1-2. Ouzeu waye mbu tu muna ndino mbu ri tjimuna owa Lot?

 INDU tji matu munu ozongaro ozombi zovandu ndino mouye, tu kara noumune tjimuna owa Lot. Eye wa “munine ouzeu kehi yotjikaro otjihakohoke tjovandu ovehinaNdjambi,” mena rokutja aa tjiwa kutja Tate wetu womeyuru wa tonda omeritjindiro omavi. (2 Petr. 2:7, 8) Mena rokutja Lot wa ri nondengero nu wa suverere Mukuru tjinene, eye wa tondere ongaro ombi yovandu ongondoroka na ye. Eṱe wina tu ri mokati kovandu mbe hi nondengero komirari vya Jehova vyomeritjindiro. Nandarire nao, eṱe matu yenene okukayenda komurungu okurira ovakohoke mongaro yomeritjindiro indu tji tu norusuvero nondira ku Mukuru.—Omiano 14:2.

² Jehova u tu vatera okutjita nao okupitira momayanḓiparisiro ngu tu muna membo rOmiano. Ovakriste avehe ovarumendu novakazendu, ovaṱiṱi novanene mave yenene okumuna ouwa indu tji mave ripurire komaronga nge ri membo rOmiano ndo.

3. Otja kOmiano 17:3, ongwaye tji tu hepa okutjevera omutima wetu? (Wina tara kotjiperendero.)

³ Epu rimwe enanḓengu ndi tjita kutja tu tjevere omutima wetu, omena rokutja Jehova u konḓonona omutima wetu. Eye u muna oviṋa ovingi vyarwe mbi ve ha yenene okumuna nu u tjiwa kutja oweṱe ovangendu mourekoto womitima vyetu. (Lesa Omiano 17:3.) Eye me tu suvere indu tji twe ripurire kounongo we mbu mau tu vatere kutja tu hupe nga aruhe. (Joh. 4:14) Ku nao, eṱe kamaatu hihamisiwa i yozongaro ozombi novizeze vya Satan  novandu ovarunde mbe ri mouye we. (1 Joh. 5:18, 19) Indu tji twa tumbuka popezu na Jehova, orusuvero rwetu nondengero ku ye mavi kurire ko. Mena rokutja eṱe katu nokuvanga okuhihamisa Tate wetu, eṱe matu tondo nandarire omeripura wokutjita ouvi. Indu tji matu rorwa kutja tu tjite ouvi, matu yenene okuripura kutja, ‘Omena raye tji me tjitire wina okuhihamisa Omundu ngwe ndji raisira orusuvero nḓu ṱa mbo?’—1 Joh. 4:9, 10.

4. Omomuano uṋe ondira ku Jehova mu ya vatera omukazendu omukambure kutja a ha tjiti otjiṋa otjivi?

⁴ Marta, omukazendu omukambure moCroatia ngwa muna omarorero okutjita ouvi, wa tja: “Ya ri ouzeu kwami okuripura nawa nokurwisa onḓero yokutjita otjiṋa otjivi. Posi yokutja ondira ku Jehova ye ndji yama.” b Omomuano uṋe ondira ku Mukuru mu ye mu yama? Marta wa tja eye we ripurira oukoto kovikongorere ko mbya tja vi kara po indu tja tjiti otjiṋa otjivi. Eṱe matu yenene okutjita nao wina. Otjiṋa otjivi tjinene, matu hihamisa Jehova nu kamaatu yenene okurikotamena ku ye nga aruhe.—Gen. 6:5, 6.

5. Mo yenene okurihongera ko ye kotjihorera tja Leo?

⁵ Indu tji tu nondira ku Jehova, eṱe tu kondja kutja atu ha tjiti oupanga novandu mbe tjita oviṋa ovivi. Leo ngwa tura moCongo, we rihonga otjiṋa hi. Ozombura ine kombunda yombapitisimo ye, eye wa tjita oupanga ku novandu mbe tjita oviṋa ovivi. Eye aa munu kutja ke ri posyo, mena rokutja eye omuini kangwa tjiti oviṋa ovivi. Tjimanga, omapanga omavi nga ya tjita kutja ma ute okunwa otjikariha okukapitisa etota nokukara notukatuko. Kombunda eye wa uta okuripura na imbi ovanene ve Ovakriste mbi ve mu honga, nondjoroka ndja ri na yo indu tjaa karere Jehova. Kwa kongorera iye? Eye wa uta okutjita imbi mbi ri ovisemba rukwao. Ovanene vombongo ve mu vatera okukotoka ku  Jehova. Ndino eye u karera otjomunene wombongo nomukandjira wapeke nondjoroka.

6. Otjihorera tjiṋe tjovakazendu vevari ku matu kahungirira?

⁶ Indjo tu tare kembo rOmiano ekondwa 9, mu matu kalesa ohunga nounongo nouyova mbwa sasanekwa novakazendu vevari. (Sasaneka Ovaroma 5:14; Ovagalate 4:24) Otja tji matu tjiti nao, zemburuka kutja ouye wa Satan u ripurira tjinene korukatuko noviperendero vyakamuzu. (Ef. 4:19) Ku nao, ounanḓengu ku eṱe okukara okukayenda komurungu okukara nondira ku Mukuru nokunakaura oviṋa ovivi. (Omiano 16:6) Atuhe, kutja oweṱe ovarumendu poo ovakazendu, matu yenene okumuna mo ouwa okuza mekondwa ndi. Auhe wovakazendu vevari mba kwa za ve ṋanga imba ovehinondjiviro okutja owomba ‘ovehinazondunge.’ Mape ya auhe wa tja, ‘Hita mondjuwo yandje tu ye ku rya ovikurya.’ (Omiano 9:1, 5, 6, 13, 16, 17) Posi yokutja mbya tjitwa ku imba mba yakura omaṋangero nga, vya panguka tjinene.

7. Otja kOmiano 9:13-18, ku tjitwa tjike ku imba mba yakura omaṋangero womukazendu eyova? (Wina tara kotjiperendero.)

⁷ Tara komaṋangero ‘womukazendu eyova.’ (Lesa Omiano 9:13-18.) Eye nokuhinohoṋi u ṋanga imba mbe hi nondjiviro okuhita mo ye nokukara pu na ye. Hapo ku katjitwa ye ku wo? “Ovandu mbe yenda kondjuwo ye ve kakoka.” Ove mape ya o zemburuka omasasanekero otjingeyo nga tamunwa rukuru membo rOmiano. Eṱe twa rakiziwa ohunga ‘nomukazendu womukweṋu, ngu hi nouṱakame momurumendu we omuini.’ Eṱe twa raerwa kutja: “Tji mo i kondjuwo ye, indino pa sana nokuyenda konḓiro.” (Omiano 2:11-19) MOmiano 5:3-10 mu nerakiza rarwe ohunga ‘nomukazendu wambangu’ nu “ondjira eye me kawondja oyokutwara konḓiro.”

8. Matu sokutoora omukambo uṋe?

⁸ Imba mbu mave zuu ‘omukazendu eyova’ mave sokutara kutja mave yakura poo mave nakaura omaṋangero we. Eṱe wina mape ya atu kara mongaro otja indjo. Matu tjiti vi, indu omundu tji ma kondjo kutja tu tjite otjiṋa otjivi poo tji twe rihaka koviperendero vyakamuzu?

9-10. Omapu yeṋe ngu maye tu vatere okunakaura oruvakiro?

⁹ Pe nomapu omasemba ku twa sokunakaurira orukatuko. ‘Omukazendu eyova’ wa tja: “Omeva omavaka ye tjata omuzeze.” “Omeva omavaka” otjikwaye? Ombeibela i sasaneka omahakaeneno womonyama pokati kovakupasane ku nomeva omakovise. (Omiano 5:15-18) Omurumendu nomukazendu mba kupasana kotjiveta va yandjerwa okuyorokera omahakaeneno  womonyama. Oyo ya panguka ‘komeva omavaka.’ Oyo mape ya ai hee oruvakiro. Ovandu mbe tjita oruvakiro popengi ve kondja okuhoreka ku varwe, tjimuna erunga tji ri kondja okuvaka oviṋa mongumumu. “Omeva omavaka” ye munika aayo omawa indu imba mbu mave tjiti nao tji mave munu kutja kape nomundu ngu ma tjiwa imbi mbi va tjiti. Owo ve riwovisa oveni mena rokutja Jehova u muna oviṋa avihe. Indu tji twa pandjara oupanga wetu ku na Jehova, iho otjiṋa otjivi tji matji yenene okutjitwa kweṱe nu katji tjata “omuzeze.” (1 Kor. 6:9, 10) Posi ya pe na varwe ovingi.

¹⁰ Otukatuko mape ya atu eta ohoṋi, atu wisa onḓengu yomundu, atu eta omaṱumbaparero nge ha undjirwa ko nu tu teya omaṱunḓu. Tjiri okunakaura omaṋangero omukazendu eyova ounongo. Pendje nokupandjara oupanga wawo ku na Jehova, ovandu ovengi mbe tjita otuvakiro ve vera omitjise mbi mavi yenene okuvezepa. (Omiano 7:23, 26) Ezeva 18 mekondwa 9 ma ri tja: “Imba mba tenga po okuhita, nai ve ri mourekoto wotjovakoke.” Ongwaye ovengi tji ve yakura omaṋangero we nge twara koumba?—Omiano 9:13-18.

11. Omena raye okutarera oviperendero vyakamuzu tji ku ri okunaumba tjinene?

¹¹ Otjiṋa tjimwe tji matu hepa okukara kokure natjo oviperendero vyakamuzu. Ovandu tjiva ve muna kutja okutara oviperendero vyakamuzu katjiṋa otjinaumba. Posi yokutja oviperendero vyakamuzu vi hihamisa ovandu, vi tjita kutja ve pandjare ondengero ku wo oveni na ku varwe nu irira ouzeu okuisa okuvitarera. Indu ovandu tji va munu oviperendero ovivi mbi, irira ouzeu okuvizemba. Oviperendero vyakamuzu wina kavi vatere ovandu okukoza ozonḓuma ozombi, nungwari ovyo vi pendura ozonḓuma nḓo. (Kol. 3:5; Jak. 1:14, 15) Tjiri ovengi mbe tarera oviperendero vyakamuzu ve kakara mozongaro zoruvakiro.

12. Omomuano uṋe mu tu raisa kutja eṱe tu kondja okunakaura oviperendero mbi pendura ozonḓuma mweṱe?

¹² Matu yenene okutjita vi Otjovakriste indu tji twa munu otjiperendero tjakamuzu motjiungurisiwa tjetu nokuhinokuundjira ko? Tu sokuhakahana okuhinokutara ku tjo. Ma rire oupupu kweṱe okutjita nao indu tji matu rizemburuka kutja otjiṋa otjinanḓengu tjinene kweṱe, oupanga wetu ku na Jehova. Nandarire oviperendero mbi he ri oviperendero vyakamuzu mape ya avi pendura ozonḓuma. Omena raye tji twa sokuvinakaura? Mena rokutja katu nokuvanga okutoora omukambo nangarire omuṱiṱi mbu mau tjiti kutja tu ripure okutjita otjiṋa ngamwa otjivi. (Mat. 5:28, 29) Omunene wombongo moThailand wena David wa tja: “Ami mbi ripura omuini kutja, ‘Nandarire kutja oviperendero mape ya kavyakamuzu, hapo Jehova ma kara nonyuṋe indu tji me kayenda komurungu okutara ku vyo?’ Ouripura otja imbwo u ndji vatera okutoora omikambo mbi ri vyo.”

13. Otjikeṋa tji matji tu vatere okutoora omikambo omisemba?

¹³ Tji twa kara nondira okutjita otjiṋa ngamwa atjihe tji matji tjiti Jehova a ha kara nondjoroka, matji tu vatere kutja tu toore omikambo omisemba. Ondira ku Mukuru oyo “ombutiro younongo.” (Omiano 9:10) Ihi tja handjaura pomautiro wembo rOmiano ekondwa 9, “ounongo” mu wa sasanekwa nomukazendu warwe.

14. Omaṋangero yeṋe warwe nge ri mOmiano 9:1-6?

¹⁴ Lesa Omiano 9:1-6. Imba matu lese ohunga nomaṋangero okuza ku Jehova ngu ri Omuute wetu nOmburo younongo auhe. (Omiano 2:6; Rom. 16:27) Imba matu lese ohunga nondjuwo onene ndji nozongunḓe hambombari. Ihi matji raisa kutja Jehova omuharupu nu u yakura avehe mbu mave vanga okuṱakamisa ounongo we mehupo rawo.

15. Mukuru u tu ṋanga okutjita ye?

 ¹⁵ Jehova eye omuharupu nu u yandja ovingi. Otja kotjihorera tjomukazendu ngwa sasanekwa ‘otjounongo’ mOmiano ekondwa 9, twe rihongo kutja Jehova omuharupu nu u tu pa oviṋa ovingi oviwa. Omazeva nga maye tja omukazendu ngwi wa ṋanga ovaṋangwa okuya koye nokuyekurya eriro ewa ndi nonyama nomavinu eye nda rongerisa. (Omiano 9:2) Otja kezeva 4 no-5: “[Ounongo] komayova owo mau tja nai: ‘Indjeye mu ye okurya ovikurya vyandje.’” Omena raye tji twa sokuyakura omaṋangero okuza komukazendu ngwi? Jehova u vanga ovanatje ve okurira ozonongo nokukara mondjeverero. Eye kavanga kutja tu tjite ozondataiziro nḓu maze tu hihamisa. Mena ranao “Eye ongu ri ombwiro yombatero noyondjamo kovandu ovasemba.” (Omiano 2:7) Indu tji tu nondira ku Jehova, matu vanga okumuyorokisa. Eṱe tu zuva erakiza re rounongo nu tu kara nondjoroka okuriṱakamisa.—Jak. 1:25.

16. Omomuano uṋe ondira ku Mukuru mu ya vatera Alain okutoora omukambo omusemba, nu kwa tjitwa tjike?

¹⁶ Tara komuano okukara nondira ku Mukuru mu kwa vatera Alain okutoora omukambo omusemba. Alain omunene wombongo nu omiṱiri yoskole. Eye wa tja: “Ovandu ovengi mbu tu ungura pamwe ve vara oviperendero vyakamuzu otjomuano wokurihonga ohunga nomahakaeneno womonyama.” Posi yokutja eye aa tjiwa kutja imbo kauatjiri. Eye wina wa tja: “Mena rokutja ami mba suvera nu mbi nondengero ku Jehova, ami mba panḓa oparukaze okutarera oviperendero mbyo. Ami wina mba kahurura kovandu mbu tu ungura pamwe kutja omena raye.” Eye aa ṱakamisa omaronga ‘younongo,’ ngu maye tja “twareye ondjira yozondunge.” (Omiano 9:6) Ozomiṱiri zarwe tjiva za tjaterwa i yongurameno ya Alain, nga tji za uta okurihonga Ombeibela nokukara pozombongarero zombongo.

17-18. Ozondaya zeṋe imba mbe yakura omaṋangero okuza ‘kounongo’ nḓu ve yorokera, nu mave yenene okuundjira ko ye? (Wina tara kotjiperendero.)

¹⁷ Jehova u ungurisa ovihorera vyovakazendu vevari mbo okuturaisira kutja omomuano uṋe mu matu yenene okukara noruyaveze rwondjoroka. Imba mbe yakura omaṋangero ‘womukazendu eyova’ ve kondja okumuna ondjoroka moruvakiro. Posi yokutja owo kave munu kutja imbi mbi mave tjiti mavi ṱunu ku imbi mbi mavi katjitwa ku wo moruyaveze. Ovitjitwa vyawo mavi ve twara konḓiro.—Omiano 9:13, 17, 18.

¹⁸ Imba mbu mave yakura omaṋangero womukazendu ngu kuramena po “ounongo” mave kakara noruyaveze ndwa panguka. Nowo ve nondjoroka mena rokutja ve noviṋa avihe mbi mave hepa okuveṱizira popezu na Jehova. (Jes. 65:13) Okupitira momuprofete Jesaja, Jehova  wa tja: “Purateneye ku Ami mu tjite imbi mbi me hungire, neṋe mamu ri ovikurya imbi oviwaviwa pu avihe.” (Jes. 55:1, 2) Eṱe tu rihonga okusuvera imbi Jehova mbya suvera nokutonda imbi eye mbya tonda. (Eps. 97:10) Nu eṱe tu nondjoroka mena rokutja matu yenene okuṋanga varwe okuyekurihonga okuza ‘kounongo’ mbwi. Eṱe tu ri tjimuna ovakarere mbe isana “pozondongamo zotjihuro amave tjivisa nai: ‘Indjeye, vandu ovehinondjiviro!’” Eṱe na imba mbe yakura omaṋangero nga, tu muna ouwa nai, nu ouwa mbo mau karerere nu mau tjiti kutja tu ‘kahupe’ nga aruhe otja ‘tji matu twara ondjira yozondunge.’—Omiano 9:3, 4, 6.

19. Otja kOmuzuvarise 12:13, 14, matu sokurimanena okutjita tjike? (Wina tara kokawongo nga “ Ondira ku Mukuru i tu pa ouwa.”)

¹⁹ Lesa Omuzuvarise 12:13, 14. Ondengero onene ku Jehova, i tu tjevera nu i tu vatera okukara nomeritjindiro omakohoke nokukara popezu na ye momayuva omasenina nomavi nga. Eṱe matu kayenda komurungu okuṋanga ovandu ovengi otja pu matu yenene okupaha “ounongo” nokurihongera ku wo, mena rokutja eṱe tu nondengero nu twa suvera Jehova nomitima vyetu avihe.