Omazeva ngo ye tamuna ovikaṋena muvyu vyovihape vyOmbepo mbi: “Orusuvero, enyando, ohange, omuretima, oupore, omutima omuwa, ouṱakame omerisusuparisiro nomeritjaerero.” Eṱe katu sokumuna kutja imbyo oovikaṋena aviyerike ombepo ondjapuke mu mai yenene okutuvatera.

Matu tjiwa vi? Ngunda omuapostele Paulus e hiya tjanga ovihape vyombepo, eye wa tjanga kutja, “Nu oviungura vyongaro youndu ovyo vi tjiukwa nawa, novyo mbi: oruvakiro, nouhakohoke, nehambaneno rombonḓi; okurikotamena kovisenginina, oundjai, okukarasana ovanavita, onyengo, ozombata, omazenge, oviposa, omahaṋikiro nohaṋi, eruru, okupurukisiwa i omanuwa omazeu, evyaro noviṋa avihe ohamukwao na imbyo.” (Gal. 5:19-21) Kunao, Paulus wa mana nomambo ngu ma ye tja, “noviṋa avihe ohamukwao na imbyo,” pu mape hee kutja eye ka hungirire koviṋa avihe mbi ri “oviungura vyongaro youndu,” tjimuna mbya tamunwa mOvakolose 3:5. Momuano otjingewo, indu tja tjanga ovikaṋena muvyu oviwa vyombepo mezeva 23 wa tja, “Omatwako kaye kuramene oviṋa otja imbi momurungu.” Kunao Paulus ka tamunine ovikaṋena avihe oviwa mbi matu yenene okukara navyo nombatero yombepo ondjapuke.

Matu zuu otjiṋa hi nawa indu tji matu sasaneke ovihape vyombepo ku novihape vyondjerera Paulus mbya tjanga kombongo moEfesus: “Mondjerera omu mu za oviṋa ngamwa avihe vyouwa nousemba nouatjiri.” (Ef. 5: 8, 9) Otjiperi kutja, ‘ouwa’ poo (omutima omuwa) pu nousemba nouatjiri orupa rovikaṋena ‘vyondjerera’ nu wina ouwa poo omutima omuwa itjimwe ‘tjovihape vyombepo.’

Momuano otjingewo, Paulus wa tunduuza Timoteus ‘okukondjera ousemba nondira ku Ndjambi nongamburiro norusuvero nonḓaro orure noupore womutima,’ mbi ri ovikaṋena hamboumwe oviwa. (1 Tim. 6:11) Nu ovikaṋena vitatu uriri (ongamburiro poo ouṱakame, orusuvero, noupore) ombi ri vimwe ‘vyovihape vyombepo.’ Timoteus wina aa vanga ombatero yombepo ondjapuke kutja ma kare novikaṋena vyarwe mbya tamunwa mba, ousemba, ondira ku Ndjambi, nonḓaro orure.—Sasaneka Ovakolose 3:12; na 2 Petrus 1:5-7.

Kunao Ovagalate 5:22, 23 ka ri tamuna ovikaṋena avihe Ovakriste mbi mave sokukara navyo. Ombepo ondjapuke mai yenene okutuvatera kutja tu kare novikaṋena muvyu mbya tamunwa otja “ovihape vyombepo.” Posi yokutja pe novikaṋena vyarwe ovingi mbi matu yenene okukara navyo otja tji matu kuru mongamburiro ‘nokurihwikika omundu omupe ngwa utwa kosaneno ya Ndjambi nu ngu riraisa mongarero osemba nondjapuke youatjiri.’—Ef. 4:24