Eṱe atuhe tu noruveze oruṱiṱi okutjita omakonḓononeno wetu oveni. Matu yenene vi okuungurisa oruveze ndwi momuano omusemba? Rutenga, o riramba. Ove mo munu mo ouwa indu tji mo konḓonona oviṋa kouṱiṱiṱiṱi nombango aihe, kombanda yaindu tji mo lese oviṋa ovingi mohakahana.

Okuzambo, twa po kutja ovikwaye mbi mo konḓonona rutenga. (Ef. 5:15, 16) Tara koviṋa mbi mo yenene okutjita:

• Lesa Ombeibela eyuva arihe. (Eps. 1:2) Ma rire nawa okuuta nomalesero wOmbeibela ngu tu konḓonona pombongarero yomokati kotjivike, otjivike atjihe.

• Rongerisa okambo komakonḓononeno kOruhungu nombongarero yomokati kotjivike komurungu woruveze. Kondjisa okurirongera nawa kutja u yandje eziriro.—Eps. 22:22.

• Arikana wina kondjisa okulesa omambo warwe nga zikamena kOmbeibela, nokutarera ouvidio mbu ri korungovi ndwi jw.org.

• Konḓonona epu ndu mari ku nana ombango. Ove mo yenene okukonḓonona ohunga nouzeu mbu u na wo, epuriro ndu u na ro, poo epu rOmbeibela ndu mo vanga okuzuva nawa.