EṰE ATUHE tu nongamburiro kutja Jehova u hongorera po ovakarere ve nu u vepa imbi mbi mave hepa kutja ve kare noupanga wopopezu kuna ye “momayuva omasenina” nga. (2 Tim. 3:1) Posi yokutja atuhe matu hepa okukara nonḓuviro ku Jehova. Eṱe matu yenene okusasaneka ongaro yetu kuna indji oyOvasrael indu tji vari mokuti onguza. Owo aave sokutoora omukambo indu tji va zuu ombosiro yohiva.

Jehova wa raera Moses okuungura ozohiva mbari posilveri ‘a woronganise na zo ombongarero, nokutjivisa kutja ozondanda ze womboroke.’ (Num. 10:2) Ovapristeri aave sokutona ozohiva momiano pekepeke okuraera ovandu imbi mbi mave sokutjita. (Num. 10:3-8) Ndino, ovakarere va Mukuru ve pewa omihunga momiano pekepeke. Morupa ndwi matu ke rihonga omiano vitatu mu tu muna omarakiza nokusasaneka omarakiza ngo ku nomuano oIsrael otjikuru maatji ungurisa ohiva. Ovakerere va Mukuru ndino, ve ṋangwa komaworonganeno omanene, imba mba zikwa mounane ve muna omahongero, nu pe tjitwa omarundurukiro omape ozombongo azehe mu ze hongwa.

Ovapristeri ave tono ozohiva azeembari indu Jehova tji ma vanga kutja “ombongarero aihe” i woronganene pamwe pomahitiro wokeyuva komuhuka wOndanda yOmahakaeneno. (Num. 10:3) Omihoko avihe mbya turire motupa tune ongondoroka nOndanda yomahakaeneno, aavi yenene okuzuva ombosiro ndjo. Imba wozondanda nḓari popezu nomahitiro wOndanda yomahakaeneno, aave yenene okutoora omikambo moruveze rwatjimanga. Varwe mba ri kokure tjinene mape ya aave hepa oruveze ndwa yenene nongondjero okuvaza. Nandarire kutja tjiva va ri popezu poo kokure, Jehova aa vanga kutja avehe ve worongane okupuratena komarakiza we.

Ndino, katu worongana pondanda yomahakaeneno, nungwari tu ṋangwa okuworongana ku novakarere va Mukuru. Ihi matji kamburire mo, omaworonganeno worukondwa novitjitwa vyarwe vyapeke, putu kamuna omahongero omananḓengu nokupewa omuhunga. Momahi aehe ongondoroka nouye, ovakarere va Jehova ve yorokera omahongero yemwe. Kunao avehe mbe yakura omaṋangero nga ve tjaterwa okuya pamwe nu ve nondjoroka. Tjiva ve za kokure tjinene. Posi yokutja avehe mbe ya komaṋangero nga, ve tjiwa kutja ka mungandjo okutjita nao.

Hapo imba mbe ri kokure nomaworonganeno omanene ngo, wina ve muna mo ouwa? Mena rounongo woviungura wouye wa ka ndino, ovengi ve yenena okumuna ouwa koprograma otjingeyo, nowo wina ve rivara otjorupa romaworonganeno omanene. Otjotjihorera, omukuramenepo womberoo ohongora tjeya okuryangera orutavi rwomberoo  moBenin, wa nyanda oprograma moAlita, okarongo mu mwari omine mokuti onguza kwaSahara moNiger. Ovahongonone va Jehova, novandu varwe mba ri nonḓero omirongo vivari na umwe va woronganene pamwe. Nandarire kutja owo va ri kokure aave rimunu tjimuna va worongana pamwe na imba 44 131 mba ri pomaworonganeno ngo. Omurumendu omukambure umwe wa tjanga kutja: “Me tja okuhepa tjiri kokuturaisira otjitjitwa ho. Wina matji tu raisire kutja, eṋe mwe tu suvera tjinene.”

Indu omupristeri Omuisrael tja posisa ohiva rumwe uriri “imba ovanane vomihoko vyOvaisrael” ombaave ya pondanda yomahakaeneno. (Num. 10:4) Owo aave kapewa ondjivisiro nomahongero okuza ku Moses. Iho aa tji ve vatere kutja ve yenene okutjinda omihoko mbyaave nana nawa. Andakuzu wa ri umwe wovanane mbo, hapo kotjotjita ozongondjero okukara mbo kutja umune mo ouwa?

Ndino, ovanane vombongo ka veri tjimuna “ovanane vomihoko,” nu kave honaparere po orupanda rwa Mukuru neke rotjitenda. (1 Petr. 5:1-3) Nungwari ve kondja nomasa okutjevera orupanda rwa Mukuru nouṱakame. Mena ranao, owo ve yakura nonḓero omaṋangero womahongero ngu ve muna, tjimuna pOskole yOviungura vyOuhona. Pomahongero ngo ovanene vombongo ve hongwa omuano omusemba wokutjevera oviṋa vyombongo. Mena romahongero nga, ovanene vombongo na imba avehe mbe ri kehi yondjeverero yawo mombongo ve tumbuka popezu na Jehova. Nandarire kutja koire kozoskole nḓo, ove umuna ouwa mena rokutja imba mba ya ve ungurisa ondjiviro ndjo okuvatera ombongo.

Povikando tjiva ovapristeri wOvaisrael aave tono ozohiva mozombosiro pekepeke. Iho aa tji tjivisa kutja Jehova ma vanga ozondanda ze womboroke. (Num. 10:5, 6) Indu ovandu tjaa ve womborora ozondanda aave tjiti nao momuano omusemba, posi yokutja ya ri oviungura ovingi novizeu komundu auhe. Tjiva mape ya aave kara nozombameno ozengi. Omena raye?

Ngahino mena rokutja tjiva aave munu kutja omarundurukiro nga aaye ya tjimanga nu kaave undjire ko. “Nu porumwe otjikamba iyatji kara okuza kongurova nga komuhuka weyuva rarwe uriri.” Nu oruveze rwarwe ya ri “omayuva yevari poo omueze umwe poo orure komurungu wanao” nokuhiyatjinda. (Num. 9:21, 22) Nu hapo ondanda aai tjindi tungapi? Numeri ekondwa 33 ri tamuna otuveze 40 Ovaisrael pu va ka tona ozondanda.

Povikando tjiva Ovaisrael aave tono ozondanda poṋa pu pe nomuzire. Okutona ozondanda poṋa pu pe nomizire atja ku ve pa ondjoroka ‘mokuti okunene onguza.’ (Deut. 1:19) Nu iho aatji tjiti kutja ve ripure kutja koṋa ku mave tjindire ka kuwa.

Indu ozondanda tji za uta okutjindisiwa omihoko tjiva aavi hepa okukara nomuretima kokutja ve undje oruveze rwawo okutjinda. Avehe aave zuu ombosiro yohiva, posi yokutja kaave yenene okutjindira tjimwe. Ombosiro yohiva ndjo tji ya pose aai raisa kutja oviwaṋa mbya turire komuhuka tjimuna Ovajuda, Ovaisakar nOvasebulon aavi sokutjinda. (Num. 2:3-7; 10:5, 6) Kombunda ya indu tji va zu nokutjinda, ovapristeri aave posisa ohiva kotjikando otjitjavari kokutja omihoko vitatu vyokomamuho vi tjinde. Ovapristeri aave tjiti nao nga otjiwaṋa atjihe tji tja tjindi.

Mape ya ove u kara nozombameno ozengi okuyakura omarundurukiro nge tjitwa motjira tja Jehova. Mape ya oripura kutja pari omarundurukiro omengi. Poo ngahino wa suvera ongaro ndja ri po nu kovanga kutja i runduruke. Mape ya omunu kutja ouzeu okukara nomuretima okuyakura omarundurukiro ngo. Nandarire nao, indu tji twa kongorere omarundurukiro ngo Jehova metu sere ondaya.

Momayuva wa Moses, Jehova wa hongorera po ovarumendu, ovakazendu, novanatje mokuti onguza. Owo katja ve hupa andakuzu keeve hongorere po. Ndino, Jehova u tu hongorera po momayuva omasenina nga. Eye u tu vatera kutja tu kare noupanga wopopezu kuna ye nokukurisa ongamburiro yetu. Kunao eṱe matu vanga okukara nonḓuviro tjimuna otjiwaṋa tja Israel tjaa tji tjiti.