1. Otjikwaye tjapeke tji tji tu pa ondjoroka ndino?

TJIRI tji tu pa ondjoroka okumuna omuano otjira tja Jehova mu tji kurira ko! Ombura ndja zu ko, twa honga ovandu vokombanda 10 000 000 Ombeibela. Ihi tjiri tji raisa kutja ovakarere va Mukuru ve yerisa ondjerera ya wo! Kombanda ya nao, ripura nomangete wovandu mbe ya kOmariro omayapuke. Momuano mbo owo ve ya okurihonga omuano Mukuru ma raisa orusuvero indu tja yandja otjisuta tjonguturiro.—1 Joh. 4:9.

2, 3. (a) Ovikwaye mbi he tu tjaere okuyera “otja ozonyose”? (b) Mokuripurira komambo wa Jesus nge ri mu Mateus 5:14-16, matu ka tara ku ye morupa ndwi?

² Mouye auhe, ovandu va Jehova ve hungira omaraka omengi pekepeke. Posi yokutja, ihi ka tji tjiti kutja a tu ha hivirke Tate wetu, Jehova moruwano. (Omavan. 7:9) Kai natja kutja oweṱe omungehoko nokutja twa za pi, atuhe matu yenene okuyera “otja ozonyose nḓe yerisa evaverwa ouṱuku.”—Fil. 2:15.

³ Omuano ovandu mu ve ya kouatjiri, ombwaneno ndji tu yorokera, nomuano mbu tu kondja okukara katumba, avihe mbi vi yeta ohiviro ku Jehova. Morupa ndwi, matu ka tara kutja oviṋa mbyo vi yenenisiwa vi.—Lesa Mateus 5:14-16.

4, 5. (a) Pendje nokuzuvarisa, matu yerisa vi ondjerera yetu? (b) Ongaro yetu ombwa i yeta ouwa waye? (Tara kotjiperendero pomautiro worupa ndwi.)

⁴ Orupa rOtjingrisa ndwi “Light in the Darkness,” ndwa pita mokambo kOruhungu ka Juni 1, 1925, rwa tja: “Ka pe nomundu ngu ma yenene okurira omuṱakame nomunauatjiri ku Muhona momayuva nga sewa ko nga . . . pendje na indu tja yandjera ondjerera ye okuyera.” Orupa ndo komurungu rwa tja: “Eye ma sokutjita mbyo mokuraera ombuze ombwa kovandu avehe, nu eye omuini ma sokuhupa momuano wondjerera.” Oukahu kutja omuano umwe mu matu yerisa ondjerera yetu, omokuzuvarisa ombuze ombwa nokuisapo ovandu ovahongewa. (Mat. 28:19, 20) Kombanda ya nao, matu yenene okuhivirika Jehova mokuritjinda otjOvakriste vatjiri. Ovandu ku tu zuvarisa na varwe mbe tu muna ve tarera ongaro yetu. Omuano mbu matu meṱameṱa nokuvekorisa u raisa ovingi kutja oweṱe ovangendu nokutja oMukuru uṋe ngu tu karera.

⁵ Jesus wa tja: “Tji mwa kahita mondjuwo yorive katjeye: ‘Ohange ngai kare na eṋe.’” (Mat. 10:12) Movirongo Jesus novahongewa ve maave zuvarisa, ovandu va suverere okuyakura ovayenda nandarire mbu ve hi nokuvetjiwa. Posi yokutja ndino, ovandu kave yakura ovandu avehe nao mozoyao. Nungwari, tji wa raere omundu kutja wa eta ye poye mongaro ombwa yorusuvero tji yenenena okuṱuna komutima womundu, nu i rira oupupu ku ye okukuyakura nokukupuratena . Aruhe tji mo meṱameṱa i rira oupupu omundu okukupuratena. Nu ovakwetu ovengi tjiri va muna ouatjiri mbwi motjiungura tjokuzuvarisa na poutemba womambo mbu tu kuramisa momivanda. Otja tji mozuvarisa pokatemba komambo, moutu okumuna kutja ovandu ve puratena nawa tji mo meṱameṱa nokuvekorisa nohange. Ihi tji ve hinga okuya kweṱe nokutoora omambo wetu. Ongaro yoye ombwa mai ku vatere okuuta ehungi ku nomundu.

6. Ovakupasane vevari ovakurundu va neneparisa vi otjiungura tjawo tjokuzuvarisa?

⁶ Ovakurundu ovakupasane moEngland ve nouvere mbu he ve yandjere okuyenda kondjuwo nondjuwo. Posi yokutja owo ve yandjera ondjerera yawo okuyera pomurungu wondjuwo yawo. Owo ve twa po omambo nga zikame kOmbeibela potjitihe oiri ovandu ndji ve ye okupaha ovanatje poskole ndji ri meṋe yawo. Ovandu ovengi va kara nonḓero yomasa nu ve toora oumbo mbwi Questions Young People Ask—Answers That Work, Volumes 1 no 2, nomambo warwe wina. Omukazendu omukandjira wina u kara norupa pu nawo komuano wawo omuwa wokuzuvarisa mbwi. Orusuvero rwe nomuano ovakupasane mu ve raisa ouwa, vya tjita kutja omunene umwe ma ute okurihonga Ombeibela.

7. Ove mo yenene vi okuvatera ovataure ovape mehi reṋu?

⁷ Mozombura ozonḓiṱi nḓa kapita, omahi omengi ya muna otjivaro otjingi tjovataure. Ovikwaye mbi mo yenene okutjita kutja u vatere ovataure mbe ya mehi roye okutjiwa Jehova nondando ye? Mape tjitivi tji wa utu nokurihonga omiano vyokukorisa meraka rovandu ovayenda mbe ya mehi reṋu? O-JW Language app mai yenene okutuvatera okutjita nao. Wina mo yenene okurihonga omambo ngu maye nana ombango ya wo? Nu okuzambo mo yenene okuveraisira o-jw.org nouvidio nomambo nge ri mo meraka rawo.—Deut. 10:19.

8, 9. (a) Ombatero yaye ndji tu pewa pozombongarero zomokati kotjivike? (b) Ovanene mave yenene vi okuvatera ovanatje okukara norupa pozombongarero?

⁸ Jehova we tu pa okambo kEhupo retu rOukriste notjiungura tjetu tjokuzuvarisa kokutja ke tu vatere okurira ovazuvarise ovawa. Omirari  omiwa mbi tu muna pozombongarero zetu vi tu pa ongamburiro yomasa yokukavarura ovandu rukwao nokuhonga ovahongwa vetu vOmbeibela.

⁹ Ovengi mbe ya kozombongarero zetu ve muna omuano ovanatje mu ve kara norupa pozombongarero. Vanene, vatereye ovanatje veṋu kutja ve yerise ondjerera yawo mokuzira momambo wawo oveni pombongarero. Omaziriro wawo omasupi nge za komitima ye yenena okuhinga ovengi okumuna ekwamo rouatjiri.—1 Kor. 14:25.

10. Omerikotameneno weṱunḓu ye eta vi ombwaneno?

¹⁰ Omuano warwe mu mo yenene okuyerisa ondjerera yoye o mokukurisa ombwaneno meṱunḓu roye na mombongo. Omuano umwe ovanene mu mave yenene okutjita nao okukara nomerikotameneno weṱunḓu aruhe. Ovengi ve tarera o-JW Broadcasting omueze auhe. Tji mwa zu nokutarera oprograma ndjo, mape tjiti vi tji mwa hungirire kokutja ma mu yenene okuṱakamisa vi omapu nga hungirirwa ko? Indu tji ma hongorere omerikotameno weṱunḓu, omunene ma sokuzemburuka kutja ovihepwa vyomuatje omuṱiṱi vya haṋika ku ingwi ngwa rire omutanda. Okutja unguriseye oviṋa mbi mwe rihongo momuano mu ma vi vatere omundu auhe meṱunḓu.—Eps. 148:12, 13.

11-13. Atuhe matu yenene vi okukurisa ombwaneno mombongo nokuvatera varwe okuyerisa ondjerera ya wo?

¹¹ Ovanatje mave yenene vi okuyeta ombwaneno mombongo nokuvatera varwe okuyerisa ondjerera yawo? Indu tji uri Omukriste omutanda, mape tjiti vi tji wa twapo oruveze rokuraisa onḓero nokuvatera imbo ovanene motjiwondo? Nu tji mo vanga ve ningira kutja ve ku serekarere ekuruhungi rawo motjiungura tja Jehova. Ihi matji tungu ongamburiro yoye, nu wina eṋe amuhe mamu kurisa onḓero yeṋu yokuyerisa ondjerera youatjiri. Nu ngatu yakure imba mbe ya kozombongarero zetu zombongo norusuvero. Tji mo tjiti nao mo kurisa ombwaneno nu ovayenda mape ya ave kara nonḓero yokukara norupa rokuyerisa ondjerera yawo wina. Imbi ma vi kamburire mo okukorisa ovandu amo meṱameṱa, nokuvepa otuveze okuhaama. Ve tjiukisa ku varwe kutja ve mune kutja va yakurwa.

¹² Indu tji u nomerizirira wokurongerisa okambumba kokukazuvarisa, mo yenene  okuvatera ovakurundu kutja ve kare norupa motjiungura tjokuzuvarisa. Tara kutja pe norukondwa ku mave yenene okukazuverisira. Povikando tjiva, mo yenene okuvetwapo kutja ve ungure pu nomutanda ngu ma yenene okuvevatera. Nu wina zemburuka imba mbe hi nokuyenena okuungura ovingi mena rouvere nomauzeu warwe ngu ve na wo. Okutja tjiri tji wa tjiti oviṋa mbi, mo yenene okuvatera ovakurundu nomitanda, kutja ve nondjiviro onyingi poo onḓiṱi, okuzuvarisa ombuze ombwa noupyuke.—Lev. 19:32.

¹³ Omutjange wEpsalme wa tja: “Tjiri, okokuwa nonyuṋe oovangu nomarumbi tji mave tura pamwe nave twara kumwe omitima!” (Lesa Epsalme 133:1, 2.) Mokukara pamwe, Ovaisrael aa ve munu ouwa okuza kovihorera vya varwe mbaa ve karere Jehova pu na wo. Ya ri tjiumuna omaze omatwirise omawa nu ngaa ye suvisa nokukutura. Ongwaye tji u hi nokurimanena okuraisa ongaro ombwa nokukurisa ombwaneno mokati komarumbi novaṱena ko ye? Ndovazu ove wa uta rukuru okutjita nao, arikana ndangi. Nu noho mo yenene okutjita kutja omutima woye u “kare kamwaha,” okutja nao okukaenda komurungu okuṱiza epango ndo aruhe.—2 Kor. 6:11-13.

14. Mo yenene okutjita ye kutja ondjerera yoye i yere momaturiro woye?

¹⁴ Zemburuka kutja wina mo yenene okuyerisa ouatjiri wOmbeibela momaturiro woye. Eraka roye ehirona nongaro yo ye ombwa mai yenene okunanena ovandu ongondoroka na ove kouatjiri. Ripura omuini nai: ‘Hapo ovararanganda vandje ve ndji muna vi? Owami omundu omuhirona poyandje nu oyata yandje i kara a ya harakwa nawa? Mbi kondja okuvatera ovandu varwe?’ Tji moserekarere ku novakambure ovakweṋu, ma rire nawa tji we ve pura kutja ouwa notjari tja wo vya ṱuna vi kovazamumwe va wo, kovakwao mbu ve ungura pamwe, poskole poo kovararanganda vawo. Nu tjiri popengi mo zuu ovihorera oviwa.—Ef. 5:9.

15. Ongwaye tje ri ohepero okukara katumba?

¹⁵ Oumune mbu tu na wo wina otjiṋa tji twa sokuyandja ko ombango otja pu matu kondjo nomasa okuyerisa ondjerera yetu. Jesus wa yarukira po omambo nga: “Kareye katumba.” (Mat. 24:42; 25:13; 26:41) Nu tji twa utu okuripura kutja “ozombamisiro ozonene tjinene” ngunda ze ri kokure nokuya, nokutja ma ze ya posi yokutja ka nai ngunda atu nomuinyo. Omuano mbo ombango yetu kotjiungura tjokuzuvarisa mai yaruka ombunda. (Mat. 24:21) Moruveze rokuyera momaturiro wetu, omamunine wetu ma ye utu okuzema.

16, 17. Mo yenene okutjita tjike kutja u panḓere pokukara katumba?

¹⁶ Otja otuveze otuzeu twi pu matu ririre ko otuvi, atuhe opu tu hepa okukara katumba. Eyuva ra Jehova tji ma ri ya, ma ri ya moruveze orusemba. Imbi ka viṋa ovihakwa. (Mat. 24:42-44) Nu ngunda ama tu undju, ngatu kare nomuretima, ngatu kare katumba. Lesa Embo ra Mukuru aruhe, nu panḓera pokukumba. (1 Petr. 4:7) Zemburuka ovihorera vya imba mbe raisa ondjoroka mokukara katumba nokuyerisa ondjerera ya wo. Otjihorera tjimwe otjiwa tja tjangwa mOruhungu rwa Aprila 15, 2012 pomukuma 18-21 kehi yepu ndi “Seventy Years of Holding On to the Skirt of a Jew.”

¹⁷ Rira omundu ngu kara norupa moviṋa oviwa mbi tunga pu nomapanga omawa. Imbi ma viku etere ondjoroka, nu mo utu okumuna kutja omayuva ye hakahana. (Ef. 5:16) Meserewondo nda kapita, omarumbi wetu ya kara pokuungura nu va yenenisa ovengi. Posi yokutja eṱe ndino tu yenenisa ovingi tjinene kehi yeke ra Jehova ndi tu hongorera. Tjiri tu yerisa ondjerera yetu pondondo ndji tu hi na aa tu undjire ko.

18, 19. Ovanene vombongo mave yenene okutuvatera vi okukara katumba nokuungura? Sasaneka.

 ¹⁸ Tjiri tji tu pa ongamburiro okutjiwa kutja ouhahomonena wetu kau tjiti kutja atu ha karere Jehova momuano mbwe yakura. Mena ranao, nga tu raise ondangi ‘koviyandjewa’ vya Jehova kovandu, mbe ri ovanene vombongo. (Lesa Ovaefese 4:8, 11, 12.) Otjikando tjarwe omunene wombongo tje ye okukuvarura, ungurisa oruveze ndo okutoora ondjiviro okuza ku ye, nu kondja okumuna ouwa mondunge ndji me kupe.

¹⁹ Ovanene vevari vombongo moEngland va ya kovakupasane vevari mba ri nouzeu morukupo rwa wo. Omukazendu aa munu kutja ka ungura nawa moviṋa oviyapuke. Omurumendu wa muna kutja kaa ṱakamisa eṱunḓu re moviṋa oviyapuke nu kaa ve kara nomerikotameno weṱunḓu aruhe. Ovanene vombongo va yandja otjihorera tja Jesus kovakupassane mba. Eye wa tjevera ovahongewa ve nu ee ripurire kovihepwa vya wo. Ovanene vombongo va ningira omurumendu okuhorera Jesus. Nu va tunduuza omukazendu okukara nomuretima. Ovanene vombongo wina ve ve pa ondunge kutja mave yenene okutjita tjike kutja ve ungure kumwe momerikotameno wa wo weṱunḓu pu nounatje wa wo uvari. (Ef. 5:21-29) Nu kombunda ovanene vombongo va yarura ondangi komuano omurumendu ngwi ma yenenisa omerizirira we. Owo ve mu tunduuza okupanḓera po nokuṱaṱera kombepo ondjapuke kokutja ma rire otjiuru tjeṱunḓu otjisemba. Orusuvero nonḓero yovanene vombongo mba vya vatera eṱunḓu ndi okuyerisa ondjerera yawo.

20. Ovikwaye mbi mo munu indu tji moyerisa ondjerera yo ye?

²⁰ “Ovaṋingandu imba mbe nonḓuviro ku Muhona, nu mbe tjita ombango ye,” omutjange wepsalme wa hungira omambo ngo. (Eps. 128:1) Indu tji mo yerisa ondjerera yoye mokuzuvarisa ombuze ombwa, mokuritjinda mongaro ndji kurisa ombwaneno na mokukara katumba aruhe, tjiri mokara nondjoroka onene. Varwe mave munu oviungura vyoye oviwa, nu ovandu ovengi mave hivirike Tate wetu.—Mat. 5:16.