1-2. Omuano uṋe mu mape ya Omukriste a sasanekwa nondjuwo yozondendeko? (1 Ovakorinte 15:58)

 MOMBURA ndji 1978 moTokyo tjaJapan mwa tungwa ondjuwo yozondendeko ozengi. Mena rokutja kwa ri nomanyinganyingiro wehi omengi motjihuro ho, ovandu aave munu kutja ondjuwo yozondendeko ndjo kamaai kurama osemba. Ovikwaye ovatunge mbi va tjita kutja ondjuwo yozondendeko ndjo i kurame osemba nokuhinokuṱunwa i yomanyinganyingiro wehi? Ozoingineya za tunga ondjuwo yozondendeko ndjo kokutja i kare nomasa nga yenene, nu i kurame osemba kutja ai ha ṱunwa i yomanyinganyingiro wehi. Ovakriste ve ri tjimuna ondjuwo yozondendeko ndjo. Omomuano uṋe?

² Omukriste ma sokukara nomazikameno nokuyakura ongaro aihe. Eye ma hepa okuzikama nokurimanena okukara nonḓuviro aruhe komatwako wa Jehova na komirari vye. (Lesa 1 Ovakorinte 15:58.) Eye u kara ‘nonḓuviro’ nu ka keyakeya. Indu tji mape yenene, poo tje ri ohepero eye ma hepa okurira ‘ongozu.’ (Jak. 3:17, EEP) Omukriste ngwe rihonga okukara noumune ouwa u nakaura okukara noveta ongukukutu. Morupa ndwi, matu katara komuano mu matu yenene okuzikama nokuhinokuteratera. Nu wina matu katara koviṋa vitano Satan mbye ungurisa okutjita kutja i rire ouzeu kweṱe okukayenda komurungu okukara nonḓuviro ku Jehova.

3. Omatwako yeṋe yOmuhongore Omunenenene nga tamunwa mOviungura 15:28, 29?

³ Jehova ongu nousemba wokutwa po omatwako, neye aruhe u yandja omatwako nge ri omapupu kovakarere ve okuyezuva.  (Jes. 33:22) Otjotjihorera, meserewondo etenga orutu orunane rwa tamuna oviṋa vitatu Ovakriste mu mave sokuzikama: (1) okunakaura omerikotameneno wovisenginina nokurikotamena ku Jehova erike, (2) okukara nonḓuviro komatwako wa Jehova ohunga nombinḓu, (3) nokukara nonḓuviro kerakiza rOmbeibela ohunga nokunakaura oruvakiro. (Lesa Oviungura 15:28, 29.) Omomuano uṋe Ovakriste ndino mu mave kara nonḓuviro ku Jehova momiano vitatu mbi?

4. Omomuano uṋe mbu tu rikotamena ku Jehova erike? (Omavandururiro 4:11)

⁴ Okunakaura omerikotameneno wovisenginina nokurikotamena ku Jehova erike. Eye wa rakiza Ovaisrael okurikotamena ku ye erike. (Deut. 5:6-10) Indu tja rorwa i yOmudiaboli, Jesus wa hungira oukahu kutja tu sokurikotamena ku Jehova erike. (Mat. 4:8-10) Ku nao, katu rikotamene koviserekarera vyovisenginina, nu wina katu rikotamene kovandu. Otjotjihorera, eṱe katu vara ovanane vozongamburiro, ovanane vozopolitika, ovandu ovatjiukwa, poo ovanyande vomizumbi, otja oomukuru. Eṱe tu toora omunda wa Jehova nu tu rikotamena ku ingwi umwe ngwa “uta oviṋa avihe.”—Lesa Omavandururiro 4:11.

5. Omena raye tji matu sokukara nonḓuviro komatwako wa Jehova ohunga nomuinyo nombinḓu?

⁵ Eṱe tu ṱakamisa omatwako wa Jehova ohunga nomuinyo nombinḓu. Omena raye? Mena rokutja Jehova wa tja ombinḓu i kuramena po omuinyo, mbu ri otjiyandjewa otjihuze okuza ye. (Lev. 17:14) Indu Jehova tja yandjera ovandu okurya onyama, eye wa ve raera kutja ave ri ko ombinḓu. (Gen. 9:4) Eye wa yarukira po erakiza ndi indu tja yandja omatwako kOvaisrael. (Lev. 17:10) Nu meserewondo etenga eye wa hinga orutu orunane okuyandja erakiza kOvakriste avehe rokutja “amu ri ko ombinḓu.” (Oviung. 15:28, 29) Eṱe tu kara nonḓuviro kerakiza ndi indu tji matu toorora omapangero ngu matu yakura. b

6. Ovikwaye mbi matu sokutjita kutja tu kare nonḓuviro komirari vya Jehova?

⁶ Eṱe tu kara nonḓuviro kerakiza ra Jehova ohunga nokunakaura oruvakiro. (Hebr. 13:4) Omuapostele Paulus we tu raera kutja matu “sokukoza” ouṋepo worutu rwetu pu ma pe hee kutja tu sokutoora omikambo mbi ri vyo okunakaura ozonḓuma ozombi. Eṱe tu nakaura okutara poo okutjita otjiṋa tji matji tu hingi okukara noruvakiro. (Kol. 3:5; Job 31:1) Indu tji matu rorwa okutjita otjiṋa otjivi, eṱe tu hakahanena po okunakaura omeripura poo ozondjito nḓu maze yenene okuteya oupanga wetu ku na Mukuru.

7. Ovikwaye mbi matu sokutjita, nu omena raye?

⁷ Jehova u undjira ko kutja tu kare “nonḓuviro” okuza komutima. (Rom. 6:17) Oviṋa eye mbye tu raera okutjita aruhe vi tu etera ouwa, nu eṱe kamaatu yenene okurundurura omatwako we. (Jes. 48:17, 18; 1 Kor. 6:9, 10) Eṱe tu kondja pu matu yenene okuyorokisa Jehova nokukara nongaro tjimuna omutjange wEpsalme ngwa tja: “Ami aruhe mbi kondja okuyenenisa omazikamisiro woye, nga keyuva ronḓiro yandje.” (Eps. 119:112) Posi yokutja, Satan u tjita kutja i rire ouzeu kweṱe okuzikama. Omiano viṋe eye mbye ungurisa?

8. Omomuano uṋe Satan me ungurisa ondatumisire okukondja okungundiparisa ozondando zetu?

⁸ Ondatumisire. Omudiaboli u ungurisa outwe noṋiṋikizire okungundiparisa ozondando zetu. Ondando ye ‘oyokututeta’ nokunyona oupanga wetu ku na Jehova. (1 Petr. 5:8)  Meserewondo etenga, Ovakriste aave tonwa, nokuzepewa mena ronḓikameno yawo. (Oviung. 5:27, 28, 40; 7:54-60) Ndino Satan u kayenda komurungu okuungurisa ondatumisire. Eṱe tu muna omuano ovapirukire mu ve tjinda Ovahongonone va Jehova moRussia na momahi warwe, poo omuano mu ve rwisa ovakambure ovakwetu momiano vyarwe.

9. Yandja otjihorera tjomuano mu matu hepa okukengeza koṋiṋikizire.

⁹ Oṋiṋikizire. Satan u ungurisa “omatjendje” okuweza ko ondatumisire. (Ef. 6:11) Tara kotjihorera tjomurumendu omukambure wena Bob, ngwa ri mohospitala mena rokutja aa hepa okutaurwa. Eye wa raera ozonganga kutja eye ke nokuyakura okupakerwa ombinḓu. Ozonganga za raisa ondengero kondando ye. Posi yokutja ongurova ndjo, ngunda ee hi ya taurwa onganga yarwe ye ya ku Bob kombunda ya indu eṱunḓu re tji ra ya konganda. Eye wa raera Bob kutja ozonganga mape ya kamaaze ungurisa ombinḓu, posi ya owo mave kara na yo popezu ndoovazu mai heperwa po. Ngahino onganga aai munu kutja Bob ma rundurura oumune we indu eṱunḓu re tji ri he ri po. Posi yokutja Bob wa ri omuṱakame, nu we mu raera kutja eye ke nokuyakura ombinḓu nandarire kutja pa tjitwa tjike.

10. Omena raye omeripura wovandu tji ye ri omanaumba? (1 Ovakorinte 3:19, 20)

¹⁰ Omeripura wa imba mbe ha ṱakamisa omatwako wa Jehova. Indu tji matu ripura tjimuna ovandu mbe ha ṱakamisa omatwako wa Jehova, eṱe wina matu tu utu okunakaura Jehova nomatwako we. (Lesa 1 Ovakorinte 3:19, 20.) “Ounongo wouye mbwi” u tjita kutja ovandu ave ha kara nonḓuviro ku Mukuru. Ovakriste tjiva moPergamum no Tiatira aave horere kovandu ongondoroka na wo mbaave tjiti oruvakiro nokurikotamena koomukuru wovisenginina. Jesus wa yandja erakiza ekukutu kozombongo mbari nḓo mena rokutja aave yandjere oruvakiro. (Omavan. 2:14, 20) Ndino, ovandu ongondoroka na eṱe mape ya ave kondjo okutjita kutja tu kare nomeripura omavi. Ouṋepo weṱunḓu novazamumwe mape ya ave kondjo okuturaera kutja tu nozoveta ozongukutu nokutja tu katuke omatwako wa Jehova. Otjotjihorera, owo mape ya ave tja katjiṋa otjinanḓengu okuritjinda oukohoke nokutja omirari vyOmbeibela kavi ungurisiwa rukwao.

11. Ovikwaye mbi matu sokunakaura?

¹¹ Povikando tjiva, mape ya atu munu kutja omirari mbi tu muna okuza ku Jehova kavikahu nawa. Eṱe mape ya atu rorwa kutja tu ‘katuka omaraerero Ndjambi nga zikamisa.’ (1 Kor. 4:6) Ovanane vozongamburiro moruveze rwa Jesus va ri nondjo youvi mbwi. Owo va weza ozoveta zawo oveni kOmatwako, nu va tjita kutja i rire ouzeu kovandu vakauriri okukara nonḓuviro. (Mat. 23:4) Jehova u tu pa omirari omikahu okupitira mEmbo re notjira tje. Eṱe katu nousemba wokuweza komaronga eye nge tu pa. (Omiano 3:5-7) Ku nao, katu sere okukatuka oviṋa mbya tjangwa mOmbeibela poo okutwapera ovakambure ovakwetu omirari vyetu oveni.

12. Omomuano uṋe Satan me ungurisa ‘omapopero woposyo’?

¹² Omapopa woposyo. Satan u ungurisa ‘omapopero woposyo nomazikamisiro womahonaparero wozombepo zouye’ okupukisa nokuhaṋa ovandu. (Kol. 2:8) Meserewondo etenga, ihi tji kamburira mo omahongero woumune wovandu, omahongero wovajuda nge ha zikamene komatjangwa na komahongero wokutja Ovakriste mave sokuṱakamisa Omatwako wa Moses. Oumune mbwo au pukisa ovandu mena rokutja au isa ko ombango yovandu ku Jehova, ngu ri Omburo younongo. Ndino, Satan u ungurisa otungovi twomahakaeneno  okutjiukisa ozombuze zovizeze nḓe za kovanane vozopolotika. Moruveze rwo-COVID-19 mwa ri nomahungi wovizeze omengi otja ingo. c Ovahongonone va Jehova mba puratena komuhunga mbwa u yandjwa i yotjira tjetu va yepa ozongendo nḓa ri na imba mbaave puratene kozombuze zovizeze.—Mat. 24:45.

13. Omena raye tji matu sokukengeza ohunga nomakurungisiro?

¹³ Okukurungisiwa. Eṱe matu sokuyandja ombango koviṋa “imbi mbi ri oviwaviwa.” (Fil. 1:9, 10) Indu tji twa kurungisiwa tu morosa oruveze rwetu nomasa wetu ngu matu sokuungurisa moviṋa vyarwe ovinanḓengu. Oviṋa mbi tu tjita aruhe tjimuna okurya, okunwa, omanyando, noviungura mavi tu kurungisa indu tji twe vi yandjere kutja vi rire ovinanḓengu mehupo retu. (Luk. 21:34, 35) Kombanda yanao, eyuva arihe tu zuva nokulesa ohunga nozondjakaha mokati kotjiṋa noviposa vyozopolotika. Eṱe matu sokukondja oukukutu kutja atu ha kurungisiwa i yoviṋa otja imbyo. Tjarwe mape ya atu utu okutoorora omunda mouripura na momitima vyetu. Satan u ungurisa omiano avihe mbya tamunwa kombanda mba nondando yokungundiparisa onḓero yetu yokutjita imbi mbi ri oviwa. Ngatu katare kutja matu yenene vi okurwisa ozongondjero za Satan nokurira ovazikame.

14. Otjikwaye tji matji tu vatere kutja tu zikame nokukara munda wa Jehova?

¹⁴ Ripura kutja ongwaye tji we riyandja ku Jehova nokupapitisiwa. Ove wa toora omikambo mbyo mena rokutja o vanga okukara munda wa Jehova. Zemburuka otjiṋa tji tje ku vatera okumuna kutja wa muna ouatjiri. Ove wa uta okutjiwa Jehova, o kara nondengero nokumusuvera otja Tate woye womeyuru. Ove we kurisa ongamburiro nu ihi tja tjita kutja u ritanaure. Ove wa isa okutjita oviṋa Jehova mbya tonda nu o utu okutjita oviṋa mbi tjata ku ye. Ove wa fula nawa indu tji wa muna kutja Mukuru we ku isire. (Eps. 32:1, 2) Ove wa uta okuya kozombongarero zombongo nu o utu okuhaṋasana oviṋa oviwa mbi we rihonga  ku na varwe. Otja Omukriste ngwe riyandja nokupapitisiwa, ove nai u kayenda mondjira ndji twara komuinyo nu we rimanena okutja o ha pandjara ondjira ndjo.—Mat. 7:13, 14.

15. Omena raye okukonḓonona Ombeibela nokuripurira ko oukoto tji ku tu etera ouwa?

¹⁵ Konḓonona Embo ra Mukuru nokuripurira ko oukoto. Indu omize tji vya hita oukoto mehi, omuti u yenena okukara nomasa, ku nao tji u nongamburiro yomasa mu Jehova eṱe matu yenene okuzikama. Otja omuti tji mau hapa, omize vyomuti vi hapa oukoto nu avi handjaukire ko. Indu tji matu konḓonona Embo ra Mukuru nokuripura ko oukoto, eṱe tu kurisa ongamburiro yetu nu kambura kutja omirari vya Jehova omisemba. (Kol. 2:6, 7) Ripurira komuano omirari vya Jehova nomuhunga, nondjeverero, mu vya vatera ovakarere va Jehova morukapitaveze. Otjotjihorera, Esekiel aa yandja ombango tjinene komuengeli indu tja saneke ondjuwo ondjapuke ya Muhona motjirimunikise. Otjirimunikise hi tja yanḓiparisa Esekiel, nu tji tu pa oviṋa mbi matu rihongere ko ohunga nomuano mu matu yenene okuṱakamisa omirari vya Jehova vyomerikotameneno omakohoke. d (Esek. 40:1-4; 43:10-12) Eṱe wina tu muna mo ouwa indu tji twa twa po oruveze okukonḓonona nokuripurira ko oukoto koviṋa ovikoto mbi ri mEmbo ra Mukuru.

16. Omomuano uṋe omutima mbwa zikama mu wa vatera Bob? (Epsalme 112:7)

¹⁶ Kara nomutima mbwa zikama. Ombara David wa hungira kutja eye ke nokuyenena okupandjara orusuvero rwe ku Jehova indu tja imbura kutja: “Omutima wandje we riyameke kOve, Ndjambi.” (Eps. 57:7) Eṱe wina matu yenene okukara nomutima mbwa zikama nokukara nongamburiro mu Jehova. (Lesa Epsalme 112:7.) Ngatu tare komuano otjiṋa hi mu tja vatera Bob ngwa tamunwa rukuru. Indu tja raerwa kutja ombinḓu mai kara mbo indu tji mai heperwa po, eye wa zira kutja indu nde ri mave vanga okumupakera ombinḓu, eye ma piti mohospitala ndjo moruveze rwatjimanga. Kombunda, Bob wa tja: “Ami hi na pu mba ivaiva okutja me tjiti vi nu hee rikende kutja mape tjitwa ye.”

17. Ovikwaye mbi matu rihongere okuza kotjihorera tja Bob? (Wina tara kotjiperendero.)

 ¹⁷ Bob wa zikamene mena rokutja eye wa tjita ozondando zokuzikama ngunda e hi ya kohospitala. Otjitenga, eye wa ri nonḓero yokuyorokisa Jehova. Otjitjavari, eye wa konḓonona nawa Ombeibela nomambo wetu nga zikamena kOmbeibela nge hungira ohunga nomuinyo nombinḓu. Otjitjatatu, eye wa ri nongamburiro kutja Jehova me mu sere ondaya kokukara nonḓuviro komatwako we. Eṱe wina matu sokukara nomutima mbwa zikama nandarire kutja matu munu omauzeu nga sana pi.

18. Omomuano uṋe otjihorera tja Barak mu matji tu vatere okukara nongamburiro mu Jehova? (Tara kotjiperendero tjokombanda yokambo nga.)

¹⁸ Kara nongamburiro mu Jehova. Tara komuano Barak ma toṋa mena rokutja wa ri nongamburiro momuhunga wa Jehova. Moruveze ndwo, ovandu moIsrael kava ri ava rongere kovita, owo nandarire kava ri novirwise. Jehova wa raera Barak okukarwisa Sisera notjira tje tjovita owo mba ri novirwise ovingi. (Ovapang. 5:8) Omuprofete Debora wa raera Barak okuheruka kondundu ma kahakaene ku na Sisera nomatemba we wovita 900. Okurwira pehi ya ri otjiṋa otjizeu kOvaisrael okurwisa Sisera nombatemba we wovita. Nandarire kutja Barak aa tjiwa otjiṋa hi, eye wa kara nonḓuviro. Otja ovarwe vovita tja ve heruka kOndundu Tabor, Jehova wa rokisa ombura yomasa. Sisera nomatemba va kakatera momunoko nu wa yandja outoṋi ku Barak. (Ovapang. 4:1-7, 10, 13-16) Momuano tjingewo, Jehova me tu pe outoṋi indu tji tu nongamburiro mu ye na momuhunga mbwe yandja okupitira motjira tje.—Deut. 31:6.

19. Omena raye tji mo vanga okuzikama?

¹⁹ Eṱe matu sokukayenda komurungu okurira ovazikame otja tji matu hupu mouye mbwi. (1 Tim. 6:11, 12; 2 Petr. 3:17) Eṱe matu sokurimanena okuhinokutira ondatumisire, oṋiṋikizire, omeripura wovandu, omapopero woposyo, nongurunguse. (Ef. 4:14) Ku nao, ngatu zikame momerikotameneno wetu ku Jehova nu aruhe tu mu suvere mokukara nonḓuviro ku ye. Nu eṱe wina matu hepa okurira ovandu mbe noumune ouwa. Morupa ndu maru kongorere ko, matu kahungirira komuano Jehova na Jesus mu ve ri ovihorera oviwa vyokukara noumune ouwa.