Tate wandje wa ri omunene wombongo mokereka ndji United Church of Canada, ku nao Osondaha aihe eye ee tu hindi kozoklasa zokereka nḓe honga ovanatje Ombeibela. Okuzambo po-11 yomuhukomunene, eṱe aatu i ku na ye kokereka ku ku novandu avehe. Ometaha, aatu i ku na mama kEtuwo rOmerikotameneno. Ya ri oupupu okumuna ombangu pokati kozongamburiro mbari nḓa.

Mama wandje wa hungira ohunga na imbi mbye rihonga okuza mOmbeibela ku nomapanga we omawa Bob na Marion Hutcheson, nu owo wina va rira Ovahongonone va Jehova. Mombura ndji 1958, Mbuti na Sisi Hutcheson ve ndji twaerera ku novanatje vawo vetatu ovazandu komaworonganeno omanene wouye moNew York City nga ri nepu ndi “Divine Will” nu nga kambura omayuva hambondatu. Mba kamuna kutja kaya ri oupupu ku wo okundjitwaerera, posi ya himee zembi omaworonganeno ngo.

Indu tji mba ri omutanda, aatu kara mofarama nu ee tjaterwa okutjevera ovinamuinyo. Ami ee vanga okukerihonga okurira onganga yovinamuinyo. Mama wandje wa raera otjiṋa hi komunene wombongo. Momuano omuwa, eye we ndji zemburukisa kutja tu hupa “momayuva omasenina” nu we ndji pura kutja okuyenda komahongero wokombanda oure wozombura kaaṋi mape ya aku ṱunu vi koupanga wandje ku na Jehova. (2 Tim. 3:1) Mena ranao, ami  mba tya okuhinokuyenda komahongero wokombanda.

Posi ya, ee ripura kutja me tjiti vi tji mba mana oskole. Nandarire kutja ee piti motjiungura tjokuzuvarisa onaveka aihe, ami hee kara nondjoroka motjiungura tjokuzuvarisa nu hee munu kutja me yenene okurira omukandjira. Tate wandje ngu ha ri Omuhongonone wa Jehova nongundwandje aave ndji tunduuza okuungura otjivike atjihe ponganda onene yovimariva moToronto. Omo wa ri notjihavero tjokombanda monganda ndjo, ku nao ami mba yakura oviungura mbyo.

MoToronto, ami ee ungura tjinene nu ee kara pu novandu mbe ha ri Ovahongonone va Jehova tjaatji tjiti kutja ee ha i aruhe kozombongarero zombongo nokupita motjiungura tjokuzuvarisa. Ami ee kara pu na tate wandje omunene ngu ha ri Omuhongonone wa Jehova, posi ya indu tja ṱa ee hepa oruveze rwarwe pu me kara.

Mbuti na Sisi Hutchenson, mbe ndji twaerera komaworonganeno omanene mombura ndji 1958, va ri tjimuna ovanene vandje. Owo ve ndji ṋanga okukara pu na wo, nu ve ndji vatera okukara noupanga ouwa ku na Jehova. Ami, nomuatje wawo John twa papitisiwa mombura ndji 1960. John wa uta oukandjira, tji tje ndji tunduuza okuungura ovingi motjiungura tjokuzuvarisa. Ovarumendu ovakambure mombongo aave munu kutja mbi ungura nawa, ku nao ve ndji zika otjomutarere wOskole yOviungura vyOkuzuvarisa. a

Mombura ndji 1966, ami mba kupa Randi Berge, omukandjira omupyuke ngwa vanga okukarera koṋa ku ku nouhepe wovazuvarise. Omutarere ngu varura ozombongo wa raisa onḓero mweṱe, nu ee tu tunduuza okukavatera mombongo ndji ri moOrillia, tja Ontario. Ku nao, twa tjindira ngo tjimanga.

Ousupi indu tji twa vaza moOrillia, ami mba rira omukandjira omukarerere pu na Randi. Ami mba ri nondjoroka tjimuna ndjaa ri na yo. Kombunda ya indu tji mba uta okuungura oukukutu okurira omukandjira omuwa, ami mba uta okumuna  ondjoroka yokuungurisa Ombeibela nokumuna ovandu amave i zuva nawa. Twa ri nondjoroka okuvatera ovakupasane kaaṋi moOrillia okutjita omarundurukiro mehupo rawo nokurira ovakarere va Jehova.

Tji mba karyangere koToronto, ami mba hakaena ku na Arnold MacNamara, ngwa ri umwe wovarumendu ovakambure ngwa hongorere po poBetel. Eye we tu pura kutja matu yenene okurira ovakandjira vapeke. Ami mba hakahana kutja: “Ii, matu yenene, posi ya arikana kakoQuebec.” Ami mba ṱunwa i youmune ouvi ovandu moCanada mbaave hungire Otjiingirisa mbu va ri na wo ohunga norukondwa rwa Quebec, mu mwa tura ovandu mbe hungira Otjifrench. Oruveze ndwo ovandu aave pirukire ohoromende nu aave vanga kutja orukondwa rwa Quebec aru ha rire orupa rwa Canada.

Arnold wa tja: “Quebec ooruveze aruyerike orutavi ku maru hindi ovakandjira vapeke oruveze ndwi.” Ami mba hakahana okuriyandjera okuyenda. Ami ee tjiwa rukuru kutja Randi aa vanga okukarera ngo. Kombunda, mba kamuna kutja imbwi wa ri omukambo omusemba mbu twa toora.

Kombunda yaindu tji twa hita oklasa yOtjifrench oure wovivike vitano, ami na Randi pamwe novakupasane varwe twa ya kotjihuro hi Rimouski, tji tja ri ape ozokilometa 540 pokati komanene na koutjiro wehi rwa Montreal. Eṱe twa ri novingi okurihonga, nu twa muna otjiṋa hi indu tjee lese omatjivisiro pombongarero yombongo. Pendje nokutja ovakambure mave zu koAustria, mba ungurisa embo ndi nombosiro imwe ndu mari hee ozombo nu mba tja ovakambure mave rire ozombo.

MoRimouski, pe keriweza ovakazendu ovakambure vane ovapatje pamwe na Mbuti na Sisi Huberdeau novanatje vawo ovakazona vevari. Mbuti na Sisi Huberdeau va hirire ondjuwo onene nu ovakandjira avehe mbaave tura mo aave vatere okusuta ohira. Eṱe aatu isana ondjuwo ndjo, Ondjuwo ombapa, mena rokutja oyo ya ri ombapa novihenḓe vya ri ovivapa wina. Aamu kara ovandu okuza 12 nga 14. Otjovakandjira vapeke, Ami na Randi aatu kazuvarisa omuhukomunene, ometaha, nomapeta, nu aatu tjaterwa kutja twa ri nomundu aruhe okupita pamwe motjiungura tjokuzuvarisa, nandarire ongurova mokupepera.

Eṱe twa kara noupanga wopopezu ku novakandjira ovaṱakame mbo, nu owo va ri tjimuna eṱunḓu retu. Povikando tjiva, aatu haama pomuriro poo twa ri neyuva ndaatu ziki pamwe atuhe. Umwe womurumendu omukambure wa ri omunyande womizumbi, ku nao Oroviungura ongurova potuingi aatu imbura nokupunda.

Ovengi moRimouski va ri nonḓero okurihonga ohunga nOmbeibela. Mozombura ndano, eṱe twa ri nondjoroka okumuna Ovahongwa vOmbeibela tjiva amave papitisiwa. Ombongo ye kura nga ovazuvarise tji va vaza 35.

MoQuebec, twa muna omahongero omawa otjovazuvarise. Twa muna omuano Jehova mee tu vatere motjiungura tjokuzuvarisa novihepwa vyetu. Nu wina, twe rihonga okusuvera ovahungire vOtjifrench, eraka rawo, nombazu yawo, tji tja tjita kutja tu suvere ozombazu zarwe wina.—2 Kor. 6:13.

Orutavi rwomberoo rwe tu ningira okutjindira kokahuro nga Tracadie, atu hi nokuundjira ko, ku ke ri koutjiro wa New Brunswick. Iho tja ri ouzeu, mena rokutja twa ri nokontraka yoruveze paatu sokukara nokontraka yoviungura vyokuhonga mbye ungura eyuva ehinga. Nu wina ovahongwa vetu vOmbeibela tjiva va rira ovazuvarise nu aatu tungu Etuwo rOmerikotameneno.

 Eṱe twa kumba onaveka aihe ohunga nokutjinda naatu karyangere okahuro ngo Tracadie, ku ka pangukire tjinene koRimouski. Posi ya, eṱe twa tya okuyenda ngo mena rokutja Jehova aa vanga kutja tu yende ngo. Eṱe twa rora Jehova, nu atu munu omuano ma isa po ovipwite avihe. (Mal. 3:10) Mena rokutja Randi wa ri noupanga wopopezu ku na Jehova, ke ripurire ku ye omuini, nu wa ri omundu ngwa suvera omanyando, iho tja tjita kutja i rire oupupu okutjinda.

Omunene wombongo wa ri umwe mombongo yetu ombe wena Robert Ross. Eye nomukazendu we Linda va ri ovakandjira nu va tya okukara kombunda yaindu tji va panduka omuatje wawo omutenga. Owo nandarire kutja va ri nokanatje okazandu okaṱiṱi, owo ve tu yanḓiparisa tjinene mena rokutja aave sekirisa varwe, nu va ri ovapyuke motjiungura tjokuzuvarisa.

Kombunda yokurira ovakandjira moTracadie oure wozombura mbari, eṱe twa muna omaṋangero ngu tu hi na aatu undjire ko wokukarera motjiungura tjokuvarura ombongo. Eṱe aatu karere motukondwa twovahungire veraka rwOtjiingirisa oure wozombura hambombari. Kombunda aatu hindwa korukondwa rwOtjifrench moQuebec. Omutarere wotukondwa wena Léonce Crépeault moQuebec ee ndji tanga kombunda yaindu tji mba yandja omahungi wandje. Posi ya, kombunda aruhe aa kapura kutja: “Omomuano uṋe mu mo yenene okuyetjita kutja ye zuvakwe oupupu?” b Ombango ndjee ndji pe ndjo, ai ndji vatere okuyandja ombango komahongero wandje kutja ye hungame epu kaaṋi, nu ye rire omapupu okuzuvakwa nawa.

Otjiungura tjimwe tji mbi hi na mee zembi tja ri mombura ndji 1978 pomaworonganeno omanene wouye moMontreal nga ri nepu ndi “Victorious Faith.” Ami ee ungura novikurya. Aape sokukara ovandu 80 000 pomaworonganeno ngo, nu aatu sokuvepa ovikurya momuano mbwa pangukire ku imbwi mbwaatu tjiti morukapitaveze. Oviṋa avihe vya ri ovipe: oviungurisiwa, ovikurya, nomuano womazikiro. Eṱe twa ri nozoiskasa 20, posi ya povikando tjiva ozo kaaze ungura. Eṱe twa uta okurirongerisa menyunguhuka mena rokutja kaatu yenene okuhita motjitjandja tjomanyando mena rokutja pa ri notjitjitwa tjarwe. Nu eṱe aatu sokuyakisa omazuko ngunda eyuva ari hi ya pita okurongerisa eriro romuhukomunene. Eṱe twa urirwe, posi ya mbe rihonga ovingi okuza kovakambure ovakwetu komuano maave ungura oukukutu, kovikaṋena vyawo oviwa, nenyando ndu va ri na ro. Eṱe twa tjita oupanga oukarerere. Eṱe twa ri  nondjoroka okukara pomaworonganeno omananḓengu ngo moQuebec, ndwa ri orukondwa mu mwa ri ondatumisire onene pokati kozombura nḓa 1940 no-1960.

Ami mbe rihonga ovingi okuza kovatarere ovakwetu pomaworonganeno omanene moMontreal. Ombura imwe, David Splane, nai ngu karera otjokaṋepo kOrutu Orunane, wa ri omutarere womaworonganeno omanene. Pomaworonganeno nga tjitwa kombunda, indu tji mba ningirwa okuungura otjiungura ho, David we ndji vatera tjinene.

Mombura ndji 2011, tji twa za nokukarera motjiungura tjokuvarura ozombongo oure wozombura 36, ami mba ṋangwa okukarera otjomuhonge wOskole yOvanene vOmbongo. Mozombura mbari nḓo, ami na Randi twa rara mozombete 75 pekepeke, posi ya ozondaya nḓu twa muna za ri ozombwa. Komaandero wotjivike atjihe, ovanene vombongo va ri nondangi tjinene, mena rokutja aave munu omuano Orutu Orunane maaru rikende ohunga noupanga wawo ku na Jehova.

Kombunda mba kahonga Oskole yOvazuvarise vOuhona. Ovahongwa potuingi aave urwa tjinene, nokurikenda mena rokuhaama moklasa oure wozoiri hambombari meyuva, okuungura oviungura vyoskole oure wozoiri ndatu mapeta ayehe, nokuyandja omahungi povikando vine poo vitano otjivike atjihe. Ami nomukwetu ngwaatu hongo pamwe twe ve raera kutja owo katjave yenena okutjita avihe mbyo nokuhinombatero ya Jehova. Ami himee zembi omuano ovahongewa mu va muna kutja indu tji ve riyameke ku Jehova, mave yenene okuyenenisa ovingi.

Onḓero mama wandje ndja raisa mu varwe ya vatera ovahongwa ve vOmbeibela okutjita omarundurukiro nu nandarire ya vatera tate wandje okurundurura ongaro ye ohunga nouatjiri. Omayuva yetatu kombunda yaindu mama wandje tja ṱa, tate wandje we ya kEtuwo rOmerikotameneno okupuratena kehungi rotjiwaṋa, nu eye wa kayenda komurungu okuyenda kozombongarero zombongo oure wozombura 26. Nandarire kutja tate ka papitisirwe, ovanene vombongo ve ndji raera kutja eye aruhe ongwa ri omutenga okuya pozombongarero zombongo otjivike atjihe.

Mama wandje wa ri otjihorera otjiwa kwami novaṱena kwandje. Ovaṱena kwandje aveyetatu novarumendu vawo ve karera Jehova nouṱakame. Omuṱena kwandje umwe u karera morutavi rwomberoo rwa Portugal, nu ingwo warwe u karera morutavi rwomberoo rwa Haiti.

Ami na Randi nai tu karera otjovakandjira vapeke moHamilton, tja Ontario. Indu tjaatu varura ozombongo, eṱe twa ri nondjoroka okuyenda ku na varwe okukavarura ovandu mba raisa onḓero, novahongwa vawo vOmbeibela. Posi ya nai tu nondjoroka okumuna omuano ovahongwa vetu oveni mu ve kurisa oupanga wawo ku na Jehova. Nu otja tji matu kara noupanga ouwa ku novakambure ovakwetu mombongo yetu ombe, eṱe tu yanḓiparisiwa okumuna omuano Jehova me ve vatera motuveze otuwa notuzeu.

Eṱe tu nondangi tjinene konḓero varwe ndji ve tu raisira. Mena ranao, eṱe tu kondja okuraisa ‘onḓero tjinene’ mu varwe, nokuveyanḓiparisa okuungura ovingi motjiungura tja Jehova otja pu mave yenene. (2 Kor. 7:6, 7) Otjotjihorera, meṱunḓu rimwe, omukazendu, omuatje omuzandu, nomuatje omukazona, aave ungura otjiungura tjokuzuvarisa oruveze aruhe. Ami mba pura omurumendu womukazendu ngo kutja eye wa rora okuripura okukarera otjomukandjira. Eye wa tja aa parura ovakandjira vetatu. Ku nao, ami mbe mu pura kutja: “Hapo ove mo yenene okuveparura nawa okukapita Jehova?” Ami mbe mu yanḓiparisa okuyorokera imbi owo mbyaave yorokere. Kombunda yomieze hamboumwe, eye wa rira omukandjira.

Ami na Randi tu kayenda komurungu okuraera ‘ozondekurona’ ohunga ‘novihimise’ vya Jehova nu tu zera kutja owo mave yorokere otjiungura tja Jehova tjimuna tji twa tjita.—Eps. 71:17, 18.