wombongo? Jehova u zemburuka oviungura mbi wa ungura morukapitaveze norusuvero ndwe ku hinga kutja u tjite nao. (1 Kor. 15:58) Eye wina u muna omuano mbu kayenda komurungu okuraisa orusuvero. Omurumendu omukambure wena Christian wa wire momuinyo indu tja isakewa okukarera otjomunene wombongo. Posi yokutja, eye wa tja: “Ami mba tya okuungura pu me yenene okukarera Jehova, nandarire kutja owami omunene wombongo poo indee.” Momakayendero woruveze, eye wa zikwa rukwao otjomunene wombongo. Christian wina wa tja: “Ami kaṱiṱi ee tira okukarera otjomunene wombongo rukwao. Posi ya, ami mba tya kutja indu Jehova motjari tje tji me ndji yandjere okukarera otjomunene wombongo rukwao ami me tjiti nao, mena rorusuvero rwandje ku ye na kovakambure ovakwetu.”
14. Mo rihongere tjike komambo womukazendu omukambure ngwa za koGeorgia?
14 Ovakarere va Jehova wina ve raisa orusuvero kovararanganda vawo. (Mat. 22:37-39) Otjotjihorera, omukazendu omukambure wena Elena moGeorgia, wa tja: “Rutenga, otjiṋa tjaa tji ndji hingi okuzuvarisa ku varwe tja ri orusuvero rwandje ku Jehova uriri. Posi yokutja otja orusuvero rwandje ku Tate wandje womeyuru tjaaru kuru, orusuvero rwandje kovandu aaru kurire ko wina. Ami ee kondjisa okuripura ohunga nomauzeu ngu ve muna nokutja omapu yeṋe ngu mape ya aye ṱunu komitima vyawo. Otja tje ripurire ku wo momuano mbwi, onḓero yandje yokuvanga okuvevatera otja i kurire ko.”—Rom. 10:13-15.
JEHOVA ME TU SERE ONDAYA INDU TJI MATU RAISA ORUSUVERO KU VARWE
Okuraisa orusuvero ku eta ozondaya kovandu ovengi varwe (Oparagrafa 15-16)
15-16. Otja tji pa raisiwa moviperendero, ozondaya zeṋe nḓe za mokuraisa orusuvero ku varwe?
15 Indu tji matu raisa orusuvero kovakambure ovakwetu, kawo aveyerike mbu ve muna ouwa. Kombunda yaindu omutjise wo-COVID-19 tji wa handjauka mouye, omurumendu omukambure wena Paolo nomukazendu we va vatera ovakazendu ovakambure ovanene motjiwondo ovengi okurihonga okuungurisa oviungurisiwa vyouye wakandino okuzuvarisa. Omukazendu omukambure umwe rutenga ngwa ri nouzeu okuungurisa otjiungurisiwa tje korusenina wa kara nondoṋeno okutjiungurisa. Eye wa yenena okutjiungurisa okuṋanga ovazamumwe ve kOmazemburukiro wonḓiro ya Jesus. Ovazamumwe ve 60 va kara pomazemburukiro ngo okupitira morungovi. Omukazendu omukambure ngo novazamumwe ve va muna ouwa kozongondjero za Paolo nomukazendu we. Kombunda, omukazendu omukambure wa raera Paolo kutja: “Ndangi kokutuhonga eṱe imba ovanene motjiwondo. Ami hi me zembi omuano Jehova me rikendera kweṱe nomuano mu wa ungura oukukutu okutuvatera.”
16 Ovihorera otja imbi vya vatera Paolo okumuna kutja orusuvero orunanḓengu tjinene pondjiviro poo oviṋa mbi matu yenene okutjita. Eye wa tja: “Ami ee karere otjomutarere worukondwa. Nai mbi muna kutja ovakambure ovakwetu mape ya va zemba omahungi ngu mba yandja, posi yokutja owo ngamba ve zemburuka oviṋa mbi mba tjita okuvevatera.”
17. Ouṋe warwe ngu ma munu ouwa indu tji matu raisa orusuvero?
17 Indu tji matu raisa orusuvero ku varwe, eṱe tu muna ouwa momiano mbi tu hi nokuundjira ko. Jonathan ngwa tura moNew Zealand, u yenda kumwe noumune mbwo. Eye wa muna omurumendu omukambure omukandjira ama zuvarisa erike Oroviungura ometaha omutenya awa tu. Jonathan wa tya okuzuvarisa ku nomukandjira ngo Oroviungura arihe mometaha. Oruveze ndwo, eye ka munine omuano mu ma kamuna mo ouwa mokuraisa ouwa. Jonathan wa tja: “Ami hi na mba suverere otjiungura tjokuzuvarisa oruveze ndwo. Posi yokutja otja tje puratene komuano omukandjira ngo maa hongo, ami mba muna omuano otjiungura tje tjokuzuvarisa matji nyomoka nu ami mba uta okusuvera otjiungura tjokuzuvarisa. Omurumendu omukambure ngwo wina wa rira epanga randje ropopezu nu we ndji vatera kutja mbi kare nondjoroka motjiungura tjandje tjokuzuvarisa nokutumbuka popezu na Jehova.”
18. Jehova u vanga kutja tu tjite tjike?
18 Jehova u vanga kutja eṱe atuhe tu kurise orusuvero rwetu ku ye na ku varwe. Otja tji twe rihongo, eṱe matu yenene okukurisa orusuvero rwetu ku Jehova mokulesa Embo re nokuripurira ko oukoto na mokuhungira ku na ye mongumbiro aruhe. Eṱe matu yenene okukurisa orusuvero rwetu kovakambure ovakwetu mokuvevatera momiano pekepeke. Otja orusuvero rwetu tji maru kurire ko, eṱe matu tumbuka popezu na Jehova na kovakambure ovakwetu. Nu eṱe matu yorokere oupanga mbo nga aruhe.
EIMBURIRO 109 Suverasaneye nomutima auhe
a Nandarire kutja oweṱe ovape mouatjiri poo twa karere Jehova ozombura ozengi, eṱe atuhe matu hepa okukayenda komurungu okutjita omarundurukiro. Morupa ndwi, matu kerihonga omuano mu matu yenene okukayenda komurungu okutjita omarundurukiro mokusuvera Jehova na varwe tjinene. Otja tji mo ripurire ko oukoto korupa ndwi, tara komarundurukiro ngu wa yenenisa nomuano mu mo yenene okukayenda komurungu okutjita omarundurukiro warwe.
b Omana tjiva ya rundururwa.
