1. Ongwaye ovakarere va Jehova tji mape ya ave rimunu ourike povikando tjiva?

 OVENGI vetu povikando tjiva tu rimuna ourike. Nu ku tjiva okurimuna ourike ku kambura oruveze orusupi uriri. Posi yokutja, varwe mape ya ave rimunu ourike oure woruveze orure. Eṱe mape ya atu rimunu ourike nandarire kutja tu ri ongondoroka novandu. Tjiva ve muna ouzeu okutjita omapanga mombongo ombe. Nu varwe ve kurira meṱunḓu nda suvera okuungura oviṋa pamwe, kunao indu tji va tjindire kwarwe owo ve rimuna ourike. Varwe wina ve hihamenwa i yokukara pu nomusuverwa wawo ngwa ṱa. Nu Ovakriste tjiva, tjinenenene imba mbe ya mouatjiri oupe, ve rimuna ourike indu omaṱunḓu nomapanga wawo mbe he ri Ovahongonone tji mave ve ṋiṋikiza poo indu tji ve hi nokuvanga okukara puna wo rukwao.

2. Matu kazira omapuriro yeṋe?

² Jehova u tjiwa oviṋa avihe ohunga na eṱe. Indu tji matu rimunu ourike eye u tjiwa nu u vanga okutuvatera. Omomuano uṋe Jehova me tu vatera? Ovikwaye mbi matu yenene okutjita okurivatera oveni? Nu omomuano uṋe mu matu yenene okuvatera varwe mbe rimuna ourike mombongo? Ngatu katare komaziriro womapuriro ngo.

3. Omomuano uṋe Jehova ma raisa kutja ee rikende ohunga na Elia?

³ Jehova u vanga kutja ovakarere ve avehe ve kare nondjoroka. Eye u ri popezu na auhe wetu nu indu tji twa u momuinyo u muna. (Eps. 145:18, 19) Ripura ohunga nomuano Jehova mee rikende ohunga nomuprofete Elia nokutja we mu vatera vi. Omurumendu omuṱakame ngwo wa hupire moruveze indu Ovaisrael tji va munine ouzeu. Ovakarere va Jehova moruveze ndwo aave tatumisiwa tjinene. Nu imba mba ri mouvara mbaave pirukire Mukuru, aave vanga okuzepa Elia. (1 Ozomb. 19:1, 2) Elia wina aa munu kutja eye ongu ri omuprofete erike  ngwa sewa ko ngu karera Jehova, nu otjiṋa ho mape ya tje mu wisa momuinyo. (1 Ozomb. 19:10) Mukuru wa hakahana okuvatera Elia. Eye wa hinda omuengeli okumuraera kutja ku nOvaisrael varwe ovengi mbe kayenda komurungu okukarera Jehova nouṱakame.—1 Ozomb. 19:5, 18.

4. Otja ku Markus 10:29, 30, omomuano uṋe Jehova me raisa kutja u rikendera kovakarere ve mba nakaurwa i yomapanga poo omaṱunḓu wawo?

⁴ Jehova u tjiwa kutja indu tji twa toorora okumukarera, tjiva vetu mape ya atu hepa okutjita omarundurukiro omengi poo atu pandjara oviṋa ovingi. Omarundurukiro ngo mape ya aye kamburire mo okuhinokumuna ombatero okuza kovazamumwe vetu nomapanga mbe he ri Ovahongonone. Omuapostele Petrus ee rikende ohunga notjiṋa ho, nu wa pura Jesus kutja, “Eṱe twa isa oviṋa avihe natu Ku kongorere, nu matu munine po tjike?” (Mat. 19:27) Jesus norusuvero wa raera ovahongewa ve kutja ovakambure mombongo mave rire eṱunḓu rawo. (Lesa Markus 10:29, 30.) Nu Jehova Tate wetu wOmeyuru wa kwizika kutja ma vatere imba mbe vanga okumukarera. (Eps. 9:10) Tara koviṋa tjiva mbi mo yenene okutjita kutja u mune ombatero ya Jehova indu tji mo rimunu ourike.

5. Ongwaye tje ri otjiṋa otjiwa okuripura nomuano Jehova me ku vatera?

⁵ Ripura nomuano Jehova me ku vatera. (Eps. 55:22) Iho matji ku vatere kutja u kare noumune ouwa ohunga nongaro mu u ri. Omukazendu omukambure omukombe wena Carol, b ngu hi novazamumwe mouatjiri wa tja: “Indu tji me ripura ohunga nomuano Jehova me ndji vatera okutuurunga omauzeu wandje, ku ndji vatera okumuna kutja kawami erike. Nu ku ndji pongamburiro kutja aruhe ma kara mbo okundjivatera.”

6. Etjangwa ra 1 Petrus 5:9, 10 mari yenene vi okutunduuza imba mbe rimuna ourike?

⁶ Ripura nomuano Jehova me vatera ovakambure ovakwetu mbe rimuna ourike. (Lesa 1 Petrus 5:9, 10.) Omurumendu omukambure wena Hiroshi ngwa ri Omuhongonone erike meṱunḓu re oure wozombura ozengi, wa tja: “Indu tji u ri mombongo, irira oupupu  okumuna kutja omundu auhe u nomauzeu. Okutjiwa kutja atuhe tu kondja pu matu yenene okukarera Jehova, maku yenene okutunduuza ovakambure mbe hi novazamumwe mouatjiri tjimuna ami.”

7. Okukumba ku ku vatera vi?

⁷ Kayende komurungu okukumba, okulesa Ombeibela nokukara pozombongarero zombongo aruhe. Okukumba ku kamburira mo okuraera Jehova ongaro aihe mu u ri. (1 Petr. 5:7) Tara kotjihorera tjomukazendu omukambure omutanda wena Massiel, ngwee rimunu ourike mena rokutja wa ri erike ngwaa karere Jehova meṱunḓu re. Massiel wa tja: “Otjiṋa tjimwe otjinanḓengu tjinene tji tje ndji vatera kutja e he rimunu ourike ya ri okukumba okuza komutima ku Jehova. Eye wa ri tjimuna Tate, nu ee kumbu ku ye eyuva arihe povikando ovingi okumuraera ongaro mu mba ri.”

8. Okulesa Embo ra Mukuru nokuripurira ko oukoto ku ku vatera vi?

⁸ Lesa Embo ra Mukuru eyuva arihe nu ripurira ko oukoto kovihorera mbi mavi raisa kutja Jehova we ku suvera. Omukazendu omukambure wena Bianca ngu hungirwa omambo omavi i yeṱunḓu re, wa tja: “Okulesa nokuripurira ko oukoto kovihorera vyOmbeibela novihorera vyovakarere va Jehova mba tuurunga omatokero tjimuna oyandje, ku ndji vatera tjinene.” Ovakriste tjiva ve rihonga Omatjangwa motjiuru ngu maye ve huhumiṋa, tjimuna Epsalme 27:10 na Jesaja 41:10. Varwe ve ungurisa ovipuratenwa indu tji mave rirongerisa kozombongarero zombongo, poo tji mave lese Ombeibela yawo. Owo ve tja okutjita nao ku ve vatera tjinene kutja ave he rimunu ourike.

9. Hapo okuyenda kozombongarero zombongo ku ku vatera vi?

⁹ Kondja pu mo yenene okukara pozombongarero zombongo aruhe. Oprograma yombongarero mai yenene okukuvatera, nu ove wina mo utu okutjiwa ovakambure ovakweṋu nawa. (Hebr. 10:24, 25) Massiel ngwa tamunwa rukuru, wa tja: “Nandarire kutja mba ri nohoṋi, ami mba tya okuyenda kozombongarero zombongo azehe nokuyandja eziriro. Iho tje ndji vatera kutja mbi mune kutja wina owami orupa rwombongo.”

10. Ongwaye tje ri ounanḓengu okutjita oupanga ku novakambure ovaṱakame mombongo?

¹⁰ Tjita oupanga ku novakambure ovaṱakame. Paha omapanga mombongo ngu mo yenene okurihongera ko. Owo mave yenene okurira ovanene poo ovaṱiṱi pove, poo nandarire vombazu ndja panguka ku indji oyoye. Ombeibela i tu zemburukisa kutja “ovakurundu ve nounongo.” (Job 12:12) Ovakambure ovanene motjiwondo mave yenene okurihonga ovingi okuza kovakambure omitanda mombongo.  David wa ri omuṱiṱi tjinene pu Jonatan, posi yokutja iho katji ve tjaerere okukara noupanga ouwa kumwe. (1 Sam. 18:1) David na Jonatan aave vaterasana okukayenda komurungu okukarera Jehova nandarire kehi yozongaro ozonḓeu. (1 Sam. 23:16-18) Omukazendu omukambure wena Irina ngu ri Omuhongonone wa Jehova erike meṱunḓu re, wa tja: “Ovakambure ovakwetu tjiri mave yenene okurira ovanene poo ovazamumwe vetu. Jehova ma yenene okuveungurisa kutja ve rire eṱunḓu ndi matu hepa.”

11. Ovikwaye mbi matu sokutjita kutja tu kare noupanga wopopezu kuna varwe?

¹¹ Okutjita omapanga mape ya katjiṋa otjipupu, tjinenenene tji u nohoṋi. Omukazendu omukambure wohoṋi wena Ratna ngwe rihonga ouatjiri nandarire indu varwe tjaave mu pirukire, wa tja: “Ami mba muna kutja ee hepa ombatero okuza kovakambure ovakwetu mombongo.” Katjiṋa otjipupu okuraera omundu ongaro mu u ri, posi yokutja indu tji wa tjiti nao omundu ngo ma yenene okurira epanga roye ropopezu. Omapanga woye ye vanga okukuyanḓiparisa nokukuvatera. Posi yokutja, owo mave hepa okutjiwa kutja omomuano uṋe mu mave yenene okutjita nao.

12. Omomuano uṋe otjiungura tjokuzuvarisa mu matji yenene okukuvatera okutjita omapanga omawa?

¹² Omuano umwe omuwa wokutjita omapanga okupita motjiungura tjokuzuvarisa pu nOvakriste varwe. Carol ngwa tamunwa rukuru, wa tja: “Ami mba muna omapanga omengi omawa mokukara pu novakazendu ovakambure motjiungura tjokuzuvarisa, na moviungura vyarwe motjira tja Jehova. Oure wozombura ozengi Jehova wa ungurisa omapanga ngo okundjivatera.” Okutjita oupanga ku nOvakriste ovaṱakame tjiri ku tu yetera ouwa. Jehova u ungurisa omapanga otja ingo okutuvatera kutja atu he rimunu ourike.—Omiano 17:17.

13. Omerizirira yeṋe avehe mombongo ngu ve nawo?

¹³ Avehe mombongo ve nomerizirira wokutjita kutja pe kare ohange norusuvero, nokutja a pe ha kara omundu ngu me rimunu ourike. (Joh. 13:35) Oviṋa mbi matu tjiti nokuhungira mavi yenene okutunduuza varwe tjinene. Tara ku imbi omukazendu omukambure mbya hungira. Eye wa tja: “Indu tji mbe rihonga ouatjiri ovakambure mombongo va rira eṱunḓu randje. Ami he tje yenena okurira Omuhongonone wa Jehova nokuhinombatero yawo.” Ove mo yenene okutjita vi okuvatera imba mbe ri aveyerike mouatjiri okurimuna kutja orupa rwombongo?

14. Ovikwaye mbi mo yenene okutjita kutja u tjite oupanga kuna imba ovape mombongo?

¹⁴ Kondja okutjita oupanga kuna imba ovape. Eṱe matu vanga okuyakura imba ovape mombongo norusuvero. (Rom. 15:7) Posi yokutja, matu vanga okutjita ovingi pendje nokuvekorisa uriri. Otja oruveze tji maru kayenda matu vanga okukara noupanga ouwa kuna wo. Kunao, norusuvero ve raisira kutja tjiri ove u rikendera ku wo. Kondja okutjiwa kutja omauzeu yeṋe ngu mave munu, nu o pura omapuriro ngu mape ya aye ve ṱisa ohoṋi. Mape ya ai rire ouzeu ku tjiva okukuraera ongaro mu ve ri, kunao o ve ṋiṋikiza okuhungira. Moruveze rwanao, ve pura omapuriro nongengezero nu u ve puratene nomuretima. Otjotjihorera, ove mape ya ove pura omuano mu va tjiwa ouatjiri.

15. Omomuano uṋe Ovakriste mbe noupanga ouwa kuna Jehova mu mave vatere varwe mombongo?

¹⁵ Indu Ovakriste mbe noupanga ouwa kuna Jehova, tjinenenene ovanene vombongo tji mave raisa onḓero mu varwe, ongamburiro ya auhe mombongo mai kurire ko. Omukazendu omukambure wena Melissa ngwe kurisiwa i  ina mouatjiri, wa tja: “Ami tjiri mbi nondangi kovarumendu ovakambure mba ri tjimuna ootate kwami nu mbaave twapo oruveze okukara puna ami. Aruhe pa ri nomundu okundjipuratena, indu tji me hepa okuhungira.” Omurumendu omukambure omutanda wena Mauricio ee rimunu ourike, indu omundu ngwe mu honga Ombeibela tja isa ouatjiri. Eye wa tja: “Ovanene vombongo aave rikendere ku ami nu iho tje ndji vatera tjinene. Owo aruhe aave hungire kuna ami. Aatu ungura pamwe motjiungura tjokuzuvarisa nu aave ndji raere oviṋa mbi va toora momakonḓononeno wawo oveni wOmbeibela. Owo nandarire aave nyanda kuna ami omanyando wokurikuturisa orutu.” Melissa na Mauricio nai ve karera Jehova oruveze aruhe.

16-17. Omomiano viṋe vyarwe mu matu yenene okuvatera varwe?

¹⁶ Omiano vyarwe vyokuvatera. (Gal. 6:10) Omurumendu omukambure wena Leo ngu karera otjomuhindwa mehi rarwe kokure novazamumwe ve, wa tja: “Indu tji tu ri mouzeu otjiṋa tji tu hepa okutjindwa nawa. Ami me zemburuka eyuva rimwe indu tji mba ri moumba wohauto. Indu tji mba vaza ponganda, ami mba ri nombameno tjinene. Posi yokutja kombunda yanao, pa ri ovakupasane mbe ndji ṋanga keriro. Ami hi zemburuka ovikurya mbi twa rya, posi yokutja mbi zemburuka omuano omuwa mu ve ndji puratena. Nu korusenina ami mba kutukire momuinyo.”

¹⁷ Eṱe atuhe tu kara nondjoroka indu tji tu ri pu novakambure ovakwetu, nokuhungirira komahungi ngu twa zuu povitjitwa tjimuna omaworonganeno worukondwa na inga wotukondwa. Posi yokutja, Carol ngwa tamunwa rukuru, wa tja: “Ami mbi rimuna ourike tjinene indu tji mbi ri pomaworonganeno worukondwa na inga wotukondwa.” Omena raye? Eye komurungu wa tja: “Nandarire kutja pomaworonganeno nga pe kara ovakambure ovakwetu ovengi, owo potuingi ve kara pu nomaṱunḓu wawo. Ami tji me ve munu, mbi rimuna ourike.” Ku varwe irira ouzeu okuyenda komaworonganeno worukondwa poo inga wotukondwa, kombunda yokuzepaisa omundu ngu va kupasana. Hapo ove mo tjiwa omundu ngu ri mozongaro otja inḓo? Ma rire nawa tji wa ṋanga omundu ngwo okuyekukara puna ove neṱunḓu roye pomaworonganeno ngu maye ya.

18. Omomuano uṋe mu matu yenene okuṱakamisa etjangwa 2 Ovakorinte 6:11-13, indu tji matu sekirisa varwe?

 ¹⁸ Tjita oruveze okukara puna varwe. Kondja okukara pu novakambure pekepeke, tjinenenene imba mbu mo munu kutja mape ya ave rimunu ourike. Eṱe tu vanga kutja ‘omitima vyetu vi kare kamwaha,’ tjinenenene ku imba mbe ri mongaro otja indjo. (Lesa 2 Ovakorinte 6:11-13.) Melissa ngwa tamunwa rukuru, wa tja: “Eṱe aruhe aatu kara nondjoroka tjinene indu ovakambure tji ve tu ṋanga kozoyawo poo okutoora ouyenda puna wo.” Hapo pe nomundu mombongo yoye ngu mo yenene okusekirisa?

19. Omozongaro zeṋe ovakambure ovakwetu tji ve hepa kutja tu tjite oruveze okukara puna wo?

¹⁹ Mape ya a pe kara otuveze indu Ovakriste ovakwetu tji mave kara nondangi tjinene tji twa twapo oruveze okukara puna wo. Ku tjiva mape ya a rire ouzeu okukara pu nomaṱunḓu wawo mbe he ri Ovahongonone va Jehova, indu tji mave zemburuka ovitjitwa mbi ha zikamene kOmbeibela. Varwe mape ya ave u momuinyo meyuva ndi omusuverwa wawo tja ṱa. Indu tji twa tjiti oruveze okukara pu novakambure mbe ri kehi yozongaro otja inḓo, eṱe matu raisa kutja tjiri tu “rikendera” ku wo.—Fil. 2:20.

20. Omomuano uṋe omambo wa Jesus nge ri mu Mateus 12:48-50 mu maye yenene okutuvatera, indu tji matu rimunu ourike?

²⁰ Pe nomapu omengi nge tjita kutja Omukriste povikando me rimune ourike. Posi yokutja, eṱe matu sokuzemburuka kutja Jehova u tjiwa ongaro mu tu ri. Eye potuingi u ungurisa ovakambure ovakwetu okutupa ombatero ndji matu hepa. (Lesa Mateus 12:48-50.) Eṱe tu raisa ku Jehova kutja tu nondangi kovakambure ovakwetu mombongo, indu tji matu kondjo pu matu yenene okuvevatera. Nandarire kutja povikando tu rimuna ourike, ngatu zemburuke kutja Jehova aruhe u ri puna eṱe.