1, 2. (a) Ovanene tjiva Ovakriste ve raisa ongaro iṋe, indu omuatje wawo tja raisa onḓero yokupapitisiwa? (b) Ongwaye ovandu mbu mave papitisiwa tji ve purwa kutja owo ve riyandja ku Jehova mongumbiro? (Tara kotjiperendero pomautiro worupa ndwi.)

OVANENE va Maria aave tarere omuatje wawo omukazona a kurama pomurungu puna ovakwao mbu mave undju okupapitisiwa. Omuyandje wehungi wa pura omapuriro 2. Nu Maria wa zira omapuriro nga neraka ekahu. Ousupi okuzambo, eye wa papitisiwa.

² Ovanene va Maria va ri nondjoroka tjinene, kutja omuatje wawo omukazona we riyandja ku Jehova na papitisiwa. Posi yokutja komurungu wanao, ina ya Maria kaṱiṱi ee rikende. Eye ee ripura kutja, ‘Hapo Maria kamuṱiṱi tjinene okupapitisiwa? Hapo eye tjiri ma tjiwa ounanḓengu womukambo mbu ma toora mbwi? Poo ngahino ma sokuundja kaṱiṱi?’ Inga omapuriro tjiva ovanene ngu ve kara na wo, indu omuatje wawo tja raisa onḓero yokupapitisiwa. (Omuzuv. 5:5) Kanavi tji ve kara nomapuriro otja ingo, orondu omeriyandjerero nombapitisimo omikambo ominanḓengu tjinene mehupo  rOmukriste.​—Lesa okaongo nga “ Hapo ove we riyandja omuini ku Jehova?”

3, 4. (a) Omuapostele Petrus wa raisa vi kutja ombapitisimo omukambo omunanḓengu tjinene? (b) Ongwaye ombapitisimo tji mai yenene okusasanekwa ku nokutunga oskepi moruveze rwa Noa?

³ Omuapostele Petrus wa sasaneka ombapitisimo kuna Noa tjaa tungu oskepi. Eye wa tja: “Nomeva nga owo otjiraisiro tjombapitisimo nambano ndji mai mu yama.” (Lesa 1 Petrus 3:20, 21.) Omatungiro woskepi ndji, ya raisa oukahu ku varwe kutja Noa aa vanga okutjita ombango ya Mukuru nomutima we auhe. Noa wa yenenisa otjiungura Jehova tje mu pa nouṱakame. Nu mena rongamburiro ya Noa, Jehova wa yama Noa neṱunḓu re kOmupupo. Petrus hapo aa vanga okutuhonga tjike?

⁴ Tjimuna oskepi tjaai raisire varwe kutja Noa wa ri nongamburiro mu Mukuru, omundu tji ma papitisiwa, u raisira varwe kutja eye we riyandja ku Mukuru, nokutja u nongamburiro mombendukiro ya Kristus. Tjimuna Noa, imba mbe riyandja ku Mukuru, ve kara nonḓuviro ku ye nu ve ungura oviungura mbye ve pa okuungura. Otja Noa tja yamwa kOmupupo, ovandu mba papitisiwa nu mba ṱakama ku Mukuru, wina mave yamwa indu ouye ourunde mbwi tji mau yekuyandekwa. (Mar. 13:10; Omavan. 7:9, 10) Okutja tjiri, ounanḓengu tjinene ku eṱe okuriyandja ku Jehova nokupapitisiwa. Omundu tji ma wombo okupapitisiwa, eye mape ya a pandjara omuinyo waaruhe.

5. Matu kerihonga tjike morupa ndwi?

⁵ Nai tji twa munu ounanḓengu wombapitisimo, matu sokuyandja ombango komapuriro 3 nga: Ombeibela i tja vi ohunga nombapitisimo? Omikambo viṋe omundu mbi ma sokutoora ngunda e hiya papitisiwa? Ongwaye aruhe tji matu sokuzemburuka ounanḓengu wombapitisimo, indu tji matu hongo ovanatje vetu poo ovahongwa vetu Ombeibela?

6, 7. (a) Ombapitisimo Johanes ndjaa tjiti aai hee tjike? (b) Ombapitisimo iṋe yapeke Johanes ndja tjita?

⁶ Omundu omutenga ngwa tamunwa mOmbeibela ngwaa papitisa ovandu varwe, wa ri Johanes Omupapitise. (Mat. 3:1-6) Ongwaye ovandu tjaave ya ku Johanes okupapitisiwa? Owo aave tjiti nao okuraisa kutja ve ritanaura komauvi wawo, nokutja ve nomuhihamwatima mena rokutja kave raisire onḓuviro kOmatwako wa Moses. Posi yokutja ombapitisimo onanḓengu tjinene Johanes ndja tjita, kaai kuramene po omeritanauriro. Johanes wa muna ondjingonekero yapeke yokupapitisa Jesus, Omuna wa Mukuru ngwa ri ohomonena. (Mat. 3:13-17) Jesus kenaa wa tjitire ouvi, kunao kaa hepa okuritanaura. (1 Petr. 2:22) Ombapitisimo ye aai kuramene po okuriyandja ku Mukuru kutja ma tjite ombango ye.​—Hebr. 10:7.

⁷ Jesus tja za nokuuta otjiungura tje tjokuzuvarisa, ovahongewa ve wina va uta okupapitisa ovandu. (Joh. 3:22; 4:1, 2) Tjimuna ombapitisimo Johanes ndjaa tjiti, ovandu mbo wina aave papitisiwa mena rokutja ve ritanaura komauvi wawo, ngaaye pirukire Omatwako wa Moses. Posi yokutja, kombunda yonḓiro nombendukiro ya Jesus, ombapitisimo ya hara omaheero warwe kovemukongorere.

8. (a) Erakiza riṋe Jesus nda yandja kovemukongorere indu tja za nokupendurwa? (b) Ongwaye Omukriste auhe tji ma hepa okupapitisiwa?

⁸ Mombura ndji 33 O.Z., Jesus tja za nokupendurwa we rimunikisa kovandu vokombanda 500, ovarumendu novakazendu nu ngahino pa ri ovanatje. Nu mape ya, ya ri oruveze ndwo indu tja tja: “Otji mwa sokuyenda koviwaṋa avihe ngamwa akuhe mu kaise po ovandu ovahongewa vandje amamu ve papitisa mena ra Tate nOmuna nOmbepo Ondjapuke. Nu ve hongeye okuṱakamisa oviṋa avihe mbi mbe mu raera.” (Mat. 28:19, 20; 1 Kor. 15:6) Pe munika aayo ovakongorere va Jesus ovengi opu va ri, indu Jesus tja yandja erakiza rokukaisa po ovandu ovahongewa ve. Kunao, Jesus wa raisa kutja ombapitisimo otjiṋa tji tji undjirwa ko ku imba mbe vanga okurira ovahongewa ve, poo mbe vanga okutoora omutenge we. (Mat. 11:29, 30) Omundu auhe ngu ma vanga okukarera Mukuru momuano mbu tjata ku ye, ma sokuyakura kutja Mukuru u ungurisa Jesus okuyenenisa ombango ye. Omundu ngo tja zu nokutjita nao, otji ma yenene okupapitisiwa. Indji oombapitisimo aiyerike yomomeva Mukuru ndje yakura. MOmbeibela mu noviraisiro ovikahu ohunga nokutja meserewondo etenga, ovahongewa va Kristus ovape aave tjiwa nawa ounanḓengu wombapitisimo. Nowo kaave wombo okupapitisiwa.​—Oviung. 2:41; 9:18; 16:14, 15, 32, 33.

9, 10. Matu rihongere ko tjike komurumendu Omuetiopi nomuapostele Paulus ohunga nombapitisimo?

⁹ Lesa Oviungura 8:35, 36. Ngatu tare kotjihorera tjomurumendu Omuetiopi ngwa ri mondjira okuyaruka konganda, tja za nokukerikotamena pondjuwo ondjapuke moJerusalem. Omuengeli wa Jehova wa hinda Filipus ‘okukemuzuvarisira Ombuze Ombwa ya Jesus.’ Omurumendu Omuetiopi ngwi, wa raisa ongaro iṋe? Eye wa zuva nawa ouatjiri ounanḓengu mbwe rihonga, nu aa vanga okutjita imbi Jehova mbye undjira ko kOvakriste. Kunao, eye wa papitisiwa nokuhina okuwomba.

¹⁰ Otjihorera otjitjavari otjohi tjomurumendu Omujuda ngwaa tatumisa Ovakriste. Eye wa za motjiwaṋa tji tje riyamekere ku Mukuru. Posi yokutja Ovajuda va pandjarere oupanga wapeke mbu va ri na wo kuna Jehova. Omurumendu ngo wa ri nongamburiro yokutja Ovajuda ngunda aave karere Mukuru momuano omusemba. Kunao aa tatumisa Ovakriste. Posi yokutja eye we rihonga ohunga nomuano omusemba wokurikotamena ku Mukuru. Jesus Kristus ngwa pendurwa wa hungira kuna ye okuza keyuru.  Omurumendu ngwi wa raisa ongaro iṋe? Eye wa yakura ombatero okuza komuhongewa wena Ananias. Ombeibela i tja nai ohunga nomurumendu ngwi: “Saulus wa sekama na papitisiwa.” (Oviung. 9:17, 18; Gal. 1:14) Ove mape ya wa zemburuka kutja omurumendu Omujuda ngwi, eye ngwi kombunda ngwa katjiukwa otjomuapostele Paulus. Nungwari yandja ombango kokutja, indu Paulus tja tjiwa ouatjiri ohunga norupa Jesus ndwe na ro momayenenisiro wombango ya Mukuru, eye wa toorera ko omikambo. Eye wa papitisiwa nokuhina okuwomba.​—Lesa Oviungura 22:12-16.

11. (a) Otjikwaye tji tji hinga ovahongwa ndino okupapitisiwa? (b) Ku tu ṱuna vi momuinyo indu tji matu munu varwe tji mave papitisiwa?

¹¹ Ovahongwa vetu ndino wina ve ri mongaro otjingeyo, kutja ovanene poo ovaṱiṱi. Imba mbe nongamburiro nondangi kouatjiri mbu ve rihonga mOmbeibela, ve kara nonḓero yokuriyandja ku Jehova nokupapitisiwa. Ehungi rombapitisimo, irimwe romahungi omananḓengu tjinene pomaworonganeno worukondwa na inga owotukondwa. Ovahongonone va Jehova ve kara nondjoroka indu omuhongwa wOmbeibela tja yakura ouatjiri, na tja toora ondando yokupapitisiwa. Ovanene Ovakriste wina ve kara nondjoroka okumuna ovanatje vawo mokati kaimba mbu mave papitisiwa. Mombura yoviungura vyetu ndji 2017, ovandu vokombanda 284 000 “mba toororerwa omuinyo waaruhe,” va raisa omeriyandjerero wawo ku Jehova mokupapitisiwa. (Oviung. 13:48) Oukahu kutja, ovahongewa ovape mbo aave tjiwa nawa kutja, ombapitisimo otjiṋa tji tji undjirwa ko kOmukriste auhe. Nu hapo owo aave sokutjita vi ngunda ave hiya toora omukambo wokupapitisiwa?

12. Omuhongwa ma sokutoora omikambo viṋe ngunda e hiya papitisiwa?

¹² Ngunda omuhongwa e hiya papitisiwa, eye ma sokukara nongamburiro ndja zikamena kondjiviro ohunga na Mukuru, nondando ye, nondyero ya Mukuru yokueta ondjamo kovandu. (1 Tim. 2:3-6) Ongamburiro otja indjo i hinga omuhongwa okunakaura ongaro ndji i ha tjata ku Mukuru, nokuhupa otja komirari vya Jehova vyousemba. (Oviung. 3:19) Ihi otjiṋa otjinanḓengu, mena rokutja Jehova kanaa yakura omeriyandjerero womundu ngu kayenda komurungu okutjita oviṋa, mbi mavi tjiti kutja a ha kara norupa mOuhona wa Mukuru. (1 Kor. 6:9, 10) Posi yokutja pe noviṋa vyarwe wina mbi tu sokutjita. Imba mbu mave vanga okutjita imbi mbi ri ovisemba, wina ve yenda kozombongarero zombongo aruhe, nu aruhe ve kara norupa motjiungura tjokuzuvarisa ombuze ombwa ku varwe. Jesus wa tja otjiungura hi, matji kayendisiwa i ovahongewa ve vatjiri. (Oviung. 1:8) Omuhongwa ma sokutjita oviṋa avihe mbi rutenga. Okuzambo otji ma yenene okuriyandja ku Jehova mongumbiro, na papitisiwa.

13. Indu tji matu hongo varwe, ongwaye tji matu sokuzemburuka kutja owo mave sokupapitisiwa kutja ve rire Ovakriste vatjiri?

¹³ Indu tji matu vatere ovanatje vetu novahongwa vetu okutjita oviṋa ovinanḓengu mbi, matu sokuzemburuka kutja imba mbu mave vanga okurira ovahongewa va Jesus vatjiri, mave sokupapitisiwa. Tji twa tjiti nao, maku tu vatere okuhungira kuna wo momuano mbu mau ve vetere okutjita nao. Nu moruveze orusemba, kamaatu tira okuveraera ohunga nounanḓengu wokuriyandja ku Mukuru nokupapitisiwa. Eṱe matu vanga kutja ovanatje vetu novahongwa vetu ve kurise oupanga wawo kuna Jehova, ngatji mave vaza kombapitisimo!

14. Ongwaye tji tu ha sokuṋiṋikiza varwe okupapitisiwa?

¹⁴ Posi yokutja ape ningi omundu ngu ma ṋiṋikiza omuhongwa, poo omuatje we okupapitisiwa. Jehova ke tu ṋiṋikiza kutja tu mu karere. (1 Joh. 4:8) Nungwari tji matu hongo varwe, matu sokuvevatera kutja ve mune ounanḓengu wokukara noupanga wawo oveni kuna Mukuru. Nu omuhongwa tja utu okutjaterwa i ouatjiri  mbu me rihongo ohunga na Mukuru, na tji ma utu okuhara onḓero yokutjita avihe mbi undjirwa ko kOvakriste vatjiri, eye ma hara onḓero yokupapitisiwa.​—2 Kor. 5:14, 15.

15, 16. (a) Hapo pe notjiwondo tjorive tji tja tuwa po, omundu mu ma sokupapitisiwa? Kahurura. (b) Ongwaye omuhongwa tji ma sokupapitisiwa rukwao otjOmuhongonone wa Jehova, nandarire kutja wa papitisirwe rukuru mozokereka zarwe?

¹⁵ Kape notjiwondo tjorive tji tja tuwa po, omundu mu ma sokupapitisiwa. Ovandu va panguka, nu ovahongwa tjiva ve hakahana okukura pu varwe. Ovengi ve papitisiwa ngunda ave ri ovaṱiṱi, nu ve kayenda komurungu okukarera Jehova nouṱakame. Varwe ve rihonga ouatjiri wOmbeibela ngunda ave ri ovanene, nave papitisiwa. Nu tjiva nandarire ve papitisiwa notjiwondo tjokombanda yozombura 100!

¹⁶ Omuhongwa umwe ngwa ri omunene motjiwondo, wa pura ku ingwi ngwee mu hongo Ombeibela kutja, hapo ohepero ku ye okupapitisiwa rukwao. Orondu eye wa ri a papitisiwa rukuru mozokereka zarwe. Nu ingwi ngwee mu hongo Ombeibela, we mu raisira omatjangwa mOmbeibela nga zira epuriro re ndo. Omuhongwa ngwi nai wa uta okumuna momatjangwa ngo, kutja ombapitisimo otjiṋa tji tji undjirwa ko, nu arire tja papitisiwa. Nandarire kutja wa ri nozombura 70 notjihupe, eye aa munu kutja ohepero okupapitisiwa. Jehova u yakura ombapitisimo yetu indu tji matu tjiwa ouatjiri ohunga nombango ye. Kunao, nandarire kutja twa papitisirwe rukuru mozokereka zarwe, eṱe matu sokupapitisiwa rukwao otjOvahongonone va Jehova.​—Lesa Oviungura 19:3-5.

17. Otjikwaye omundu tji ma sokuripurira ko meyuva ndi ma papitisiwa?

¹⁷ Eyuva rombapitisimo, tjiri eyuva rondjoroka yatjiri. Nu wina oruveze rwokuripurira ko oukotoko kutja omeriyandjerero woye nombapitisimo, vi kamburira mo tjike. Ku hepa ozongondjero, okutjita atjihe tji tji undjirwa ko kOmukriste watjiri. Jesus opa zokusasaneka okurira omuhongewa we ku nomutenge. Ovahongewa va Jesus ‘ave ngara ve nomuinyo mu wo oveni, nungwari nga rire ingwi ngwa ṱira wo nu ngwa pendurirwa wo.’​—2 Kor. 5:15; Mat. 16:24.

18. Morupa ndu maru kongorere ko matu katara komapuriro yeṋe?

¹⁸ Otja tji twe rihongo morupa ndwi, okutoora omukambo wokurira Omukriste watjiri katjiṋa tjomanyando. Ina ya Maria opa zokupura omapuriro nga tamunwa pomautiro worupa ndwi. Tji u ri omunene, mape ya wa rora okuripura omapuriro otja inga: ‘Omuatje wandje tjiri wa yenene okupapitisiwa? Hapo eye u nondjiviro ndja yenene ohunga na Jehova, kutja me riyandje ku ye? Nu hapo ma sokumuna omahongero noviungura ovisemba rutenga amaa papitisiwa? Hapo me tjiti vi indu omuatje wandje tja tjiti ouvi ounene kombunda yokupapitisiwa?’ Morupa ndu maru kongorere ko, matu katara komapuriro ngo, nokurihonga kutja ovanene Ovakriste mave yenene vi okukara noumune ouwa ohunga nombapitisimo.