1. Otja ku 1 Petrus 5:2, otjiungura tjiṋe otjinanḓengu ovanene vombongo tji mave sokuungura?

 OVANENE vombongo Ovakriste va pewa omerizirira wokuṱakamisa ozonḓu za Jehova nḓa suvera. Ovarumendu ovaṱakame mbo, ve nondangi tjinene ku Jehova kutja wa raisa ongamburiro mu wo okutjevera ovakambure ovakwao, nu ve ungura oukukutu ‘okuvetjevera.’ (Jer. 23:4; lesa 1 Petrus 5:2.) Eṱe tu nondangi tjinene okukara novanene vombongo otja imbwo mombongo yetu.

2. Omauzeu yeṋe ovanene vombongo tjiva ngu mape ya ave munu?

² Mokuṱakamisa omerizirira wawo, ovanene vombongo ve muna omauzeu omengi. Ovanene vombongo ve hepa okuungura nomasa kutja ve ṱakamise ombongo. Tony, omunene wombongo moUnited States wa muna kutja aa hepa okurira omurisusuparise koviungura mbi ma yakura. Eye wa tja: “Indu omutjise wo-COVID-19 tji wa uta, ami ee kondjo okuungura oviungura ovingi okurongerisa ozombongarero zombongo notjiungura tjokuzuvarisa. Nandarire kutja ee ungura ovingi, aruhe aape kara ovingi okuungura. Ku nao, mba ri noviungura ovingi mbya tjita kutja eha kara noruveze okulesa Ombeibela, okutjita omakonḓononeno wandje omuini, nokukumba.” Ilir omunene wombongo moKosovo wa ri nouzeu warwe. Indu tja ri poruveze mu mwa ri novita, ya ri ouzeu ku ye okuṱakamisa omirari mbyaavi zu kotjira tja Jehova. Eye wa tja: “Ouvanḓe wandje wa rorwa indu orutavi rwomberoo tji rwe ndji ningira okukavatera ovakambure ovakwetu mbaari moruveze orunaumba. Ami ee tira nu ee munu kutja omuhunga mbwo au munika tjimuna kamusemba.” Tim omuhindwa moAsia aa munu ouzeu okuungura oviṋa mbyaa hepa okuungura eyuva arihe. Eye wa tja: “Povikando tjiva, ee urwa tjinene okurikendera kovakambure ovakwetu.” Hapo ovikwaye mbi mavi yenene okuvatera ovanene vombongo mbu ve muna omauzeu tjimuna ingo?

3. Omomuano uṋe ovandu avehe mu mave munu mo ouwa mokuripurira kotjihorera tjOmupangure Gideon?

 ³ Ovanene vombongo mave yenene okurihongera kotjihorera tjOmupangure Gideon. (Hebr. 6:12; 11:32) Eye wa ri omutjevere nu wa ri omurise wovakarere va Mukuru. (Ovapang. 2:16; 1 Ekuruh. 17:6) Tjimuna Gideon, ovanene vombongo va zikwa okutjevera ovakarere va Mukuru moruveze rouzeu ndwi. (Oviung. 20:28; 2 Tim. 3:1) Eṱe matu yenene okurihongera komerisusuparisiro nonḓuviro ya Gideon. Onḓarorure ye ya rorwa otja tja ungura otjiungura tje. Nandarire kutja, tu karera poo katu karere otjovanene vombongo, eṱe matu yenene okurihonga okukara nondangi kovanene vetu vombongo. Eṱe matu yenene okuyandja oruvara kovakambure ovakwetu mba mbe ungura oukukutu okututjevera mombongo.—Hebr. 13:17.

4. Omomuano uṋe Gideon ma raisa omerisusuparisiro?

⁴ Gideon wa ri omurumendu omurisusuparise. b Indu omuengeli wa Jehova tja raera Gideon kutja wa toororwa okuyama Israel kotjiwaṋa tjOvamidian otjinamasa, omurumendu omurisusuparise ngo wa tja: “Onganda yandje ondji ri otjingundi tjinene momuhoko waManasse, nami omuini owami omuhinanḓengu tjinene meṱunḓu randje.” (Ovapang. 6:15) Eye aa munu kutja ke ya yenena okuungura otjiungura ho, posi ya Jehova aa tjiwa kutja ma yenene. Nombatero ya Jehova, Gideon wa yenena okuyenenisa otjiungura tje nondoṋeno.

5. Oruṋe tji mape ya a rire ouzeu komunene wombongo okuraisa omerisusuparisiro?

⁵ Ovanene vombongo ve kondja pu mave yenene okuraisa omerisusuparisiro moviṋa avihe. (Mika 6:8; Oviung. 20:18, 19) Owo kave rihivi mena roviṋa mbi mave yenene okutjita poo mbi va tjiti. Nu owo kave rivere mena rokutja ve nozondataiziro nḓu va tjiti. Posi ya, povikando tjiva irira ouzeu komunene wombongo okuraisa omerisusuparisiro. Otjotjihorera, eye mape ya a yakura oviungura ovingi posi ya arire ouzeu okuyenenisa oviungura avihe mbi. Poo mape ya arire ouzeu ku ye okuraisa omerisusuparisiro indu ovandu tjiva tji mave mu kwekurura nu tjiva tji mave mu tanga mena romuano me tjita oviṋa. Ovikwaye ovanene vombongo mbi mave yenene okurihongera ku Gideon mbi mavi ve vatere mozongaro otja inḓo?

6. Ovikwaye ovanene vombongo mbi mave yenene okurihongera komerisusuparisiro wa Gideon? (Wina tara kotjiperendero.)

⁶ Ningira ombatero. Omundu omurisusuparise u tjiwa kutja pe noviṋa tjiva mbye ha yenene  okutjita. Gideon wa raisa kutja omurisusuparise mena rokutja aa ningire ombatero ku varwe. (Ovapang. 6:27, 35; 7:24) Ovanene wombongo mbe nounongo ve tjita nao wina. Tony ngwa tamunwa rukuru, wa tja: “Mena romuano mbu mbe kurisiwa, ami ee yakura oviungura ovingi mbyee he yenene okuyenenisa. Ku nao mba tya okuhungirira komerisusuparisiro momerikotameneno wetu weṱunḓu nu mba ningira omukazendu wandje okundjiraera oumune we. Ami wina mba tarera okavidio nga Train, Trust, and Empower Others, as Jesus Does korungovi ndwi jw.org.” Tony wa uta okuningira varwe okumuvatera noviungura vye. Ovikwaye mbya kongorera ko? Tony wa tja: “Oviungura mombongo aavi yenenisiwa nu mba ri noruveze okukurisa oupanga wandje ku na Jehova.”

7. Omomuano uṋe ovanene vombongo mu mave yenene okuhorera ku Gideon indu tji mave kwekururwa? (Jakobus 3:13)

⁷ O pindike indu tji wa kwekururwa. Omarorero warwe ovanene vombongo ngu ve muna, okukwekururwa. Ku nao, otjihorera tja Gideon matji yenene okuvevatera. Eye aa tjiwa kutja kahomonena, ku nao eye kapindikire indu Ovaefraim tji ve mu posisa tjinene. (Ovapang. 8:1-3) Gideon ke ve zirire nomazenge. Eye wa raisa omerisusuparisiro indu tja puratena komaunaunino wawo nokuhungira ku na wo momuano omuwa. Iho tja tjita kutja omapindi wawo ye we pehi. Ovanene vombongo mbe nounongo ve horera ku Gideon mokupuratena nawa nokuzira momuano omuwa indu tji mave kwekururwa. (Lesa Jakobus 3:13.) Ku nao owo ve tjita kutja mu kare ohange mombongo.

8. Ovanene vombongo mave sokutjita vi indu tji va pewa ohiviro? Yandja otjihorera.

⁸ Yandja ohiviro aihe ku Jehova. Indu varwe tjaave tanga Gideon mena rokuhavera Ovamidian, eye wa yandja ondangu ndjo ku Jehova. (Ovapang. 8:22, 23) Hapo ovarumendu mba zikwa mounane mave yenene vi okuhorera ku Gideon? Owo mave sokuyandja ohiviro ku Jehova koviṋa mbi va yenenisa. (1 Kor. 4:6, 7) Otjotjihorera, indu omunene wombongo tja pewa ohiviro mena romahongero we omawa, eye ma yenene okutja omahongero ngo ya zire kEmbo ra Mukuru nokutja eṱe atuhe tu hongwa i yotjira tja Jehova. Ovanene vombongo mave yenene okuripura ohunga nomuano mbu ve honga kutja u yandja ohiviro ku Jehova poo ku wo oveni. Tara kotjihorera tjomunene wombongo wena Timothy. Indu tja uta okukarera otjomunene wombongo, Timothy wa suverere okuyandja omahungi. Eye wa tja: “Omautiro wehungi randje nomasasanekero nge ungurisa aye nana ombango tjinene. Ovandu potuingi aave ndji tanga mena ranao. Ouhumandu, otjiṋa ho aatji tjiti kutja ovandu ave ha yandja ombango kOmbeibela poo ku Jehova nungwari ve yandje ombango kwami.” Timothy wa muna kutja aa hepa okutjita omarundurukiro komuano we wokuhonga kutja ovandu ave ha yandja ombango tjinene ku ye. (Omiano 27:21) Hapo ovikwaye mbya kongorera ko? Eye wa tja: “Nambano ovakambure ovakwetu ve ndji raera kutja omahungi wandje ye ve vatera okutuurunga ouzeu, omarorero, poo okutumbuka popezu na Jehova. Ami mbi kara nondjoroka indu tji me zuu omambo ngo pu indu tjaave ndji tanga ozombura nḓa kapita.”

9. Omomuano uṋe onḓuviro nouvanḓe wa Gideon mu vya rorwa? (Tara kotjiperendero tjokombanda yokambo nga.)

⁹ Indu Gideon tja zikwa otjomupangure okuhongorera po Israel, onḓuviro nouvanḓe we vya rorwa. Eye wa pewa otjiungura otjinaumba tjokunyona otjipunguhiro tja Baal tja ihe. (Ovapang. 6:25, 26) Kombunda, indu Gideon tja za nokuworonganisa otjimbumba tje tjovita, Jehova we mu raera povikando vivari okuhendurura otjimbumba tje tjovita. (Ovapang. 7:2-7) Korusenina, eye wa raerwa okurwisa ovanavita na ye mokati kouṱuku.—Ovapang. 7:9-11.

10. Omomuano uṋe onḓuviro yomunene wombongo mu mai yenene okurorwa?

 ¹⁰ Ovanene vombongo mave sokurira ‘ovananḓuviro.’ (Jak 3:17, EEP) Omunene wombongo wonḓuviro u hakahana okukongorera Omatjangwa nomuhunga okuza kotjira tja Jehova. Eye u rira otjihorera otjiwa ku varwe. Posi ya, mape ya onḓuviro ye ai rorwa. Mape ya ai rire ouzeu ku ye okuyenenisa oviṋa avihe mbya raerwa. Povikando tjiva mape ya e ripura kutja okutoora omukambo kaaṋi ondunge ombwa poo indee. Poo mape ya a ningirwa okuungura otjiungura tji mape ya atji twa ouyara we moumba. Omomuano uṋe ovanene vombongo mu mave yenene okuhorera konḓuviro ya Gideon mozongaro otja inḓo?

11. Ovikwaye mbi mavi yenene okuvatera ovanene vombongo okukara nonḓuviro?

¹¹ Puratena nu u ṱakamise omuhunga mbu wa pewa. Mukuru wa raera Gideon omuano mbu ma sokunyona otjipunguhiro tja ihe, noruveze pu ma sokutunga otjipunguhiro tja Jehova otjipe, nokutja otjinamuinyo tjiṋe tji ma sokupunguha. Gideon kena pa kwekurura omuhunga mbwa pewa nungwari wa tjita otja Jehova pe mu raera okutjita. Ndino, ovanene vombongo ve muna omuhunga okuza kotjira tja Jehova okupitira motutuu, omatjivisiro, nomaronga nge tu vatera okukara mondjeverero nokutumbuka popezu na Jehova. Eṱe twa suvera ovanene vombongo mena rokutja owo ve kongorera omuhunga okuza kotjira tja Jehova nouṱakame. Ombongo aihe i muna mo ouwa.—Eps. 119:112.

12. Ovanene vombongo mave yenene vi okuṱakamisa eronga ndi ri mOvaheberi 13:17 indu otjira tja Jehova tji tje ve raere okurundurura omuano mu ve tjita oviṋa?

¹² Rira omupaturuke okuyakura omarundurukiro. Zemburuka kutja Jehova wa raera Gideon okuyarura ovasorondate ve ape avehe kozoyawo. (Ovapang. 7:8) Eye mape ya we ripura kutja: ‘Hapo omarundurukiro nga ohepero? Hapo oyo maye ungura?’ Posi ya, Gideon wa kara nonḓuviro. Ndino ovanene vombongo ve horera ku Gideon mokukara nonḓuviro kotjira tja Jehova indu tji tje ve raere okutjita otjiṋa momuano warwe. (Lesa Ovaheberi 13:17.) Otjotjihorera, mo-2014 Orutu Orunane rwa eta omarundurukiro komuano otjimariva tji tja tungisa Omatuwo wOmerikotameneno nOmatuwo wOmaworonganeno mu matji sokusutwa. (2 Kor. 8:12-14) Ozombongo kaaze hepa okuyazema nokuyarura otjimariva ho rukwao. Nungwari, otjira tja Jehova tji ungurisa oviyandjewa vyouharupu okuza kozombongo azehe mouye okutunga omatuwo ngu maye hepwa, nandarire kutja ombongo oini ndji mai hepa omatungiro kai novingi okuyandja. Indu José tja zuva ohunga nomarundurukiro ngo, eye aa munu kutja owo mape ya aye ha ungura. Nu eye ee ripura kutja: ‘Nandarire Etuwo rimwe rOmerikotameneno kamaari tungwa. Oviṋa kavi ungurwa nao morukondwa ndi.’ Ovikwaye mbya vatera José okuyandja oruvara komuhunga mbwo? Eye wa tja: “Omambo nge ri mOmiano 3:5, 6 ye ndji zemburukisa okukara nongamburiro mu Jehova. Nu mbya kongorera ko vya ri oviwa tjinene. Eṱe nai tu tunga Omatuwo wOmerikotameneno omengi nu twe rihonga okuyandja momiano pekepeke, kokutja ovandu avehe ve ṱunwe pu pe ṱeki pamwe.”

13. (a) Gideon wa ri nongamburiro mu ye? (b) Omomuano uṋe ovanene vombongo mu mave yenene okuhorera ku Gideon? (Wina tara kotjiperendero.)

 ¹³ Tjita ombango ya Jehova nouvanḓe. Gideon wa kara nonḓuviro ku Jehova nandarire kutja aa tira nu nandarire kutja otjiungura tje aatji twa omuinyo we moumba. (Ovapang. 9:17) Kombunda yokumuna omayanḓiparisiro okuza ku Jehova, Gideon wa ri nongamburiro okuura kutja Mukuru me mu vatere okutjevera ovakarere ve. Ovanene vombongo mbe ri motukondwa oviungura vyetu mu vya tjaerwa ve horera ku Gideon. Owo ve hongorera po ozombongarero zombongo notjiungura tjokuzuvarisa nouvanḓe nandarire kutja ve ri moumba wokukamburwa, wokupuriwa omapuriro omazeu, wokupandjara oviungura, poo wokuhihamisiwa kotutu. c Mozombamisiro ozondirise, ovanene vombongo mave hepa ouvanḓe okukara nonḓuviro komuhunga mbu mave pewa, nandarire kutja omuhunga mbwo omunaumba okukongorera. Otjotjihorera, eṱe mape ya atu munu omuhunga ohunga nomuano wokuzuvarisa ombuze onamasa yombanguriro nokutja matu sokutjita vi okutuurunga omawiro wa Gog na Magog.—Esek. 38:18; Omavan. 16:21.

14. Ongwaye tja ri ouzeu ku Gideon okuraisa onḓarorure?

¹⁴ Gideon aa sokuungura oukukutu okukarera otjomupangure. Indu Ovamidian tjaave taura motjirwa ouṱuku, Gideon we ve rambera okuza korutjandja rwa Jesreel nga kOnḓonḓu Jordan, porumwe ndja kovererwe i yomiti omingi. (Ovapang. 7:22) Hapo Gideon wa yandera ponḓonḓu Jordan? Kako. Nandarire kutja va urirwe, eye novarumendu ve 300 va konda onḓonḓu nave kayenda komurungu okuverambera. Korusenina, owo va kavaza Ovamidian nave ve taara motjirwa.—Ovapang. 8:4-12.

15. Ongwaye povikando tjiva tje rira ouzeu komunene wombongo okuraisa onḓarorure?

¹⁵ Povikando tjiva, omunene wombongo mape ya a urwa morutu, mouripura poo momuinyo mena rokurikendera ombongo neṱunḓu re. Mozongaro otja inḓo, omomuano uṋe ovanene vombongo mu mave yenene okuhorera ku Gideon?

16-17. Ovikwaye mbya vatera Gideon okuraisa onḓarorure, nu ovanene vombongo mave yenene okukara nongamburiro mu ye? (Jesaja 40:28-31) (Wina tara kotjiperendero.)

 ¹⁶ Kara nongamburiro kutja Jehova me ku pe omasa. Gideon wa ri nongamburiro kutja Jehova me mu pe omasa nu Jehova tjiri otja tjita. (Ovapang. 6:14, 34) Otjikando tjimwe, Gideon novarumendu ve aave rambere ozombara mbari zOvamidian pehi, mape ya mba kavirire kozongamero. (Ovapang. 8:12, 21) Posi ya Mukuru wa vatera Ovaisrael kutja ve kavaze ovarumendu mbo nu ve taare otjirwa. Ovanene vombongo wina mave yenene okuriyameka ku Jehova ngu ‘ha urwa nu ngu ha nanga.’ Eye me ve pe omasa indu tji mave ye hepa.—Lesa Jesaja 40:28-31.

¹⁷ Tara kotjihorera tja Matthew, okaṋepo kOkomiti yomapangero. Ovikwaye mbye mu vatera okuraisa onḓarorure? Matthew wa tja: “Ami mba muna omasa okuza ku Jehova nge hungirwa mOvafilipi 4:13. Povikando tjiva tji mba urirwe nu tji mbi ha ri nomasa wokukayenda komurungu, ami ee kumbu ku Mukuru nokuriheka kutja me ndji pe omasa ngee hepa morutu na mouripura kutja mbi vatere ovakambure ovakwetu. Moruveze ndwo, ami mba muna ombepo ya Jehova ama i ndji pe omasa nokundjivatera kutja mbi raise onḓarorure.” Ovanene vetu vombongo ve ungura oukukutu okutjevera ovakarere va Jehova nandarire kutja kaupupu okutjita nao aruhe tjimuna Gideon. Otjingaperi kutja owo mave sokurira overisusuparise nokumuna kutja kaaruhe tji mave yenene okutjita oviṋa mbi mave vanga okutjita. Owo mave yenene okukara nongamburiro kutja Jehova me ve zuvire indu tji va ningire ombatero nu me ve pe omasa okuraisa onḓarorure.—Eps. 116:1; Fil. 2:13.

18. Okurizemburukisa, omomuano uṋe ovanene vombongo mu mave yenene okuhorera ku Gideon?

¹⁸ Ovanene vombongo mave yenene okurihonga ovingi okuza kotjihorera tja Gideon. Ovanene vombongo mave sokuraisa omerisusuparisiro indu tji pe ya kokutja mave yakura oviungura mbi ṱeki pi, nu wina indu varwe tji ve ve kwekurura poo tji ve ve tanga. Owo mave sokuraisa onḓuviro nouvanḓe, mena rokutja tu hupa kuṱa komaandero wouye mbwi. Nu mave hepa okukara nongamburiro kutja Mukuru me ve pe omasa nandarire kutja va munu omauzeu nge ṱeki pi. Otjingaperi kutja, eṱe tu nondangi kovarise mbe ungura oukukutu otja imbwo, nu ngatu ‘yozike ovandu mbe ri nai.’—Fil. 2:29.