1. Eṱe matu sokutjita vi kutja tu tuurunge eyuva ra Muhona?

 INDU Ombeibela tji mai hungire ohunga ‘neyuva raMuhona,’ mai hee oruveze indu Jehova tji ma kanyona ovanavita na ye, natji ma kaeta ondjamo kovakarere ve. Morukapitaveze, Jehova wa eta omberero koviwaṋa tjiva. (Jes. 13:1, 6; Esek. 13:5; Sef. 1:8) Momayuva wetu, “eyuva raMuhona” mari utu indu ovanane vopolotika tji mave wire Babilon Otjinene, nu mari kayanda novita vya Armagedon. Matu sokurirongerisa nai kutja tu tuurunge “eyuva” ndo. Jesus wa honga kutja matu ‘sokukara atwe rirongerere’ “ozombamisiro ozonene tjinene,” pu mape hee kutja matu sokukayenda komurungu okutjita nao aruhe.—Mat. 24:21; Luk. 12:40.

2. Omena raye tji matu yenene okumuna ouwa okuza mOvatesalonika ovatenga?

² Morutuu rwe orutenga kOvatesalonika, omuapostele Paulus wa ungurisa ovisasanekero okuvatera Ovakriste okukara ave rirongerisire eyuva ra Jehova enene rombanguriro. Paulus aa tjiwa kutja eyuva ra Jehova kamaari ya oruveze ndwo. (2 Tes. 2:1-3) Posi ya eye wa tunduuza ovakambure ovakwao okurirongerisira eyuva ndo tjimuna mari ya muhuka, nu eṱe wina matu yenene okuṱakamisa omaronga we. Ngatu katare komakahururiro we ohunga noviṋa mbi: (1) kutja eyuva ra Jehova mari ya momuano uṋe, (2) ooveṋe mbu mave tuurunga eyuva ndo, nu (3) matu yenene okurirongerisa vi kutja tu tuurunge.

3. Omomuano uṋe eyuva ra Jehova mu mari ya otja erunga mouṱuku? (Wina tara kotjiperendero.)

³ “Otja erunga mouṱuku.” (1 Tes. 5:2) Ihi itjimwe tjovihorera vitatu mbya ungurisiwa okukahurura omeero weyuva ra Jehova. Potuingi omarunga ye ya mouṱuku tji kwa zorere indu ovandu tji ve hi nokuundjira ko. Eyuva ra Jehova wina mari ya tjimanga, ngunda ovandu ovengi ave hi nokuundjira ko. Nandarire Ovakriste vatjiri mape ya ave himisiwa i yomuano oviṋa mu mavi tjitwa  tjimanga. Posi yokutja, eṱe katu nokukanyonwa tjimuna ovarunde.

4. Omomuano uṋe eyuva ra Jehova mu ri ri tjimuna ozongama zomukazendu otjingundi?

⁴ “Tjimuna ozongama zomukazendu otjingundi.” (1 Tes. 5:3) Omukazendu otjingundi kamaa tjiwa oiri ndji ma kapanduka. Posi yokutja, eye ke nomakeyakeyero kutja eyuva ndo mari ya. Indu tji re ya, ombandukiro nomihihamo mavi ya tjimanga nu kape notjiṋa tji matji yenene okuvitjaera. Momuano otjingewo, eṱe katu nokutjiwa eyuva noiri eyuva ra Jehova mu mari ya. Posi ya, eṱe tu nongamburiro kutja oro mari ya nokutja ombanguriro ya Mukuru kovarunde mai ya hakahana nu kave nokuyenena okuiyepa.   

5. Omomuano uṋe ozombamisiro ozonene tjinene mu ze ri tjimuna enyunguhuka?

⁵ Tjimuna menyunguhuka. Otjisasanekero otjitjatatu tja Paulus wina tji tamuna omarunga ngu maye vaka mouṱuku. Posi yokutja, otjikando hi Paulus wa sasaneka eyuva ra Jehova ku nenyunguhuka. (1 Tes. 5:4) Omarunga nge ya mouṱuku mape ya aye ha yandja ombango koiri. Omatjiro weyuva epe mape ya aye ve vaza ave hi nokuundjira ko nu ave munika. Momuano otjingewo, ozombamisiro ozonene tjinene maze tjiukisa imba mbe kayenda monḓorera tjimuna omarunga, nu mbe tjita oviṋa mbi ha tjata ku Mukuru. Eṱe matu yenene okurirongera mokunakaura ovitjitwa mbi ha tjata ku Jehova nokutjita “oviṋa ngamwa avihe vyouwa nousemba nouatjiri.” (Ef. 5:8-12) Okuzambo Paulus wa ungurisa ovisasanekero vivari okuhungira ohunga na imba mbe hi nokutuurunga eyuva ndo.

6. Omomuano uṋe ovengi mu ve ri tjimuna ovandu mba rara? (1 Ovatesalonika 5:6, 7)

⁶ Owomba “mbe rara.” (Lesa 1 Ovatesalonika 5:6, 7.) Paulus wa sasaneka imba mbe hi nokutuurunga eyuva ra Jehova ku novandu mba  rara. Owo kave tjiwa oviṋa ongondoroka na wo poo omakayendero woiri. Ku nao, owo kamaave tjiwa indu tji pa tjitwa otjiṋa otjinanḓengu nu kamaave yenene okutjita ko otjiṋa. Ovandu ovengi ndino ve ri tjimuna ovandu mba rara. (Rom. 11:8) Owo kave kambura moviraisiro mbi raisa kutja tu hupa “momayuva omasenina” nokutja ozombamisiro ozonene tjinene maze ya moruveze rwopopezu. Indu tji kwa tjitwa omarundurukiro omanene mouye, ovandu tjiva ve uta okukara nonḓero mombuze yetu yOuhona. Posi yokutja, ovengi ve yaruka mozomboṱu pendje yokukara katumba. Nandarire tjiva mbe kambura meyuva rombanguriro ve muna kutja ri ri kokure. (2 Petr. 3:3, 4) Posi yokutja, eyuva arihe i rira ounahepero kweṱe okukara katumba.

7. Omomuano uṋe imba mbu mave kanyonwa i Mukuru mu ve ri tjimuna ovandu mba ṱomeva wamururu?

⁷ “Imba mbe ṱomanuwa omazeu.” Omuapostele wa sasaneka ovandu mbu mave kanyonwa i Mukuru ku imba mba ṱomeva wamururu. Ovandu mba ṱomeva wamururu ve womba okumuna oviṋa mbi mavi tjitwa ongondoroka na wo, nu kave twa po ozondando ozombwa. Momuano otjingewo, ovarunde kave puratene komarakiza wa Mukuru. Owo ve toorora omuhunga mbu mau ve twara konyoneno. Posi yokutja, Ovakriste va raerwa okukara nomuungutima. (1 Tes. 5:6) Omuhongwa umwe wOmbeibela wa tja: “Omundu ngu nomuungutima u porimana nu kayaraara, eye u yenena okuripura nawa kokutja ma toore omikambo omisemba.” Omena raye tji matu sokuporimana nokuhinokuyaraara? Kokutja atu ha kara norupa moviṋa vyopolotika poo omauzeu wotjiwaṋa. Oṋiṋikizire yokukara nomunda moviṋa otja imbyo mai ririre ko onḓeu otja eyuva ra Jehova tji mari tumbuka popezu. Posi ya, katu nokuhepa okurikenda ohunga nokutja matu tjiti vi. Ombepo ya Mukuru mai yenene okutuvatera okuporimana nokuhinokuyaraara nokutjita kutja tu twe po ozondando ozombwa.—Luk. 12:11, 12.

8. Omomuano uṋe 1 Ovatesalonika 5:8 mu ri sasaneka ovikaṋena mbi mavi tu vatere okukara nomuungutima nokukara katumba? (Wina tara kotjiperendero.)

⁸ ‘Hwikikeye ombanda yotjitenda yomorukoro nekori rotjitenda.’ Paulus we tu sasaneka kovasorondate mbe rirongere nu mbe rihwikikire okuyenda kovita. (Lesa 1 Ovatesalonika 5:8.) Ovandu ve undjira ko kutja omusorondate me rirongerere okuyenda kovita oruveze aruhe indu tji ku novita. Otjiperi nao wina kweṱe. Matu rirongerisire eyuva ra Jehova mokurihwikika ongamburiro norusuvero otja ombanda yotjitenda yomorukoro, nomaundjiro otja ekori rotjitenda. Ovikaṋena mbi mavi yenene okutuvatera tjinene.

9. Omomuano uṋe ongamburiro yetu mu i tu tjevera?

⁹ Ombanda yotjitenda yomorukoro aai tjevere omutima womusorondate. Ongamburiro norusuvero vi tjevera omutima wetu poo omundu mourekoto we. Ovyo mavi tu vatere okukayenda komurungu okukarera Mukuru nokukongorera Jesus. Ongamburiro i tu vatera okutjiwa kutja Jehova me tu pe ondjambi indu tji matu mu paha nomutima wetu auhe. (Hebr. 11:6) Oyo mai tu vatere okurira ovaṱakame kOmuhongore wetu, Jesus, nandarire kutja tu ri kehi yomauzeu. Eṱe matu yenene okukurisa ongamburiro yetu kokutja tu yenene okupanḓera po indu tji tu ri kehi yomauzeu, mokurihongera ku imba mba kara nonḓarorure kehi yondatumisire poo ouzeu wotjimariva. Nu eṱe matu yenene okuyepa oumba wokusuvera ovimariva nomauini tjinene, indu tji matu horere ku imba mba ṱuna ehupo rawo kutja ari ha kara noviṋa ovingi, kokutja ve yenene okutwa po Ouhona wa Mukuru poruveze orutenga. b

10. Orusuvero ku Mukuru na kovandu ru tu vatera vi okupanḓera po?

¹⁰ Orusuvero wina maru tu vatere okukara katumba atu nomuungutima. (Mat. 22:37-39) Orusuvero  ku Mukuru maru tu vatere okupanḓera po motjiungura tjokuzuvarisa nandarire kutja matu munu ouzeu. (2 Tim. 1:7, 8) Mena rokutja eṱe tu raisa orusuvero ku imba mbe ha karere Jehova, tu kayenda komurungu okuzuvarisa momaturiro mu tu zuvarisa, nu nandarire okupitira mongoze na motutuu. Eṱe katu yumbu ohama kutja eyuva rimwe ovandu mave rundurura ongaro yawo nave utu okutjita imbi mbi ri ovisemba.—Esek. 18:27, 28.

11. Omomuano uṋe orusuvero kovakambure ovakwetu mu ru tu vatera? (1 Ovatesalonika 5:11)

¹¹ Orusuvero rwetu kovandu ru kamburira mo ovakambure ovakwetu. Eṱe tu raisa orusuvero otja indwo indu tji matu ‘pandiparisasana nokuvaterasana.’ (Lesa 1 Ovatesalonika 5:11.) Eṱe tu yanḓiparisasana tjimuna ovasorondate tji ve ri pamwe motjirwa. Otjingaperi kutja omusorondate mape ya a hihamisirire omukwao motjirwa, posi ya kamaa tjitire wina otjiṋa tji tja sana ngo. Otjingaperi kutja kamaatu hihamisire ovakambure ovakwetu owina poo okuyarura ouvi mouvi. (1 Tes. 5:13, 15) Eṱe wina tu raisa orusuvero rwetu mokuraisa ondengero kovakambure mbe hongorera po ombongo. (1 Tes. 5:12) Indu omuapostele Paulus tjaa tjanga orutuu ndwi, ombongo yOvatesalonika tjandje kai ya tjita ombura. Ovarumendu mba zikwa mape ya kava ri nondjiviro ndja yenene nu mape ya aave tjiti ozondataiziro. Posi yokutja, owo aave sokupewa ondengero ndje ve pwire. Otja ozombamisiro ozonene tjinene pu maze yende amaze ryama popezu, eṱe mape ya atu hepa okuṱaṱera komuhunga mbu matu pewa i yovanene vombongo tjinene pu indu tji tu tjita nai. Eṱe mape ya atu ha munu omuhunga okuza komberoo ohongora youye norutavi rwomberoo. Ku nao, ounahepero okurihonga okusuvera nokutenga ovanene vombongo nai. Nandarire kutja pa tjitwa tjike, ngatu kare katumba, atu yandja ombango koungundipare wawo, posi ya ngatu tjiwe kutja Jehova u hongorera ovarumendu ovaṱakame mba okupitira mu Kristus.

12. Omomuano uṋe omaundjiro wetu mu ye tjevera omeripura wetu?

¹² Tjimuna ekori rotjitenda mu ri tjevera otjiuru tjomusorondate, omaundjiro wetu wondjamo ye tjevera ouripura wetu nu ye tu vatera kutja tu ripure nawa. Tu tjiwa kutja oviṋa vyouye  omungandjo, mena rokutja tu nomaundjiro nge ha teratera. (Fil. 3:8) Omaundjiro wetu ye tu vatera okuporimana nokuhinokuivaiva. Iho otji tja tjitwa ku Wallace na Laurinda, mbe karera moAfrica. Movivike vitatu, auhe wawo wa zepaisa omunene. Mena romutjise wo-COVID-19 mbwa handjauka mouye, owo kaave yenene okuyaruka konganda okukakara pu nomaṱunḓu wawo. Wallace wa tja: “Omaundjiro wombendukiro ye ndji vatera kutja e he ripura nomuano mu va ri mouye mbwi momayuva wawo omasenina, nungwari mbi ripure nomuano mu mave kakara momayuva wawo omatenga mouye oupe. Omaundjiro ngo ye tjita kutja mbi porimane indu tji mba u momuinyo.”

13. Matu yenene okutjita vi kutja tu mune ombepo ondjapuke?

¹³ “Amu pirukire Ombepo Ondjapuke.” (1 Tes. 5:19) Paulus wa tja ombepo ondjapuke i ungura mweṱe. Indu tji tu hi nokuipirukira, matu rire ovapyuke nu matu kara nombango okutjita imbi mbi ri ovisemba nu matu kara nomasa okuungurira Jehova. (Rom. 12:11) Matu yenene okutjita vi kutja tu mune ombepo ondjapuke? Matu yenene okuningira mongumbiro, okukonḓonona Embo ra Mukuru, nokukara pu notjira tje tji tji hongorerwa po i yombepo ye. Okutjita nao maku tu vatere okukara ‘novihape vyOmbepo.’—Gal. 5:22, 23.

14. Ovikwaye mbi matu sokunakaura kutja tu kayende komurungu okumuna ombepo ya Mukuru? (Wina tara kotjiperendero.)

¹⁴ Indu Mukuru tje tu pe ombepo ye ondjapuke, eṱe twa sokukengeza kutja atu he i “pirukire.” Mukuru u yandja ombepo ye ku imba mbe nomeripura nomeritjindiro omakohoke. Eye kamaa kayenda komurungu okutupa ombepo ye indu tji twa kayenda komurungu okuripura ohunga noviṋa ovihakohoke nokuvitjita. (1 Tes. 4:7, 8) Kutja tu kayende komurungu okumuna ombepo ondjapuke, eṱe wina katu ‘sokunjengura omaprofetero.’ (1 Tes. 5:20, EEP) Mezeva ndi “omaprofetero” ye heya ozombuze Jehova nḓe tu pa okupitira mombepo ye ondjapuke, ozo ze kamburira mo eyuva ra Jehova nounanḓengu woruveze mu tu hupira. Eṱe katu ripura kutja eyuva ra Jehova poo Armagedon kamaari ya ngunda atu nomuinyo. Nungwari, eṱe tu raisa kutja eyuva ndo riri  popezu, indu tji matu kayenda komurungu okutjita oviṋa ‘mbi tjata ku Ndjambi’ eyuva arihe nokuritjinda momuano omukohoke.—2 Petr. 3:11, 12.

15. Omomuano uṋe mu matu tjiti kutja atu ha pukisiwa i yondjivisiro yoposyo novizeze vyozondemone? (1 Ovatesalonika 5:21)

¹⁵ Moruyaveze rwopopezu, ovapirukire va Mukuru mave tja: “Ku nohange norusuvo.” (1 Tes. 5:3, EEP) Ovizeze okuza kozondemone mavi ura mehi nokupukisa ovengi. (Omavan. 16:13, 14) Hapo pe ri vi ohunga na eṱe? Eṱe kamaatu pukisiwa indu tji twa ‘roro oviṋa avihe.’ (Lesa 1 Ovatesalonika 5:21.) Embo rOtjigrike ndi ‘okurora’ aari ungurisiwa okuhungira ohunga nomuano ovandu maave roro osilveri nongoldo kutja ondji ri yo poo indee. Ku nao, eṱe matu hepa okurora imbi mbi matu zuu poo mbi matu lese okutara kutja ovyo ouatjiri poo indee. Iho tja ri otjiṋa otjinahepero kOvatesalonika, nu otjiṋa otjinahepero tjinene kweṱe otja tji matu yendere ozombamisiro ozonene tjinene. Pendje nokukambura moviṋa ovandu varwe mbi mave hungire, eṱe matu sokuungurisa ouripura wetu okusasaneka imbi mbi matu lese poo mbi matu zuu ku na imbi mbi mavi hungirwa mOmbeibela na motjira tja Jehova. Indu tji twa tjiti nao, eṱe kamaatu pukisiwa i yovizeze vyozondemone.—Omiano 14:15; 1 Tim. 4:1.

16. Omaundjiro yeṋe ngu tu na wo, nu twe rimanene okutjita tjike?

¹⁶ Matu tjiwa kutja ovakarere va Jehova mave tuurunga ozombamisiro ozonene tjinene, posi ya katu tjiwa kutja muhuka mari eta ye. (Jak. 4:14) Nandarire kutja twa tuurunga ozombamisiro ozonene tjinene, poo twa ṱu komurungu wanao, eṱe matu kamuna otjisuta tjomuinyo waaruhe indu tji twa kayenda komurungu okurira ovaṱakame. Ovatwirisiwa mave kakara pu na Kristus meyuru. Ozonḓu zarwe maze kakara moparadisa kombanda yehi. Ngatu yandje ombango komaundjiro wetu omawa nu ngatu kayende komurungu okurirongerera eyuva ra Jehova.