1. Ongwaye tji matu sokupuratena kerakiza ra Jesus?

MOMAPROFETERO ohunga nomayuva omasenina, Jesus wa tja: “Ritjevereye nawa kutja amu ha kara . . . nozongendo zouye mbwi.” (Luk. 21:34) Matu sokupuratena kerakiza ndo. Omena ratjike? Mena rokutja nai eṱe atuhe tu muna omauzeu ovandu avehe ngu ve muna.

2. Omauzeu wa ye ovakambure ovakwetu ngu ve muna?

² Povikando tjiva, tu muna omauzeu pekepeke nge tupa ozongendo nu nge tjitirwa tjimwe. Ngatu tare kovihorera mbi ma vi kongorere ko. Omurumendu omukambure wena John, * ngwa vera omutjise mbwi multiple sclerosis, wa pindikire tjinene indu omukazendu we ngu va kara pamwe oure wozombura 19 tja isa orukupo. Nu okuzambo ovanatje ve 2 ovakazona va isa okukarera Jehova. Ovakupasane 2 womana nga Bob na Linda va muna omauzeu warwe wina. Owo va pandjara oviungura vyawo, nu okuzambo ave pandjara onganda yawo mena rokutja kaave yenene okuisuta. Nandarire kutja owo va ri nomauzeu ngo, Linda wa munikwa omutjise womutima mbu mape ya au mu zepa, nu wina wa ri nomutjise warwe mbu ṱuna kovirwise vye vyorutu.

3. Ovafilipi 4:6, 7, mari tu raere tjike ohunga na Jehova?

³ Eṱe matu yenene okukara nongamburiro yokutja Omuute wetu nu ngu ri Tate wetu worusuvero, Jehova, u tjiwa nawa omuano omauzeu mu ye tu ṱuna. Nu eye u vanga okutuvatera okutjinda omauzeu ngu tu muna. (Lesa Ovafilipi 4:6, 7.) Embo ra Mukuru ri novihorera ovingi mbi tu raera ohunga nomauzeu ovakarere va Mukuru ngu va tuurunga. Oro wina ri tu raera ohunga  nomuano Jehova me ve vatera okutjinda omauzeu ngo. Tara kovihorera tjiva.

4. Omauzeu yeṋe Elia nga muna, nu wa ri noumune uṋe ohunga na Jehova?

⁴ Elia wa karera Jehova kehi yotuveze otuzeu nu wina wa munine omatokero omanene. Ombara Ahab, umwe wozombara mekuruhungi rOvaisrael ngu ha ri omuṱakame, wa kupire omukazendu Isebel, ngwee rikotamene ku mukuru wotjisenginina Baal. Owo va handjaura omerikotameneno wa Baal nu va zepa ovaprofete va Jehova ovengi. Elia wa yenena okutaurira kwarwe. Eye wina wa hupa indu tji kwa ri ourumbu owingi tjinene mena rokutja we riyameka ku Jehova. (1 Ozomb. 17:2-4, 14-16) Nu wina, Elia we riyameka ku Jehova indu tja hungamwa i ovaprofete novandu mbaave rikotamene ku Baal. Eye wa tunduuza Ovaisrael okukarera Jehova. (1 Ozomb. 18:21-24, 36-38) Elia wa muna omuano Jehova mbwe mu tjevera nokumuvatera momiano pekepeke kehi yotuveze otuzeu.

5-6. Otja 1 Ozombara 19:1-4, Elia wa ri noumune uṋe, nu Jehova we mu raisira vi kutja we mu suvera?

⁵ Lesa 1 Ozombara 19:1-4. Elia aa tira tjinene indu Ombara oserekaze Isabel tjaa vanga okumuzepa. Kunao eye wa taurira koBerseba. Eye wa wire momuinyo tjinene nga tje “rizeri okukoka.” Ongwaye tjaa ri noumune mbo? Elia kaa ri omurumendu ohomonena, eye wa ri “omundu otja eṱe.” (Jak. 5:17) Ngahino wa ri nozongendo nu wa urirwe tjinene. Mape ya Elia aa munu kutja ozongondjero ze zokuvatera ovandu okurikotamena ku Jehova za ri omungandjo, nokutja kape notjiṋa tji tja runduruka  moIsrael, nu aa munu kutja eye erike uriri ngamba ongu karera Jehova. (1 Ozomb. 18:3, 4, 13; 19:10, 14) Eṱe mape ya atu himwa kutja omuprofete omuṱakame otja ingo mape ya vi a kara noumune otja imbo. Posi yokutja Jehova aa zu nawa oumune wa Elia.

⁶ Jehova kena pa rokohera Elia mena rokutja wa hungira oumune we. Posi yokutja, Eye wa vatera Elia okukara nomasa. (1 Ozomb. 19:5-7) Kombunda, norusuvero Jehova wa rundurura oumune wa Elia mokumuraisira omasa we omahimise. Jehova we mu raera kutja pe novandu 7 000 ngamba mbe he rikotamene ku Baal. (1 Ozomb. 19:11-18) Mokumuraera ovihorera mbi Jehova wa raisira Elia kutja we mu suvera.

7. Omuano Jehovah ma vatera Elia ku tupa ongamburiro ya tjike?

⁷ Hapo ove uri mongaro ndji mai ku kendisa? Tjiri otjiṋa otjihuhumiṋe okutjiwa kutja Jehova aa tjiwa ongaro Elia mari mo! Ihi tji tupa ongamburiro kutja Eye u tjiwa oviṋa mbi tu kendisa. Jehova u tjiwa oungundipare nomasa wetu, nu eye wina u tjiwa omeripura wetu omakoto. (Eps. 103:14; 139:3, 4) Indu tji twa horere ku Elia mokuṱaṱera ku Jehova, eye me tu vatere okutjinda omauzeu nge tu etera ozongendo momuinyo.​—Eps. 55:22.

8. Jehova me ku vatere vi okutjinda omauzeu woye?

⁸ Tji u nozongendo momuinyo ku tjita kutja u ripure kutja ongaro mu uri ka mai runduruka, nu otjiṋa hi tji ku wisa momuinyo. Iho tji tja tjitwa kove, zemburuka kutja Jehova me ku vatere okutjinda ozongendo zoye nḓo. Eye me ku vatere vi? Jehova u tu ṋanga kutja tu mu raere omauzeu nomeripura wetu omakoto. Nu eye me tu vatere. (Eps. 5:3; 1 Petr. 5:7) Kunao kumba ku Jehova aruhe ohunga nomauzeu woye. Eye ke nokuhungira ongarate kuna ove tjimuna tja tjita kuna Elia, posi yokutja ma pitire mEmbo re Ombeibela notjira tje. Omahungi ngu u lesa mOmbeibela maye ku pe omahuhumiṋino nomaundjiro. Ovakambure ovakweṋu wina mave yenene okukuhuhumiṋa.​—Rom. 15:4; Hebr. 10:24, 25.

9. Omomuano uṋe epanga retu mu mape ya a ri yenene okutuvatera?

⁹ Jehova wa raera Elia okuyandja oviungura vye tjiva ku Elisa, momuano mbwi Jehova wa yandja epanga ewa ku Elia ndi mari mu vatere okutjinda omauzeu we indu tje ri kehi yozongendo. Momuano otjingewo, indu tji twa raere epanga retu omeripura wetu omakoto, eye ma yenene okutuvatera okutjinda omutwaro wetu. (2 Ozomb. 2:2; Omiano 17:17) Tji mo munu kutja ko nomundu okuraera omauzeu woye, kumba ku Jehova okukuvatera okumuna omukambure Omukriste ngwe kura mongamburiro ngu ma yenene okukuvatera okutjinda omutwaro woye mbo.

10. Otjihorera tja Elia tji tupa omaundjiro wa ye, nu omakwizikiro nge ri mu Jesaja 40:28, 29 ma ye tu vatere vi?

¹⁰ Jehova wa vatera Elia okutjinda omauzeu we nu we mu vatera kutja me mu karere nouṱakame oure wozombura ozengi. Otjihorera tja Elia tji tupa omaundjiro. Povikando tjiva eṱe mape ya atu kara kehi yozongendo tjinene nga tji twa mana omasa morutu na mourekoto wetu. Nungwari tji twa ṱaṱere ku Jehova, eye me tu pe omasa wokukayenda komurungu okumukarera.​—Lesa Jesaja 40:28, 29.

11-13. Omomuano uṋe ozongendo mu za ṱuna kovakarere va Mukuru 3 voruveze orukuru?

¹¹ Ovandu varwe mOmbeibela wina va ri kehi yozongendo tjinene. Otjotjihorera, Hana wa ri kehi yozongendo tjinene mena rokutja kaa panduka tji tja ri otjiṋa otjiṱisa hoṋi ku ye, nu wina omukazendu warwe womurumendu we ee mu toko. (1 Sam. 1:2, 6) Hana wa ri kehi yozongendo  tjinene tji tje mu tjita kutja ma we momuinyo nokupandjara ombango yokurya.​—1 Sam. 1:7, 10.

¹² Povikando tjiva, Ombara David wa ri kehi yozongendo. Ripura uriri ohunga nomauzeu eye nga muna. Eye ee rimunu ondjo tjinene mena rozondataiziro ozengi nḓa tjita. (Eps. 40:12) Omuatje we omusuverwa Absalom we mu pirukira, nu kombunda Absalom wa kazepewa. (2 Sam. 15:13, 14; 18:33) Nu epanga ra David ropopezu re mu tjita ovineya. (2 Sam. 16:23–17:2; Eps. 55:12-14) Omapsalme omengi David nga tjanga ye raisa ongaro ye tja wire momuinyo nongamburiro ye onḓikame mu Jehova.​—Eps. 38:5-10; 94:17-19.

¹³ Omutjange warwe wepsalme wa uta okunanukirwa i yehupo rovandu ovarunde. Eye mape ya wari ondekurona yOmulevi Asaf, nu eye aa karere ‘pOndjuwo ondjapuke’ ya Muhona. Omutjange ngwi wari kehi yozongendo tjinene, ihi tja tjita kutja a ha kara nondjoroka momuinyo nu wina aha kowa mu imbi mbye navyo. Eye nandarire wa uta okumuna kutja oviṋa Jehova mbye mu tjitira kavi ya yenena.​—Eps. 73:2-5, 7, 12-14, 16, 17, 21.

14-15. Matu rihongere ko tjike kovihorera vyovandu 3 mOmbeibela ohunga nomuano wokuriyameka ku Jehova kutja me tu vatere?

¹⁴ Ovakarere va Jehova 3 mbo va paha ombatero ku ye. Owo ve mu raera omauzeu wawo aehe okupitira mongumbiro. Ovakarere mba va ri ovapaturuke okuhungira kuna ye ohunga nokutja ongwaye tji va wire momuinyo. Nu va kayenda komurungu okuyenda koruveze rwomerikotameneno rwa Jehova.​—1 Sam. 1:9, 10; Eps. 55:22; 73:17; 122:1.

¹⁵ Jehova norusuvero wa zira ozongumbiro zawo. Hana wa muna ohange momuinyo. (1 Sam. 1:18) David wa tja: “Omusemba nanda munu oviwonga ovingi, Muhona me mu  vatere mu vyo avihe.” (Eps. 34:19) Nu kombunda omutjange wepsalme wa muna kutja Jehova we mu ‘kambura pokuoko kwe kwokunene,’ nokumuhongorera po nomaronga worusuvero. Eye wa tja: “Nu ku ami okokuwa okukara popezu na Ndjambi; omaundiro wandje ye ri mu Muhona Ndjambi.” (Eps. 73:23, 24, 28) Matu rihongere ko tjike kovihorera mbyo? Povikando tjiva, eṱe matu munu omauzeu omanene tjinene ngu maye tjiti kutja tu rikende tjinene. Nungwari matu yenene okutjinda omauzeu wetu ngo, indu tji twe ripurire ko oukoto komuano Jehova maa vatera ovandu varwe, tji twa ṱaṱere ku ye mongumbiro nu atu ṱakamisa imbi mbye vanga kutja tu tjite.​—Eps. 143:1, 4-8.

16-17. (a) Ongwaye tji tu ha sere okuriṱizira kokure na Jehova novakarere ve? (b) Omomuano uṋe mu tu muna omayanḓiparisiro?

¹⁶ Ovihorera 3 mbyo mavi tu hongo epu rarwe enanḓengu rokutja eṱe katu sokuritizira kokure na Jehova novakarere ve. (Omiano 18:1) Nancy, ngwa ri kehi yozongendo tjinene indu omurumendu we tje mwesa, wa tja: “Omayuva omengi ee vanga okukara kwami omuini nokuhinokumuna poo okuhungira ku novandu. Nungwari otjiṋa hi aa tji ndji wisa momuinyo tjinene.” Indu Nancy tja uta okupaha omiano vyokuvatera varwe mbe ri momauzeu, tje mu vatera okukara noumune warwe. Eye wa  tja: “Otja tjee puratene komauzeu wawo, kwendji vatera kutja mbi yandje ombango ku varwe noumazeu wawo, nu tja tjita kutja e ha yandja omabango kwami omuini nomauzeu wandje.”

¹⁷ Tu muna omayanḓiparisiro indu tji matu i kozombongarero zombongo. Indu tji tu ri pozombongarero zombongo tu yandjera Jehova kutja me tu ‘vatere nokutuhuhumiṋa.’ (Eps. 86:17) Imbo Eye utu yanḓiparisa nombepo ye ondjapuke, Embo re, novakambure ovakwetu. Pozombongarero zombongo tu yenena ‘okuvaterasana mongamburiro’ nondjoroka. (Rom. 1:11, 12) Omukazendu omukambure wena Sophia wa tja: “Jehova novakambure ovakwetu ve ndji vatera okutuurunga omauzeu wandje. Otjiṋa tji tje ndji vatera tjinene ya ri okukara pozombongarero zombongo. Mba muna kutja okukara norupa tjinene motjiungura tjokuzuvarisa nokukara pozombongarero zombongo kwe ndji vatera okutjinda ozongendo zandje.”

18. Jehova ma yenene okutupa ye, indu tji twa u momuinyo?

¹⁸ Indu tji twa u momuinyo, ngatu zemburuke kutja Jehova we tu kwizikira kutja ma kaisapo oviṋa mbi tupa ozongendo nga aruhe nu wina nai u vanga okutuvatera okutjinda omauzeu wetu. Eye u tupa “ombango nomasorero” indu tji twa u momuinyo nu tji tu hi nomaundjiro.​—Fil. 2:13.

19. Omakwizikiro yeṋe nge ri mOvaroma 8:37-39?

¹⁹ Lesa Ovaroma 8:37-39. Omuapostele Paulus we tupa ongamburiro yokutja kape notjiṋa tji matji tu pora korusuvero rwa Mukuru. Omomuano uṋe mu matu yenene okuvatera ovakambure ovakwetu mbe kondja okutjinda omauzeu? Morupa ndu maru kongorere ko matu katara komuano mu matu yenene okuhorera kotjari tja Jehova nokutja matu yanḓiparisa vi ovakambure ovakwetu mbe ri kehi yozongendo.