1. Omuapostele Paulus wa yandja erakiza riṋe kOvakriste ovatwirisiwa?

OMUAPOSTELE PAULUS wa tja: “Amu horere komihingo vyouye mbwi.” (Rom. 12:2) Paulus wa tjanga omambo ngo kOvakriste veserewondo etenga okuverakiza. Ongwaye Paulus tja yandja erakiza ndo kovarumendu novakazendu mbe ri yandja ku Mukuru nu mba twirisiwa nombepo ondjapuke?​—Rom. 1:7.

2-3. Satan u kondja vi okutupora ku Jehova, posi yokutja matu yenene vi okurwisa omeripura poo ozongaro ozombi nḓe ri ozonḓeu okuisamo mouripura wetu?

² Paulus ee rikende mena rokutja Ovakriste tjiva va uta okuṱunwa i ouripura ouvi wouye mbu ri kehi yomananeno wa Satan. (Ef. 4:17-19) Auhe wetu mape ya a ṱunwa momuano mbwi. Satan, ngu ri omuhonapare wouye mbwi, u ungurisa omiano pekepeke okutupukisa, otjomuano wokutupora kokure na Jehova. Otjotjihorera, indu tji matu vanga okurira ovandu ovananḓengu poo ovatjiukwa, eye ma ungurisa otjiṋa ho okutupora ku Jehova. Eye mape ya a kondjo okuungurisa oviṋa mbi twe rihonga ponganda, poskole poo mbi twe rihonga kovandu ongondoroka na eṱe, okutjita kutja tu ripure momuano eye mbwe vanga.

³ Hapo matu yenene ‘okuhahaura oviṱunga ovizeu’ mbi ri mouripura wetu? (2 Kor. 10:4) Tara komuano Paulus ma zira: “Tu nata na vyo omarwisiro omeritongamise nge pirukira ondjiviro ya Ndjambi. Nouripura ngamwa auhe mbu pirukira Ndjambi tu  u worera kutja u kare nonḓuviro ku Kristus.” (2 Kor. 10:5) Ii, nombatero ya Jehova matu yenene okurundurura omeripura omavi. Tjimuna omiti omipange tji vi isamo owanga, Embo ra Mukuru wina ri isamo omeripura poo ozongaro ozombi nḓe tu ṱuna mouye wa Satan mbwi.

4. Otjingi tjetu aatu hepa okutjita omarundurukiro wa ye indu tji twa yakura ouatjiri otjikando otjitenga?

⁴ Ripura ohunga nomarundurukiro ngu wa tjita indu tji wa yakura ouatjiri wEmbo ra Mukuru otjikando otjitenga, notoorora okukarera Jehova. Ovengi vetu aatu hepa okuisa okutjita oviṋa ovivi. (1 Kor. 6:9-11) Tjiri tu nondangi kutja Jehova we tu vatera okuisa okutjita oviṋa ovivi mbi!

5. Otja kOvaroma 12:2, ovikwaye 2 mbi matu sokutjita?

⁵ Eṱe katu sokumuna kutja katu nokuhepa okutjita omarundurukiro warwe. Nandarire kutja twa isa okutjita oviṋa ovivi tjinene mbya tu tjiti ngunda atu hiya papitisiwa, eṱe matu sokukayenda komurungu okuungura oukukutu kutja atu ha rorwa mokutjita oviṋa mbyo rukwao. Matu yenene vi okutjita nao? Paulus wa zira na tja: “Amu horere komihingo vyouye mbwi. Ndjambi nge mu yarure koupe mourekoto womitima vyeṋu.” (Rom. 12:2) Okutja matu sokutjita oviṋa 2. Rutenga, matu hepa okuisa ‘okuhorera,’ poo okuṱunwa i ouye mbwi. Otjitjavari, matu hepa ‘okuyarurwa koupe’ mokurundurura omuano mbu tu ripura.

6. Matu rihongo tjike komambo wa Jesus nge ri mu Mateus 12:43-45?

⁶ Omarundurukiro Paulus nga hungirira ko ye kamburira mo ovingi nu kakurundurura ombunikiro yetu uriri. Oyo ye kamburira mo omarundurukiro okuura. (Lesa okaongo nga “ Okuyarurwa koupe poo Okuritjitukisa?”) Eṱe matu hepa okurundurura omeripura wetu aehe, mbi kamburira mo ongaro yetu yomoukoto, oumune wetu, nozonḓero zetu. Kunao eṱe matu hepa okuripura oveni kutja, ‘Omarundurukiro ngu me tjiti kutja mbi rire Omukriste, owokombanda uriri poo tjiri mbi tjita kutja  mbi rire Omukriste mourekoto wandje?’ Ombangu ndji matu raisa onahepero. Nu omambo wa Jesus nga tjangwa mu Mateus 12:43-45, ye raisa kutja matu hepa okutjita ovikwaye. (Lesa.) Omambo ngo ye tu honga eronga enanḓengu rokutja eṱe tu sokupingenisa omeripura omavi ku nomeripura Mukuru nge yakura, pu mape hee kutja okuisapo omeripura omavi uriri kaku ya yenena.

7. Matu yenene vi okurundurura ongaro yetu yomoukoto?

⁷ Hapo matu yenene okurundurura omeripuriro poo ongaro yetu yomoukoto? Embo ra Mukuru ri tja: “Omitima vyeṋu nomeripuriro weṋu vi sokuyarurwa koupe. Neṋe mamu sokurihwikika omundu omupe ngwa utwa kosaneno ya Ndjambi nu ngu riraisa mongarero osemba nondjapuke youatjiri.” (Ef. 4:23, 24) Ii, matu yenene okurundurura ongaro yetu yomoukoto posi yokutja kaupupu. Tu hepa okutjita oviṋa vyarwe pendje nokupirukira ozonḓuma ozombi nokuisa okutjita oviṋa ovivi. Matu hepa okurundurura ‘omitima nomeripuriro’ wetu wina. Ihi tji kamburira mo okurundurura ozonḓero zetu, oviṋa mbi twa iririra okutjita, nomapu ngu tu tjitira oviṋa. Oviṋa avihe mbi vi hepa ozongondjero aruhe.

8-9. Otjihorera tjomurumendu omukambure matji raisa vi ounanḓengu wokurundurura ongaro yetu yomoukoto?

⁸ Otjotjihorera, omurumendu omukambure wa ri omundu ngwa tjiti outwe morukapitaveze. Eye aa nu otjikariha tjinene nokurwa posi yokutja wa isa oviṋa mbi na papitisiwa, ihi tja raisa otjihorera otjiwa kovandu momaturiro we. Posi yokutja ongurova imwe kombunda yombapitisimo ye, eye wa rorwa momuano mbwe hina a undjire ko. Omurumendu umwe ngwa nḓorongere we ya poye nu aa vanga okurwa kuna ye. Poutenga, omurumendu omukambure ngwi wa rwisa onḓero ye yokuvanga okumutona. Posi yokutja indu omurumendu ngo tja yamburura ena ra Jehova, omurumendu omukambure wa pindika tjinene nga tje hina aa yenene okuritjaera rukwao. Eye wa pita nu a katona omurumendu ngo. Ongwaye tja tjita nao? Nandarire kutja omakonḓononeno we wOmbeibela ye mu vatera okupirukira onḓero yokuvanga okurwa, eye ngundee karundururire omutima nomeripuriro we. Momambo warwe, eye tjiri ka rundururire ongaro ye yomoukoto.

⁹ Nungwari, omurumendu omukambure ngwi kena pa isa okukondja okurundurura ongaro ye. (Omiano 24:16) Nombatero yovanene vombongo, eye wa kayenda komurungu okutjita omarundurukiro omawa. Oruveze tjaaru kayenda wa rira omunene wombongo. Ongurova imwe, ngunda e ri pendje yEtuwo rOmerikotameneno, eye wa kara mongaro tjingeyo ndjo rukwao. Omurumendu warwe ngwa nḓorongere aa vanga okutona omunene warwe wombongo. Omurumendu omukambure ngo wa tjita tjike? Eye wa hungira momuano omupore, womerisusuparisiro komurumendu omunḓoronge ngwi, okuzambo we mu wisa omazenge pehi ne mu vatere okuyenda konganda. Ongwaye omukambure omukwetu ngwi tje ri tjinda momuano warwe otjikando tji? Omena rokutja wa rundurura omutima nomeripuriro we. Eye tjiri wa rira omundu omunahange nomurisusuparise. Ihi tja eta ondjozikiro ku Jehova!

10. Ovikwaye mbi matu sokutjita kutja tu rundurure ongaro yetu yomoukoto?

¹⁰ Omarundurukiro nga ka ye tjitwa tjimanga nokuhina ozongondjero. Eṱe mape ya tu hepa ‘okukondja tjinene’ poo okuungura oukukutu oure wozombura ozengi. (2 Petr. 1:5) Omarundurukiro nga ka ye tjitwa mena rokutja twa karera Jehova oure woruveze orure. Eṱe matu sokukondja tjinene okurundurura ongaro yetu yomoukoto. Pe noviṋa tjiva mbi ma vi yenene okutuvatera okutjita omarundurukiro ngo. Ngatu konḓonone oviṋa tjiva mbi.

11. Ongumbiro i tu vatera vi okurundurura omitima nomeripuriro wetu?

¹¹ Otjiṋa otjitenga otjinahepero tji matu sokutjita okukumba. Eṱe matu sokukumba tjimuna omutjange wepsalme ngwa tja: “Omutima omukohoke ungura mu ami, Ndjambi, nu u zikamise ombepo ombe nonḓikame moukoto wandje.” (Eps. 51:10) Matu sokuyakura kutja matu hepa okurundurura omitima nomeripuriro wetu nokuningira ombatero ya Jehova. Ongwaye tji tu sokukara nongamburiro kutja Jehova me tu vatere okutjita omarundurukiro? Matu yenene okuyanḓiparisiwa i omakwizikiro wa Jehova ohunga nOvaisrael mba ri nomitima omikukutu momayuva wa Esekiel, ngwa tja: “Ami me ve pe omitima omipe nombepo ombe . . . me ve pe omitima ominanḓuviro.” (Esek. 11:19.) Jehova wa ri nonḓero yokuvatera Ovaisrael mbo okurundurura ongaro yawo, nu wina u nonḓero yokutuvatera.

12-13. (a) Otja kEpsalme 119:59, ovikwaye mbi matu hepa okuripurira ko oukoto? (b) Omapuriro yeṋe ngu mo sokuripura omuini?

¹² Otjiṋa tjarwe otjinahepero tji matu sokutjita okuripura oukoto. Otja tji matu lese Embo ra Mukuru eyuva arihe, matu hepa okutwapo oruveze rwokuripurira ko oukoto kokutja omeripura poo oumune uṋe mbu matu hepa okurundurura. (Lesa Epsalme 119:59; Hebr. 4:12; Jak. 1:25) Matu sokutara kutja omeripura poo oumune uṋe mbu tu na wo mbwa ṱunwa i omeripura wouye mbwi. Eṱe matu sokuyakura kutja tu noungundipare uṋe nu atu ungura oukukutu kutja u zapo.

¹³ Otjotjihorera, ripura omuini kutja: ‘Mbi neruru momutima wandje nandarire kaṱiṱi?’ (1 Petr. 2:1) ‘Mbi rimuna kutja owami omunanḓengu povandu varwe mena romuano mbu mbe kurisiwa, omahongero ngu mbi na wo, poo mena rovimariva ovingi mbi mbi navyo?’ (Omiano 16:5) ‘Hapo mbi vara ovandu mbe hi noviṋa mbi mbi navyo poo mba za momuhoko warwe nonḓengu yokehi?’ (Jak. 2:2-4) ‘Hapo mbi nanukirwa i oviṋa vyouye wa Satan?’ (1 Joh. 2:15-17) ‘Mbi tjaterwa i omanyando nge tunduuza otuvakiro poo outwe?’ (Eps. 97:10; 101:3; Amos 5:15) Omaziriro komapuriro nga, maye ku vatere okumuna kutja ovikwaye mbi mo sokuungurira ko. Indu tji matu yenene okurundurura omeripura omanamasa nge ri mourekoto wetu, matu yorokisa Tate wetu womeyuru.​—Eps. 19:14.

14. Ongwaye tje ri otjiṋa otjinahepero okutoorora omapanga omawa?

¹⁴ Ounahepero kweṱe okutoorora omapanga omawa. Nokuhinokutjiwa, tu ṱunwa tjinene i ongaro yomapanga wetu. (Omiano 13:20) Poviungura poo poskole, twa kondorokwa i ovandu mbe he tu vatere okuripura momauno omuyakurwa ku Mukuru. Posi yokutja, matu yenene okumuna omapanga omawa pozombongarero zetu zombongo. Pozombongarero zombongo opu matu yenene okuyanḓiparisiwa “morusuvero na moviungura oviwa.”—Hebr. 10:24, 25.

15-16. Omomiano viṋe Satan me kondja okurundurura ouripura wetu?

¹⁵ Zemburuka kutja Satan we rimanena okurundurura ouripura wetu. Eye u ungurisa omahongero ngamwa aehe okunyona omuano omuwa Embo ra Mukuru mu ra ṱuna kouripura wetu.

¹⁶ Satan ngamba u kayenda komurungu okupura epuriro nda pura Eva motjikunino tja Eden, indu tja tja: “Indu Ndjambi otja hee, tjiri, kutja . . . ?” (Gen. 3:1) Mouye mbu ri kehi ya Satan mbwi, tu zuva omapuriro ngu mape ya a ye tjiti kutja tu ute okukeyakeya mongamburiro yetu, omapuriro tjimuna, ‘Hapo Mukuru tjiri ka yakura otukupo pokati komurumendu nomurumendu poo pokati komukazendu nomukazendu? Hapo Mukuru tjiri ka vanga kutja u zemburuke  omayuva wOkrismesa poo wongwatero? Hapo Mukuru tjiri u undjira ko kutja ohayakura okupakerwa ombinḓu? Hapo Mukuru worusuvero tjiri u undjira ko kutja eṱe atu ha kara pu novasuverwa vetu mba kondwa kombongo?’

17. Matu sokutjita vi indu omundu tje tu pura omapuriro ohunga nongamburiro yetu okututjita kutja tu keyakeye, nu otja kOvakolose 2:6, 7 matu yenene okumuna ye?

¹⁷ Matu hepa okukara nongamburiro tjiri moviṋa mbi tu kambura mo. Indu tji tu ha munine omaziriro komapuriro omananḓengu ohunga nongamburiro yetu, eṱe matu yenene okuuta okukeyakeya kutja imbi mbi tu kambura mo kauatjiri. Omakeyakeyero ngo mape ya aye tjiti kutja tu rundurure ouripura wetu nokuteya ongamburiro yetu. Otjikwaye tji matu sokutjita? Embo ra Mukuru ri tu raera kutja ngatu yarure omeripura wetu koupe, kokutja tu rizuvise oveni kutja ‘ombango ya Ndjambi, okutja mu tjiwe kutja ihi tji tji ri otjiwa nEye me nonyuṋe, nu tji tja pwira Ye, otjikeṋa.’ (Rom. 12:2) Tji matu konḓonona Ombeibela aruhe, matu yenene okurizuvisa oveni ouatjiri mbu ri mOmbeibela. Eṱe matu kara nongamburiro okuura kutja omirari vya Jehova omisemba. Okuzambo, tjimuna omuti mbu nomize mbya zikama, eṱe wina matu yenene okukara nomize, ‘vyomasa mongamburiro.’—Lesa Ovakolose 2:6, 7.

18. Ovikwaye mbi ma vi tu vatere kutja tu ritjevere koviṋa ovivi mbi etwa i ouye wa Satan?

¹⁸ Kape nomundu warwe ngu ma yenene okutjita kutja ongamburiro yoye i rire onamasa, kunao kayende komurungu okuyarurwa koupe momutima nomeripuriro woye. Kumba aruhe, nu riheka ku Jehova kutja me ku vatere nombepo ye ondjapuke. Ripura oukoto, nu kayende komurungu okukonḓonona omeripura woye nozondando zoye. Paha omapanga omawa nu kara pu novandu mbu mave ku vatere kutja u yarure ouripura woye koupe. Tji wa tjiti nao, ove mo ritjevere okuza koviṋa ovivi mbi etwa i ouye wa Satan nu mo yenene okurwisa “omarwisiro omeritongamise nge pirukira ondjiviro ya Ndjambi.”—2 Kor. 10:5.